天真/純真

好耐以前都好似有講過, 純真同白痴只係一線之差。白痴係真係咩都唔識, 未見過世面, 唔知人間醜惡噶一面, 一心仲係生活係童話噶世界入面。小朋友純真加天真, 因為佢地仲細個, 唔識唔緊要, 但係年紀大左都仲係天真, 就可以叫係白痴。係咁現實噶世界, 白痴係好難生活到噶。不過, 如果可以正面開心咁做到白痴, 無人理到佢, 亦都可能係一件好事, 起碼真係覺得開心先呀。

年紀大, 經歷多左, 一定唔可以天真(因為天真好難生活), 但係卻仍然可以純真(當然, 好難做到)。人絕對係可以出污泥而不染的, 亦可以知道世途險惡, 而仍然保持住赤子之心噶。有經歷、有過去, 可以識得分辨是非, 可以避免自己踩到人地噶陷阱, 但係都仍然可以堅持住"真善美"。係工作中社會裡不論點樣生存, 但係對自己噶家人、朋友、愛人仍然可以純真如舊, 無抵觸。

其實有少少牽涉到之前講噶"快樂"噶問題上。之前講過, 精神層面噶快樂同實質得到多少噶野係唔同, 有d人會好唔認同精神層面噶野, 即使一個人無晒手腳但係活得開心積極, 都會有好多人覺得咁係bad-end。同一道理, 有人覺得天真噶白痴係傻噶低能噶, 但係如果佢地活係自己噶世界入面, 唔覺得有咩唔妥, 係咪都係一件開心噶事呢?

又再牽涉多少少以前講過噶野, "只要唔會對其他人有壞影響, 自己開心就OK了"。其實呢個係最基本噶生活層面。當然我無意去影響人地噶人生觀, 或者否定任何人噶諗法, 不過我覺得, 要世界和平, 想大家開心, 自然應該每人行多一步。虛假、欺騙...好多好多噶負面野, 會令人愈來愈唔開心, 亦只會令個世界愈來愈爛, 因為人地做自己唔做, 最後會蝕底噶係自己。

但係如果大家向前行一步, 會唔會係一件好事呢? 當然啦, 唔止虛假呢d咁少噶野, 其實而家成個世界好多好多野都已經繃緊左, 好多野只會愈來愈極端, 要大家一齊唔玩爛、停落來, 就好似金庸係小說入面講咁樣, 兩個高手比拼緊內力, 已經係勢成水火, 好難同一時間停落來, 是但一邊都信唔過對方, 唔會有一方肯先停或者慢慢減弱噶。而家噶社會都一樣, 太多人先玩爛, 愈來愈多人跟風, 已經係一塌糊塗。不過, 總有人要先蝕底, 先行呢一步的(事實証明, 雖然唔efficient, 但係的確有好多肯蝕底噶人, 會慢慢改變到其他人, 改變到個情況), 如果唔係再咁樣落去, 情況只會愈來愈差。咁呢D人究竟係叫天真定純真呢?

Anyway, 事先申報, 我唔係純真噶人, 亦唔想係天真噶人, 我只係一個鍾意吹水噶普通人罷了。

完

p.s. 不得不讚下呀Gill, 佢話自己天真唔係純真, 畢竟無用錯詞語。

十一月六日 -- 雜記

31/10(一) -- 放假一天; 同呀哥出去拿衫拿野搬野足一個下午, 夜晚返來又要買野補野執野貼野, 仲有好多親戚朋友來左又要接待下吹水, 結果係攪到好繁忙兼好夜先得有訓。

1/11(二) -- 呀哥大婚之日; 一早起身到完成都好順利, 天氣又好, 基本上都無咩好特別講。夜晚12點幾返到來, 過爸媽果邊訓, 等到姨丈姨媽呀爸呀媽2個表弟連其中一個表弟噶一個女友都沖晒涼之後, 2點幾終於到我; 差唔多3點訓, 好彩有廳噶sofa, 唔使係地下, 第二日一早佢地出晒來吹水, 照恰下最後都係9點島起身。

1. 第一次做伴郎, 真係好~~~~忙; 因為所有人等一有D咩唔知要攪比錢應酬...etc全部都話搵伴郎, 其實好多野我都係唔知的; 好彩自己不嬲真係要做時都ok攪得掂, 最後完滿解決; 當日見到好~~~多好耐無見, 但細個就見過同識噶呀爸呀媽/朋友同鄉, 仲有好多我自己識噶朋友(從唔同地方來噶都有), 勁打招呼傾偈通場走; 另外一直都覺得"呀哥結婚"無咩真實感, 又唔會話好感動, 只係覺得終於都到你, 萬眾期待, 到左簽字正式註左冊, 新人講野都係無咩感覺, 係睇片果時, 播埋佢求婚果度同埋終於禮成晒kiss埋之後, 真係好感動, 眼眶都熱左啦~~ Anyway好開心終於都攪掂晒呢。注: 比以後噶新人參考, 伴郎伴都係唔好搵親生兄弟啦, 搵個fnd做好d, 親生兄弟做兄弟就好啦, 因為要同好多親戚長輩打交道, 再兼顧埋其他所有場務係有d困難的。P.S. 間野D野幾好食~~

2/11(三) -- 放假一天; 續上: 9點起身預左比d長輩"哦"(之前果晚都"哦"左), 到12點幾出去同呀哥呀嫂佢地去返晒星期一去果d地方, 拿D衫呀立雜野去還, 同埋燒豬回門, 好累, 返到屋企6點幾即時昏迷左2個鐘, 8點幾起身發現咩都未攪, 頭又暈, 救命。要搬去爸媽果邊住噶野一D都未執: 日常用品+少少衫褲+少少立雜野一個背囊島, 最緊要係部電腦, 個床肉都係唔好搬過去了。時間超趕又好累...

2. 5日假期, 諗住點都有時間去睇場戲, 點知最後一場都無睇到, 睇來實有d戲會miss左了...real steel、奪命金、In time、那些年...

3/11(四) -- 收工返企食飯。

3. "陽光神彩~露朝氣~ 迎來更大的~沖廁~" 呢首經典廣告歌今早在腦中迴響...張床好似木板咁堅硬, 真係好難頂。

4/11(五) -- 早一晚臨時約左, 收工過荃灣同Taylor、小暈、呀So打邊邊; 到差唔多11點走; 雖然唔係識左好耐噶fnd, 不過幾個人打邊爐吹下水都好輕鬆同舒服, 係一個relax噶Friday晚上。

4. 自己又"M到", 心情麻麻 =_=

5. 原來我真係好容易開心的, 好簡單就可以令我開心。

6. 睇左本出左N耐噶書, 帶銀公主噶"50樣女生想讓男生知道的心事"; 都幾持平咁講左男女係某D野噶睇法, 我覺得好多身邊噶親友都應該睇下呢, 尤其係男仔! (不過女仔都好應該睇同知); 原來自己都"知"同"識做"好多呢(但係究竟而家仲會唔會做?); 另外, 所謂女生想讓男生想知道噶事, 其實我都有一部份係好似女生咁, 有果D感覺同想法...

7. 呀源打來報料話出左Hunter X Hunter Guidebook, 去到睇原來係台版出左, HK版唔知會唔會出, 有理無理買左先!

8. 搬過果邊, 諸事不順; 張床好似木板咁堅硬, 勁訓唔慣; 無搬電腦過去, 無電腦用, 都OK噶, 我不嬲都話我係有咩用咩, 無咩就算噶人, 不過始終有會好d; 夜晚出來見到好多小強, 不過好彩唔係大強...; 沖涼用來"long"花灑支野斷左, 趺落來我隻腳度, 好痛, 又無得long住支花灑(不嬲我都唔渣住支花灑沖的); 總之好多野...希望果邊快d裝修完可以返去~~

5/11(六) -- 志蓮淨苑wv Barry & Co, 之前有人話係約實左, 原來到最後5個人有2個人來唔到, cancel左; 早上起身自己去睇左場早場, 好耐無睇戲啦! 睇左Tower Heist, Ben Stiller做主角, 仲有Eddie Murphy, 本來幾期待Eddie Murphy, 不過成套戲包括佢都係不過不失, OK啦; 下午本來想去長洲, 不過有機會過返屋企果邊, 就選擇左返來上下網, upload下相, 同埋臨時地美麗搵我一齊睇"那些年"; 好多朋友都已經睇左, 又唔太想自己睇, 好彩都有人一齊睇呢~ 下午5點島出去康怡睇, 之後同佢去左北角"小辣椒"食飯, 順便預祝佢生日。雖然稍嫌少少少少唔夠辣, 但係都好味道, 好耐無試過唔使就住人咁食辣啦。

9. "那些年"噶感想, 請睇blog噶另一篇文"那些年後感", 當然會寫多過FB版。

6/11(日) -- 一早起身過七座hea下打下野post下相, 之後同呀嫂同佢細佬一齊去久違噶長洲。主要係去行D未行過噶地方探下路, 以前鐘意去噶地方都無去到, 亦都無咩心機影好多相。仲有主要同佢地食下野, 想食噶野幾乎都食左呢。行完食完五點半就走了。

9. 下星期呀馬返來, 期待!

來緊:

7/11(一) -- Jenny來HK
10/11(四) -- dine wv Nat & Co., may be cancelled
12/11(六) -- 暫定BBQ wv colleagues, 仍然無確實消息
13/11(日) -- 呀馬返HK, 早上打波下午同佢聚!
15/11(二) -- 毛毛球wv Barry etc
19/11(六) -- 同Lands舊同事去Gordon家
20/11(日) -- K wv Cass etc
26/11(六) -- Out wv Barry etc

完

"那些年"後感

太多人睇、太多人講呢套戲, 所以我都講下自己噶感覺。我估大部份要睇噶人都睇左, 所以都唔怕係度嚴重劇透。

首先講左個人對套戲噶主觀感覺(即係結論)先: 我個人係覺得幾好睇的。不過呢個只係主觀感覺, 以下先以戲論戲。

首先, 香港人好多都只係睇大製作、多特技噶片, 一係就係比人狂谷狂煲噶片, 有幾多人會成日走去睇愛情小品? 身邊噶朋友係有, 不過真係十個有八個唔會咯。睇多少少戲, 就會覺得呢套同果d荷里活B級校園青春愛情片差唔多格局, 劇情、拍攝、各方面都好普通。
台灣點解會爆紅? 因為係本土野, 人地本身唔多拍得好噶呢d片+九把刀噶名氣(當然都有實力, 以佢第一次導演來講好叻架啦). 所以呢套戲人地本地就好爆啦。
咁點解香港又會爆? 老實講, 本地噶愛情小品十套有七、八套係唔掂噶(係, 我係講緊葉念琛果d垃圾), 加上香港人又少睇開小品戲, 再加上香港人係好~~~~易比人煲+好~~~~~媚外, 所以入到去睇一套唔錯噶片都會話好好睇咯。同當年噶"情書"、"真的戀愛了"、甚至"心動"...等等噶戲係無得比的, 以戲來講, 絕對稱唔上係經典。

講返套戲。
電影編劇(故事重點同原著其實有一定差距)、導演算係唔錯啦, "講故事手法"以刀大寫開小說噶人來講, 應該都唔算好難到佢(雖然有好幾個位個人覺得可以做得好d, 有d位可以拖長少少, 有d位可以加返快d, 令到個高潮位唔好有"跌"噶感覺), 不過個鋪排比起海角七號算係明快好多啦。
每套戲都會有個觀點, 呢套好明顯係從男仔角度去睇成件事, 係比較屬於男人噶愛情故事, 所以有女仔fnd覺得唔好睇(網上亦有好多人覺得無共鳴)。
演員? 講真佢地有幾需要交到戲呢?一班後生仔做返佢地早幾年噶野(除左女主角年紀大d之外)而已啦。不過不得不讚下選角, 一班演員新面孔有新鮮感, 如果搵已經當紅噶演員可能反而無清新噶feel, 女主角就唔使多講啦, 個樣幾靚又夠清純, 即時贏晒。最估唔到係搵左彎彎真人演出, 哈哈。

有好多人都話, 戲入面好多野"中"左好多人噶"集體回憶"。
話說自己中學時期讀齋校, 並無果d校園青澀戀愛噶集體回憶。不過扯旗、睇AV、打手槍、玩粉擦、射橡筋、Happy Corner、龍珠、井上雄彥、駁老師咀、帶動同學集體反抗老師、罰企、會考後要同死黨分道揚鑣、排排坐講理想講志願...等等相信好多人都會有。成班死黨坐係球場看台一齊見到班花經過, 一齊鍾意班花、各施其技追女仔或者你未試過, 但男仔為女仔發奮、唔想心儀既人差過自己、唔想自己差過心儀既人、唔敢表白玩暗戀、唔敢拖手玩純愛、情人唔係戀人、鍾意果個唔係結婚果個、做唔到戀人做到好朋友、以上情節你同我或多或少經歷過。有回憶，所以有共鳴；有共鳴，自然有感受。

套戲講噶係八十前噶愛情故事, 估計對於而家30歲或以上既中男中女係入晒。加上套戲噶設定係普通場學生, 唔係尖子、唔係校隊、唔係有錢仔、又唔係古惑仔, 好平凡、好大眾; 情節亦好平淡, 冇強姦、冇絕症、冇生離死別、冇催淚、冇誇張、冇超現實情節, 夠真實，所以易投入；易投入，自然就好易有感染力。

最緊要噶係, 套戲強調既係「那些年，你錯過了什麼？」, 遺憾人人都有，年長既更加多，更加感同身受。

無論大家欣唔欣賞都好, 戲入面有好多樂而不淫噶笑位, 而戲中笑位都好密集(當然大家笑點有高有低, 但總算係由頭輕鬆可笑到落尾), 本來係一套講"遺憾", 講"回憶", 好似好沉重噶戲, 但係相信大家睇果時都係笑多過淚。
講起笑同淚, 呢套戲雖然大部份位都係笑位, 但係相信好多人最深刻印象、甚至有好多人拍手噶位就係最後一幕噶神來之筆。不過誠如一位朋友所講, 全場笑得最勁噶位, 亦係最令我喊噶位, 果一刻完全明白男主角噶心理感受, 真係笑中有淚，淚中又有笑; 加上穿插左回憶、平行時空之中噶佢地、同埋現實三方面噶片段(仲有不得不讚下, 好唔錯噶主題曲), 真係深深感受到"那些年噶遺憾"。

香港人睇, 一定唔會好似台灣人感受咁多咁深, 始終係人地本土野, 我地無試過地震、沒天燈、好多野都無, 但係相信大家都曾經有"愛", "純愛"。睇返香港某d導演噶"愛情"戲, 次次都係爾虞我詐、出賣、偷食, 仲要將呢d扭曲左噶愛情觀正當化, 一係就sell波sell蘿sell青春少艾噶肉體, 而家呢套sell"純愛"係咪更加有價值, 更加值得支持呢?

對於我來講, 由於自己不嬲都鍾意睇小品戲, 加上對呢D野噶感受比較深, 所以其實都幾喜歡呢套戲噶; 同埋當然亦都會諗起有關自己噶野啦~~ 另外, 相信我係我識噶人當中, 係最有可能好似個男主角咁, 最尾做埋d咁癲噶野噶人啦, 哇哈哈。不過, 果一幕、果一下, 真係好感動到我。

完

p.s. 太多太雜亂噶感想同感覺, 寫唔晒出來, 純粹亂咁發表下意見而已。不喜勿插。
p.s.2 講真, 真係唔多想同唔想噶人一齊睇咯~ 好彩無姐。
p.s.3 我唔要做柯騰。