1。先講下每年例牌。今年睇得唔多電影：誤判、工作細胞、美隊4、哪吒、風林火山，印象好似得咁多？好少...
2。上年NBA雷霆champ，真心無感。今年繼續對NBA興趣減弱，雖然都仲會留意下嘅。
3。今年砌少好多模型...
4。跟時序講下發生嘅事。年頭睇咗陳慧嫻concert，真係好開心。圓咗個兒時夢。
5。4月終於第一次同B坐飛機去旅行(台灣]。雖然去果程機有d意外，其餘整個旅程都ok嘅。
6。5月終於搞個反甲。反甲由上年開始，周時會痛，今年發炎真心痛，所以的起心肝搞咗去。點知手術後康復進度麻麻，結果搞咗差不多成個月...果段日子真係好噁心。
7。6月阿B小學放榜，好彩(?)入到第一志願，雖然係唔錯嘅學校，不過間嘢係谷嘅傳統d嘅學校。伴隨嘅9月開學各種適應、默書、測驗、考試同全家崩潰嘅溫書。
8。6月都開啟咗我網購之門。不過我都無瘋狂嘅。
9。今個夏天再比阿B學游水。自從早幾年學識單車，隔一年學識直排輪，今年到而家學到游水三式了。之後要試下比佢學跳舞？
10。9月突發腎石入院，痛到痴線。(其實一早)要注意下生活習慣了。
11。10月大事，係阿B事隔2年又高燒抽搐白車入院。真係嚇到我...仲好記得之後有一朝返工前係餐廳食早餐嘅流淚。
12。11月阿哥係英國返來2個禮拜。好開心。另外，做咗全面d嘅body check，呢個年紀真係要檢查下好d。
13。結婚10年。
14。今年其中一個好大嘅achievement應該係同事發掘咗個骨醫。可以claim公司bupa，瘋狂去睇睇到個腰好唔少，去到可以訓酒店淋嘅床之後起身條腰唔冤。之後打波抱B On ＆ Off都有d反覆，但總體都好過之前好多年。
15。N年無打手機game，今年開咗隻新嘅Gundam game。呢隻好在唔使花好多時間都可以。而我係無課來講，都過到大部份嘅嘢，算係咁。
16。大埔大火。雖然係社會新聞唔係個人大事，不過真係好shocked。仲有今年都走咗好多知名人士。
17。今年感覺自己各樣都麻麻。健康唔好，情緒唔好，同朋友之間好似都無咁好？托賴屋企人長老們暫時尚算ok。希望下年所有嘢都會更好。
0 意見:
張貼留言