公廁

繼續白話

**********

"公廁"噶意思, 除左本身"公共廁所"噶意思之外, 如果用"公廁"一詞去形容一個女性, 會係好低劣、好不堪噶評價。不過由於今次唔係想談論呢方面噶話題, 所以不在此論。

好難得咁, 講下自己。講下自己覺得噶自己, 可能係表層意識噶自己, 或者係...想人地覺得自己係咁噶自己? 無咩必要吧...總之, 儘自己噶努力去誠實地係自己blog度講出自己想講噶野吧。由於一個人係好複雜噶, 而自己亦都好複雜, 所以可能又係會亂亂地。

**********

一直以來都好鐘意留意人噶性格行為, 當然就唔少得會想試下發掘下真正噶自己係點樣(可能由於睇到自己醜陋噶一面, 所以從來都覺得自己係好唔得的)。一個人噶性格行為好受由細到大噶環境同教育影響, 但係自己本身噶性格同意志亦都會取決左佢行噶道路。

自己性格係細個時算係外向的吧? 細個果時已經係唔怕生, 小學時候已經開始好鐘意打電話比朋友仔傾電話, 一直到中學, 由於d人太勁太叻, 所以開始變成唔多起眼噶人, 但係同熟噶朋友都係仍然會好多噶吹水同聯絡; 到到上City果時, 由於自己年紀細dd加上無d同學咁成熟, 所以就係更唔起眼噶人(但係仍然搵到屬於自己果一堆噶人)。出到來做野, 第一份工比到好大影響我, 令我變返一個外向同開心噶人(詳情應該熟我噶人都知了), 由果時開始, 自己就識多好多朋友, 亦慢慢養成左好重視朋友、好怕同人關係變差、好怕麻煩到人、好怕令人唔高興(亦好怕d人唔高興緊, 想令人開心)噶性格。不過未至於做咩講咩都小心奕奕, 但係好自然對人果時用d措詞同態度都儘量會令人舒服噶(不過, 我個人都係直話直說噶人, 有唔o岩都照插, 只不過會儘量令人好受d吧...當然愈熟噶就愈唔客氣咯), 不過係呢一年有d太過火, 因為好多原因(主要都係情緒不穩定), 有時過份客氣、有時又會過份唔客氣、有時會咩都唔理不顧後果咁講、做一d野...總之, 控制自己比以前差左好多...

其實自己雖然算係外向, 但係其實唔懂得去"開始"的, 如果對方係一個會撩人噶人、或者因為返學、返工噶需要而有接觸, 咁對我來講就可以"開始"傾到偈、熟到。一直對人地噶感覺同對自己噶感覺係: 如果有d人噶性格如激流、如瀑布一樣, 奔放自如, 或者如小溪、如江河一樣, 清徹明快, 咁我就似係一潭水咁; 並唔係想講自己係一池死水, 更加唔認為自己有如浩瀚噶大海咁, 可以靜靜地環抱住、保護住大家; 而係覺得, 雖然係靜靜噶一潭水, 但係有野掉落來, 就一定會有水花彈返上來, 如果對方肯掉野落來, 我一定會有回應, 泛起水花、漣漪...等等, 可能比本身掉落去噶回響得更大。

不過, "表示出來噶回應"呢樣野只係講緊對"朋友"; 自問自己噶性格好易同人熟, 都算平易近人, 又樣樣野都會知d識d, 咩話題都o岩傾, 算係好噶聆聽者, 又會比到主觀同時又客觀噶意見比人; 但係雖然自己好敢表達自己好多感覺, 但係偏偏對家人、對愛噶人呢, 就好怕羞。心裡面一樣會諗好多野、做好多野去為佢地好, 會比對朋友更好, 但係偏偏咀巴就不喜歡表達出來。再者, 由於自己比人噶感覺係"大眾朋友"(甚至係知已, 或者係姊妹), 對個個都好似好好咁, (亦覺得自己已經無左果種曖昧、或者令人愛噶感覺?) 因此別人對我只會係"大眾朋友"噶感覺, 或者好簡單地係對"一個好人"果雒喜歡, 甚少會係"愛"果種喜歡呢。

對於"朋友", 自己唔算係來者不拒, 但係絕對唔揀擇, 只要o岩傾、肯關心同對對方好, 就算係壞人都唔一定係唔好噶朋友; 我成日都話, 葉繼歡都會有知心友, 幾壞噶人, 都會對自己噶朋友好噶, 佢對我好, 我同佢friend, 都可以係朋友, 每個人都有可取噶優點, 缺點都可能改變到, 咁做左朋友我都可以試下影響佢唔好做壞人噶姐?

以前係blog都有講過對朋友、對感情、對同人噶關係o既諗法, 睇返之後都慶幸到而家都無咩大改變; 其實我係咪太"淋"? 我係咪諗太多? 我係咪太過敏感? (問得出呢d問題, 都覺得係吧...) 反正, 起碼係有自覺地以自己現有性格咁生活落去, 都ok吧。

講到公廁, 其實綜合返之前講過噶野, 覺得自己似公廁: 有野掉落來就會有野反彈上來、對朋友幾乎來者不拒、人人也需要、在需要時會喜歡, 但卻永遠不會愛的地方, 好似都幾準確呢~~

完

九月五日 -- 雜記

30/8(一) -- 收工返企再出返來廣田打羽毛球(21:00-23:00); 係果頭食左下野就上去, 等到9點開波, 好彩d人都唔算好勁, 雖然自己水準不及, 但係都打到下; 之後由於佢地各自有車(2個有電單車, 1個有私家車車埋另外2個人), 跟佢地行左去個唔知咩地方, 之後話散, 佢地無話點搭車, 話可以行落去, 於是我就自己搵路落去了。

31/8(二) -- 好累, 狀態極低; 收工返企求其食左d野, 早訓。

1. 不知怎的, lunch無點食野, 夜晚無點食野, 但係都無咩感覺。

2. 為了他人高興而咩都可以做?

1/9(三) -- Taylor生日快樂; 呀Man話定左上唔到堂; 約左強同威食飯(拿埋呀強幫我買噶盒蛋), 結果行左下皆旺之後食, 去左MK金寶, 之後上堂。

3. 好似係第一套擁有噶Hunter x Hunter玩具呢~~

2/9(四) -- 收工過左MK, 糊里糊塗的報了團去北海道, 一個人的旅行變成不是一個人...回家整左d野食。

4. 台灣之旅延後至10月吧...或者會去新加坡探呀馬先?

5. 呀馬返來幾日, 不過未必有時間見呢。

3/9(五) -- 同娟威威呀Sam同Esther去食銀座藏人, 講左好耐好耐好耐終於都去到, 雖然唔多人齊...收工同昆你過灣仔, 佢地一家都係去果度食呢~~ d野食唔錯, 好耐無去過KT噶外野手, 比較唔返, 下次攪次去外野手先; Jenny夜晚來。

4/9(六) -- 一日行晒Jenny同威威想去噶地方: lunch食宜豐, 皆旺, 波鞋街(有對黑色波鞋ok喎又平$299, 無買), MK行人街, 兆萬(見到個袋ok $149再九折, 亦無買), 釆豐行(洗頭水), 廣華街(拿左頭盔), In's Point(三國傳扭蛋03 $50), 深水埔(係福利見到七武海果set盒蛋$150!! +$28公孫瓚), dinner(好耐無食過飛鷹), 返企; 敗左二百幾蚊玩具, 不過好抵呀~~心甘情願~~

5/9(日) -- 好累, 成日係屋企hea過左; Jenny成日係度睇"泡沫之夏", 我就訓下起下咁, 都睇左d, 唔多好睇, 晚上食完魚米家Jenny就返去了; 去左寶琳, 買左飛同民民星期一睇Inception; 呀馬始終都係無時間見我地呢~~

6. 好似無放過假咁, 唔多想返工呢。

7. 突然發現之前幾個星期都有唱K, 今個星期無喎, haha, 諗諗下又想唱。

8. 覺得自己真的渾噩了...唔知自己想點, 唔知自己做乜。

9. 接近2個星期都訓得唔多好, 就算早訓都早醒...

來緊:

6/9(一) -- 買左飛同民民睇Inception, 終於都有得睇
8/9(三) -- 上堂
11/9(六) -- 同同事去Queenie屋企。
23-27/9 -- 北海道之旅

完

明信片

朋友比噶題目, 不過感覺上寫得很"行"...

**********

在我的小時候, 已經不多人真的會"用"明信片了, 不過偶然還會收到爸爸或其他親戚從外地寄來的明信片。

從小一直對於明信片的感覺, 是一張硬卡紙, 一邊是某異國美麗或有特色的風景, 另一邊則會貼郵票和寫下要寫的內容; 除了可以傳情達意之外, 還可以讓對方看到他身處的地方, 每一個地方都有其特色, 因此甚有紀念價值。

現在科技發達, 社會也比以前富裕; 四處旅行已經不像以前般像是難比登天的事; 別說有特色的風景, 現在幾乎連整條街有什麼店都可以知道了; 電話、上網甚麼的也超方便, 已經可以免費即時通訊, 也不用再寄什麼信呀、明信片什麼的。

發達的資訊、即時的通訊究竟有否拉近了人的關係呢? 在這資訊過於泛濫的世界, 沒錯, 人的接觸的確因此而增加了很多, 但卻充斥著虛假的情報(還有情意?), 缺乏了真正見面時感受到的眼神、聲調, 也沒有了從筆跡中字裡行間感受到的溫暖。也由於要找到一個人太方便(或者可以說太容易發現找不到一個人), 也造成了很多的誤會, 揭穿了太多的謊言。人的關係、接觸的週期因此縮短了: 快了接近, 快了分開, 快了開始, 快了結束...

在很多商店還是會見到明信片, 他們的功能好像只剩下"手信"; 可憐它們本來主要用於傳情達意的功用已經沒有了, 而收到"手信"的人也不見得會好好地"用"它。那些真摰的一字一筆都到了哪裡去呢? 你又感受到冰冷的螢光幕中, 我熱心的文字麼?

完

半年@082010

好似之前果篇"夜半敲門"咁, 又係勁口語咁亂諗亂打亂寫, 今次應該係...有意無意地亂同埋打勁多野吧? 有無人會有心機睇晒, 兼明白晒我噶意思呢? 嘿嘿...當然, 有得睇我blog噶人會明多少少, 不過好多野, 唔會係facebook disclose吧? 反正, 想打下自己d感覺出來, 打左出來好似將d野放晒出來咁, 會舒服d吧~

**********

事隔半年, 由農曆年計起, 一年又過左一半。呢半個一年, 真係好奇怪。

感覺唔到自己係呢半年生活過d咩野, 真係幾乎好似一跳就跳過左咁, 自己未至於停留左係、仲係活係半年前, 但好多野好似好近, 又好似好遠咁。What da hell am I doin' here?

曾經講過自己怕死, 因此好珍惜"活著", 珍惜每一種"感覺", 我要儘無"白活", 無"後悔"; 追求自己想要噶野, 唔一定要係事業成功, 亦唔一定要係好多人、大部份人噶人生目標, (雖然我覺得好多人都係渾渾噩噩, 包唔包括自己呢?), 但我要噶野, 由我知道左要之後, 到而家都係無變過; 錯、傷心、痛, 都唔代表會後悔, 知道自己要d咩、知道自己結果可能會點、知道自己係有無諗過而作噶決定...等等, 都係知道噶, 一直都話, 如果知道自己做緊咩就OK, 最緊要唔係無意識地生活。

珍惜生命每一種感覺, 包括快樂、悲傷、舒服、痛楚, 每一樣都應該要感受過, 所以悲傷不快眼淚等等都無白白的給我錯失過去, 都係活著噶感覺; 有低潮噶時候更會顯得高潮時噶好。開心噶時候大笑, 唔開心噶時候大哭, 情感或者感情都放到最盡, 可以嗎?

慢慢回復好耐之前噶我(應該係3年前噶我吧?), 好外向、勁搵人, 識左好多新噶朋友; 好開心近半年識噶都係好好好好噶人, 救贖左我, 陪我捱過呢段時間; 自己一向都係隨自己意而行噶人, 我一向噶格言, 係"只要唔對其他人有壞影響, 自己開心噶話點做都得", 幾唔怕人地噶眼光; 之前幾年都收埋左、低沉左, 而家會咩都唔理, 想做就做, 想搵就搵, 不論係新係舊噶朋友都好, 總之任性地搵人陪自己(真的嗎?)。可能會讓人覺得煩, 可能會令人諗多左, 可能造成誤會, 不過自己好清楚自己想點, 好清楚自己噶想法, 人地要點諗就點諗吧, 總之係對人無壞影響噶情況之下, 自己開心噶話就可以; 如果會阻到, 咁就唔搵吧, 所以其實都要收歛一下吧? 唔想永遠都係陪人果個, 所以不停搵人陪我(定係其實都係陪人?)。我要任性。

點解人唔可以簡簡單單開開心心咁一齊生活呢? 因為人係有情感、多野諗、又複雜噶, 真係好煩, 一個人已經好煩好複雜,人再多就更煩, 所以不嬲都係有人噶地方就有是非。而家好積極、好進取咁去理朋友噶事, 因為自己噶野已經理唔到、唔想理, push自己去行; 既然自己好累, 唔想諗唔想攪, 咁去理返其他人噶野, 係可以理到、控制範圍內、同埋人地愿意噶情況下去理人都係好事。

每一天每一天每一天係照鏡定係係咩地方望到自己時, 都覺得好醜好醜; 曾經話過, 自己睇人靚唔靚, 好睇自己對對方噶感覺係點, 會好影響我對對方噶觀感, 因此好多時有d好多人地話唔太靚噶人我都會覺得靚, 人地覺得靚果d, 自己又覺得麻麻...如是者, 好明顯我係覺得自己好唔得, 甚至係好唔鐘意自己吧? 我應該係一個內在外在表裡如一噶人吧?

在世上, 總有人會令人覺得很好, 有人會令人覺得不太好。每一個人都有優點和缺點, 不過, 優點可能唔係起眼噶、或者人們喜歡注意噶。自己就好鐘意去睇人噶不同特質, 當然都會留意人噶優點和缺點。同時, 自己也偏向喜歡去睇、去記住人地噶優點。因此其實我係幾盲目咁偏向睇好果方面, 同我做得fnd噶人, 或者唔多唔少我都唔會覺得佢地靚呢 hahaha; 由於呢d係好主觀噶感覺, 因此係當局者清, 旁觀者迷呢。

下半年, 積極點吧; 學皮包鐵(筆試過左), 上話劇(上緊), 遲d可能報master, 搵language course讀, 自己去旅行(plan緊了), maybe so full, add oil, 蠅。

完全反自己一向寫野噶組織同style+胡思亂想隨筆, 完。

p.s. 發覺而家好鐘意咁樣亂糟糟打好多野, 等人無咩心機睇, 哈哈。

八月二十九日 -- 雜記

23/8(一) -- 早上同催時食左M記早餐; 收工本來諗住只係入寶琳, 但係昆你又出開去MK, 自己反正都唔返企食飯大把時間, 於是一齊出MK; 終於買到對黑色波鞋, 仲要係紅黑噶, 幾ok; o岩買完昆你打來, 叫我join埋佢同佢老公食飯, 見時間還可以, 於是同佢地去左食金寶, 食完散; 搭MTR返去, 經過見到電器鋪好多人圍觀, 心感不妙, 行埋去見到話成車噶人死晒, 心都離埋, 好得人驚...之後沿途聽住朋友live同我講咩事...雖然最終唔係全車人死晒, 但係仍然好心up...好唔開心, 差d係街上喊左出來...搭車入到寶琳, 時間尚早未夠10點, 去Toyrus買埋禮物, 再過MCL買戲飛卷, 終於全部任務完成返企。(諗諗下原來成晚用左唔少錢)

1. 七月十四, 自己平安渡過, 但係發生左好得人驚噶事...好可怕。

24/8(二) -- 下午4點去總部上堂, 6點前收左工, 返企食飯。

2. 轉晒d mp3九成做快歌同勁歌。

25/8(三) -- Roving (R1), 由全日轉左做半日(8:45-14:00), 超開心; 呀Man又係臨時話唔來, 係公司留到7點幾先走, 係街上hea左一陣再去上堂。

26/8(四) -- 早上食早餐作戰失敗, 得返我同催時食...下午Roving (R2 13:45-19:00), 企左2個半日, 對腳真係唔多得; 收工後join埋同事們Hugo, Will, Janie, Money姐同Queenie係APM唱K, 大家都係玩得開心同埋會發下癲噶人, 幾開心。11點島散。

3. 最近好像很奇怪, 又像發生了不得了的事情; 與自己一向某些觀念有不同, 自己的想法也有不同, 卻, 又很害怕。

27/8(五) -- 好友Teammate昆你生日快樂! 收工唔join同事噶Chill Out, 去左北角同Carol同呀衛上左呀珊屋企打機, 打左陣落去食飯到9點島散返屋企; 10點幾無啦啦同催時傾開話出來, 係APM join左竟然唔食糖水, 走左去唱K, wakakaka, 好耐無試過2個人唱K, 唱到4點幾先走, 唱左5個幾鐘, 雖然得2個人唱, 但係唔知係咪大家都高興, 情緒高漲, 同埋唱快歌勁歌多d, 所以氣氛居然好過有時成班人一齊唱呢~~ 2個人唱左咁耐勁滿足, 亦好累~~~

28/8(六) -- 中午出TST同Taylor呀娟食飯慶Taylor生日; 去左糟媽推介噶Vietnam野"味佳居", 個火車頭好食, 不過overall鐘意MK金寶多d(尤其係個小食拼盤水準有差); 食完係海港城行左下, 之後大家提議入天水圍Taylor屋企坐下(咁耐都未去過呢), 之後係佢家玩左下Wii到6點幾走, 返企食飯。

4. 極眼訓

29/8(日) -- 成個星期都唔多夠訓(又早起又夜訓咁), 點知半夜又醒早上又好早醒; 由於早醒噶關係(7點幾), 於是自己去左睇早場"線人", 整體來緊我覺得都叫OK, 感覺上無"証人"咁好睇, 張家輝做個角色太內歛, 內歛到唔多使交戲咁(有幾幕要交戲噶係有少少爆出來, 但係又好似...爭d); 謝檸檬一如以往, 差唔多, 不過不失, 最搶係綠葉噶智叔; 不過總算成場戲都帶到觀眾入個氣氛度, 都幾緊張, 個結局麻麻地...不過, 早場$35真係好抵~~ 睇完12點島, 呀哥佢地都係寶琳, join左佢地坐左一陣就一齊去打羽毛球(今次無咩人), 打13:00-14:00, 之後返屋企沖涼抖; 呀哥個社團好多人上左來, 成個下午都好吵好吵, 我太眼訓都訓左下; 原本諗住佢地6點幾7點走, 自己可以煮d野食, 廢事過去, 點知攪到7點幾都未走; 催時打來, 臨時約食飯, 逃離左吵雜噶地方, 去左寶琳魚之味, 食完好飽無去聰嫂就返企了。

來緊:
30/8(一) -- 羽毛球@藍田 (21:00-23:00)
1/9(三) -- Taylor生日快樂; 呀Man話定左上唔到堂; 約左強同威食飯, 之後上堂

完

八月二十二日 -- 雜記

1. 上星期六唱K時發現, 佐敦King 1旁邊果間有肥貓貓噶衫鋪執左...=_= 隻肥喵喵我都仲未見到佢個樣 >_<

16/8(一) -- 同同事仲有同事朋友噶飯局@ King 1(昆你, Bowling, Kenneth Penny, Tracy), 識到新朋友同埋都幾好傾; 某人...... haha~

2. 水瓶座, Tracy呢個名, 同2月12日生日呢三樣野, 都令我覺得有d得人驚...真係驚...

17/8(二) -- 收工同Queenie, Kenneth, Penny同Janie係荷里活foodcourt食完飯之後一齊睇戲, Sorcerer's Apprentice, 正牌荷里活B級片, 成套應好多電腦特技, 無咩悶場, keep住有笑位, 唔使點用腦, 作為消閑戲來講好睇, 而且星期二噶$45飛係抵睇噶, 攪野噶地方係雖然佢係一套講魔法噶戲, 但係又ok地夾到科學入去喎, 而且仲有一場追車戲, hahaha, overall都ok啦~

3. 老細開始放假。

4. 記: "襟食" by Janie姐姐

5. 半年

18/8(三) -- 呀Man臨時通知唔上堂, 收工返企食埋野去上堂, 全日都有溫左下書。

19/8(四) -- 早上請左假考筆試, 總算過左; 考完試去左石夾尾賓墟食早餐, 之後返屋企鏟頭後返工; 收工返企食飯。

6. 多謝Money姐幫我修補左不足之處~

20/8(五) -- 同昆你去左SSP掃街之旅~ 好耐無去啦~

7. 好想買袁術, 好想買紅蓮版曹操, 但係都好貴呀...唔抵買; 來緊有項羽同埋典韋好似仲有袁紹, 都係必買項目, 點算呀~~~

21/8(六) -- 之前果日臨時約左催時join佢同佢同事唱K(無記錯噶話:傑傑, Nicky, 呀偉, Carol), 佢有個男同事唱女音好勁呀~~ 催時都OK; lunch係新境界食飯之後, 再同佢同Cass源去Megabox唱K, 散左之後去TKO體育館同呀哥社團噶人打毛毛球, 好耐無打呢~~ 之後去左坑口, 點知間茶記爆左, 結果是但食吉野渣之後再去聰嫂之後返企。

22/8(日) -- 早上最終決定唔睇戲, 去左打波, 唔知係咪之前果日打左毛毛球, 有d累累地, 打到有d手軟腳軟, 好彩都打得ok; 食完lunch之後返屋企hea足一日...竟然幾乎成個下午同youtube渡過~夜晚返企食飯。

8. 奇怪地同催時小妹熟左~ 嗅到相似噶氣味呢, 好可怕。

9. 返屋企食飯, 做左一樣好似應該, 又好似唔應該噶野...但係點都好, 唔開心...

10. 開始要搵腳一齊睇草蜢演唱會, 仲有要plan 9月噶旅行。

來緊:

24/8(二) -- 下午4點去總部上堂
25/8(三) -- Roving (R1), 收工上堂
26/8(四) -- Roving (R2), 9點收工後join同事唱K
28/8(六) -- 上昆你屋企延至9月, 下午同taylor慶祝佢生日, 地點未定。
29/8(日) -- (13:00 - 14:00) badminton

完

八月十三日 -- 雜記

9/8(一) -- 收工去寶琳買戲飛, 之後行左下奇趣, 返TKO第一次食樓下果間burger king, 食左果個廿五個半噶餐, 都OK啦; 返來砌+油左BB胡軫(強人), hea左一晚。

10/8(二) -- 收工係寶琳食左大件三文魚刺身果間野之後睇戲"唐山大地震", 好好睇呢! 個女主角超好戲, 同埋到最後都係失守左呢~

1. 最近都很早醒。

2. 因為通透, 所以痛苦。

3. 每天在家中廁所、公司洗手間、電梯、或者從什麼樣的鏡子之中, 見到自己的樣子, 總是覺得很陌生, 很醜陋; 看了那麼多年, 仍然一樣。

4. 血濃於水; 以為自己比姑姑更冷血, 可還是失守了; 徐帆好犀利!

11/8(三) -- 收工返企先再出返去同Man食飯後上堂。

5. 晚上熄冷氣訓覺, 又OK喎。

12/8(四) -- 下午落左去幫手Roving 2-6, 係秀茂坪收工, 同鵬利一齊過寶琳, 早場就唔到呀龍時間, 買唔到飛, 之後返企食飯。

13/8(五) -- KTG同Calvin來HK幾日, 點知佢地有拗撓, KTG自己來; 臨時約左小翠食飯, 本來約左去SSP食飯, 但係小翠要係MK買相機唔知到幾點, 於是自己過左SSP先, 好貴呀d模型...行完小翠仲未得, 於是索性過埋MK; 到左之後本來以後佢得, 點知都未, 於是同佢暫時散, 去睇d野再返來搵佢; 最後等到8點半佢先攪掂(仲要買唔到), 去左MK金寶食, 餐飯講左幾個月終於都食到呢。

14/8(六) -- 早上起身無咩攪, KTG又起左身, 於是一齊去左睇早場, The Last Airbender, 世界觀OK, 導演麻麻地, 編劇普通, 演員麻麻地, 特技幾好, Overall普通...浪費左個題材呢...之後就去唱K, Calvin晏d來; 好耐無同KTG唱啦~~ 加埋呀娟威威民仔呀Cass都係玩開或者好唱得噶人, 雖然唔係唱得多但係都開心呢; 中途KTG同Calvin出左去講數, 好似唔多掂收到呀哥電話又喊又盛又話分手, 結果落左去行左幾個街口見到佢地, 係遠處睇住佢地半個鐘終於好似無咩事先偷偷返去; 唱2-8, 6個鐘之後民仔同cass走, 其餘人一齊去左金蘋果食飯, 之後返企。

15/8(日) -- 差唔多天光先訓...12點幾起身, 同KTGCalvin食晏之後出MK先達, 再去家樂, 行左潮流特區, 再返返去先達, 再去尖咀, 之後佢地一直睇結婚介指唔多關我事, 6點幾返企食飯。砌左BB張遼。

來緊:

16/8(一) -- 同而家同事昆你PennyKenneth仲有Bowling同Penny朋友食飯, hehe
17/8(二) -- 老細開始放假!
18/8(三) -- 上堂
19/8(四) -- 筆試
21/8(六) -- (18:00 - 19:00) badminton
24/8(二) -- 上堂(office hour)
25/8(三) -- Roving (R1)
26/8(四) -- Roving (R2)
28/8(六) -- Queenie's home
29/8(日) -- (13:00 - 14:00) badminton
31/8(二) -- Taylor's Bday celebration

完

腳

寫左數篇書面語, 今次都係來返個白話先。

比較熟悉我噶人可能都知道, 如果以欣賞角度去睇女仔噶身體, 個人係比較喜歡睇"腳"噶。一對美腿實在係...er...其實我都唔識點形容, 總之就係如果只可以選一樣, 個人會喜歡睇美腿多於纖腰、巨乳、嫩於青蔥噶玉手、標緻噶臉蛋或者係咩美麗噶腳踝果d野。(順帶一提, 蔡瀾先生係喜歡"腰"噶, haha)

我當然唔會咁簡單無啦啦係度講"女"啦, 其實真正想講噶"腳", 係...er...可唔可以話某樣野噶"伴"呢?

每個人做唔同噶野都會有"腳"。好似麻雀腳啦, 行街買衫噶腳啦, 我自己就打波有打波果班中學同學噶腳啦, 唱K都有少量鐵膽啦("腳"昇一個level就係"膽", 哈哈), "腳"最重要噶功用, 並唔係要有人一齊, 有人陪咁簡單, 而係大家都係喜歡果樣野、一齊做會開心d、或者會互相比到意見、或者level差唔多等等, 先係好噶"腳", 亦係好雙向噶一樣野。

自己喜好做噶野, 有d係好個人噶, 例如睇書砌模型咁, 都係一個人做; 但係有好多都係需要"腳"噶; 例如頭先講開噶打波, 就keep住每個星期都會有一班中學同學出來打, 除左大家鐘意打波之外, 仲可以keep住運動, 更可以聯絡感情呢。另外一樣就係而家對於我來講最大噶嗜好之一 -- 唱K, 其實唱K都有d腳, 不過講真而家愈來愈難約到, 又好似唔係好多熟噶人真係好鐘意唱、或者係好o岩咀形一齊唱一齊發癲咁, 不過都總算有腳。最可惜噶就係其實自己幾鐘意睇戲、話劇、musical、演唱會, 雖然多朋友, 但係又唔多係鐘意o既(或者鐘意噶都唔多熟), 所以好可惜, 好多時都錯失左好多睇噶機會(入戲院睇同睇Live感覺係好唔同的)。

最難搵噶"腳", 當然係會陪係身邊、以後都會一起到老的那個老伴吧? 由於關係長遠, 所以真係起碼要將頭先果d要求全部加埋都OK先得呢~~(不過而家放棄左呢樣野, 所以唔係度多寫了)(所以我係一隻無腳噶雀仔? XDDD)

希望以後可以搵到好多各種各樣噶"腳"吧~

完

借/還

朋友給的題目, 立刻想到的不是有借有還, 借錢還錢, 或者不問自取這些事情, 反而想到了有關"報應"。(之後想到的是媒體上經常播放的貸款廣告, 很惹人反感, 尤其見到某些廣告的女子在廣告中買衫買到透支欠下大筆卡數, 只覺得是"抵死")

有關"報應", 其實覺得也是一種"有借有還"。小時候總會天真地覺得好人有好報, 壞人也會有有報應, 若然未報, 也只是時辰未到。某程度上覺得, "報應"也是有道理的, 那種人有什麼樣的性格行為, 在身邊的環境人事物等等都會有一定的影響, 從而增加"報應"的可能性。

可是真的是太天真了。

最大的所謂"報應", 無論發生什麼事也好, 如果那人沒有不開心, 沒有覺得慘, 跟本就不叫做報應。因此壞得透徹、沒有心理負擔的人, 根本就不會有報應。當然世上並不會有這麼徹底極端的人, 但這樣推算下去, 其實壞人只要有心理準備, 或者對於道德觀低、或者心理負擔少的人, "報應"的力量自然就偏低了。相反, 好人有好報, 在某程度上也只是看那人的心理, 如果他不斷遇到不幸的事, 但心理上很滿足很開心, 在精神層面上也可以說是有好報, 因為他追求的是精神上, 自己是"好人"的滿足, 求仁得仁; 但當然世上也沒有完美的好人, 除了想滿足精神層面, 也從會有其他的希望; 而世上好人總是很容易就能欺負, 而壞人做了壞事, 卻能得到好處(又不一定有報應), 如果能更聰明、更實際地取得利益, 而不會不開心的話, 其實做壞人真的很爽呢。而這些好處、壞處跟本就是"取得", 而不是"借"的, 所以不用"還"呢, 嘿嘿。

人生苦短, 自己並不是十分追求物質、實際那種人, 但卻也不是神化到純粹追求精神滿足的人。因此, 既然做不到強悍的好人, 在現世還是做個壞人好了。

後記 -- 發覺自己卻是做壞事有報應, 做好事沒好報的那種人, 那應該做好人還是壞人呢?

完

八月八日 -- 雜記

1. 夜晚突然陷入極低情緒, 爭d又發癲。

4/8(三) -- 呀馬生日快樂~~ 收工呀Man話走唔到住, 食唔設飯, 臨時join左昆你同佢朋友寶鈴一齊食飯@坑口意粉, 之後去上話劇第一堂, 等左半個鐘車又熱又焗, 難得有燥噶心情 =_=; 第一堂感覺良好, 呀Sir都OK。

5/8(四) -- 收工同MandySin(太多叫Mandy噶朋友所以打埋個姓haha)食飯, 呀娟同威威都來到; 由於Mandy想食聰嫂, 所以入坑口, 係屋企出返門口果時極大雨, 濕晒; 食左茶記+聰嫂後散。

2. 來緊好似17/8開始老細放假一星期, 好開心。

3. 最近難得有心機打野, 大家快快比題目我~~ 今次想打故仔呢。另外請大家有睇blog噶人多多留言, 我返返來啦。應該都無幾多人睇了~~~

6/8(五) -- 收工同同事們(呀黃, Carol, 何敏, 估唔到Connie又來, Step, Penny, Vincent, Kenneth, 昆你, 呀植)唱K, 難得攪得成噶大型d噶活動; 好熱鬧噶一晚, highlight係Alan唱"我是憤怒", Kenneth噶精彩表演, 當然仲有呀植來到之後噶攪笑啦, 12點幾散。

7/8(六) -- 無野做噶一日, 臨時決定去Queenie家玩, 搭左好耐車入屯門呢; 同佢老公、細妹同佢朋友5個人玩Wii, 之後佢地玩紙牌大富翁同埋Cluedo, 跟住落左去食泰國野, 好食, 食完上返來hea左一陣我就返企了; 咁o岩遇到觀塘道出事, 係對面線, 好彩唔多影響我返屋企; 入到TKO又好大雨。

8/8(日) -- 早上起身天氣OK, 打左波, 超熱; 之後返企hea左一日。

4. 終於睇完本書呢, 隔左好耐; 幾好睇尤其個結局幾得意, 不過睇得辛苦。要還晒d書比昆你了~

5. 發現要搵戲腳真係好難, 好難好難。同埋好似慢慢引起左不必要噶誤會咁。

6. 發現自己現在經常做心中想做的事, 不是最恰當的事; 明知遁做了恰當的事會好一點, 但也是沒有做...

7. I am a star...shining in a sunny bright blue sky.

來緊:

11/8(三) -- 上堂
13/8(五) -- KTG同Calvin來HK幾日
16/8(一) -- 同而家同事昆你PennyKenneth食飯, hehe
18/8(三) -- 上堂
19/8(四) -- 筆試

完

如果你是黑社會的Director/CEO, 你會如何打理你的社團?

由於上次公開徵求題目有朋友(呢個人仲算係朋友嗎? :D :P)比左個題目我, 我當然不得不辜負人地咁辛苦諗比我噶題目, 由於前排比較無心機打野, 因此都隔左好耐先攪掂。
對於呢個題目, 其實一收到已經諗好左成篇野噶內容; 本來好想快快打出來, 免得自己需要諗好耐咁, 不過始終都係隔左好耐, 以下就係本人對於呢個題目想發表噶野(基於各種原因, 決定用白話來打呢篇野, 容易d表達某d意思):

**********

如果我係黑社會噶Director/CEO, 我會點做呢? 無論係用邊個層面講都好, 我會做噶只係一樣野 -- 解散。
以下會分幾個層面慢慢咁深入來講下我噶想法。

1. 對於一個擁有閒雲野鶴性格噶我來講, 我係一個一係唔commit, 一commit落去某d野就會比較全心全意去做果種人, 因此我只會對有興趣(或者真係逼於無奈)噶野"開始commit落去", 對於"管理黑社會". 我唔知自己有無呢個才能, 但係興趣一定唔大。

2. 從社會良心噶角度睇, 如果我做左黑社會噶Director/CEO, 然後解散左佢, 表面上好似係一件好事, 因為係好多人眼中會覺得, 少左個黑社會社團, 一班壞蛋群龍無首, 只會變左烏合之眾, 好容易就會擺得平, 咁樣噶話社會又得以太平。我就可以得到一個好噶名聲?

3. 然而, 事實並非如此, 少左一個組織, 仲有好多好多其他組織, 本來噶地盤只會比人霸左, 唔見得個情況會有所改善, 根本就唔係治本噶方法。

4. 再者, 如果一班窮兇極惡、作奸犯科噶人由本來有組織而變成無組織, 只會令社會大亂, 解散跟本就唔係辦法。黑社會組織對於社會來講係一個都幾必要噶存在, 因為可以控制住成個局面, 好過d壞人亂咁來, 因此呢個世界其實根本就無可能完全打擊/取締黑社會, 呢一點相信大部份人都明白, 政府/警方其實同所謂黑社會暗中都有左噶共識, 大家各自攪掂自己果part唔好太過份就算。

4. 事實上, 一個組織(無論係好係壞)並唔會因為個呀頭死左或者話解散就會無左, 蜘蛛無左個頭都可以繼續存在(應該有人會明呢句噶), 因此, 我咁做其實到最終根本就唔會對社會有咩影響, 我話解散, 只不過會掀起左有人爭我個位噶局面, 而呢個所謂局面都唔會影響左個勢力(你估真係因為爭崩頭而令個組織崩潰咩, 呢d漫畫先會有)。

最後結論:
我根本咩都無做過, 對呢個世界無影響, 無作為; I'm a creep...I'm a weirdo...what the hell am I doing here...I don't belong here...I don't belong here...(Radiohead -- Creep噶歌詞)

完

後記+"真．如果你是黑社會的Director/CEO, 你會如何打理你的社團?"

我當然無論如何都係會話"解散"噶啦。不過如果我真係做左黑社會噶Director/CEO, 叫解散, 大家認為我真係會咁簡單話散就散咩? 嘿嘿嘿...嘿嘿嘿嘿嘿...作為邪惡軸心, 當然唔會咁簡單啦...咁事實係點呢? 為左令大家唔好有生命危險, 我都係唔好講出來了, 嘿嘿嘿...嘿嘿嘿嘿嘿...

(好野, 終於寫夠一千字, 十五分鐘由頭打到完, 爽)

真．完

一個人的第一次

買了高木直子的繪本"一個人的第一次"; 很簡單的線條和文字, 卻很生活化, 有很多事情也很窩心; 因此我也想寫一下一些一個人的第一次呢。

**********

由出生到現在(甚至到死之前), 一定會有很多"第一次"的發生, 有些"第一次"相信每個人也會一生難忘; 有些可能對於其他人是雞毛蒜皮的小事, 對自己是很深刻的回憶; 總而然之, 所謂"第一次"最珍貴的地方, 就是"只有這次才有這個感覺, 以後也會不同了", 儘管有很多事情, 在"第一次"之後會再做, 甚至已經成為千篇一律的例行公事, 但那個"第一次"總是那麼地與別不同。因此自己會十分珍惜那種機會, 而且都會儘量把"它"錄製在腦海中呢。在此記下現在能夠想起, 對我人生有影響, 又可以公諸於世的那些"第一次"s。

**********

第一次的 -- 小強

不知為何, 記得還在BB床時候的事。還在很小很小的時候, 那時還是被困在BB床, 不能到處走動的時候, 那時應該已經有點意識, 並不是無意識的BB的時候了吧?有一天, 哥哥(一個對於那時候的自己來說, 是少數認識及會信任的人)突然很緊張, 說我的床有小強(由於我厭惡小強厭惡到連那2個字都不想講, 所以那時哥哥明明不是講"小強", 我都照打小強); 他說完之後, 媽問他在哪裡, 但大家又見不到; 對於一個BB來說, 突然第一次聽到一種新的生物, 而出自一個自己信任的人口中, 卻又像如此可怕, 而且在當時又見不到、找不著這種生物, 自然地就會對種生物產生了恐懼, 種下了"小強是很可怕"這根深柢固的思想。那次也是不了了之, 不知那隻可怕的東東往哪去了。

之後的小強

到現在仍然認為是除了人類以外, 親眼見過的史上最可怕最醜陋的生物。簡單來說, 就是"我怕小強"。其他的蛇蟲鼠蟻都還好, 就只是這種生物, 絕不能拿來和我開現笑。

**********

第一次的高達模型

小學時, 比我大很多年的表姊任職政府公務員, 該部門每年也會有一次"家庭同樂日", 簡單來說就是玩攤位遊戲, 每次都會拿到很多獎品玩具回家, 而有一年的其中一件玩具便是"高達模型" -- 現在已經是舊版的1:100"百式"; 當時完全不懂得"高達", 就只是覺得組合的過程很有趣(當時的模型仍然要用膠水, 很麻煩), 而那機器人很"有型", 那模型也玩了好久呢(最後從高處墮下粉身碎骨了); 而之後再接觸高達模型, 已經是上班之後; 那時經常跟喪強一起去看玩具, 第一次買了BB戰士的雙子星高達, 覺得造型很好, 而且模型的生產技術比當年進步了很多; 亦由於這一盒BB戰士, 我開始了買BB戰士(及其他高達不同比例的模型)呢。

之後的高達模型

泛濫。家中太多太多了, 知道自己這一生也砌不完, 不過仍然一直買買買...一直沒有改變的, 是自己最喜歡的還是Q版的BB戰士呢(最近迷上三國傳!)。

**********

第一次的演唱會/電影(當然係計入場睇噶)

我居然記得, 第一次睇噶演唱會係鄭少秋演唱會, 當時佢已經係"扮野秋", 仲記得係場中佢扮晒四大天王呢; 雖然果時自己仲係好細, 但係由於自己由細就聽歌, 所以都好enjoy個演唱會呢! (由細開始已經老人精?)
至於電影, 係自己唔記得幾歲(仲細d果時), 唔知點解屋企有d免費飛(細個屋企無咩錢, 係唔會去睇戲噶), 睇左套內地噶戲"皇天后土", 跟本就唔記得講咩, 只係記得好悶; 而有印象第一次比錢入場睇噶戲, 係同屋企人睇"富貴逼人"系列噶"富貴黃金屋", 當年2位主角而家都唔係度了~~

之後的演唱會/電影

仍然很喜歡, 不過雖然自己多朋友, 但係演唱會/電影腳就好少...唉; Music is Live! 當然要支持現場! 來緊草蜢又開, 有幾多人會去睇呢?

**********

第一次的唱K

印象中第一次的唱K, 是很多年前跟哥哥及他的同學唱; 那一次並不逗留很多時間, 而且也沒怎麼唱, 只記得他們點了"三人行", 叫我唱小朋友那一段。當時覺得很新奇, 而且平常都在電視看見歌手們拿著咪唱歌, 竟然可以自己拿著來唱, 不過由於怕羞跟很不習慣的關係(經過咪在喇叭出的聲音很不同), 因此並不是十分有印象及開心的經驗。

之後的唱K

後來唱得多的時候, 是中五畢業, 當時有一大段時間很空閒, 就經常跟好友們打波 --> 唱K Lunch ($25連一個午餐, 很"抵"), 開始上班後認識了更多朋友, 更是唱得多; 現在由於K腳難求, 次數也少了很多, 但唱K仍然是我其中一樣最愛的嗜好呢!

**********

不想篇幅太長, 而且記憶有限, 加上有些"不能出街", 就此停下吧; 可能會有續集也說不定?

完

八月三日 -- 雜記

26/7(一) -- 同姑姑傾開, 佢唔知發咩神經突然話想食荃灣間米線, 於是臨時同佢去左食, 之後行左下荃豐同南豐散。

27/7(二) -- 返半日工, 下午放假, 先返屋企再出去join關老B, 去灣仔檀島食左d野入場睇書展, 殺到完場過晒時間先走, 敗左唔少野(竟然大部份都唔係字噶書) =_=, 之後搭車入TKO放返d野屋企再出去食飯, 叫埋Angel但係佢到時我都要走; 遲到左少少上堂, 聽到10點放學返企。

1. 又再印證了自己的強項/弱項和定位, 還是儘量去快樂地接受現實吧。

28/7(三) -- Angel返左HK之後累, 所以cancel左睇"唐山"; 約左Grace食飯@ King 1, 之後行左寶琳。

2. 居然比人話我似Lotso =_=, 無理由掛。

29/7(四) -- 係土瓜灣收工, 昆你陪我行紅磡奇趣, 再行IN's Point(又買野), 再去幫KTG睇錶, 點知無佢要噶野, 之後食MK金寶, 再去幫佢睇左下錶都無, (又買左國產噶項羽同袁紹), 之後散。多謝昆你陪我行足全晚呢。

3. 連同事都話我似Lotso =_=, 攪錯。

30/7(五) -- Jenny來HK, 收工陪佢去左SaSa同采豐行買野之後去YMT李錦基食Vietnam野, 都係MK金寶好食d; 之後返企。

31/7(六) -- 同死黨圈(娟, 威, Jenny, 民, 源, Sam, Esther, Dorothy)唱K, 1點半唱到8點, 抵; 之後去左金蘋果食飯後散。

1/8(日) -- 同Jenny在家hea了一天, 睇左一直想睇噶"月滿軒尼詩", 好睇呢, 我始終都係喜歡小品; 4點幾去食左個晏左噶午餐、早左噶晚餐, 屋企樓下噶ShabuShabu。Jenny 7點幾走。

2/8(一) -- 收工同Cass食飯, 去左淘大某唔記得名噶齋鋪食, 形式好似快餐店, d餐都幾平, d野食普通都唔錯, 食完行左下淘大+德福散。

4. 比人話我唔似Lotso, 不過似Pooh =_=, 唉。

5. 呢個星期好似諗左好多野, 但係又好似唔多記得, 好一種茫然若失噶感覺...失去左d咩呢?

6. 覺得自己慢慢回復返07年前噶我? 但係又好似有d唔同, 而且, 唔想產生任何不必要噶誤會同麻煩, 都係小心d好。

7. 見到出左紅蓮裝曹操同袁術, 睇來要去一去SSP了...

3/8(二) -- 起身有d頭痛, 好軟弱噶情況下決定請病假(睇返對上一次係六月中, 都ok啦); 係屋企hea足足足一日, 真係好hea, 雖然好無聊同有d悶, 但係打下NDS, 攪下Pet-So, 睇下高木直子噶繒本, 打下野, 聽下歌都好寫意, 自己都好耐無咁悠閒地過一日呢。(就爭左唔夠時間攪埋模型就perfect啦)

8. 上網睇過下周秀娜同慳d啦Baby噶相集, 麻麻地姐...

9. 七月份精選詞語: 隊型, 無視, 還有部署。

來緊:

4/8(三) -- 話劇第一堂; 今次會記住每一堂玩噶練習呢。(and之後逢星期三)
5/8(四) -- dine w/ Mandy in TKO, 仲搵緊多d人
6/8(五) -- K gathering w/ URA buddies
25/8-26/8 -- 好似係呢2日我要去roadshow幫手

完

七月二十五日 -- iMax

1. "拋" & ATM

19/7(一) -- 早上頭很赤很辛苦, 不過做發起人同班同事食飯, 雖然有點軟弱但都返左工; 收工同大家(我, 昆你, 昆你老公糟媽, 茄輪, 呀植, 呀儀, Penny, carol)食灣仔金源, 傾偈到10點散; 好開心噶一次gathering。

2. 之前講錯野...真的衰左, 唉, 唔講對唔住啦, 但係真誠有悔意! 謝謝你!

3. 同茄輪在晚上傾了好一些事。

20/7(二) -- 臨時約左昆你食飯, 用聰嫂個榴槤甜品引左佢 XDDD; 收工即入坑口, 順手試埋間意粉, 由於時間尚早唔使等好耐; 食完就去左食聰嫂, 之後行返去尚德, 陪佢搭車出KT直車返轉頭TKO。

4. 想取消了那電話卡, 發了神經, 對不起。

5. 今早的我是10。

6. 先把話說得滿了, 再成功完成任務/勝出比賽, 才是"型"!

7. 盲目盲目盲目地做攪手, 盲目盲目盲目地想唱K, 不停唱; 我的興趣而還能夠keep住做的, 差不多只剩下唱K了。

8. 認真並沒有錯, 錯在過份認真。

21/7(三) -- 收工返企食飯

9. 卑鄙是卑鄙者的通行証，高尚是高尚者的墓誌銘 -- 林夕

10. 呀哥同民仔同佢d社團友上SZ, 第日係SZ去上海, Home Alone for 4 days。

22/7(四) -- 臨收工黑雨, 收工返企食飯

11. 呢排使左好多錢。

12. Call me Ying! K More Ying -- K魔瑛!

13. 繼7月頭日本之旅攪唔成, 8月頭噶Singapore之旅睇來都泡湯。

14. 好耐無試過咁早訓到呢, 11點幾~~

23/7(五) -- 晚上同花姐姐入左博康食飯, 食完搵左呀娟拿返d野, 之後返企。

15. 最近慢慢回復返好多年前噶自己, 不過覺得自己有d過渡活躍, 毫無顧忌咁講野, 識朋友, 同好多人混熟, 約好多人去街去玩, 有d過左頭噶感覺; 事實噶自己、一個人果時噶自己又係點呢? 係咪真係好返好多呢?

24/7(六) -- 呀進之前果日先知來唔到, 好早醒, 先去KT放底對皮鞋整, 之後搭van去荃灣搵八婆, 同佢一家同呀源食北海道活壽司; 之後等到差唔多3點呀娟同威威先來, 玩得一陣board game到6點佢地就走; 之後6點半島, 都無咩人玩唔到d咩, 我同源就去荃豐是但食d野散。

16. 極想睇唐山大地震!

25/7(日) -- 晨早發夢, 晨早醒, 好辛苦。中午去KT拿返對皮鞋, 好得呢! 之後拿埋對皮鞋去柴灣攪爺爺單野; 一如所料三點島走得, 之後本來想返屋企淋個浴換個衫出來, 但係太趕廢事; 係坑口join左關老B之後一齊去TST睇Toy Story 3, 第一次i-Max呢~~ 個螢幕好大~~ 套戲都好好睇~~ Pixar噶戲係無令人失望噶! 之後去左King 1食生日飯, 傾到10點島返企。

17. 經過一輪掙扎, 因為專重爺爺+可能有蚊+睇戲可能凍, 結果著左長褲; 雖然唔係真係好辛苦, 但係都有d時間幾熱...睇來呢個夏天除左返工之外要全著短褲先得~~

**********

來緊:

26/7(一) -- 臨時約左姑姑食荃灣米線
27/7(二) -- 下午請假同關老B去書展; 晚上學車上堂第一堂
28/7(三) -- 唐山大地震 w/ Angel
31/7(六) -- K w/ 死黨s?
2/8(一) -- dine w/ Cass
4/8(三) -- 話劇第一堂
5/8(四) -- dine w/ Mandy
6/8(五) -- K gathering w/ URA buddies

完

傘

多謝某同事(或者根據好耐之前我噶定義, 係朋友)提供題目; 好難得有人明白我要噶"題目"係點解, 而又比到我噶。記得以前都寫過有關傘噶文, 本來想寫d完全唔關事, 出奇不意噶野, 不過, o岩o岩開始寫返野, 唔寫d咩懶深入噶野, 就簡簡單單, 只係用白話簡單咁講下自己噶感覺, 講下自己諗起傘會諗起咩野吧。

**********

雖然都可以用來遮太陽, 但大部份人諗起"傘", 應該會同"雨"關連多d吧? 以前都講過, 自己唔知點解, 幾喜歡雨天, 一落雨就不期然咁會覺得情緒高漲少少。自己唔多唔少都會喜歡淋雨(而家酸雨犀利, 都唔敢淋了), 男仔夏天又甚少話擔遮遮太陽喎, 因此其實自己都好少用呢樣野。用得少還用得少, 又長期會放一把係袋喎, 主要用途都係用來遮d唔記得帶噶人噶, 哈哈。

一件不得不提有關"傘"噶事。話說從前讀男校, 甚少識得女仔; 係中五畢業時識左幾個新朋友, 其中一個女仔同我熟左(詳見以前blog打過噶); 印象中好似係第一次同女仔單獨約會就係同佢呢~~ 記得果時去九龍灣噶, 落雨佢又無帶遮, 結果就我一把遮2個人, 仲好記得佢無啦啦繞住我手臂(成世人第一次呀), 個感覺係又驚又突然又緊張(薯仔一名), 成個人硬崩崩。呢個絕對係值得一提"傘"帶比我噶珍貴回憶呢~~ (係咪因為咁, 而家無論咩時候都會帶把遮搏仲有呢d機會呢? XDDD)

"傘", 諧音"散"; 好多人都話唔老黎, 唔好拿來送比人; 自己無咩呢d意識, 成日呢d野偏偏就要去做下唔信邪, 不過呢d野有d人覺得寧可信其有不可信其無, 唔好拿自己噶命運來較飛, 真的嗎?

仲有一樣我諗係男仔會比較有多d機會玩噶, 就係拿縮骨遮當劍; 當個遮柄拔出來果下好似劍咁玩, 懶型 XDDD 就算而家自己有時拿住把遮都好無意識咁會咁做, 超低能(但係又唔係為左扮型, 只係好玩)。順帶一提, 而家用緊把遮已經唔可以咁玩了~~ 因為係自動彈出同收噶縮骨遮, 細個恨左好耐噶~~ 自動彈出無咩特別, 型係型在按個制可以收返把遮, 個感覺好正! 又係好低能噶感覺 =_=

暫時就咁多吧, 總算起步打左咁耐以來, 一篇非雜記噶野吧~~

完

七月十八日 -- 雜記

1. 好開心聽到個新聞, 但係又唔講得~~

12/7(一) -- 請左日假, 凌晨睇左WC決賽, 悶波一場...早上臨時約左關老師係坑口食lunch(意粉), 之後吹水同埋行左下坑口到4點島散, 之後臨時約左呀強食飯; 返屋企抖左一下再出去, 終於拿左隻SDX Superior Dragon, 好抵又好靚呀~~~ 行左下先達同皆旺(都好耐無行過啦), 之後去左食洗衣街噶海南雞飯, 食完行左下花園街返企。

2. 西班牙拿左WC champ, 民仔都算稍有安慰啦。

3. 終於facebook upload得返相, 終於upload返一大堆要整噶野上去。

13/7(二) -- 收工臨時約左威威, 咁就報左學電單車了; 之後去APM行左下, 食左KFC, 好耐無試過2個人食桶餐 =.= 雖然威威食多d, 但係我都好飽...之後落左金沙行左個圈後返企。

4. 前年...

5. 唔小心delete左一堆野...由它去吧...

6. 終於報埋學電單車, 唔好計危唔危險, 唔好計之後係咪真係會渣, 起碼自己呢期keep住積極地想向前行噶。

7. 居然比我呢個事先未搵人噶人抽中左戲飛...

14/7(三) -- 同ConnieMartinCarolMandy唱K, 本來呀黃都話來, 點知佢有事無返工亦無去到。

8. 肥在江湖，貓不由吱

15/7(四) -- 臨時被約同民仔HermanBenChoi食飯, 去左NP東寶, 雖然係好食, 但因為間野出名噶關係真係好貴, 自己覺得佢係overratted, 同一價錢去禾輋可以食到嘔都食唔晒, 又好食喎。

9. 開始可以像很久以前的自己一樣, 做攪手, 攪氣氛, 仍然都係攪完就可以躲埋一邊睇人地各種嚷笮態, 但係覺得自己內心愈來愈極端, 對住人開朗時好開朗, 內心噶黑暗卻愈來愈深藏。

16/7(五) -- Carol生日快樂; 同白田同事ManPuzzleWing gathering, 結果去左唱K; 收工去左MK間綠野仙蹤, 買左2本書仔, 之後join埋大家唱K, 果然星期五係sharp cut(其實係未夠鐘cut), 10點幾出到來, 呀Wing第日返早走先, 我同PuzMan去左石磨坊食糖水, 吹水到11點幾散。

10. 君要臣死, 臣Facebook!! (非死不可)

17/7(六) -- 中午臨時約左關老B食晏, 去Jusco果度果間ShabuShabu, 各方面都同"牛陣"差唔多, 不過覺得牛陣好d; 之後去Christine家(Christine, Connie, Martin, Carol, Sean, 呀衛), 又係同Carol慶祝生日, 今年同佢慶祝左三次, 切左三次蛋糕XDDD; 佢地幾個人打牌, 我唔打牌噶就打Winning, hea左一日; 晚上本來Connie同Martin唔留噶, 結果玩玩下都係留低左, 夜晚一齊食勝利小廚, 幾好食都唔算貴, 食完散, 返屋企。

11. 機會噶野一閃即逝, 把握唔到就無的了。

18/7(日) -- 同民仔同呀哥噶社團朋友Cindy仲有佢大學同學唱K, Cindy都唱得OK呢! 而且又好玩得, 又搵多個好K腳~! 之後同民仔去左Time Square開倉果度睇玩具(呀娟同威威都去左), 敗家敗左五百幾蚊 =_=, 之後同民仔買左Jusco壽司上我家打Winning到11點島散~

12. 今日個個都唔開心, 個個都發脾氣噶...係咪我做錯野呢...

13. 感覺好似愈來愈遠...

19/7(一) -- 同而家同事食飯@ Wanchai金源
24/7(六) -- 同好耐無見噶足球機之友龍葵婷婷呀源食飯cancelled, 去八婆家玩
25/7(日) -- 估唔到抽中左戲飛; 睇戲, 終於約實左人
27/7(二) -- 學車上堂第一堂

完

七月十一日 -- 雜記

6/7(二) -- 同同事"昆你"睇海洋天堂, 難得搵到人一齊睇呢。幾好睇, 平平淡淡噶感覺好好, 尤其喜歡那一段含蓄的愛情...

7/7(三) -- 返企食飯休息, 半夜睇波。

1. complete左好多tasks呢, 之前list出來果d攪掂左好多。

8/7(四) -- 收工同Grace去左坑口和花亭食飯之後行左下再去寶琳行+食埋聰嫂。

2. 總欺騙不了自己的感覺。

9/7(五) -- 收工同一班人(呀源, 呀娟, 威威, 舊同事Gordon, 進, 呀康)上八婆家探BBs + 玩; 去到等齊人係佢屋企食齋, 之後開始玩佢d board games, 由於狀態唔多好, 頭暈暈, 所以無點玩...到11點幾走~ 留左部DC係佢屋企唔記得拿走...

2. Bandai繼HG, MG同PG之後, 出左新噶RG, 即係MG噶精細度同埋HG噶大細, 真係好靚...痴線噶..., 不過無咩興趣, 始終都係鐘意BB戰士多。

10/7(六) -- 叫左班同事上我家玩; 中午昆你同佢老公糟媽來同我同哥一齊食飯, 之後上我家等左一下Kenneth同日安伉儷一齊上來, 開始玩到後來Alex同Carol都到, 好熱鬧; 中學同學Chowbenben返左來HK, 叫我一齊食晚飯, 無join到, 由於佢之後都唔得閒, 只可以呢晚, 唔見就要下年X'mas先見, 所以同Carol食完蛋糕、買左一堆野食上Connie屋企食、食完玩左陣Wii的mario Kart之後我就走先, 去TST join ChowBenBen、呀魚、虎媽同呀天, 坐底食左個甜品吹左陣水就散。2頭唔到岸...2邊噶人都唔多滿足到呢, 真係唔好意思...不過返轉頭都係要咁樣...

3. 呀強幫我買左SDX金色果隻Superior Dragon, 超靚仲好平呀~~ $230島~~

11/7(日) -- 早上去左順利打工商杯籃球最後一戰, 當然係輸波, 仍然都係2投1中; 之後臨時搵Carol入左TKO食lunch, join左佢去君傲灣佢地打網球果度, 我當然無打, 同connie左行左陣, 再去佢家打Wii的Mario Kart; 到佢地差唔多打完網球就落去join埋一齊(盧撈, Alex, 呀黃, Kenneth Carol)一齊去魚米家食tea, 之後知道呀黃原來就來搬去坑口, 於是一行人一齊去佢未裝修噶屋睇樓, 之後散。晚上哥叫左好多人上來玩同食野, 我都join玩左一下, 晚上等睇波睇WC決賽。

4. 一星期有4個人來搵我傾心事, 仲要有2個一來就喊...好耐無做過"社工"呢個角色; 不過係第一次係自己都係低沉噶時候做, 好彩對住人(或者話"client")都仲頂得住, 好堅強, 仲可以拿埋自己d傷痕來講...總之幫到人就好了...

來緊:
12/7(一) -- 請假, 凌晨會睇WC決賽, 之後未有plan...
14/7(三) -- 同ConnieMartinCarol唱K, 仲叫緊人; 呀黃好似有興趣, 大2家仲話叫埋個GO?
16/7(五) -- Carol B Day; 同白田同事ManPuzzleWing gathering

完

七月五日 -- 紀

1. 總結返之前噶雜記事項(+ new item):
1.1. 要買黑色波鞋(著緊果對真係唔多得了) -- 未有時間去睇
1.2. 要買headphone(用緊果個都愈來愈唔掂了) -- completed
1.3. 要買NDS袋袋(偷左呀哥果部來用, 唔需要住) -- canceled
1.4. 要買pc手制(無咁急噶item) -- canceled
1.5. plan下來緊旅行? 學車? 參加工聯會course? (報左工聯)
1.6. 想買短褲for summer著 -- completed

28/6(一) -- 收工返企食飯, 之後同呀哥去左坑口行。

2. 呀Wing記得我要買headphone, 咁o岩佢同事有個多唔要, 幫我要左平賣呢, 謝謝!

29/6(二) -- 同Lands舊同事(呀進, Gordon, Wendy, Connie)食飯慶祝Lands個Connie生日; 結果去唱K, 雖然係唔多好玩噶一班(呀進除外), 但係當練歌又好咩都好, 總算唱左K。佢地買噶禮物好得意(貓貓錢箱), 可惜無電玩唔到, 又無影底。

30/6(三) -- 本來約同虎媽呀魚食飯, 不過cancel左; 臨時搵左Cass去左KLB食飯傾偈...有人陪下傾下都係會舒服d, 仲順便行左下街; 9點散左之後自己再去坑口行左圈。

1/7(四) -- 公眾假期無約, 係屋企幾乎訓左一日。

2/7(五) -- 約左班同事食飯Gathering, 後來後加一齊睇波(八強巴西對荷蘭, 應該好睇); 結果本來7個人加到9個人, 去左觀塘上次同Crystal食果間上海野食, 之後6-7個人上左呀衛屋企睇波, 一齊食飯吹水睇波幾高興呢~ 不過反而感覺果日似係睇波為主, 食飯為副咁, 哈。

3/7(六) -- 日頭係屋企hea左一日, 夜晚本來約左民仔同佢d大學莊友睇波, 不過後來Crystal又搵我一齊睇波, 我地2個又加唔到入去民仔度, 結果就我同Crystal另外搵地方睇; 出來第一次見到佢男友呢, 一齊行左下佢要去飲, 之後去新蒲崗同好耐無見噶呀Tim係一間粉麵鋪睇波, 仲臨時叫埋呀娟同威威添, 睇完波散, 好彩無join民仔果邊呢。

4/7(日) -- 早上一早起身去順利, 同同事熱下身, 之後打工商杯, 當然係輸左啦, 起手2射1中, 有d籃板偷波咁, 都OK啦; 之後下午去天樂里同AngelKatyJanetWallace唱K, 都OK呢, 幾o岩玩; 一齊食埋晚飯佢地要睇Octave, 7點幾就散, 我就過左呀哥青年會個party度坐住hea, 佢地氣氛都幾好幾熱鬧呢。等到完party一齊返屋企。

5/7(一) -- 請左一日假; 約左呀娟食lunch, 食完呀娟返工之後自己去SSP福利買左百幾蚊共3盒模型, 再去MK等八婆到左上采豐行, 跟住去巴黎咖啡店坐同吹水; 之後上返Lands舊office同八婆拿返佢d野, 再過返In's Point睇玩具, 又買左一盒模型+一套扭蛋, 再搭地龍返荃灣, 去街市買左d送上佢家整野食, 食完飯吹水到10點島走; 好耐無試過一使使二百幾蚊買玩具呢~ 不過好抵買左好多野~~

3. 一年

4. 病情反覆...怎麼辦...

5. 又慣性好早醒, 好辛苦。

6. 世界杯四強了, NBA Free Agent開始簽得約了, 今年d free agent class好勁, 好期待有大轉變呢~ 不過暫時都係無咩郁...一係就留隊...

7. ......

來緊:

6/7(二) -- 同同事昆你睇海洋天堂, 難得搵到人一齊睇呢。
7/7(三) -- 返企休息, 半夜睇波
8/7(四) -- 同Grace食飯?
9/7(五) -- 同一班人上八婆家探BBs
10/7(六) -- 未有plan
11/7(日) -- 早上工商杯籃球最後一戰
12/7(一) -- 請假, 凌晨會睇WC決賽

完

六月二十七日 -- 雜記

1. 總結返之前噶雜記事項(+ new item):
1.1. 要買黑色波鞋(著緊果對真係唔多得了)
1.2. 要買headphone(用緊果個都愈來愈唔掂了)
1.3. 要買NDS袋袋(偷左呀哥果部來用, 唔需要住)
1.4. 要買pc手制(無咁急噶item)
1.5. plan下來緊旅行? 學車? 參加工聯會course? (要實行先得)
1.6. 想買短褲for summer著

結果一樣都未買未做。

21/6(一) -- 收工返家食飯。

2. 竟然有2個人同一晚發夢見到我...不過都係男噶... =.=

22/6(二) -- 拿得眼鏡, 本來Angel話星期二唔得, 之後又OK; 跟住話要9點前返到屋企, 最後都唔需要, 不過要晏d出; 本來約左呀喱8點幾9點拿返個小提琴, 最終可以收工去拿左先; 去到中環因為人為問題結果等左好耐7點差唔多半先拿到小提琴, 返屋企放底d野換衫過去坑口, o岩o岩Angel亦到坑口, 總算無白費等噶時間; 終於拿到眼鏡, 之後去左茶記食飯吹水, 係TKO散。

3. Delete了d野。

23/6(三) -- 白田飯聚補, 不太樂觀。果然都係少左好多人; 本來想去渣華軒, 點知比人包左場~ 結果去左意蠔站; 雖然期待左好耐噶飯聚, 延左2次都係唔齊人, 但係人少少一樣傾得好開心; 期待16號唱K! 好耐無聽呀ManPuzzle呀Wing唱k啦~

4. 今日比Puzzle姐姐(嬸嬸至o岩)教壞, 買左波, 哈哈~ 居然中埋三穿一, 哈哈。

24/6(四) -- 本來同同事打波。但係天氣反覆, 無打。同Queenie去左炮台山睇貓貓+買玩具+北角食福建野。

5. 係街度見到架巴士寫住"模特兒招募比賽"; 大家覺得有問題麼?

25/6(五) -- 返企食飯; 食完同呀媽係樓下行左下街吹水。

26/6(六) -- 本來民仔約左Money唱K, 我地班人幫手"鄧腳", 民仔好難得好積極呢! 不過可惜失敗左, 約唔成。之前果晚+早上由頭睇追到update港漫"溫瑞安群俠傳"; 下午民仔來打機打左成晏, 打到頭都赤, 之後行左去坑口食飯, 食完行左東港城再去埋寶琳行新都城, 想走時都10點, 見個商場直播世界杯南韓對烏拉圭, 就諗住睇下個頭, 睇睇下唔錯睇左成場, 之後返企。

27/6(日) -- 好想打波, 但係當然打唔成; 本來想自然醒夠早噶話睇早場, 不過爭dd, 早場睇唔到; 睇左中午場, 都係貴多10蚊姐; "打擂台"好睇呢, d人果然無講錯, 好有feel, d配樂都好正, 值得一睇; 下午hea左下, 之後頂唔住訓到食晚飯。

記返一d上星期噶事:

6. 出site時見到有個男人, 係觀塘道無紅綠燈噶中間位, 由對面馬路直奔過馬路, 之後仍然係馬路邊唔係行人路噶位一路狂跑, 仲要跑到啪啪聲, 最勁噶地方係, 果個人用一個好猙獰噶面孔一路叫住"呀呀呀呀呀~~~~!!!!"咁跑! 好有氣勢同埋feel到佢真係全力全心全意咁跑緊!

7. 記: 係公司同Kenneth講左d野, 令佢hang機, 個樣超好笑。

8. 放假時同呀娟威威Jenny係新都城萬寧見到個著住碎花連身短裙白雪雪樣貌身材都唔錯噶女仔, 係個domdom架前面係度慢慢研究d domdom, 仲拿左2盒係自己個購物籃度添~~

9. 不是我還可不可以再愛的問題了, 而是我還有能力讓別人幸福麼?

來緊:
29/6(二) -- 同Lands舊同事食飯慶祝唔知邊個生日, 未confirm
30/6(三) -- 同虎媽呀魚食飯, 未confirm
4/7(日) -- 同AngelKaty等人K, 未confrim

完

六月二十日 - 雜記

1. 總結返之前噶雜記事項(+ new item):
1.1. 要買黑色波鞋(著緊果對真係唔多得了)
1.2. 要買headphone(用緊果個都愈來愈唔掂了)
1.3. 要買NDS袋袋(偷左呀哥果部來用, 唔需要住)
1.4. 要買pc手制(無咁急噶item)
1.5. plan下來緊旅行? 學車?(要實行先得)

14/6(一) -- 約左Cass陪我同Angel去Times果間88配眼鏡(因為有佢有半價)。大家都諗左自己係要咩噶, 所以好快就配完; 呀Cass走先, 配完後同Angel本來想食Applegreen, 但係要等, 於是想轉去食咩飛機cafe(唔記得咩名), 點知內部裝修, 最終是但去左間茶記, 食完行去灣仔果邊, 再食左個麻麻噶甜品, Angel陪我等巴士, 散。

15/6(二) -- 一直都OK想睇波斯王子, 之前果日Angel講開會同佢朋友Katy睇, 仲係TKO睇添, 於是就join埋一齊睇; 好開心識多個TKO噶朋友呢, 大家都好雀躍識到TKO fnd; 係魚之味食完飯, 臨時加埋Angel同事呀龍4個人一齊睇; 套戲都唔錯, 不過略嫌太多跳跳跳噶戲, 反而覺得有d over, 而且個演員唔係動作演員出身, 好多鏡頭都係剪接出來, 無咁正; 個結局雖然係唔錯, 不過都係有d美中不足呢。

2. 新發現: 原來自己自言自語果時, 成日都會用英文或者普通話噶, 反而唔係用廣東話喎。

16/6(三) -- 公眾假期, 全日在家無出去, 無野做好悶, 砌+油左幾隻BB戰士, 好耐無開工同咁有心機呢。是晚KTG同佢未婚夫來左。

17/6(四) -- 本來約左白田同事們食飯, 好期待。點知有人唔記得, 又有2個人病左, 於是cancel; 臨時約左威威, 入元朗睇玩具, 食左間茶記(本來想食岩手拉麵)加B仔涼粉。有電單車坐真開心。

3.1 做了不願回家的孤魂野鬼

3.2 為何總是口不對心, 說違心的話

3.3 為了防止傷害, 硬不起鐵石心腸, 就讓冰封了它吧

18/6(五) -- Jenny來港, 同同事去睇+買相機; 收工搵左花姐姐一齊食飯, 本來想食CityCanteen, 之後講講下去左好耐好耐無去噶南山村樹記, 仍然健在+平呢。食完行左去SSP睇左下玩具, 散...

4. Lakers贏左總冠軍了~~ 終於又完一個球季~~ 今年LBJ被人踢左出局已經覺得好夠, 不過Finals 2隊係比較想Lakers贏噶~~ 下年咁多勁噶free agents, 一定風起雲湧了~~~

19/6(六) -- lunch同Jenny娟威威去左好耐無去噶佐敦"牛屋"食飯, 之後就陪佢地行街, 兵分2路, 女仔去左行護膚品, 我就同威威行; join埋之後再行廣東道名店-->In's Point, 之後佢地+埋威威表弟去睇A Team, 我就同Aki+Janet唱K, 8點半入去, 都係11點幾照cut歌, 而家似乎真係無無限唱呢支歌仔唱(勁唔夠喉); 同佢地散左之後尚早, 行返去佢地睇戲果度等埋佢地, 散, 搭到尾班巴士。

5. 係機鋪見到出左新噶鼓機! 今次好真實! 有2邊Cymbol+左右腳踏+3個tom!好正呀~~

20/6(日) -- 在家hea左大半日, 呀娟威威勁hea咁先過來; 睇左張敬軒噶08'拉闊變奏廳, 勁唱林憶蓮d歌, 好正; 執左下間房, 之後佢地5點幾先到, 去食魚之味+行下寶琳, 之後返企執埋野散。

來緊:
21/6(一) -- 本來諗住拿得眼鏡, 點知要星期二先有得拿, Angel要星期四先得閒添; 打算返家同老爸食返餐飯。
22/6(二) -- no plan, 搵威威去對面海?
23/6(三) -- 白田飯聚補, 不太樂觀。
24/6(四) -- 同Angel拿眼鏡。
25/6(五) -- 呀哩還返小提琴比我?
26/6(六) -- 民仔約左Money唱K, 我地班人幫手"鄧腳", 民仔好難得好積極呢!
27/6(日) -- 好想打波。

完

附: 夜半敲門
本來唔想打落blog, 不過始終係自己想記底野噶地方, 都係貼埋過來; 某晚訓唔著上facebook貼噶一篇文。

頭好暈...好暈...我好乖了...今晚好早就關機去睡...可是頭好暈...睡不著...好想嘔...身體好像火燙一樣...腦子、血管一跳一跳的...好辛苦...就是睡不著...
早睡的話就會很早醒來...晚睡的話第二天又好累好辛苦...好想一早就睡著, 一睡醒就天大亮, 好想好想...真的好辛苦、睡不了, 才再開電腦, 記下這些亂七八糟的東東...

夜深人靜, 突然間什麼不好的事情都湧出來, 小時候的、讀書的、上班的, 之前的事, 自己的、家裡的、朋友的...承受過的什麼都浮現出來, 好累好累好累...;記憶力太好, 不只會在幼兒園時期懂得背乘數表, 不只會在小學記得很多艱深的英文生字, 還會將很多很多不應該記得的快樂事情、痛苦事情統統都記在腦中, 揮之不去; 為何總是在不應該的時、地, 喜歡了不該喜歡的人、事、物; 人生隨著時間累積起來的, 不只成長、知識, 還有傷痕; 3點多了...好想唱K。

好想充實地過著每一天; 人生為了什麼, 沒有人知道, 也沒有人說得出死後會是什麼世界; 做壞事不見得有惡報, 做好人卻是吃虧得緊; 好想自己的blog好像以前一樣, 會寫故事, 寫感想, 寫短文, 寫雜七拉八的無聊東東...; 好想去旅行, 確實地去準備但一開始就失敗了、泡湯了; 學車麼? 幾時?; 手跟不上腦子的速度, 很多很多很多想到的東西都打不到, 記不下來, 腦筋一直在轉轉轉轉轉轉轉...

曾經說過, 不會再在別人面前...不會, 不會的了...讓我在這個時候, 記下自己的感覺...再等明天眾多朋友發的東西給淹沒吧...原諒我沒有文法、沒有鋪排、沒有整理過、極多語病又沒有連貫性的句子、段落。最好, 沒有人看到; 真的嗎? 那就不如別貼出來、或者刪除了吧?我還是應該做好自己的角色, 每一個人都有自己的角色, 就好好的扮演自己的角色, 不要超出別人想像中的角色範圍(好朋友?)就好了吧?那還是我嗎?

大家給我題目好嗎?好想有題目, 只是題目, 不用題材, 讓我去想、去墮入自己無邊的妄想中, 不如在此徵求題目吧? 有人可以出一個"題目"給我嗎? 好嗎? 只是一個"題目"就可以了...寫完, 我不會怕被恥笑, 會貼在facebook上。給我吧。

瘋了? 瘋完了? 瘋夠了麼? 怎麼也好, 這篇不會在blog出現, 只在夜深facebook留言+吃飽飯沒事做, 又不在貧窮線以下, 不是真正煩惱的感想...完畢。 03:28 15/06/2010

完