人類的進步

本來只想談談有關藝術方面的東東, 不過愈想愈多愈遠, 最後還是想談"人"的文化、想法。

**********

隨著時代的變遷, 科技的改革, 經驗的累積, 人類從數千年的歷史中應該在不斷的進步。可是, 究竟是怎樣地進步了呢?

起初, 我是看到了一個現象: 很多有關藝術的東東, 都是以前勝過了現在, 不論是書法, 畫, 音樂, 文學作品, 甚至較為現代的電影等等, 被稱為"大作"、"經典"的, 都是從前的東西。好像是古代的以前的都是好的, 現代的人再生產出來的, 就沒以前的那麼好(尤其是名畫, 名字等等, 有誰會說現代的畫家書法家比以前的好?)。

為什麼會這樣呢? 原因可能有以下(當然亦不只這些):

(1) 古代的(或以前的)人沒那麼多姿多采的娛樂/事情, 因此能較專注。
(2) 現在的人總覺得新不如舊, 而且覺得以前的東西總是好的, 香的。
(3) 很多事情已經進步到了極限, 很難再進一步, 已經到了"樽頸位"。
(4) 一代不如一代; 現在的人已經不重視這些東西了。

不論是哪個原因, 這些都只是有關藝術方面東東的退化原因。

真正想到的, 是人類除了科技進步了, 賺錢的各項方法系統進步了, 生活是舒服了方便了; 其他的東西有沒有進步呢? 不要說藝術這些陶冶性情的東西; 現在的文化、人與人之間的關係、人的心性各方面有進步了嗎?

又回到了老話題。
真的覺得現在的人很不同了。有時回到鄉村地方, 或者看電視, 見到一些生活在偏遠地方或較窮地方, 人們真的比較純樸, 十分可愛。現在社會開發得愈發達的地方, 人就愈沒有了一些特質。在拜金主義, 金錢為上的世界, 大部份人都只向錢看, 除了錢以外, 其他的生活及思想就變得很空洞。人與人之間的關係, 隨著科技的發展, 卻不見得更加接近(嘿, 人們的肉體關係卻很接近, 很多的接近; 心靈?......)

即使是很好的朋友, 說話也會很容氣, 很避忌小心, 不盡不實; 有些人交朋友更十分功利主義, 幫不到自己的就不是朋友。人對人都十分小心, 事事保護了自己, 大家都很虛偽, 開了幾層防護網(卻不知其實別人也看穿了自己, 甚至大家也知道大家也是虛偽的); 人看人也變得愈來愈表面, 不是看賺錢能力就是看外表漂亮與否。

賺不到錢, 上不到高位的就不是成功, 生活在平靜安穩世界不懂得/不想去投資的人就是"戇鳩"(這詞語只是轉述, 原汁原味地把別人的說話呈現, 不要責備我說粗口)。追求錢以外的東西都變了是不設實際的, 或者應該是退休以後想的事情。

社會上大部分的現象, 當你發掘到最後, 原因也只不過是為了錢。不只商場上黑暗, 其實小至娛樂圈大至政治上的一切也都只是騙人的, 一般人看見的只是很表面很表面的東西罷了(這些大家應該一早就知吧?)。到最後就只是錢錢錢。不愁錢的人, 像某些二世祖, 或者政府架構的某一些冗員(好在也有一些好的...), 就渾渾噩噩, 成了社會的寄生蟲也就算了, 最慘的事吃飽飯等屁放, 自己是廢物又要麻煩到人的那些垃圾...

為理想而努力? 為民族而奮鬥? 為大義而犧牲? 在這繁榮的社會中提也別提, 提了也只會被人當作傻子。

在此並不是想探討人生究竟是為了什麼, 以上只是一些很膚淺的見解。
不過經過了千百年, 人類卻仍然不能從以前的經驗學習。爭執仍然存在, 罪惡仍然發生, 戰爭仍然爆發...世上不平不快不該的事, 從來也沒少過。究竟人類進步了什麼?

當然, 自己也不是什麼聖人, 也不會大義凜然地說別人錯, 只是偶爾想到了這些東西, 就記了下來而已(而且由於思想比手快, 有很多意念已經在打字的時候忘記了...唉)。自己只想與大家開開心心, 風花雪月地過快樂日子就好了。人類的進步嗎? 就別再想那麼多了。

完

三月三十日 -- 雜記

1. 25/3(二) -- 返企食飯剪髮寫大字揀埋歌。

2. 26/3(三) -- 大字堂

3. 27/3(四) -- 之前果日臨時約食Martin生日飯; 由於大家無意見於是我提議去左花滿樓。食之前去左旺電買2G的SD card, 而家好平呢, 八十幾蚊咋。終於部NDS又可以放返好多games入去了。花滿樓d野唔太差掛? 食完行一陣先返企。

4. 28/3(五) -- 收工極累, 返企。

5. 29/3(六) -- 當然繼續short week, 係企抖。中午自己煮左個"沙爹司華力腸燒賣天使麵", 雖然騎呢但係ok呢, 呵。晚上試整牛柳扒, 估唔到味道都OK, 不過都係煎耐左少少...

6. 30/3(日)-- 當然無返大球場, 早上打波都OK, 打完同民仔行街同佢睇左陣衫, 之後身體狀態甚低同佢返企打機, 晚上睇獎門人幾好笑。

7. Gundam OO終於完左第一季, 尾呢幾集好好睇呀~~ 好熱血又打得精彩。

8. 天氣開始熱了...

links:
潮語字典 -- 身為HK人, 點可以唔識? 推介大家睇睇!
http://hk.myblog.yahoo.com/abraham-lincoln/article?mid=3077

攪笑動物圖 -- 好攪笑的動物圖
http://www2.discuss.com.hk/viewthread.php?tid=6733643&extra=page%3D9

半斤八兩日本人唱version XD, 幾無聊, 不過幾攪野
http://www.youtube.com/watch?v=imXil3ioBWk&feature=related

好勁的掃描
http://www2.discuss.com.hk/viewthread.php?tid=6677252&extra=page%3D16

完

轉貼: 家明雜感﹕生命是用電影煉成的

世界上無奇不有, 呢d野都無咩值得驚訝; 轉貼出來係因為入面某d野好認同。

**********

家明雜感﹕生命是用電影煉成的 (明報) 03月 23日 星期日 05:10AM

【明報專訊】在眾多文藝愛好者之間，是不是只有「影癡」才這麼雜食？就是說但凡「電影」，無論新片、舊片、爛片、cult片、紀錄片、前衛電影，古今中外，都可以吸引影癡的注視。不少影癡，就以什麼電影都看為榮。如果看電影真的等同飲食口味，那影癡必然是凡可以下嚥的，都願意一試的食客。
影癡電影看得多，都是一台會行走的電影字典。他們是內建了 metadata的資料庫，可以隨時如數家珍，滔滔不絕，歷史哲學、天文地理扯個不易樂乎。一個人名或戲名，影癡總有說不完的電影往事、童年回憶、技術概念、歷史理論、相關知識……，或再牽連出十個人名廿個戲名，每筆資料總可一再無限延伸，沒完沒了map下去。
《Cinemania》影癡實錄
前陣子看了2002年一部美國紀錄片《Cinemania》，圍繞幾個紐約的影癡。他們是怎樣的瘋迷程度？每天看3至5部電影，全年無休。他們從不社交，影癡間離群獨居。若有電影要看，他們不出席婚宴、葬禮或到醫院探望朋友，毋須掙扎，朋友自會明白。對影癡而言，電影比愛情、性更重要，電影已不止是「迷戀」（beyond obsession）。這幾個影癡沒有工作，有些人節衣宿食、有些繼承親戚的財產，不找工作、發 展個人事業，全為了節省時間看電影。他們熟悉紐約所有電影放映場合（如MOMA），熟讀每周的時間表，以時間換取空間，像我們在電影節編排時間表「趕場」，分別只是，他們天天都是「電影節」，做人的目標就只一個：「看電影」。
有個叫Bill的哲學家，每次觀映前，必定洗浴、換上乾淨衣服及內衣褲，確保以最舒適的狀態入影院。而且每次都把眼鏡清洗乾淨，他對不潔的眼鏡有恐懼，像患有「強迫症」的人不住洗手一樣。有個叫Jack的，飲食習慣也得遷就。他不吃全素餐，因為大量蔬菜影響腸臟「時間表」，變相減低看電影的效率。有個叫Harvey的，他隨口可說出任何影片的長度，在蒲影院時，常主動向主辦單位更正影片的資料：「By the way，今晚那部片子其實是108分鐘才對」。
終極影癡樂與怒
有個叫Roberta的中年女人，個子不高，說起電影來卻斬釘截鐵，很有霸氣。她說自1950年代開始對電影認真，此後看電影不絕，收藏所有票尾、大量放映節目表及珍貴電影紀念品，雜亂無章堆滿自己居住的小單位。她不算易相處，多次跟影院的職員摩擦，MOMA的管理層決定取消她的會員資格，不歡迎她再到那裏看戲。至於Jack，也因為常在影院跟別人吵架、打架（他要教訓在影院談話、吃東西的滋擾者），屢被警察逮捕。
《Cinemania》的終極影癡，全部都沒有工作，沒有家庭，沒有戀人。看在我們這些沒有工作就混身不自在的打工仔眼裏，都是異類。他們其貌不揚（嚴格來說都很醜），居室狹小，卻堆滿書本、影帶、雜物及垃圾（塑膠袋、廢紙）；那副狼狽，也肯定不是我們見慣窗明几淨、落地破璃的小布爾喬亞心態能夠明瞭。他們不修邊幅、衣衫襤褸、頭髮蓬鬆、帶厚厚的老花鏡，頂大肚子踢涼鞋便出門，而且總提或背上大包小包。要是在香港的街頭給我們撞見，不被看成精神有問題或露宿者，也準被判定為「雙失」的loser無疑。
電影節熟客與稀客
但這些終極影癡除了看電影，什麼都不在乎，也休管別人怎樣看。 Jack的朋友曾問他，會不會覺得自己很不正常？他說會，但「不正常」有什麼不好？「正常」只代表大部人的行為，不一定見得就是好或對。又有人問他一天到晚蒲影院，不是很逃避現實嗎？他說，「逃避」本來就是電影與生俱來的功能，再說「現實」有什麼好稀罕，誰願意活在這見鬼的現實？
香港有沒有這樣狂熱的影癡？這些年看電影節或其他特備電影節目，偶爾也碰見一些逢戲必看的熱心觀眾。有位好像叫阿漢的老人家，很低調，但多年來出現在不同場合，看電影看展覽都碰過他。另外有更多叫不出名字的影友，有人總要佔差不多位置（所以文化中心大劇院第一排都是熟悉的臉孔）；有些人提大包小包，節目表及場刊放滿一袋，手上的戲票厚厚一疊。香港的電影放映數目遠遠不如紐約，但好些觀眾還是矢志不渝的，只要有機會就蒲電影院去。反而最怕一些為趕時髦湊電影節熱鬧的稀客，幾年光景不到，已經一副「曾經滄海」的老鬼姿態，說電影節變了、電影褪色了，自己不得不放下身段，電影節沒參與好多年。本來人各有志，要過主其實不必說出來；而且江山代有影迷出，少你一個，沒人會放在心上的。
說起神憎鬼厭，大部分人都像《Cinemania》的Jack 一樣，最討厭影院的滋擾者。你有權說話、向女朋友解話，但我也有權喝止你、公然咒罵你，自由社會人人平等。常覺得，第一次看一部電影，就像初夜，一生人就那麼一次，要是你故意來挑撥，高談闊論或大聲接電話，斯可忍孰不可忍，一定不讓你好過。令人好奇的是，《Cinemania》的Jack愛恨如此分明，若出現在今年香港電影節開幕觀賞山田洋次的《母親》，目睹主辦單位在電影放完前，急不及待多次公告貴賓酒會之安排，將有什麼言論及反應？
文﹕家明
編輯：葉旺文
策劃：家明

三月二十四日 -- 雜記

1. 18/3(二) -- 同而家o既同事Spenser俠士Grace凱琪仲有呀怡Charlene唱K; 好耐無唱無狀態不在話下, 係Neway City唱(呀怡識人可以唔限時+9折), 都唱得幾開心, 11點幾散。

2. 19/3(三) -- 由於某死黨轉工人工暴漲, 因此想食好野, 亦因此走堂; 3個人去左新蒲崗o既大盛食; 總店o既質素好過KT好多, 是日無顧忌地食, 好好食, 多謝某死黨請 XDD

3. 20/3(四) -- 收工留係公司三個人打機; 一齊打好玩好多呢~ 之後快食埋飯返企。

4. 21/3(五) -- 一堆人一齊去踩單車; 去到大圍食d野(又食日本野, 一星期食左好多次 :P), 之後發現租單車好貴($150, 有鋪頭仲$180添)! 太貴了, 假期坐地起價; 大家於是決定唔踩單車直接去SZ玩。Sam, Ivan, Jowelle, Penny四個人上去先, 咁o岩呀哥又上去, 我, 民, 馬, 娟等埋佢一齊上去; 先去書城買同睇書, 等到G來埋join, 連埋呀哥o既frined (愛, 莎)一齊去join呀Sam佢地; 中途食d野, 跟住去左篤波+碌Ling; 8點幾先走, 9點幾先去到食海鮮, 好好食又好抵食, 食完之後12點幾佢地去按摩, 我+哥+G就返HK, 返到企2點。

5. 22-24/3(六-一) -- 係企抖同打機, 上網; 睇左獎門人同早熟; 早熟果2對父母(黃秋生,曾志偉,毛舜筠,余安安)做得好正呢~ 星期一下午出左來, 同死黨1+2行KT, 到倉睇波鞋, 居然佢地2個買到我買唔到...之後4點幾同Nike係APM食tea傾偈, 再行一陣, 之後返企食飯(本來預同佢一齊食, 不過有人話唔食所以返企食)。Nike星期二返美國了。

6. NDS出左一系列o既新game好似好好玩; 忍者龍劍傳, 期待已久o既熱血躲避球, 正呀; 原來仲出左幽遊白書, 好想玩~

7. 係網上見到有地方譯o既Mario vs Sonic奧運: 水管工人大戰變種老鼠 =.=

8. Gundam OO第一季已經播到尾二啦(#24), 故事去到白熱化階段, 雖然d迷團要第二季先解, 但係而家主角們o既危機到底...?!

9. Hunter x Hunter keep住仲有出, 真係好野...希望keep到啦。

10. 金庸果堆新版書仲未借到(剩返果d都係好睇d同長o既作品了), 不過由於各種關係, 唔再寫d讀書報告了 :D

11. 今日得知某Lands舊同事散左拖...

**********

Links:

Street Fighter 4 trailor, 估唔到街霸摺左咁耐又出返!
http://tw.youtube.com/watch?v=K7fVk8lfI6c

Street Fighter the Movie?!, 估唔到仲有電影會拍?!
http://www.imdb.com/title/tt0891592/

完

三月十七日 -- 雜記

1. 10/3(一) -- 幫Catherine去KT拿野, 之後食大盛, 好早返企; 11/3(二) -- 返企; 12/3(三) -- 上堂; 13/3(四) -- 約左中學舊同學Nike食飯; 同死黨一二+Nike去左灣仔金源再試燒雞, 好味, 由於有人等, 居然好早被趕走, 甜品都無買...之後去左Pacific Coffee坐, 本來諗住早走, 點知臨尾Nike話要影相, 叫左個唔識o既鬼佬幫我地影, 之後個鬼佬同我地攀談, 講左好耐先走...其實如果唔累第日又唔使返工係好好的...不過真係幾累...; 14/3(五) -- 返企; 15/3(六) -- 出左KT諗住行d倉, 點知原來無左...行左一輪, 發現另一個地方有好多波鞋賣, 仲有好多我著開o既牌子添(MK已經唔係好見有...)下次要同死黨一去睇睇; 16/3(日) -- 無波打=.=, 下午去Spenser屋企玩; 9個人, 4個人打麻將, 好耐無試過5個人打賽車!! 好好玩好緊張!! 呀Wing果然係好敵手~~ 好累無試過出晒全力打同埋打到咁累, 晚上去左外野手, Spenser請我食, 呵呵, 不過食到好飽, 晚上唔係好訓得著...

2. 好想打羽毛球, 有左新拍之後反而好少打...好想做多d運動呀~~~

3. Gundam OO去到第一季季尾, 真係極好睇呀~~好感動!! 劇情合理打鬥好睇又唔會有咩人或者咩機贏晒, 而且d人係會死o既, 唔係話點打都無人死。今集真係睇到大家心都up呢~~!!

4. 同第二條link有關的一句, 凶手Bowen講的一句: "I'm a Christian," he said. "Sometimes when we feel like we're wrongfully accused, you have to look at it as people we try to emulate our lives after were wrongfully accused. It's about how you handle that, more than anything else."
呢句野真係某d教徒o既典範, 亦都係我唔鐘意某d教徒o既原因。

5. 今天17/3(一)很累, 推左同batch gathering同貓gathering都無去, 返企。

Links:
講緊MTR港鐵o既野, 不過...係用Gundam OO入面o既其中一段, d語音都係跟返原本o既; 不過中文字幕就改左, 改到係講MTR o既野, 但係d表情氣氛又好o岩噃, 好好笑; 唔睇gundam o既人紀絕對都可以睇~~~
http://www.youtube.com/watch?v=9mKFDhSOilc

Bowen攻擊Chris Paul片, 第二條係高清版
http://youtube.com/watch?v=w8WXVJQ06Sk
http://youtube.com/watch?v=hZNwSC_6H90&feature=related

狗狗咬貓貓, 真係唔識死,好笑
http://www.youtube.com/watch?v=76-tL5NulhU&NR=1

完

拍拖白痴?

很煩亂。想到很多東西, 難以組織, 儘量寫下讓自己以後看看。

想到以前和現在很多經歷和發生過的事。其實自己究竟是一個怎樣的人? 究竟有沒有從經驗中學習到些什麼?儘量地想對所有人好, 寬宏, 看得開, 無所謂; 但偏偏對自己及身邊的人很嚴苛, 平時對其他所有人都接受到容忍到的東西, 對身邊的人反而一點兒都不能容忍; 平時與朋友或其他人隨時能說笑甚至肆無忌憚地調戲, 對身邊的人反而做不到, 連對方不開心時也不懂得逗笑; 明明放下身段及面皮說一些自己都能夠想到的話就完全解決事情, 在腦中想得很厲害, 比起其他人想的都好, 就是做不到。

經常看到對方不好的地方、做得不夠的地方、自己不喜歡的地方: 原來自己一樣有犯下同樣的錯誤; 經常想大家坦白: 自己的事、經歷、做過什麼也是百份之百透明度(這個網誌實在把我的生活及大部份想法透露了), 但其實自己內心中所想的一些很深很深的東西卻沒有表達出來(或者可以說因為太多太複雜而不知如何表達出來)。自己在其他方面的想法很樂觀很有彈性, 但有時卻又極固執, 想改變想放軟下來也做不到。

到最後一塌糊塗(指的不是自己行為, 是自己的思緒及情感), 傷害了對方, 也傷害了自己。傷得別人深, 傷得自己更深。

究竟自己是否適合拍拖? 似乎自己並沒有從之前的經驗學到改變到。自己與所有人做朋友都無問題, 做朋友時真的很好, 大家的感覺都很好, 很舒服, 但就是不能再進一步, 進一步就不行了, 自己就控制不到之後的事, 之後的感覺了, 很可怕。

不想對任何人做成傷害, 不想自己看見別人受到傷害, 也不想因為這些原因而令自己受到傷害(看見別人因自己受傷, 比別人令我受傷更令我覺得受傷害); 傷害很可怕, 很辛苦。

以上的不是寫小說, 不是寫愛情小品, 不是把故事和想像套上現實生活; 這是我內心的感受。

真的很對大家不起。大家也不用擔心我, 只是長期性腦部過份活動及周期性負面思想而已。

很煩。不想再想。未能抒發心中所想之萬一, 就此。

完

一再返睇金庸小說閱讀報告之倚天屠龍記

由於之前先讀了金庸較短篇及名氣較遜的作品, 因此剩下來會講的都是大作。

倚天屠龍記當然是金庸武俠小說中一大作品。書中描寫人物, 武功, 故事情節及把人物融入歷史中的功力, 都已經比之前的作品爐火純青, 而當中有很多情節及事件, 都是從他自己其他故事所進化及應用的, 不過佈局及結構自不可同日而語了。當然用不著也論不到我來品評其文學藝術價值, 只談談自己的喜惡。

第一次看時很喜歡, 因為故事情節從頭到尾很精彩, 沒什麼冷場。之後再返看時不太喜歡, 因為覺得主角很無能, 性格猶豫不決。經過幾次的返看, 現在的感覺, 仍然是覺得很好看。當中曲折離奇之處及人性陰暗奸謀紛爭金庸寫起來自然駕輕就熟, 相當精彩, 這些劇情也就不多談; 其中想提一提一段自己覺得精彩及喜歡的, 是張無忌及4女(還有義父)同處一舟, 當中各人的思緒及情況, 雖然筆者著墨不多, 而人物也沒有說或做什麼, 但當中可想像的空間及意境實在很精彩, 一點不比其他武鬥(六大派圍剿光明頂)及詭奇情節(多不勝數)差呢。

書中改寫增減的地方不多, 唯一較留意到的, 就是增添了一些主角及四女之間所發生的事, 說過的話; 相比起來, 使人更覺得他與眾女感情深一些(連不多提及的主角對小昭之情, 也加了不少對話及情節, 使人覺得他也喜歡小昭, 想跟她廝守)。而最後結局也加插了一段, 張無忌的想法: 他的為人只會記著人的好, 忘記別人的不好, 因此很容易原諒別人, 而那四個女子, 也都是很好很好的。所以有點像一個open-end(當然結局一切也定了案, 所謂open-end, 只是他會與哪個女角一起, 或哪幾個女角一起而已)。

書中出現了大量人物, 而當中令人印象深刻及好的人物也很多, 難以盡錄, 所以就只寫寫其中一些自己的感覺吧:

張無忌: 以前有一段時間很不喜歡, 因為他在書中好像很渾渾噩噩, 一切做及發生的事情好像是身不由己, 為人有點猶豫不決, 不是做大事的人。然而, 有些人生性如此, 難道他自己本來便很想做大事嗎? 他小時候遭逢大變, 之後一直到十多歲仍然一直徘徊生死關頭, 本來就是身不由己, 之後得有奇遇才不致身亡; 到了武功高強, 身為明教教主後, 雖然未能展現身為一教之主的氣魄, 但總算堅持了俠義之道, 又導引了明教入正途, 其所作所為是好得很了。他的性格雖然猶豫不決, 而對女人更似乎是沒什麼辦法, 使讀者看起來感覺是沒有男子氣概, 但其實書中不只一次形容他的胸襟廣闊, 氣量極廣, 面對大是大非也決不含糊, 能忍下心頭一切氣憤; 這樣的人, 雖然不是一個能治世或一純江湖的大器, 卻能成為每一個人身邊的朋友。因此, 現在也頗為喜歡這人物。

趙敏: 書中後半段才出現的人物。雖然著墨甚多, 但總對她沒有很深刻的感情。她對主角的情雖然描述為很深, 為他做很多事, 但總覺得比起其餘三女沒有了一點東西。而其本身足智多謀, 論其奸的程度, 也不比周芷若低吧…只不過是她後來一心為了主角, 才淡化了她的這一面。

周芷若: 不論是書中形象, 或之後電視劇中的演員也好, 都是她比較優勝。書中突然有一段成了敵角, 實在出乎意料; 雖然後來作者為她開脫了, 她所做一切只是為一向尊重的師父所逼, 而又沒有真的犯下大錯, 但相信在很多讀者心中扣了分了。總之有點奇怪, 忽然變奸, 又忽然變好…

小昭: 很多朋友喜歡/會選為妻子的其中一個角色。而貫徹了整個故事, 大部份的女角或多或少也有騙張無忌(或隱瞞一些東西)。不過小昭對張無忌卻都是從頭到尾真心而沒有對他壞的。書中加插的些許情節, 就有一點是小昭與主角之間的關係及對話, 增加了讀者的對於“張無忌喜歡小昭”的認知。

殷離: 返看再返看後, 由以前比較喜歡小昭, 到現在反面比較喜歡蛛兒(殷離); 雖然著墨不多, 但她不論對小張無忌或者大張無忌(曾阿牛)都是真誠的! 記憶中, 她也從沒騙過張無忌。雖然因為其經歷關係, 性格較為偏激, 但從少耳濡目染之下, 卻可以接受(之後有很多劇情也提及她良心很好)。為此, 四女之中現在反而對她好感最大。

張翠山及殷素素書中有四分之一的篇幅以他們為主角; 其實金庸小說中的愛情, 有很多並不通; 很多時候男女主角(或配角)只因一面之緣就愛上對方, 不能自已, 終生不渝。他們之間愛情的“根底”並不足夠, 一味靠之後一起所發生的事及經歷患難而一起。這一對也是一樣。張翠山的人品性格本是不錯, 但他的門戶之見很深(金庸小說中名門正派人物的門戶之見實在太深, 不過也因此有許多故事發生), 深得有點迂腐, 有師若張三豐般胸襟廣闊, 他卻顯得小氣了。殷素素機智無比, 雖起近手段毒辣, 但實不失為一可發人物。

武當七俠及張三豐相比很多其他XX三俠, XX五怪, XX九傑, 武當七俠實在是描寫得很成功。他們之間的兄弟之情描寫得很深刻, 各人的武功也能寫得使大家覺得很厲害, 不失大俠風範; 而最好之處, 在於雖有七人, 每個人都有不同的性格, 而不會模糊不清。張三豐乃書中不世之奇人, 要寫得他武功深不可測容易, 難在而且也成功在形容他見識胸襟皆高, 平易近人不拘小節愛說笑, 對徙子徙孫極度愛護關心的性格。明教眾人不打算逐個談了, 只可說他們一個一個在故事中出現, 各有其精彩的出場及獨特性格, 實在是每一個都很真實的活現於眼前。

謝遜貫串整個故事的一個人物, 明教護突法王之一。文才武功都是一流, 簡直就是人中之龍(當然書中有很多人也一樣, 但他算是眾人當中比較出類拔箤的一個了)。不過其性格偏激, 其師父大奸角成崑就是看準這點, 才造成了謝遜一生的不幸及整個故事。一個人的性格才能實在很影響他的經歷及遭遇, 即使是聰明的、厲害的人, 也不一定會成功。最後謝遜參悟了, 倒是一個很好的結果。

滅絕師太實是一個形容得十分成功的人物。雖然很可怕甚至有點討人厭, 但實在描寫得很強, 而且氣概極大!! 姑且不說她門戶偏見極大, 行為偏激, 但她所做一切都是於心無愧, 徹底地維持她心目中的正義!! 不得不為讀者們既敬且佩。

成崑由於一直只聞樓梯響, 真正出場時間不算多, 不過書中大部份奸謀及事件背後都幾乎是他作為幕後黑生, 武功又高, 算是很厲害的“最後大佬”。不過他大部份的行為及奸謀都在暗中而為, 雖然厲害, 但總覺得不太轟然。最後一場決戰不是由主角, 而是由獅王對成崑, 描寫上及意義上也很合理及好看, 作為書中最後決戰算得上是好了。

完

三月九日 -- 繼續地獄雜記之連續四星期Long Week

1. 5/3(三) -- 大字堂; 連續幾星期去街市食, 終於試左頗為有名o既果個咖哩包包, 幾好食, 不過又唔係真係極度出色, 又唔係平, 可以一試o既。大字真係好多野要學, 呢2堂o既野好o岩我呢!! 講字型同構造, 真係要記同練多d呢~~

2. 6/3(四) -- 好多/一切o既野來得太突然; 中午去左石夾尾村痴餐, 開新村contractor拜神好多野食, 最正係係買左馳名o既炭燒燒豬來拜神, 好好食; 由於Puzzle唔舒服, 晚上唔來; 所以去返Spenser好想去的博康打邊爐; 仍然都係好平同抵食, 好耐無見呀Wing呢。同日, 突然知道原來Spenser星期long week, 但係佢要去旅行, 所以又係要搵我同佢調week...仲要同佢餵三日貓...

3. 7/3(五) -- 由於星期六突然要返工, 星期日又要返part time, 所以即係無得抖同去街玩, 收工搵左死黨2食飯; 未食飯之前同呀Mak去Spenser屋企餵貓; 2隻貓貓雖然無反抗, 但係好明顯怕陌生人, 唔係好合作又狂躲埋, 好彩有呀Mak幫手, 鏟屎屎, 洗野, 餵野, 攪左好耐先攪完; 貓貓又唔肯食野, 我地唔係度又唔放得出籠, 最後唯有放d兜兜入籠...攪完都成8點幾好累...之後同死黨2返企食野打下機...

4. 8/3(六) -- 地獄連續第四個星期返Long Week, 真係好累; 中午得Grace一個人食飯, 所以無叮飯同佢一齊食; 終於第一次去左食維記豬潤麵! 其實d料真係好平, 賣差唔多廿蚊真係幾好賺; 豬潤好多同埋真係幾好食, 個湯都OK, 值得一試呀; 收工又去餵貓, 今日比較合作少少, 又係攪到差唔多8點...之後去左食KT車仔麵, 居然賣晒主打o既豬頭皮, 太失望了...返到企本來都好累, 突然呀哥打來要我幫佢做d野, 原來係幫姨丈翻譯一份contract(嚴格來講係sales agreement), 本來已經好累(返左4星期long week, 餵貓...)又眼訓, 但係仲要譯d難o既野, 仲要係幾頁紙添, 想死!! 自己譯左一半島, 之後搵左死黨2幫手, 剩返果d再一人一半島...2點幾先訓...太累了...

5. 9/3(日) -- 由於太累, 所以唔返part time了; 連續返4星期+餵貓, 就係為左Spenser去旅行, 唔叫佢請返食餐勁o既都唔得!! 早上去打波, 由於之前lunch time射過一次發現自己問題所在, 今天手感返左來~~ 今日打得都唔錯呢~~!! 死黨2真係有太多野要改進, 近2次打波都令人感到洩氣呢。打完波食完飯, 即興上左死黨1屋企(好耐好耐無上過去啦), 坐左陣搬左套漫畫(Slam Dunk)走, 同死黨2去餵貓貓, 似乎貓貓開始習慣陌生人, 都OK。之後各自返企了。

6. 唔可以成日就人, 只會帶來自己痛苦...話時話, 又話我地條村有人生日果個月都攪下野, 到我生日果時都無啦 :D, 來緊居然有人可以自己出聲話幫佢攪...=.= 攪就無所謂, 但係幫班自私鬼攪就無興趣。不過而家都好少攪到gathering了, 時間又難就, 又話要返學又返工又補習又成日有人放飛機, 又話唔得閒, 無咩心機。

7. 追開o既動、漫仍然好睇。

好links:
沙鍋雲吞喵?
http://www.youtube.com/watch?v=uWkxt1O7m-s&feature=related

經典推介!! 林敏聰+曾志偉當年果堆改篇歌, 超好笑(雖然其實好無聊), 呢條link仲可以link到好多佢地其他o既歌o既 ; 不過要識舊歌先好笑。
http://www.youtube.com/watch?v=_P_M4YzTQRk&feature=related

完

極力推介的一條link

昨天上網, 無聊之中見到有人在網上post了一條link, 是一位女性的網誌(blog)。一看之下, 發現實在很值得推荐給大家看。

在該網址中, 是一位女性描述了自己的日常瑣事, 有很多是有關與男友的性事。為什麼會這麼極力推介大家看呢? 主要原因, 是她描寫的性愛當中帶出了: 最開心就是能與喜歡的人一起, 去令對方快樂, 而對方與自己又是那麼的親密, 因此很多時也可以不怕醜地取悅對方。而因其文筆淫而不低俗, 可當作一篇好文章而去閱讀。

由於"愛", 網主當然不只在性方面使對方滿足, 大家可見她很多方面也很懂得體貼愛人, 實在是使很多網友認為她的男友太幸福了。亦因為網誌中有很多心態及想法方面很值得學習(當然還有技巧上), 因此我特別在此以一篇文去推介; 網誌中的各項分類(請看"網誌分類"), 也有很多很值得大家去觀摩研究的(尤其是由女性角度去研究如何取悅男方/女方)。

在此與大家共勉, 希望大家別帶著有色眼鏡去看; 反正大家就只在家中自己一個在上網的時候, 別怕羞, 信我一次認真地去四處瀏覽一下吧!!

亞理沙的性愛手記
http://hk.myblog.yahoo.com/jw!aupwpeKTAh6NeLmdgZ._eoXi9q4-/article?mid=3191

完

三月四日 -- 雜記

1. 3/3(一) -- 因有人臨時甩底cancel了, 仲要到過左6點先講唔去...係就早d嘛。

2. 今日食完飯同辦事處同事坤坤去射左陣波; 佢仍然都係勁呢, 雖然個人係怪d, 不過打波係幾勁。自己都射左一段時間波, 發現左d好緊要o既野; 話說自己近年都無再自己落街練波, 次次去打都係鬥波, 有好多基本野同埋姿勢原來唔覺唔覺改變左, 差左; 今日一射之下發覺原來同以前射波o既姿勢唔同晒, 錯晒; 即時發覺同慢慢改返~~ 而家個手感好似好返d, 希望之後可以愈來愈好啦~~ 睇來呢2年打波方面, teamwork打form走位果d好左, 但係個人技術反而退步左了。

3. 工聯會又就來新一期, 要研究下有咩好報了。

4. NDS張SD Card死左一輪, 一排無玩, 估唔到呀哥俾左張128mb的card我而玩返, 反正平時都好少玩, 128mb放到2-3隻games玩已經好夠我玩了。

5. NBA自從Payton退休後, 好似都無特別捧咩球星, 雖然都有d幾鐘意o既球員, 但係都無話捧邊隊; 近2年o既新人Chris Paul好正~~ 似乎係繼Payton後我會捧o既人物呢~ 而且又係一個PG呢~

6. 過左個寒冷o既冬天, 發覺自己真係有肥返, 果期實在太凍, 又無點做運動, 又成日想食野...真係慘...要打返多d波!!

完

一再返睇金庸小說閱讀報告之連城訣

第一次看這書和之後再看, 感觀改變很大。本來覺得不好看, 很無聊, 尤其結果更是無聊, 但後再來再看, 到這次再看, 都覺得很好看, 很是喜歡(當然不是最喜歡)。

這部小說很“苦”。作者仍然以很簡樸的字眼去描述主角所見所聞及其心聲。主角是一個思想單純, 但也是非常正直的人。跟其他小說的主角不同的是, 他天資魯鈍, 又不是英俊瀟灑, 並不像其他的主角般都是學武奇材; 而他的遭遇更是悲慘, 故事一開始不久就受到莫大的冤屈, 右手使劍的手指被削, 琵琶骨被穿, 又被監禁了數年…大家都誤會他, 連自己最親最愛的人也誤會他, 在獄中又被狂人毒打, 絕望到了極點; 後來終於遇上丁典, 其人生就有了很大轉變(也不算是奇遇迭起吧, 他可是挨了很久的)。有了武功根底, 到了出獄後卻又失去了好友, 又再不停地墮入被人折磨及誤會的遭遇當中。到最後終於解決了所有事情, 可能作者也不知可以怎樣處理其他人物, 又想帶出“貪”念的可怕, 所以一次過將所有人全部“解決”掉。而真正正直又不貪心的人就有較好的結果。(雖然到最後, 主角狄雲的餘生不知會否比較快樂呢?)

書中除了描述了主角的苦, 也講述了人性的醜惡。金庸小說中經常以“貪念”為惡, 寫出很多人為了它做了很多壞事, 卻最終引致自己滅亡; 也經常寫名門正派或以正道自居的人, 實際上也有醜惡的一面。這部小說也不倒外, 也以這個題材貫串了整個故事。

談談書中人物。狄雲: 他的遭遇真可稱得上是“很慘”。像楊過般所經歷的悲哀, 實是自己性格所致, 合情合理, 實至名歸; 但狄雲的遭遇卻與他的個性無關, 是不由自主的, 所以是真正的可悲可憐; 他的性格十分正直, 即使戚芳被虛假的事實矇閉, 但也不太相信他會做出那些被冤屈的壞事, 而到最後也終於明白了真相! (不知為何, 自己很怕看人物被冤屈的劇情, 也因此很喜歡真相大白的情節!)後來狄雲慢慢因自己的經歷及丁典大哥的指點, 變得較為世故, 也變得沉穩, 加上其本身性格堅毅, 因此是一個非常不錯的人物呢~

戚芳: 想不到她的出場時間及用處比起想像中大, 因為通常這種女角(因不同原因, 而嫁了給其他人的青梅竹馬/師妹: 馬春花, 田青文, 甚至南蘭等等)都沒什麼大用處, 也沒有很多出場機會。但她在故事後段卻表現出平凡的機智及行動力, 而且也慢慢的查出了真相。最後的結果雖然悲哀, 但數年夫妻之情, 她會這麼做也是很合理的, 而且劇情上也比較完整。不過雖然是一個好的人物, 感覺上卻好像太“強”了一點。

丁典與凌霜華: 金庸故事中經常出現的典型“強”的人物, 通常用以帶起主角各方面的成長 – 其中一個就是丁典了。本身丁典這一個角色各方面都很厲害, 也沒什麼好提的。他與凌小姐的一段情, 其實比起很多其他的, 都算是很動人的一段。雖然他們很傻, 寧不遠走高飛, 行為上很受到世俗的影響, 但他們這樣困難也能守著對對方的情, 實在可歌可泣。英雄配美人, 凌小姐不僅是美人, 她的氣魄也很大, 作出如此大的犧牲! 雖然只是喜歡, 而不是極喜歡這兩人, 但卻很喜歡這段情。

落花流水: 這四人的出現就只像用來被人打得落花流水般…只是用來顯示出了血刀老祖的強…唯一只有水大俠, 臨死倒也極有氣魄。

血刀老祖: 在金庸的“最後大佬”之中, 算得上是營造得很好, 給人的感覺很“強”。而且一向欣賞做壞人壞到底的人, 血刀老祖壞得很透, 也因為不擇手段, 強得很厲害。可惜死得太早了。
其餘的人, 也就沒什麼好講的。

完

三月一日 -- 疲累的地獄一星期

1. 25/2(一) -- 去上水training第二堂; 之後同Mak, Carol, Sam同Esther上SZ加埋KTG食小肥羊。真係一個顯示出我朋友值o既組合, 因為呢5個人都係各自唔識, 而都係我係唔同地方識o既(Mak-CityU同學, Carol-BD同事, Sam話劇同學, Esther-Lands同事, KTGSZ朋友)~ 未上SZ之前就已經唔係好舒服, 不過一早約左就當然照去啦~ 雖然佢地大家各自唔識, 但係做我得friend的都有返咁上下傾得, 因此由頭到尾都無悶場呢~~ 一過關去左東門陪Carol買左老番(自己都買左2隻), 之後就join埋一齊食小肥羊; SZ小肥羊好平好抵食好好食呀~~ 食完由於我唔好按摩, 大家都陪我唔按返HK了(而且自己狀態又低); 最後10點幾就返HK了。

2. 26/2(二) -- 病了, 但之前同呀Mak約左整野, 所以本來諗住收工攪o既野, 變左請左病假然後日頭出來; 係MK食好耐無食過o既宜豐; 呀Mak就順便介紹左去工聯會睇醫生, 幾方便又幾快又唔貴, 唔使好似平時診所等咁耐; 之後第一次上呀Mak新居, 好開心呢~~ 之後返TKO, 夜晚同ConnieMartinCarol打羽毛球; 唔係大病, 做下運動出身汗果然好d(中學時試過發燒打波出身汗好左)~ 返企之後沖涼寫大字, 做左好多野好充實的一天...除左病之外...

3. 27/2(三) -- 大字堂。放學後居然撞到Connie馬生係TGW, 真係o岩。

4. 28/2(四) -- 同死黨們唱K; 終於正正式式同過mandy o既朋友Cass唱K; 的確係唱得幾好, 唔怪得可以係APM唱歌呢~ 雖然係唱得好, 由於我識得太多唱歌好聽o既人, 始終都係同頭三位爭少少呢(KTG, MayChan, Sharon); 不過同朋友唱K唔在乎唱得好唔好聽, 大家開心就好了~~ 唱得好聽係一個bonus來姐~ 當晚唱到12點島搭到尾班巴士返企, 都唔太太夜。好耐無唱K, 都係果句, 無可能返到以前o既狀態...不過唱一唱都好返d, 下星期一可能會好少少...

5. 29/2(五) -- 好耐無攪過o既話劇gathering, 今次都唔係好齊人, 得6個人(我, 民, Sam, Addison, Crystal, Federick); Lobo介紹o既"花滿樓"果然係好食, 大家都覺得好食, 價錢又唔貴; 當晚大家都傾得好開心, 過晒d聖誕新年呢d節日後, 來緊呢d平常o既日子都會多返gathering~~ 順帶一提, 當日由於要等佢地到, 去左星際望一望, 終於見到亦以平價買到夢寐以求o既GundamWeapon -- 武者烈傳零篇!!好正!!

6. 1/3(六) -- 俾人搵左笨返o既long week; 本身已經連續返左2次long week, 好累好想抖, 但係由於同事想要有time-off去旅行, 因此要去幫手MEB來賺一日time-off; 於是就想同我調week; 本來新同事答應同佢調, 點知突然又話唔得...於是都係搵左我來攪...其實如果自私d, 唔比佢去而由我去MEB賺一日time-off, 仲可以4點收工, 或者可以唔答應, 係屋企抖一日都好...而家連續返三個星期long week仲要6點收工...不過都係把啦...不嬲都係咁的; 收工返企未食飯就訓左...食完再訓...好好累...

7. 2/3(日) -- 由於星期六都早訓, 星期日都有d想打波; 不過係未決定之前, 死黨一早打左電話來, 反正都醒左, 緊係去打啦; 手風好過前2次, 不過都係麻麻地, 不過其餘各方面都打得唔錯, 所以都幾好; 雖一不幸就係好難得地右手食指爆左甲好痛, 打波以來好少試過呢。打完波食完飯去左葵芳買玩具...

8. 出左新一期DMC! 仲有HunterxHunter, Gundam OO#21; 全部都好睇呢~~

9. 成日都會蝕底去幫人, 虧待自己唔係問題, 最大問題係會虧待埋身邊o既人; 以前都好多次為左幫朋友, 令到身邊o既人唔高興, 或者寧願無陪屋企人或者最friend果d朋友; 可能自己覺得, 同我愈親o既人就愈明白我, 愈唔介意我咁樣...真係要講聲對唔住; 不過希望大家明白, 平時一般o既野, 我就個個都會幫, 但係最好最好o既野同時間, 或者係好緊要o既時候, 我一定係會留返俾我親人, 死黨/真正o既好朋友同愛人的。

10. 又係果句, 成一個星期先打返d野, 有好多感覺o既野都唔記得了...

link:

日本校服美少女選舉, 不過參賽者全部都係已為人妻及人母o既女性!! 但係都唔差架, 仲靚過唔少後生女添!!
http://www.dailymotion.com/video/x4dqc5_japanprbeupdate_blog

來緊:
3/3(一) -- 同而家同事唱K(Spenser, Grace, 凱琪, 俠士, 呀怡)
5/3(三) -- 大字堂
6/3(四) -- 本來同Puzzle呀Wing等人唱K, 不過P突然話唔想唱, 所以改為食飯; 應該會去KT的廣福宮韓燒
9/3(日) -- 下午返好耐無返的大球場

完

一再返睇金庸小說閱讀報告雜錦短篇之書劍恩仇錄+鴛鴦刀+白馬嘯西風

一口氣寫幾個故事, 是因為短。

書劍恩仇錄

書劍恩仇錄是作者武俠小說作品最早期的第一部, 由於作者愈寫愈進步, 因此這一部也就是比較沒那麼好的一部了。書劍的格式及故事都比較像早期的章回小說, 而老實說, 自己並沒有心機看, 雖然借了回來, 但還沒再看就還了。也大概有“掃瞄”過一次, 發現情節並沒有多大改變, 只是在結局加了一大段形容男女主角對於香香公主的想法。

只說說自己的感覺吧。故事方面, 由於並沒有一個確實的主角(起碼前面有一大段都不是陳先生), 因此有點散亂。故事根據“乾隆”是漢人的野史而圍繞著這話題而發展; 一眾紅花會“群豪”也就為“反清復明”而做了很多無聊事。(說真的, 怎會因為這些行為就會成功?)

由於太多人物的關係, 很多人物也沒有發揮的機會, 而且也很粗糙; 即使是出場比較多的人物, 也沒有很突出的感覺。以下簡略地說說:

陳家洛: 被我評為“金庸小說最差男主角”的一個人物。此人物一開始被形容得文武雙全, 又有領導群雄的能力, 實是一個年輕才俊; 可惜書中所見, 實在只是一個武功不錯的迂腐書生, 黃毛小子; 凡事猶豫不決, 遇大事不能決斷; 愛情路上更是一塌糊塗, 不堪入目。不想多提。

霍青桐: 翠羽黃衫霍青桐, 反而是書中最有氣概的人物之一, 雖然身為女子, 但的而且確能挑起重擔, 而且作為回族一部的領袖, 相當稱職; 而她也分得清愛情及民族大事之別, 令人可敬; 可惜唯一缺憾就是愛上了陳先生這一個小子…

香香公主: 雖然她從未入世, 極度天真無邪, 但卻也極有氣概!! 以前看的時候覺得她太天真太傻, 有點白痴; 但只看看最後她為了民族, 為了所愛的人, 不惜犧牲自己, 最後更不惜違背自己宗教, 寧下地獄(起碼在她心中, 她覺得自己會下地獄也這樣做!)也要救自己心愛的人們。是一個可愛的人物!

張召重: 作為武俠小說的“最後大佬”, 稍嫌不夠強, 又有點經常被玩弄的感覺…差…

乾隆: 可能由於作者不好此人, 因此寫得他像懦夫一樣, 完全是一個“cheap佬”; 不過, 在他的位置及環境, 他會這樣做完全是合理的。

***************************

鴛鴦刀

很短很短的一個短篇, 一樣有一樣神秘的“秘寶”--鴛鴦刀為主題; 不過真的很短, 只是“得啖笑”; 不過書中以輕鬆的手法推進劇情, 而且不停地用一些“順口溜、打油詩”, 使得人物都很有趣及市井。

到最後, 大家揭開鴛鴦刀的無敵的秘密 – 仁者無敵, 嘿嘿, 哈哈!

*******************

白馬嘯西風

又是一個很簡單而短的故事, 不過卻很喜歡。作者仍是用了很顯淺的字語, 而書中人物大部份也像少數民族般, 思想十分純樸, 就像我喜歡看俠客行一樣, 主角李文秀及其身邊的人思想都很直接, 很單純得可愛。而故事由頭到尾的流程亦很暢順, 只不過, 結局和俠客行不同, 是一個無奈的結局。一個又一個的巧合, 誤會, 使得人不停地有遺憾的事…而最後又再帶出了一個經常出現的主旨: 他們都是很好很好的, 但我就是不喜歡。

完

一再返睇金庸小說之閱讀報告之俠客行

自己很喜歡這部小說。
“俠客行”的內容及情節有一點“集金庸多部小說之大成”的感覺。
故事在一開始已經很緊張, 引人入勝; 而且一來便是爭奪一樣要緊的物事, 當然, 少不得的就是主角就在現場; 之後隨著劇情推進, 又發生了不少大謎團, 但條理又極分明, 一環扣一環, 實在令人覺得精彩無比。而當中卻一直不乏輕鬆的笑料, 而書中的人物、行為及物事也都有一點象徵了某些人性及人們經常犯的錯誤(但就不在此談了)。

不過, 令我喜歡的原因, 主要是"簡單"。回想一下金庸小說中的人物, 發覺自己比較喜歡思想較為單純的人, 而單純之中並不是入世未深的白痴, 而是有一顆赤子之心, 但實際上卻有著處世的智慧, 或者有股信念。像書中的主角, 白馬嘯西風的李文秀, 天龍八部中的段譽, 甚至射鵰中的郭靖, 連城訣中的狄雲等等。

書中的人物都頗為得我喜歡; 主角(應該叫他做什麼名字呢? 狗雜種? 石破天? 石中堅? 史億刀?)忠厚老實但又胸襟寬廣, 不通世務但資質又高, 而且跟很多其他主角一樣, 都有一點戇戇的氣質(其他主角就算很聰明, 但也總有劇情說他們裝傻扮懵), 行為上引起誤會加上有人刻意經營之下, 使劇情更加有趣。(萬千故事好看的原因: 誤會, 實在是不變的真理)幾個謎團及書中的主線劇情也佈置得絲絲入扣, 又開了人一個大大的玩笑; 主角狗雜種(還是叫他狗雜種吧)一開始就被捲入了事件之中, 而他在摩天崖過了幾年後下山, 就開始了各種的謎團: 為何人人都視他為長樂幫幫主石破天? 在此一誤會發生之後就不停地出現了很多誤認而造成的麻煩事; 之後又出現了賞善罰惡令的謎團, 到了最後, 發現原來他的身世也成了謎(不過, 雖然作者像雪山飛狐一樣, 沒有正式交代他的身世, 但相信大家也會知道是如何的)。

而劇情背後, 也與很多其他作者的作品一樣, 道出過份的貪念最終會使人墮落, 而最後亦會使人失敗; 而正直的人在他的作品中也會有不少奇遇及"好事"發生, 到最後得到成功; 在現實世界, 當然沒有那麼理想及那麼多巧合, 但要寫故事, 就當然沒有問題, 而且帶出正面的信息, 邪不能勝正, 總比現在的劇本麻木地要"出位", 經常正邪不分為好。
另一個在作者作品中出現的"道理", 就是在愛情上: 明明他不是最好, 但我就是喜歡他。這正正道出了愛情盲目及使很多人開心快樂或悲哀傷痛之處, 相信大家也很明白這道理, 在此不多談了。

書中情節似乎沒有多作改動, 最為我留意的就是書中的"咖呢啡"侍劍改為沒有死; 以前看的第二版, 侍劍被點倒後, 丁噹回頭把她一劍結果了; 現在卻說主角把他放了; 可能作者覺得此人物尚算可喜, 又沒必要多死一條人命吧? (不知以後會否成為主角的後宮? 哈哈)

總的來說, 由於書中的主角寫得好, 而劇情也十分流暢及有趣, 文字也沒有早期幾部般的十分文謅謅, 因此自己十分喜歡這部書呢。

完

返睇再返睇金庸小說閱讀報告之雪山飛狐+飛狐外傳

序
因為公司近圖書館的關係, 經常有機會借書來看; 最近又再借金庸的小說, 不過這次是最新的修訂版; 查先生幾年前才再重新修改過再出新版之後還未看過呢~ 因此在見到有機會借到的情況下, 又開始重看了。
最先看的, 是雪山飛狐+飛狐外傳(呵呵, 看三本書就可以完成十四部中的四部, 哈哈)。

以下開始是自己的閱讀報告(其實只是寫個人觀感及看的時候一些感覺, 一點藝術性質的評論也沒有), 由於純粹個人喜好, 因此不一定很有條理(及道理)。

雪山飛狐+飛狐外傳
雖然是2部小說, 但雪山飛狐及飛狐外傳中的人物有很大關連(甚至跟本就一樣), 因此一氣看完及做閱讀報告。

先說說雪山飛狐; 有關雪山飛狐的寫作手法, 實在不用多說了; 書中以不同人的角度說故事, 講述多年前胡一刀及苗人鳳大戰那幾天的一段往事; 雖然如此, 但仍然引人入勝;. 幾個人說的版本都有一點不同, 而隨著另一個人所說, 又令事件慢慢的知道得更多; 除此之外, 大家很多時也忽略了田歸農之死也是用這方法做的。

由於是短篇, 節奏較容易控制又不用有太龐大的世界觀, 因此比較容易做出一幕幕連續的高潮(像古龍的某些小說也是這樣); 其中最好看及印象最深刻的始終是胡一刀及苗人鳳一段不打不相識, 相知相交的往事; 3個人(連同胡夫人)真的可以稱得上豪氣干雲, 氣魄之大, 實在叫人拍案叫絕, 是金庸小說中少有的豪俠(其他小說的高手, 就算很有氣概, 但總難及此三人之“豪”); 至於胡斐, 在書中只像是一個配角而已; 雖然在短短的篇幅裡已經提到他文武相全, 但身為胡一刀之子, 相貌又粗豪, 但性格也有點忸怩, 總是差一點點; 而他對”報仇”一事又如此地執著, 有點過於迂腐(而且明知不太關苗人鳳事), 相對於楊過最後能夠想通了, 他在眾主角中是差了一點了。

當然不得不提, 是結局實在太太太“搵笨”了。

飛狐外傳則像是雪山飛狐的“補完”; 交代胡斐由少時到武功初成的一段故事; 不過這部小說我幾乎把它在金庸小說的排行榜中排最後。

金庸的小說大部份都以“謎團”或”秘寶”(錢或武功秘錄也好)為線, 帶出了故事及書中武林人物的諸多紛爭; 飛狐外傳則沒有這些東東, 很正常地圍繞著主角的所見所聞及遭遇而發展; 可惜, 書中所發生的事情比較“小事”, 又不曲折離奇, 因此較為平淡。主角在大部份的故事, 都是為了殺“最後大佬”鳳天南, 但一來他為了要殺他的動機及事情太弱(相比起其他小說的事), 二來最後大佬很早期已經不夠打, 只是逃走了主角要找他(才引發到之後較大件事的天下掌門人大會, 還要有一半原因是想見紫衣, 亦即是“溝女”…), 因此故事的氣派差了很多了。後來的天下掌門人大會, 也不太精彩; 作為配角出現的紅花會, 出場不多, 令人最深刻印象的就只是趙半山(他在這裡加了不少分數), 其餘都只像是過客而已。

書中的一大敗筆(其實是自己不喜歡的地方, 不是敗筆XDD), 就是有關武功的描寫過多; 書中主角或者其他人打得太多了, 不停地出現很多打鬥場面, 又打得很久又很長, 有點煩氣; 這部小說的武功比較現實, 又出現了很多現實存在不同門派的武功, 因此打得不誇張; 但由於太現實, 因此又很少“妙著”, 就算有, 也只是以“胡家刀法精妙, 以令人意想不到的方法出招”來形容, 每次打鬥又經常翻翻滾滾二三百招, 所以很悶呢, 很失敗。

武功不誇張, 書中用毒卻很誇張, 根本毒手藥王的師弟及幾個徒弟用毒太厲害, 根本就“贏晒”, 他們很容易就出人頭地, 何必需要那麼多的章節做那麼多功夫做那麼多無聊事? 不過在金庸小說中鮮有用毒的比拚, 因此雖然誇張, 但也頗有趣。

愛情線是最狗屁不通的一環; 為了與雪山飛狐接得上, 紫衣到最後突然地發現原來是尼姑, 好沒來由地要拆開他們; 如果是尼姑, 又實在攪了很多無謂的事出來, 又愛上故斐, 又甚麼救鳳天南三次, 又攪亂天下拳門人大會, 總之就是一塌糊塗…故斐先遇到紫衣, 先愛上了她, 才致靈素沒了機會, 真可惜… 而當中一段馬春花的事, 在金庸小說中經常出現類似情節(師妹與師哥/粗人從少一起, 卻遇到年青俊美的貴公子, 更偷漢子/遠走高飛的情節; 例: 苗人鳳, 曹雲奇與田青文, 連城訣中狄雲與戚芳, 笑傲江湖中令狐沖與岳靈珊等等; 似乎主要人物中, 青梅竹馬的一對都沒有好結果呢)

說說人物, 少年胡斐與雪山飛狐中的青年胡斐可謂十分連貫: 與乃父乃母不一樣, 不太有氣概(其實書中有儘量形容他是有的, 可是看起來較像是少年心性沉不住氣…), 在有問題時就好像深思熟慮, 其實是忸忸怩怩, 迂腐不通…所以是一個普普通通的主角而已…

袁紫衣就更加“九唔搭八”; 實在不覺得她有甚麼可愛之處, 除了樣貌漂亮之外, 性格刁鑽古怪, 但在要緊時候又是忸忸怩怩, 迂腐不通, 與胡斐實在是一對兒。

紅花會群雄中規中矩吧, 在書劍恩仇錄中, 由於是群戲的關係, 使得每一個人也不令人深刻印象; 因此在此書中出現得最多的趙三當家也就加了不少分數, 描述得他頗為突出。不得不提, 書劍恩仇錄中大名鼎鼎的四當家文泰來因長期受傷而沒什麼表現機會, 在此書也只得擲了一記去勢凌厲的刀給胡斐而稍有露面而已, 反不及其妻駱冰可愛, 一匹愛馬因聽趙半山所述的胡斐就豪爽地要送出去。

苗人鳳仍然貫徹了“豪俠”的感覺, 氣勢無匹; 而也加多了一點俠骨柔情的感覺, 描寫了他對南蘭的愛, 是多麼的深刻。

最後當然要談程靈素, 她使這部書的分數在我心目中增加不少; 她可能是金庸小說中我最喜愛的女主角之一; 比起其他女主角各種過分完美, 她的存在感很真實; 而最可愛的地方, 就是她十分善解人意, 蘭心慧質; 她極愛故斐, 又聰明, 因此有什麼事總能為他擔人, 也有資格為他擔心(總能為他解決一切的問題), 雖然他不美麗(少有地女主角不漂亮), 但那種深情尤其動人!! 而最後一段情節, 也描述得很震盪人心, 亦是其中一段看到眼濕想哭的一段情節。

至於雪山飛狐書中所錄的另外幾篇故事, 會在另外的篇幅再談。

完

二月二十三日 -- 雜記

1. 15/2(五), 16/2(六) -- 收工返企; 27/2(日) -- 打波麻麻地, 下午同媽去每年正月都會去o既黃大仙。

2. 18/2(一) -- 去上水上training course, 呀Mak同Carol咁o岩都係同一日, 又無呀sir上, 勁hea同勁開心~~ 自從Year-1 讀City之後都好耐無去過上水了~~ 收工返企。

3. 19/2(二) -- 同Lands舊同事松林2個人食飯; 去左佐敦打冷; 果間野之前成日經, 都見到幾多人食, 而且有樣野好特別就係好多鬼佬食~~都係食小菜同打冷o既野; 2個人叫左炒蜆, 干炒牛河同鹵水鵝, 松林以前試過炒蟶子同炒蜆都係麻麻地, 牛河普普通通, 但係個鹵水鵝好好食~ 第日要再來試下第2d小菜呢~

4. 20/2(三) -- 收工後大字堂。

5. 21/2(四) -- 同PuzzleWingSpenser凱琪俠士食飯; 去左Wing介紹灣仔d舊街o既舊鋪頭食小菜; 呢間值得推介! d野好食得來又唔貴, 尤其係呀Wing推介o既山東燒雞, 好好食, 另外叫果d野都唔錯呢~~ 仲有一樣又係必食o既, 就係d甜品! 木糠布甸, 榴槤慕思都好好食又平!! 一定要留肚食埋甜品! 6個人叫多左野, 都係八十幾, 太好了!!

6. 22/2(五) -- 收工返企; 23/2(六) -- Long Week收工返企。

7. 近排又返睇金庸; 今次睇新版; 將會遂套講下自己o既睇法同埋鐘意d咩野。

8. 拆左利是; 由於有某幾個屈機o既souce, 所以今年都有幾多錢, 不過扣除果2個cource的話, 其實都唔過一千蚊。

9. 最近玩新NDS game -- Assassin's Creed; 打法係半3D o既類似波斯王子o既遊戲, 不過係NDS咁少制o既情況下, 都有好多唔同o既操控同玩法, 變化幾多; 遊戲背景係講十字軍東征打到薩拉森o既時候o既野, 主角係一個暗殺手; 幾經辛苦終於打爆左中級難度, 幾好玩呢~~

來緊:
25/2(一) -- 去上水training第二堂; 之後同Mak, Carol, Sam上SZ飲飲食食。
26/2(二) -- 同ConnieMartinCarol打羽毛球。
27/2(三) -- 大字堂
28/2(四) -- 同死黨們唱K
29/2(五) -- 話劇gathering @ MK
6/3(四) -- 同而家同事唱K
16/3(日) -- 去Spenser屋企玩; 玩貓打機打Wii打麻雀(雖然我唔會打打麻雀)

Links:
Cat from Hell -- 好好好惡o既貓貓
http://www.youtube.com/watch?v=AmDDp-cCo24&feature=related

3 years after -- 惡貓小時候?
http://www.youtube.com/watch?v=j_ANJZICV0U&feature=related

貓貓都會自己... :P
http://www.youtube.com/watch?v=ytPXxrGYT5g&feature=related

貓為狗理毛 -- 好溫馨
http://www.youtube.com/watch?v=l57mQZvDaL4&feature=related

貓激怒狗兒 -- 隻喵好低能 XDDD
http://www.youtube.com/watch?v=2Vg32JkCWEQ

電影trailer -- WANTED; 好似好好睇!!
http://www.apple.com/trailers/universal/wanted/wanted_medium.html

貓和兔 -- 好好笑~~ XDD
http://www.youtube.com/watch?v=IUU_oOBZKko&NR=1

完

很煩的淫照事件

淫照事件已經擾攘了香港半個月, 現在街上車上飯店中四處的人仍然不斷地在談論著這件事。其實我覺得這件事很煩, 有什麼好討論的呢? 只不過是有人意外地得到別人的隱私, 然後公諸於世, 而當事人是公眾人物而已。

很多人在評論著進是誰非, 有很多人說陳先生不好, 又說呀Gill應該顧及自己形象, 又說了很多很多不同的意見, 大部份都是對當事人不好的評價。我自己則認為, 所有的當事人基本上都沒有做錯什麼。

男歡女愛實在平常不過, 尤其當事人們都廿多歲, 成年了, 他們愛做什麼跟本就沒問題(能夠大聲站出來說反對的, 就只有結了婚, 而又真的在結婚後才發生過性行為的人); 他們所做的一切都是你情我願的, 陳先生喜歡拍這些照, 女方也明顯沒有抗拒, 那麼陳先生做錯了什麼呢? 他有強逼對方被拍嗎? 我想沒有吧? 那他們"拍照"及"做愛"這些行為有什麼問題呢? 即使他們更變態, 喜歡SM同性戀雜交什麼的, 也與其他人無關, 如果沒有讓人知道, 又有什麼關係? 唯一能夠責備的, 就是陳先生疏忽, 讓別人得到了這些照片(他自己私自給好朋友看當然也不好, 但並未因此流出及影響社會)。真正有問題該責罰的應該是不斷發放照片於網上的人吧? 影響到全香港, 敗壞風氣的人應該是放出照片的元兇吧? 論前因後果, 無理由要追溯到藝人們拍照有問題, 基本上如果無人把照片流出, 就不會有這麼多事發生。

至於某些家長及有些道貌岸然之輩(e.g. 李怡, 蕭若元...etc), 指Gill(及其他當事人)作為公眾人物應該檢點, 注重自己形象, 這個更是荒天下之大謬; 娛樂圈一向都是大染缸, 相信除了小朋友外大部份人也不會純真到相信藝人們平常在幕前的形象吧? 最重要的是, 當事人做愛做的事, 是他們的私隱, 他們拍照, 也是私隱, 他們從來無打算或意圖把造些照片公諸於世, 他們平常面對公眾時也有注重自己形象, 那麼這些照片流出了就是他們不檢點及不注重形象嗎? 沒可能吧? 知情權之說更是無稽之談, 難道身為公眾人物就要讓你知道他們一天24小時在做什麼? 甚至要讓大家知道他們有幾多條陰毛? 不知所謂。

至於公開交代事件方面, 大家能對他們有甚麼期望呢? 想不到那些大大有名的專欄作家們與大部份普羅大眾一樣天真及無知; 當事人們除了能夠作一些公式的回應, 還可以怎樣? 姑勿論年輕的當事人們未經風浪, 不學無術, 讀完書未踏足社會就做了與世隔絕的藝人; 即使他們不是這樣, 他們能做的事也只是"公司"叫他們做的事及說的話, 還能怎樣? 他們"虛偽"才是保持原有"形象", 難道要他們在廣大市民面前直認他們很淫賤及交代他們的房事才對嗎? (況且, 他們做這些事也不代表他們淫賤; 再者, 娛樂圈中淫亂的事情更多更大更雜亂...)

我覺得最應該要受千夫所指的, 應該是發放照片的人; 應該受大眾非議的, 是警方的處事手法(雖然我覺得, 現在的人對"政府"的要求過份, 而且難於令"所有人"滿意, 警方夾在中間很難處事), 其餘的, 大家就最好別提吧...

在我自己來說, 這件事實在很無聊, 藝人的私隱及其真實一面從來也不是我感興趣的, 作為一個藝人我只要他們在幕前的表演好及行為對公眾有交代就好了; 那些一點藝術美感也沒有的照片更提不起我的性趣及性幻想; 希望香港人(及我身邊的人)快點停口, 不要對此事再作無謂的談論了...

完

二月十三日 -- 新春大吉

1. 5/2(二) -- 第一次Connie book左君傲灣場打羽毛球, 實在太耐無打, 好開心呢~~ 希望之後都有得打啦~ Spenser仍然都係太勁, 完全無得打, level差得太遠反而就無得係咁猜下波呢~ 好快就要執波再開, 都係搵返d實力差唔多o既人打好d呢~ 下次應該搵返Carol :P 之後上企食外賣+打NDS。

2. 6/2(三) -- 大字堂因新春關係2星期唔使返; 收工返企食團年飯~

3. 7/2(四) -- 新春大吉; 都係一日去晒要去o既地方; 隨住年紀增長可以去o既地方愈來愈少...近幾年拜年見到老人家都好大感觸, 又好多野諗...人都係總會慢慢老去同唔係度...真係唔想呢d野發生...
4. 新春幾日假除左拜年都係係屋企hea, 民仔上左來打機2次, 星期日早上打波, 由於唔熱所以都keep住可以狂走, 但係手感麻麻射波唔準...最終有贏有輸啦...唔覺唔覺打到2點, 累就唔太累但係對腳極痛; 一齊食大家樂後馬同民就上企打下機, 咁就完左個假期了。

5. 開工大吉幾日, 由於唔使行樓又無貨收, 因此都係VO同Cert order, 經過大家o既努力, 好快就攪掂晒, 因此呢幾日返工都好hea...除左整d單之外就係睇小說; 2日返睇左一套飛狐外傳; 借左最新o既版本來睇, 都係唔係好大改動。

6. Gundam OO極好睇, 即使唔係gundam fans, 一般會睇動漫o既人的話, 我都會推介睇呢~~ 好正!

7. 新年後第一日見俠士, 居然話有買馬tips, 幾個同事包括我在內都諗住湊趣買下馬呢, 發個新年財。今晚收工後同周賓賓食飯。係牛頭角九九店買左超平o既MG大魔!! 之後係大排檔, 再行一陣, 返企; 今天又累又眼訓呢。買馬似乎衰左, 蝕左添 XDDD

8. 天氣凍左一段時間, 成日都唔想郁, 又想食野, 食多左野, 加上呢2個月少左好多打波活動, 感覺到自己肥左!! 唔得!! 唔可以再咁落去了~~~

來緊:
21/2(四) -- 同Puzzle呀Wing等人食飯。
18或19/2 -- 同Lands其中一舊同事(松林)去廟街食殘忍飯, 未confirm。
下星期要約實話劇朋友們食飯。

links:
BB話 -- 得意
http://hk.video.yahoo.com/video/video.html?id=334767

YukMan -- 談近日警方做事手法, 鬧得好
http://hk.youtube.com/watch?v=0wyyoQBsW8k

得意貓貓
http://www.youtube.com/watch?v=dAMZaAVrUZ4

完

二月四日 -- 無網上

1. 31/1(四) -- 唔知點解好累所以Time-off一天; 知道九龍灣星輝外有大平賣之後, 夜晚同呀哥過左去睇, 終於都買左MG Turn A, $130, 好平呢~~ 當係比自己o既禮物啦~ 之後係牛頭角下村頹食後返企。

2. 2/1(五) -- 收工同Catherine去TST幫佢拿贈品, 都幾重呢~ 食飯食山林道金鳳。夜晚開始無得上網, 網絡有問題, 星期一先整...

3. 2/2(六) -- 上午同下午係企抖, 打下機; 夜晚同死黨們大角咀K; 之前去左MK買左對波鞋; 而家少唱好多, 可能個喉嚨無咩唔舒服, 個狀態唔錯呢, 估唔到都OK呢。唱到3點幾先走, 多謝大家o既禮物, 好開心呢~~ 搭到泥蜢的, 好快返到企。

4. 3/2(日) -- 估唔到天氣好...無波打蝕左...下午同哥行左坑口同寶琳。

5. 上唔到網, download唔到Gundam OO新一集...

來緊:
5/2(二) -- 第一次Connie book左君傲灣場打羽毛球, 好耐無打波, 期待!
6/2(三) -- 大字堂因新春關係2星期唔使返
7/2(四) -- 新春大吉

完

一月三十日 -- 生日

1. 28/1(一) -- 收工返企; 新劇第一集都ok啦...另一套都係無咩心機睇, 麻麻地。寫左好幾張大字, 都係麻麻地...試寫左個"福"字之後, 自己o既性格都係o岩行書多過楷書呢~

2. 29/1(二) -- 收工同呀強行街睇玩具; 之前約左係In's Point等, 我以為行完果度就食飯散, 點知之後再行兆萬同信和, 差唔多10點先食飯...好累呢~~好耐無行過了~~係係朗豪坊熟食街市食, 原來過左10點都未收的, 以後晏d都可以照去呢~ 都見到d野有d想買, 但又唔係儲開同必要買, 最後咩都無買到...

3. 好多謝各位朋友, 親口、電話、sms等等同我講生日快樂, 仲有祝福我, 請我食飯, 送禮物比我...等等; 真係多謝晒。

4. 呢幾日好累又凍個狀態又差, 明天好想請假...

5. 有好幾樣野想買比自己做禮物, 買咩好呢? 嗯... 好可能最終都唔買 :P

來緊:
31/1(四) -- 同Taylor食飯? <----Taylor唔得, cancel
2/2(六) -- 同死黨們唱K
5/2(二) -- 第一次Connie book左君傲灣場打羽毛球, 好耐無打波, 期待!
6/2(三) -- 大字堂因新春關係2星期唔使返

完