十一月十七日 -- 破地獄

11/11(一) -- 出site火炭收工返去夜晚C煮。

12/11(二) -- 出site收工返去夜晚C煮。

13/11(三) -- 出site收工返去寶林拿體檢報告，夜晚C煮。

1。除左一早估到血糖會升左之外，其他本來高高地嘅指數竟然全部有跌(雖然都仲係少少偏高)，估唔到。

2。夜晚11點幾掛8號波。

14/11(四) -- 朝早10點4落波，為左唔同人逼，差不多10點半就返到公司。收工上九座食飯，呀媽拎左大閘蟹同羊腩返來，C再買左雞。

3。逢星期四公司羽毛球班又因為場地問題延去星期一。

15/11(五) -- 放假一天，B上午做assessment (9-13攪左4個鐘)，確定有專注力不足+過度活躍症。之後係觀塘"新乜乜"(好耐無去)食晏，再過SSP行特賣城同玩具街，買左少少聖誕Deco。搭地鐵返TKO，食到荳子最尾時間嘅tea之後返企。

4。呀B夜晚起風癩，成晚都訓唔好。

16/11(六) -- 朝早我湊B去坑口上堂，今日第一堂Ukulele，skip左最後一堂工聯會綜合美術，之後佢上埋粉彩。早少少捉佢落堂，返去睇醫生之後去食蕃茄十八，返企沖涼。佢明明好攰唔訓，C就訓左。我同佢溫少少書同比佢睇打機，夜晚叫外賣。

17/11(日) -- 是日無波打。C同B同C親戚去海洋公園。我同Derek睇早場"破地獄"。睇完一齊食點壽司之後散。返企沖涼抖一陣，夜晚中同食飯(合時小廚私房菜)，呀澤係日本返來。10點先散再同呀澤行返北角先搭地鐵。

來緊:

逢星期四公司羽毛球班

23/11(六) -- 公司Disney

29/11(五) -- B學校放假，我都請假一天

30/11(六) -- RitaEdf聚

完

破。地獄 觀後感

網上太多人講，所以重複嘅就唔多講了。先總結，係好睇嘅。至於神唔神呢，我就覺得未係神級。

話說在頭，每次有戲上我都好鍾意上網睇影評(都算睇得多，專頁嘅論壇嘅乜都睇)，大概都會get到邊類人邊類睇法。我知電影好唔好睇真係好主觀，而且人人都唔同切入點同埋唔同角度，尤其唔同身份對於戲入面嘅人物事件更加會有唔同體會，所以真係無得話反對別人嘅睇法。不過網上真係有好多立場撚/獨醒撚/為反而反撚/逢紅就踩立場獨特撚...呢d我就唔多講了，亦都無謂反駁。最無聊係一d連個expectation都唔啱嘅人話唔好睇，果d真係得啖笑。

講返套戲。個人覺得，個故事其實唔算太特別，基本上都係standard，咩人物出場都估到功用係乜。認同網上有人話想講嘅野太多，所以每一段都有少少短，講得唔夠，渲染嘅力度都未太夠，不過我覺得都OK，如果要cut，倒不如出個加長版。只可以話電影時間影響左想講嘅野。

電影嘅一大gimmick係殯儀，其實始終佢都唔係真係涉獵我好深入，更加唔係紀錄片。睇電影對於講任何行業，始終一定會"浪漫化"，"浪漫化"係包括美化醜化同"以意加減，真係好正常。因為要帶出戲劇效果，因為要比唔識嘅人某種認知，所以一定唔會係原原本本的。所以我自己就唔介意。而呢套戲都係用"殯儀業"為題，實質要帶出嘅係家庭、親情、關係，仲有人生、放下同埋釋懷。

我覺得編劇同鋪排算係唔錯，有人話2個主角角色心態轉變太快，我就認為唔係真係一單兩單case就轉變嘅，中間都有經過唔少時間，只不過電影唔會花費咁多編幅去交代姐。攝影、畫面同音樂音效就幾正。百年來，電影故事大部份始終走唔出框框，點講故事就好講技巧了。自己唔係讀電影，唔識評論任何技法，不過覺得呢部算係咁了(但講真未到神級，而家票房大賣我覺得係因為演員加成)。至於喊，我一向睇電影甚至動畫都係好易喊果類，極度眼淺，但呢套我又無喊喎(都有幾幕眼濕濕嘅)，可能佢想帶出嘅道理我本來就已經知道同諗到。

最要激讚嘅，就係演員。個陣容其實好勁。

黃子華來講，講真我又從來唔覺得佢演技特別好，佢最成功係棟篤笑同埋佢嘅形象，而佢好睇大賣嘅戲，係角色似佢啱佢多過佢做得特別好。不過又咁，要諗第個演員去做返個角色，又真係諗唔到邊個啱過佢。That's what I mean。

許冠文就真係好勁。佢個角色其實唔係就咁做個乞人憎廢老就OK，真係有唔同情緒係入面。朱康其實唔少戲份，網上d人話佢同衛詩雅被過譽，我就唔覺得佢地經常木口木面無表情一兩下爆發就係好定壞，而係覺得，係佢地有份嘅情景，佢地嘅行為心態表現得好自然，咁已經好足夠。金燕玲今次戲份無乜機會表現。最勁嘅始終係老戲骨秦沛，只係簡單2幕，d戲出晒來，好癲。

唔多識講d乜，無乜組織，諗到乜寫乜，可能有d亂。

總的來講我覺得係好睇值得一睇的。

完