神鵰俠侶電視版

事先聲明, 呢篇野係個人觀感, 而且預左同大眾為敵, 但係希望大家睇晒去, 有d咩講得唔o岩就插我, 唔好等我自己錯落去。

唔講本身套小說。2個月前寫左幾千字都未寫完o既金庸返讀再返讀報告, 有機會出先至慢慢討論套野啦。呢篇野個主旨係想講“電視版”。

由於本身個“故事”既出名又好睇, 所以電視版會好睇都唔出奇。但係呢樣野只不過係本身個劇本好, 同果班製作電視o既人無關係。所以係度講o既, 係有關電視製作出來o既效果。

講真, 我一向覺得好多大陸o既導演係“差”。我一向對內地o既野係完全無成見, 所以並唔係話一聽到係“大陸野”就罵o既人。但係, 係拍攝呢一方面, 真係差。

睇好多內地o既劇集同電影, 大家會發現分開左2個時期, 而現在仍然有2個時期o既產物。第一個時期, 同埋都今時今日o既內地片都仍然有好多都有o既野, 就係完全無“拍攝手法”。我係以前講電影時都講過, 導演要係一個好o既story teller, 拍攝手法好重要。無奈, 有好多內地導演拍o既戲, 就好似拍新聞片段甘 (呢個形容係呀Mak講的, 好貼切)。分鏡, 拿角度, 剪接…好多野都好唔掂, 成日都係靠個劇本好, 同埋故事入面帶出來o既信息好, 就好似大晒。係, 內地好多戲o既內容, 意念都好好(好過港產多多聲), 但係唔係內容大晒咯。總之簡單來講, 就係睇新聞片, 或者自己睇書好過。

第2個時期, 係呢幾年開始見到o既, 就係好多戲o既拍攝手法都“張藝謀化”。呢d作品, 你會經常經常見到好美好美o既畫面, 好美好美o既動作, 好美好美o既人物…等等, 但係好可惜, 太過著重畫面同美感, 無晒其他野。再講多次, 導演係story teller, 講故事o既人, 一個好o既講故事o既人, 唔係剩係形容到d野好仔細, 好美麗, 而係要令到聽故事o既人要: 1. 清楚明白個故事內容 2. 令人覺得精彩/緊湊…etc, 總之就係要扣人心弦。再無奈, 呢d導演無呢個能力。即使佢拍到畫面幾甘靚, 幾甘夢幻, 係一個shot度停幾耐, 係成套片是但take一個shot都可以做wallpaper甘靚都好; 空洞就係空洞, 唔好睇就係唔好睇, 悶就係悶。

講完內地導演, 係時候講下套神鵰俠侶電視版。

讚左呢套野要讚o既野先。
呢套野拍得好靚, 真係好靚。有某d人物亦好o岩角色, 亦做得好好。除此之外, 我未諗到有咩要讚。讚下人物, 小龍女呢個角色無咩好讚或彈, 因為原著入面跟本就係一個木口木面o既角色, 係某一d位稍為表露自己情感, 但係都無大喜大悲, 所以唔太需要演技, 只要個演員靚同個氣質似就得。劉亦菲靚唔靚見仁見智, 氣質叫係OK似, 所以演技方面無咩好讚(唔係話佢無演技, 而係呢個角色無得比佢發揮), 但係亦都無咩好彈。郭芙, 劇中可以做到好無腦又好乞人憎又有幾分姿色, 算係唔錯。郭襄佻皮可愛, 李莫愁冷艷奸惡, 都係做得好o既角色。
讚完。

要彈。
呢套野, 中左好多頭先我講o既問題。大家唔好唔同意我住。再講多次, 好睇係因為本身個故事好, 同埋名頭大, 大家會覺得好睇, 但係以電視劇論, 的而且確係一套大制作, 但係由於係大制作, 使左甘多錢, 更加要罵!!

呢套野係拍得好靚, 但係分鏡同角度分得好刻意同埋好“台灣”feel。台灣好多偶像劇近年都拍得十分“懶型”, 但係比我o既感覺係好娘, 好唔得。神鵰無台灣果d咁差, 但係都係太刻意了。係營造氣氛分面, 由於分鏡o既唔好, 再加上係好多“懶靚”o既畫面停留太長, 所以氣氛都唔好。劇情明明好緊張, 但係都唔能夠令人覺得緊湊投入, 極差o既story teller。

導演差, 已經係死罪。武指差, 係武俠片來講, 更加係接受唔到。到左今時今日, 居然仲有戲劇入面o既打鬥, 仲係2個人係飛係空中, 4隻手亂甘”fing”, 四圍係度爆炸, 只係靠爆破同電腦特技, 極唔掂。係, 入面係有d人一招一式甘打, 但係通常都係cheap仔先係甘打, 勁果d大俠就個個都係用“氣”, 係甘意“發”一野就震開晒d卒仔。個人認為, 呢d打, 唔睇罷就。至於用特技果d場面, 都係果句, 靚咯。

演員。有好多都好唔錯。選角, 都有d幾好。但係都有一堆係差o既。
我唔講有一堆女角唔夠靚, 靚唔靚又係見仁見智, 唔講了。講演同講氣質。
唔講果d即係我無留意到或者無意見)

楊過。第一眼睇到佢, 就覺得佢係好適合做最後時期o既楊過。係靚仔又幾型, 而且眉宇之間自然都會有些少皺起, 頗有滄桑之感。但係做後生時, 完全唔得。明明個樣超成熟, 但係扮活潑可愛, 好噁心, 好造作o既演技。佻皮? 完全做唔到。
黃蓉。太師奶了。人地係書入面雖然生過, 但係容色不減。而且個演員完全做唔到黃蓉o既“機智奸狡”o既感覺(黃蓉的確係奸狡的! 不過無做壞事而已)。
一燈。雖然唔係咩主要角色, 但係係其中一個極反感要罵的(唔係罵個角色, 係個演員)。明明係一個得道高僧, 極度慈祥得來又有皇者氣派, 但係個演員做o既時候, 講野時居然對眼係轉來轉去條眉又成日上揚又郁郁下! 好似好多野諗又好奸甘, 唔係心如止水恬靜無為, 極極極唔得, 完全不可接受! 唔好以為剃左光頭加大片白鬚就唔使做啦!
歐陽鋒, 做到好似傻傻地, 反而覺得似周伯通, 但係一d都唔“癡線”, 唔狂, 差。
周伯通, 太造作, 唔得。
黃藥師, 成個蛋散甘, 完全唔起眼; 當年無線o既綠葉演員駱應鈞都做得好過佢。
仲有好多, 不過開始唔想再講。

最後, 想講下睇左大結局果集o既感想。
我無全集坐定睇, 不過睇到3個“廣告”係入面。
第一個, 係楊過跳落絕情谷時, 終於見返小龍女, 好開心, 2個人係度飄來飄去, 某朋友話似拍緊飄柔廣告…
第二個, 小龍女講返呢十六點過, 同埋點解會好返; 佢話自己開始養玉蜂, 食d蜂蜜, 食左十六年, 慢慢好左。令我諗起某蜂膠廣告; 以下係我自己杜撰o既廣告台詞: 絕情蜂膠, 滋補養顏, 你睇我到左三四十歲都仲係少女甘o既樣, 點解? (單手拿起產品, 牌子名向外), 因為我食絕情蜂膠, 我食左十六年啦! =.=
第三個, 最後一幕, 隻鵰明明唔識飛, 居然會飛, 算。最後畫面影住好大一輪明月, 見2位主角身影飛左上天…慢慢完…大家係咪諗起由細到大睇月餅廣告o既嫦娥奔月? 不過多左個吳剛係隔離甘解。

說左好多, 這片子雖然不是真的那麼差, 不過, 離好看, 畢竟還有很遠的路呀..............絕對係差過佢應該做到o既效果, 係咁多。

完