桃姐大追捕春嬌

以下乃個人觀感, 對3套戲極度主觀o既評論, 有興趣可以參考下, 不喜勿插。另外, 文中內容嚴重劇透, 如果大家想去睇o既, 就最好唔好睇住啦。

前言

話說在頭既, 港片真係唔係差, 而小本製作亦唔一定差得過大製作。如果人人都要Hollywood大製作先入戲院睇, 要睇好多budget都放左係d聲光特技效果但係劇情演技欠奉o既戲, 咁電影業就真係會愈來愈差; 好o既電影, 就要入場睇!

"桃姐"

首先要講下桃姐。

唔理大家細個有無睇過華Dee同Deanie姐合作過o既戲都好, 佢地2個配埋真係絕配。有時d野真係唔係只係劇情演技咁簡單, 單單就"說服力", 佢2個角色搵過第二pair人都做唔到呢個效果, 佢地演呢d母子主僕o既情懷已經上晒腦入晒屋, 所以真係特別有說服力同感染力。

Deanie姐雖然都唔後生六十有幾, 但係佢個人o既狀態都仲保養得好好, 係戲中佢卻係演活左一個七十幾歲o既人, 由健康演到老態龍鐘, 到病到死, 超自然。華Dee今次都好驚喜, 之前睇佢d戲, 雖然角色唔同, 但係套套都有d"劉華"o既影子, 唔多唔少有d chok, 但係今次真係演得好平民好自然, 真係值得一讚。

許鞍華導演o既戲其實我睇得唔多。佢一向都係好寫實, 又唔會催淚。今次拍左老人院o既生活出來, 刻劃左好多老人問題同老人院入面o既人生百態, 拿捏得好準確。有好多位都好細膩, 又一d都唔造作。抄網上有人講o既評語: 文藝片既情懷，拍得細膩含蓄舒服得黎又不失笑位和幽默感。可能好多人都會覺得悶, 但係我覺得真係一套好戲。

"大追捕"

一開始可能大家會覺得呢套係一套懸疑片、警匪片、動作片, 但係其實唔係。嚴格來講應該算係一套"親情片"。

講真, 套戲大半都營造左一個懸疑o既氣氛同佈局: 究竟事實o既真相係點呢? 究竟同廿年前o既案件有咩關係呢? 究竟...好多好多。不過我相信稍為有腦o既人, 睇到一半都已經知道發生咩事, 估到個劇情係點樣。但係咁樣並唔係佢失敗, 我覺得根本就係想比觀眾知咩事而繼續睇落去。

成套戲實在有好多亮點, 但係最正o既一定係張家輝。真係要講句對唔住先, 我仲記得我無耐之前仲係度講, 張家輝演技係好, 但係感覺唔似係可以擔正大旗出大場面o既。當時都有睇過唔少佢o既戲, 但係睇左呢套, 我真係要收回前話, 簡稱收皮。只係睇佢做個啞巴, 冇對白純表情既演技, 睇佢用眼神來做戲, 睇佢欲言又止o既表情, 睇佢內心痛苦面容抽搐, 睇佢放下一切最後一笑...只係睇佢都已經值回票價。

任達華華哥做o既警探實在無咩complain, 謝安琪o既角色純粹為成套戲緊張o既氣氛做一個緩衝, Janice Man中規中距, 反而有一個可能大家漏左o既亮點(可能有人留意到, 但係網上唔多見人有提), 就係出場唔多o既余安安。以前甚少睇佢做戲, 不過佢有份出場做主o既幾場戲, 都超交到戲。

2個鐘o既戲, 完全交待到劇中人物之間唔同o既感情, 張力亦由頭去到落尾, 一幕接一幕, 即使去到一半大家都已經知道"點解", 仍然都會好緊張之後究竟會發生咩事。去到尾段, 播返張家輝望住Janice Man眼淚係度打滾, 同埋最後, 張家輝跳樓前想講野果度, 真係頂唔住, 自己o既眼淚都標左出來。王遠揚到最後一個人都無殺到, 只係殺左自己, 但係佢救贖到身邊幾個人, 包括一直追查佢o既林Sir, 真係無得頂。

"春嬌與志明"

上一集o既志明與春嬌, 個人覺得好好睇。今次"春嬌與志明"網上都好多人話好好睇, 我呢, 就覺得都好睇, 但又未到d人講到咁正(不過都係好睇o既)。

今次無左麥曦茵, 少左女性角度, 但係彭浩翔既招牌黑色幽默及譁眾取寵竟然自我抑制到, 保留到上集果種好平淡舒服o既味道喎。最開心o既係雖然今次想打入國內市場, 大部份都係發生係內地北京, 主打o既除左千Fa同余文樂另外兩個徐崢同楊冪都係內地演員, 但係仍然堅持到港式粗口同男女關係, 無大陸味, 值得一讚。

故事講一對三十歲島o既HK情侶, 過左熱戀期之後開始熱情冷卻, 好多相處之間o既問題出現, 到分手到分道揚鑣, 再係北京重遇, 各自搵到另一半, 重新認清自己而認定對方再一齊, 一層一層好有條理好流暢。

戲入面亦都拍到一貫港男港女o既情態。不得不讚下余文樂同千Fa: 近年都睇左唔少余文樂o既戲, 覺得佢又真係不斷有充進步, 好自然順眼, 演技唔會好方塊; 千Fa就更加放低晒, 演活左春嬌呢個HK中女, 都唔知係咪應該話佢做返自己(其實佢自己應該已經唔係咁o既情況啦~)定係話佢演技好好啦。

上次以"煲煙"來做串連, 今集已經講少左好多, 不過港式粗口健在, 而且係講得好自然攪笑, 唔會覺得過份粗俗(事實上, 有好多野用粗口講出來o既感覺真係會強烈d同表達到某d意思)。

網上好多人都話好唔現實, 有咩理由志明會揀中女唔揀個又索又正o既空姐呢? 講真呢d人應該都未係好明白愛情、婚姻同埋相處。衰d咁講, 學網上果d人話齋, 上床攪野開波, 緊係楊冪正啦。但係結婚係對一世, "色相"究竟係咁長o既時間入面可以有幾重要呢? 志明當然係會揀返了解自己、同自己背景相近(都係HK人)、相處得舒服o既春嬌啦, 呢個先係現實來呢。戲入面都有講, 志明係鐘意食7仔o既肉醬意粉, 鐘意就係鍾意咯~

不得不提o既, 就係最後出字幕後果段片, 余文樂做返當年王馨平o既"別問我是誰"MV, 不論場景、服飾、鏡頭、拍攝, 最緊要係佢連表情都學足埋, 真係笑到X街(不得不出一句粗口向套戲致敬啦!), 大家睇果時千祈唔好睇漏呀~~

完