翻睇, 翻玩, 翻做, 翻....

最近"翻"左唔少野。
最近除左聽歌係聽新歌之外, 做好多野都係"翻"舊的。

翻睇唔少漫畫: 幽白, 劍心, 入樽, I"s等等, 非常好睇, 即使以前睇過幾多次, 再睇返都係覺得好好睇, 唔會悶呢。I"s果種青澀o既學生戀愛, 未拍過拖的初戀, 不安而緊張o既心情完全描寫到出來, 好正呢~~不過如果第一次睇時係一個已經成熟左、拍過拖o既人, 感覺可能就低好多了。入樽亦非常緊湊, 又有好多笑位, 係當年其中一個好大原因令我鐘意打波呢~ 幽白就唔使講啦, 個作者諗"橋"真係好叻, 劇情、戰鬥都好多樣化, 唔係單一以力量分勝負, 而且好多位的氣氛都做得好好, d人真係有咁型得咁型, 有咁cool得咁cool, 極之好睇呀~~ 戶愚呂弟實在營造得好好, 感覺真係好強! 暗黑武術大會開始畫功亦愈來愈靚, 漸漸成熟, 翻睇時仍然有好多驚喜~~ 太正了~~

打機打返Diablo2, 出左咁多年仍然係覺得好好玩, 都係用慣近身戰ｏ既人, 用起來爽好多呢~~另外, 亦用模擬器玩返好多舊game, 其實好多舊game雖然畫面無咁靚, 但係遊戲性同諗頭好過好多而家o既game呢~一堆動作遊戲King of Dragons, Knight of the Round, Final Fight...etc都好好玩, 人物造型, 遊戲編排, 甚至音樂等等都好好, 而家好多game都太注重聲光效果...好少出到好好玩ｏ既game了...(當然有, 不過無以前咁百花齊放了)。

太多野翻做過了, 講唔晒, 差ｄ又想講歌都係舊o既好聽(呢樣其實又唔係, 而家都有唔少好聽o既歌, 只不過係d人唱得差罷了)。最近有時上網或者youtube搵到好多歌聽, 尤其係d歌手唱Live的version。之前post過一d舊歌手的version, 相信有睇過o既都唔會覺得差掛?當中亦有睇過好多而家歌手o既啦, 真係差好多...完全係慘不忍睹...基本上連標榜"實力"o既歌手, 都唔係個個得...唉...同好多人或者而家的年輕人傾過"歌"o既野, 最令人覺得唔高興o既係佢地連咩係"好"都唔識...如果對方擺明話係鐘意靚仔靚女都算啦, 但係無理由覺得係唱得"好"o既...連聽時d聲CD係執到呀媽都唔認得都唔知...

唔覺唔覺又呻左一堆呢d野, 講返"翻"o既問題啦~~有好多人都好念舊, 好鐘意睇返、諗返、做返以前o既事物; 當然, 以前o既野係好, 唔好都唔會留到而家, 而且間唔時溫故知新亦係好事, 不過亦唔係樣樣"翻"都係好野來的, 好似做spalling repair做得唔好要翻打啦, 對朋友翻舊帳啦, 明明分左手都想翻"啅"啦...等等

愈講愈離題, 其實寫野時最主要係想講幽遊白書好好睇而已...哈哈, 無無聊聊愈打愈多。

完