出庭作証

因為之前係BD(屋宇署)份工o既關係, 17/8(星期三)要去做証人。

由於係BD時, 成日出Order(命令)要人拆僭建物, 好多時d人都無拆; 出埋警告信都唔拆, 就會拿去告。通常d人一知要告, 就會即刻拆, 就算唔拆, 到佢一拿到傳票(出左傳票就即係一定要上庭同罰錢了), 都會即刻拆同認罪(認左罪罰少d)。不過, 有少數人會死都唔認罪, 覺得自己有理據(99%到最後都係有罪), 而今次就恰巧有人唔認罪, 所以我地做過呢單case的人都要準備上庭了。

係度講返少少之前係BD發生o既趣事。話說有一日, 一班同事突然聽到一對夫婦(呀叔同呀嬸來的)係會議室度同我地同事吵(當然係拒地2個嘈, 我地同事就緊係有禮貌啦)。果對夫婦(可以叫八公同八婆)又係覺得自己無錯, 無理由要拆d野, 又好粗俗, 總之傾唔成。由於到最後都唔肯拆, 所以後來知道會告拒地。當日由於拒地又大聲又嘈, 所以全公司都知咩事, 成班人都係背後笑拒地。

事隔幾月, 從同事果度聽返來, 原來單case已經審完。但係當日發生左好好笑o既事情。話說個官判左拒地有罪, 又要罰錢, 由於果2個人由始至終都覺得自己無問題, 因此係判完要離開o既時候, 爆左句粗。個法官聽到, 即時叫庭警“的”返拒地2個返來, 重重地告誡拒地一番, 仲話如果再講就告拒地睨視法庭。果對八公八婆即刻死死氣, 比人話左一輪先有得走。哇哈哈哈, 抵死。

講返我要上庭。由於一個法庭一日會定左審邊幾單case, 但係個次序又臨時睇個官鐘意審邊個先, 因此全部人都要一早到左先。果日9點幾就到左法院, 一路等等等等(好彩帶左2本厚o既書去睇), 我地單case放左係最後審 =.=, 12點幾場先開庭。開左庭一陣, 本來對方都唔肯認罪, 後尾可能終於都知道自己理虧, 終於係大概1點都認左罪。可憐我地班人係度磨左4粒鐘(好彩有帶書, 睇左成本), 到最後都係唔使出庭, 蝕晒。好心一係就晨早認左去, 我地唔使去; 一係就唔好認, 等我有得出下庭做下証人, 試下都好呀~~~而家等左甘耐又無得出, 真係唔抵!

好彩返公司問返, 由於係公職, 所以應該唔使扣大假, 如果唔係真係蝕到入肉了。

完

改下歌詞 -- 肥貓學跳舞

呢排大家的心情都似乎隨住天氣而有d鬱悶~~~
不如大家一齊低B下, 唱支歌仔啦~~~!!!
希望係呢個甘悶o既氣氛入面, 大家唔笑首歌仔都有得笑下我!
哇哈哈哈哈哈哈~~~~~

肥喵學跳舞

調寄: London Bridge is falling down (有隻雀仔跌落水)
詞: 渣二
唱: 童音合唱團 (大家記住用最低B的聲音唱)

*小~貓走去學跳舞, 搖又擺, “弟”下手!
小~貓走去學跳舞, 餓~“匾”~肚皮!*

repeat ** x3 (每次速度加快)

(速度回復正常)
肚空空走去食下野, 鵝共鴨, 大乳豬!
肚空空走去食幾味, 餓~貓~變肥!


係咪頂唔住呢~~
哇卡卡卡卡卡~~~~

~~~~完~~~~

心的距離

不知是天生性格使然, 或真是星座的關係, 一向十分著重“心靈”。自己的身體疲累, 只要休息一下, 睡一覺就好; 就算仍然累, 精神充沛仍然可以凌駕肉體的疲累。這裡所說的“精神”, 並不只是說“有否足夠睡眠”那種“精神”, 而是指心靈上的滿足。

與人的關係也一樣, 自己覺得, 無論是親戚/愛人/朋友, “心”的距離最重要。當然, 每個人都不相同, 而實質上“形體”的距離亦會影響到人的交流, 但最重要的始終覺得是“心”。

有很多人交朋友或拍拖, 十分著重形式上的事情。覺得要常常見面/電話才算是朋友, 我卻不以為然。不錯, 與一個人感情要好, 自然想跟對方多見面, 多親近, 多說話, 但有很多時卻是情況不許可。我的其中一位死黨去了外國讀書一年了, 期間當然沒有見面, 有時忙起來(自己忙, 對方忙)連續很長時間連電話/ICQ也沒交談過, 但這代表了我們的友誼褪色了嗎? 一定不會! 我也有很多朋友, 不論在外國或在香港, 平時也很少見面, 聯絡也不多, 但一見面/聯絡時也暢所欲言, 就像肝膽相照經常見面的老朋友一樣。

十分珍惜“心靈上交流”的這種感覺。交朋友, 不在乎年齡, 性別, 距離及相識的時間, 只要是大家都肯把“心”交出來, 相性接近, 即使相處時間不多, 溝通時間不多, 甚至沒見過面, 但只要有某種形式的交流, 一樣可以成為好朋友。君不見很多人每天在學校/公司都與同學/同事相見, 但也不一定是朋友嗎? 有些情侶一星期中差不多天天都見, 每天也傾幾個小時電話, 甚至有肉體關係, 還不是不了解對方, 完全沒有精神上的聯繫?到最後也是分手收場。

有時親人間或朋友間, 不是以表面上形式上的噓寒問暖來表示關心。有些人就是不懂表達自己, 或不愛在某些方面表達情感, 難道這些人都是沒有感情的人嗎? 而且, 真正的關心, 並不一定是施予援手。有時情況根本不是外人可以幫忙的, 肯好好聆聽已經是很好的幫助, 不過問他的事情, 只從旁照顧其他瑣事也是很好的幫助, 甚至全無辦法幫到也好, 好好的作為一個朋友而做朋友也很足夠(很難解釋的一句)…總之都是關心的一種表現。

實質上的幫忙, 我能力有限, 要幫也是不過是幫倒忙; 所以希望自己能夠為身邊的人帶來希望, 帶來心靈上的安慰, 回復大家的“精神值”。有煩惱, 有問題又不介意的話不妨找我談談吧, 起碼有個會聆聽的人呢(反正我都身負不少人的秘密了, 不介意再多幾個人找我殺人滅口)。正所謂: 每日拿出幾分鐘, 聽聽少年心底夢。哇哈哈哈哈哈~~~ 超嘔的slogan~~~

話雖如此, 經常精神力不足的我還是需要與朋友見面/吹水/打機…等等, 來回復自己的“精神值”呢。

完

轉貼: 又係深雪 : 有利愛情的性格

其實好多時都唔係十分認同佢講o既野, 不過有時入面o既其中一d道理我覺得OK, 而且都係等各位各自理解下, 因此都係全篇轉貼啦。

深雪 : 有利愛情的性格

常說擇偶要看條件，其實，除了事業基礎、行為人品之外，性格都好重要。然而，何謂有利於建立感情的性格？我的建議是尊重以下兩個方向的。
第一，他是個願意接納自我增值的人。要注意，很多男人也不是如此。自我增值除了是事業上的進取外，更重要的是個性上的改進，一個願意接納自己有需要作出改進的人，才會是一個合意的伴侶。
試想想，他會否是個在情感低潮時願意尋求輔助的人？如果是，你就有福了。你可以觀察一下，他是否接受一些改進關係的書籍，此外，他接受自我增值這回事嗎？對於宗教上、靈性上的提升，他有甚麼看法？
最怕就是那些一成不變的人，與他們在一起，永遠只有他是對的，而任何改進的提議，都似乎有損他的男子氣概。
第二，他要是個願意顯露情緒的人。他能哭能笑嗎？他有能力與伴侶作出情感上的溝通嗎？當目睹別人有情緒上的波動時，他會不屑抑或作出共鳴和體諒？
一個不願意顯露情緒的人是不適宜擁有親密關係的，他不獨內心冷漠，更會辜負和取笑你的一番情意，你也別期望他有能力去愛你，他只夠能力做些膚淺的男女之事。基本上，這些人不會有與你作出情感上溝通的興趣，就算他有愛意，那些表達手法都會是錯的。
很多男人不接納自我改進這回事，也有很多男人以不表露內心情緒為榮。與其善心地幫助他們改變性格，不如掉頭走，搵過第二個好了！


完

八月十四日 -- 雜記

1. 之前都講過, 原本諗住開個篇寫公司d野, 但係都係無心機, 係度草草講下啦。而家我係地政處o既啟德果team做, 啟德team咁o岩係其中最最忙o既一早, 不過好彩我都唔係怕忙怕多野做o既人, 返工o既時間過得好快, 不過收工後個人覺得累好多(精神累)。以前5點零收工o既日子過去了。雖然比起私人公司係幸福好多, 但係係政府做, 平均要做到6點幾7點(仲要唔係老細級), 見到office其他人5點幾就開始走, 都係有d不爽XDDD。好彩而家係返5 Day, 好開心。
舊老細resign左, 11/8 last day走左了。佢係一個好人, 只不過個性格係慣左cool, 做人又極之嚴謹, 令到某d人覺得佢好harsh。Under佢實在係幾大壓力, 而且由於佢實在太勁(佢做呢個位應該係極度underpaid的), 即使我draft的memo, circulation, document甚至minute, 係意思同grammar都無錯, 佢都可以改好多野(佢d英文實在用得好老練, 既formal又準確)。雖然大壓力, 不過可以學到野。新老細來左一個星期, 佢從來未做過政府o既工, 唔係好知個flow係點行, 而且啟德實在係太多野, 佢來左一個星期, 一定take up唔晒(我做左一個月都未啦), 而家我地2個相依為命, 唯有慢慢摸索…
至於份工, 係我做過呢幾份最唔o岩我做的。之前做物業管理話就話做維修睇工程, 但係其實最緊要係對人: 房客, OC, contractor, 房署, 老細…etc, 做埋customer service, 雖然好多人覺得又煩又難做, 但係我反而handle到又做得開開心心。係BD 做o既野雖則係政府野, 又係執法部門, 但係其實好多野都係好睇情況, 自由度都大, 好case by case, 而且亦都要對人。而家呢份就十分死板, 樣樣野都要跟得好足個流程(政府d野又特別煩), 仲要極度極度極度細心(開正我死穴), 連d字眼一隻半隻都要執得好準, 好累人呢~ 不過做開又唔會咁快就話走o既, 係度做o既野同之前完全唔同, 學下野先啦。
2. 今個星期開始逢星期二游水, 係觀塘泳池, 鐵膽得我同民仔, 話左唔使OT就會來o既有呀S, 呀哥同呀源。其餘所有人都係free to walk in, 邊個有興趣聯絡我啦。
3. 返左一個月工, 由於收工累, 所以都無攪d咩活動, 係間唔時同朋友食下飯, 補充下個精神值。如果唔不時同朋友聚一聚, 傾下偈, 個精神值真係會好低。不過識左LOBO之後, 差唔多個個禮拜都會有美食聚會, 可以知多d有好野食o既地方, 都幾好呢, 之後可以同其他朋友去。
4. 上星期三同舊老細farewell食晚飯, 我個位o既上幾手同新舊老細一齊食。去左銅鑼灣廣場o既”南翔”。D野食OK啦(舊老細請我地), 過程都有傾有講o既…
5. 星期五同2個朋友(BD同事)食晚飯(Connie & Martin), 去左星期三”因為要同老細食飯而去唔到o既LOBO美食聚會”o既地方。係佐敦(我公司行去好近下)食龍躉。價錢唔算貴, 不過由於某個朋友講得唔太清楚, 所以叫左d野來唔夠食, 3個人(包括唔大食o既Connie)都唔夠食, 仲要事後先知原來係蒸o既果味龍躉先係推介(我地叫左炆), 蝕左添。(碟炸子雞都幾好食, 壽包都唔錯, 怕甜o既我都覺得OK)。食完之後由於唔多夠, 大家再去食糖水, 食下傾下就散了, 3個人慢慢行去尖咀(Connie有下場, 同Carmen Jessie飲野, 我同Martin仲路過say hi添), 最後同馬生去新港果面各自搭車返屋企。同朋友聚下舊食下飯真高興呢~~
同日, 呀S同Mandy加入左California, 做Gym虫。另外亦得知原來民仔唔聲唔聲一早就做左會員, 仲要好dum本做永久會員(聽另一永久會員呀Sam講要皮幾野)。
6. 星期六, 原本而家同事攪活動去濕地公園, 點知攪下攪下無下文, 諗住反正都係有活動, 呢邊去唔到, 就去深圳啦。約左KTG同埋另外幾個friends, 上到去都係飲飲食食唱埋K, 幾悠閒, 無之前幾次上去咁累。終於都唱到幾首學左好耐o既合唱歌, 我其他朋友一係唔識唱, 一係唱唔到, 所以有得同人唱到好滿足。夜晚去KTG介紹o既”酋長”食晚飯, 好特別! 食類似燒烤o既野, 但係有好多種類, 多過巴西燒烤, 而且坐係自己位度就得, 一班服務員(每個都拿住唔同野)會不停咁成間餐廳逐張台走埋來問要唔要, 唔使自己走出去拿野食。至於燒烤以外o既野, 就有一張好大o既台係外面, 有好多其他普通熟食同生果, 呢d就要自己去拿啦。總括來講, D野食得, 環境特別得來又舒服, 服務仲好好, 幾廿蚊任食, 實在係值得推介! 下次同其他朋友去要推下先得! 食完晚飯就返歸, 返到來得知原來濕地公園成行, 好彩一早通知左同事(係我未知成行之前)話唔join了。
同日, 呀哥去左我介紹o既一間中醫同一間推拿(都係我身邊有人去過而且極得o既!), 唔知係咪真係咁掂, 時間証明一切。
7. 星期日, 抖。
8. 星期一, 又返工了…

完

狠批一班無聊為情自傷的人

事先聲明, 我對我唔識o既人做咩野全無興趣, 佢地要發傻發癲都唔關我事, 亦都唔會可憐。不過如果有我唔識人睇左覺得有些少幫助o既, 無任歡迎。
係呢度我並唔係想講一兩個人, 而係我識o既一堆唔同圈子o既人, 所以唔好對號。

我好明白, 人係有感情o既動物。除左食飯訓覺大小二便之外, 人都需要精神上o既慰藉。而精神o既需要人人唔同, 有d人需耍事業帶來o既成功感, 有d人喜歡站在台上受萬人歡呼o既感覺, 有d人喜歡挑戰極限以提昇自己為榮, 有d人就以信仰為精神寄託, 但係除此之外, 有更多人(或包括剛才講過果d)需要人關心, 需要人o既”愛”。因此, 我並唔會係度講”有手有腳有飯食有地方住已經好幸福啦”(雖然我覺得係!)。我只係講返大家最在意o既”人生/生活” 同”戀愛/情傷”。

撇除晒果堆無父無母無手無腳失明失聰身有殘缺活在戰火恐懼當中o既人唔計(還不夠嗎?), 你地仍然不足為”慘”。”感情”, “感覺”係好重要, 但係真係大晒嗎?
即使真係大晒, 但係你地所謂o既”愛”有幾深有幾真? 對方真係如此重要? 現在係, 過多十年你能否仍然有如此”激情”? 呢樣野最多2-3年而已! 多年後回想起仍然會有很大的感覺嗎? 當一起生活後所浮出來o既問題又有無諗過? 真係因為”愛”就可以堅持所有野嗎? 我第一個唔信!
又或, 明明對方係一個唔值得愛o既人, 或者係一個對你完全無感覺o既人, 自己覺得有”feel”就堅持嗎? 有咩作用? 純粹要旁人覺得你癡情專一嗎? 要旁人可憐你嗎? 唔會! 人家心目中只覺得你無聊兼晒時間!
大家覺得自己果d真係愛嗎? 我覺得有一部份人(不是全部, 但如果大家都歸自己為不是那類, 我無話可說)只是”硬頸”和”覺得唔抵”而已。將這種思緒正當化, 便覺得是”愛”, 覺得不對不在自己, 自己很”慘”。
講慘, 我識(唔係睇書睇電視, 係真係識)大把人係呢方面更慘。要我數嗎? 有從少拍拖拍左7-8年因為有第三者分手(仲要我個朋友係男仔); 更有個朋友結婚十幾年有埋仔女, 但係因為外遇離婚, 頓失依靠同經濟支柱, 仲要獨力養2個細路(sorry搬左妳出來)。雖然仍然都係唔開心, 但係都可以振作起來, 努力向前; 但係你地班人少少野就喊苦喊忽, 算係老幾? 算係什麼東西?

人真的很了解自己嗎? 我覺得很多人都被”自己希望自己是什麼性格”的表層意識影響了。經常覺得自己是怎樣, 慢慢地自己便變得真的是這樣。什麼星座性格, 生肖, 睇相…等等, 只是影響了你自己而令以後產生改變(當然, 我係講坊間大部份都係無料到的, 真正的東西方術數我也覺得可信)。尤其近年各大傳媒, 書籍, 歌曲等等都標榜”慘” (其實連金庸小說內的主角, 很多時都以慘的經歷來引起讀者共鳴), 使人覺得如果自己不能很快樂, 不如便”慘”, 慘會使人可憐, 即使不可憐你也不會睇低你, 覺得你有錯也情有可原, 很淒美。對不起, 我不會。

戀愛真的大過天嗎? 真的那麼慘嗎? 要天天以淚洗面嗎? 食唔落飯嗎? 每晚發夢夢見他嗎? 人生真的那麼灰暗嗎? 真的什麼也沒有嗎? 不!!!! 只不過不能和所愛的人相愛罷了。父母呢? 兄弟姊姊呢? 朋友呢? 無人關心你了嗎? 你一個人發傻便令那麼多人擔心, 那樣便好嗎? 父母兄弟親戚朋友未必了解你, 但不了解不代表不關心! 只為了一個人便可以不理全世界的感受嗎? 忽視了自己所擁有o既野嗎?

覺得自己有所不足, 便要去”做”, 去”改變”! 放工無聊便去進修或去興趣班, 身體不太好就去求醫, 覺得自己性格某方面有問題使去改, 常常掛在口邊說”自己是這樣的了, 好難改的”, 但又不去行動, 根本就不會有所改變! 自己認識社工, 聽過心理醫生的說話, 也看過很多有關書籍; 有一位社工說: 人要改變自己, 是沒有人幫到的, 一定要自己”愿意”, willing to改變, 其他人才可從旁扶一把, 自己”批死自己唔得”, 就沒有改變的餘地。要在短時間內放開, 看淡一切當然困難, 但絕對不可將自己困在一個又一個框框裡, 鑽牛角尖, 愈來愈向著極端走。

沒有深思隨意便野出來, 結構可能散亂, 但希望大家認真諗諗, 希望對你地有些少幫助。接受唔到o既就算罷。我要講o既野差唔多係咁多了。

完

轉貼: 深雪 : 娶你為妻的秘笈 + 深 雪 : 娶你不娶你？

也許你也讀過《Why Men Love Bitches》這本戀愛秘笈，現在，同一位作者，Sherry Argov寫了一本更勁的女性攻略讀本─《Why Men Marry Bitches》。

一看書名就知勁，也果然，內容非常有見地，眾女士必能從中學曉幾招。顧名思義，此書以擄獵男人當上堂老襯為目的，一切朝結婚為目標。


如此偉大的題目，我打算分兩日介紹。首先，作者指出，女人若要男人娶她，就要在拍拖初期讓男人無壓力，要是你一開始拍拖，就擺出一個非要對方娶你不可的姿態，他就一定對你有所防範。


好了，到已進入熱戀階段時，女人要留意性愛上的態度。皆因，世上男人都只想娶正經女人，所以，女人平日的衣不可以太暴露，而在床上的表現，更加要留神。


男人，都有迷戀處女的情意結，於是，女人的表現愈清純，就愈能讓男人萌生結婚的念頭。那麼，請由內衣的風格開始注意，最初幾次的性愛，女人最好穿清純一些的內衣，要是真的很想穿性感內衣，就最好製造機會讓他知道，這套內衣是你專程為他而買的。男人很怕看見女人穿前度男友也看過的性感內衣，他會為此而反感。女人必須知道，男人只想娶一個絕對屬於他的女人。


床上表現適宜被動，切忌十八般武藝，不要表現得太老練。在最初幾次的性愛前，如果男人忘記帶避孕套，女人千萬不要在自己家中供應給他。整件事的要點是，讓他覺得你是好女人，不要引誘他，應讓他全權作主導。


要他娶你還須留意甚麼？留待明天再續。


緊接昨天的分析，你倆已經同居了，他還會想娶你嗎？《Why Men Marry Bitches》的作者Sherry Argov提出了一個重點：縱然你們已同床共枕，但你要令他依然有興趣繼續追捕你。

首先，不要讓這個男人佔你便宜。例如，若然他一回家就發你脾氣，你就要找機會出外走走避開他，並告訴他，雖然你明白他有多難受，但你希望他在你回家後已能冷靜下來。


他出外公幹數天也不致電給你嗎？你就要盡找機會與女朋友們逛街，當他終於致電給你了，你不妨不聽他的電話。這為了令他知道你也有你的生活，你不是他可以隨便丟低一旁的。


你的EQ要高，並間中製造一些機會讓他緊張你，而不是只有你會去緊他。


另外，如果他是有錢人，你要表現出你不貪他的錢，你一定要有份工作，這讓他尊重你。另一方面，無論他買甚麼送給你，你都要表現得快樂和感激，這讓他覺得，他能帶給你幸福。


好了，你們已同居兩年了，你已非常想結婚，可以怎樣做？你可以與他認真講清楚，你希望結婚，要是他諸多藉口，你就要從那一刻開始大幅度減少與他一起的時間。你加班又好、進修或是旅行都好，總之，讓他明白，要是大家不能結婚，你就會愈走愈遠。當他害怕失去你時，可能就會求婚。


要是他不求婚？你乾脆說分手，然後間中見一見他。當他掛念與你一起的日子時，就有可能求婚。


他還不求婚嗎？那麼，你另找一個新對象好了，橫豎，他永遠不會娶你，你要走的路，和他根本就不同的。

轉貼: 深雪 : 框框之女

很多好女孩都無男朋友，最大原因是，她有太多框框。
都未去到被追求的階段，卻已經超級多顧忌和嫌棄，太過保護自己。

嫌棄對方條件不夠好就無話可說，但有些女孩子甚至會因為對方一句半句說話而決定落閘；另外又有一些，會無端端考驗對方的誠意、專一程度；亦有女孩子以對方的舊戀愛史作為參考標準……

別人都未追你，你已經為這段關係寫下三世書，實在驚嚇。

我的建議是，輕輕盈盈、開開心心地為自己撮合一些約會機會，不要太快落閘。到第三次約會後，你真的肯定他完全不適合你才放狗咬人吧！到那時候，你不單止更了解他，亦更了解你自己，你會明白你真的討厭甚麼，以及能容忍甚麼。

如果，你是那種每個月都有人約會的女孩子，你當然有權嫌三嫌四。若然，你已三年無發市了，你就該由最簡單的男女約會開始平衡一下你的思想和心理。

縱然我是女人，我都會認為有些女孩子頗為心理變態。你認為你是在保護自己嗎？其實，你是在令自己蝕底。

態度開揚一點、簡單一點，在最初的階段，不要太認真。到你要認真考慮這段關係的方向時，你才把它分類吧！

那些落了千重大閘還有男人戀戀不捨的女人絕對不是你；舊時代流行考驗男人的方法亦不適用於你。你記，你是很久都無拖拍的那個。

對男人要採取歡迎的態度。而你心目中那些無限量的框框，稍後才設置。

無聊短篇 -- 把冰山劈開

“我…我…的八兒呀…你…一定要繼承爺爺的遺志…把冰山劈開…” 奄奄一息的一個爸爸對著兒子說。
“爸!爸! 我一定會的! 但…但是冰山是怎麼樣的呢?”
“你…你…不知…道嗎? 呀…旦…你…你…見到又大…又白…又…”一口氣接不上來, 就此嗚呼哀哉。

年輕的烏龜兒子從此下定決心, 練好武藝, 一面尋找著冰山的蹤跡, 誓要把冰山劈開。而為了繼承爺爺及父親的遺志, 少年不敢稍有偷懶, 日出而練, 日入而息, 每天風雨不改從不間斷地勤練絕技, 很快便超越了他的七個兄長; 日子有功, 不知不覺地在一次入定中領悟到本門絕技的奧妙, 而一窺高手之殿堂, 慢慢地更到了父親及爺爺不能到達之境界。年輕人漸覺自己的本領可以出身行走江湖, 便毅然離家, 全力去尋找冰山。

一路行俠仗義, 竟然闖出個名堂來, 但冰山的蹤跡卻無法得尋。行過千里路, 就在一個心灰意冷的晚上, 終於給他見到了, 想不到在這樣的境地相遇!

果然是很難應付的對手! 年輕人使盡一生功力, 全力擊出自家最終極絕招!
“冰山破!!”
暴喝一聲之下, “冰山”應手而裂!!

“我終於成功了! 我成功了! 我把冰山劈開了!”

就在此時, 一隻兔子怒氣沖沖地掙扎地走過來, 大聲責備年輕人所做的事。
“我自打破了冰山, 干你什麼事?”年輕人很傲氣地說。
“冰山?!那是月亮呀!”
“什麼?這不是冰山嗎?爸說是又大又白的…這不是冰山嗎?不是嗎?我畢生的功力…我…呀~~~~”

玉兔回去慢慢修補了月亮, 從此我們看見的月亮也是斑紋處處的。

完

問題: 究竟年輕人姓甚名誰?

睇完"底褲人"之我感

首先問下大家，蝙蝠俠同超人有咩相同之處，又有咩唔同之處?
錯錯錯，緊係唔係咩行俠仗義，有無超能力甘啦!
相同之處: 都係將條底褲著係外面。
不同之處: 一個笠係頭度，一個著係條長褲外面。

相信睇到呢度大家都對佢地有ｄ認識了

愈扯愈遠了。話說睇左呢排上ｏ既電影"超人"，柅講下觀後感。
首先，估唔到套戲成２個半鐘(之前無留意簡介)，坐甘耐，咩都底晒。
第二，個男主角係幾靚仔。相信好多女仔都係睇呢樣野先。
第三，ｄ特技係做得好好，唔係戲院睇感受唔到。

講完一般人要ｏ既野，講下自己ｏ既意見先。
結論先: 套戲唔差，但係亦並唔係一套好好ｏ既戲。

無錯，人靚，特技好睇。但係比起幾廿年前ｏ既Christopher Reeve，演繹無甘有內涵, 情感無甘豐富。今時今日ｏ既電影純粹著重視覺效果, 有點忽略演員的感情戲份上。並唔係話而家果ｄ差，但的確係無以前甘好。劇情方面，同近年ｏ既"美式英雄片"一樣，幾乎可以話無咩，總之就係有班衰人作惡，要解決各種麻煩，再加上ｄ感情線，就係甘。所謂有帶出來ｏ既信息，套套都係甘講架啦，要加ｄ有意思ｏ既野話甘易，唔係深刻ｏ既根本無用。

導演係"X-men"第一集ｏ既導演。呢個人根本就唔得，名大於實。導演最重要有２樣野：一係就係一個好ｏ既story teller (即係講故事ｏ既人)，一係就可以控制到觀眾情緒（開心，傷心，緊張，驚怕．．．等等)，呢個導演，絕對唔係一個好ｏ既story teller都算，拒拍呢ｄ"美式英雄片"，又唔見得有咩故事，居然動作場面都唔算多，一味影住堆人係度講野，一係就做ｄ好不知所謂ｏ既動作來發動能力，加特技又攪掂；甘使鬼搵拒拍咩! 總之個導演實在係唔得。

講返呢套戲，其實比係"X-Men"第一集，已經好好多，而且ｄ特技真係好唔錯。不過成套野雖然無咩悶場，但係又無特別高潮位；正常無論小說，故事，電影．．．都會有高潮位，但係呢套又唔係好算有(係有幾幕會緊張少少咯)，非演員之罪，乃導演之錯也。

總的來說，由於我一開始果３個原因，加上"超人"名頭又大，加上又係近期熱門，俾錢入戲院睇都係OK的，一看無防。５粒星會比３至３粒半星啦。

完

八月四日

呀馬生日快樂!! 祝身體健康! 心想事成!

1. 呢排都係返返返工, 放放放工
2. 呀媽同呀哥屋企大執屋, 當然除左我間房之外, 天堂與地獄之比更顯著
3. 呢幾個星期都有一日半日同Lobo, Martin, Carmen食晚飯。由於Martin係廚師, Lobo又係四圍試食o既食家, 所以次次都去d介紹地方, 而質素亦都幾好。最印象深刻係1/8(WED)去西環山道o既加拿大餐廳, d野好得! 係食西餐o既, 幾十蚊一位晚餐, 但係質素絕對超越呢個價位! 係個地方隔涉d。
4. 終於唱K唱左草蜢演唱會!(緊係唔會全部唱晒啦) 雖然好out, 但係好開心! 在每夜草~~~~蜢彈跳於激光中!草~~~~蜢彈跳於心窩中!
5. 今期工聯無報野, 要搵一日regular同民民去游下水先得
6. 本來想出另一個詳細o既文講返工d野, 諗左好耐但係都無心機寫...可能真係收左工唔想諗起啦...有機會先寫啦...總之好彩自己都OK勤力同暫時跟得住d野, 老細都無咩野大不滿啦
7. 果個幾千字o既金庸更加停左手成個月
8. 好多朋友都有野唔高興, 屋企人又有野唔多高興, 攪到自己都有d唔多高興
9. 睇左底褲人, 估唔到成2個半鐘; 套野OK啦, 唔差, 又唔見得極好; 不過要睇就最好係戲院睇; 總評都值得入戲院睇o既
10. 暫諗唔到d咩, 係咁

完

七月二十五日 -- 雜記

好耐無寫野了, 原因主要係轉左工, 由於太耐無寫, 所以記得d咩特別野就寫啦, 但係次序, 日期等等就可能求其d了~
1. 打鼓堂終於上完, 覺得雖然個班無咩用廢廢地, 但係由於自己有意識去學野, 所以一樣有得著, 同埋對個鼓o既感覺熟左d(雖然仍然要練多d); 另外, 係堂上都叫識左2個朋友, 一個係呀叔來o既, 一個係個好斯文o既後生女, 尾果幾堂上堂之前仲會一齊食飯添; 由於我地上8.45pm, 係MK上, 而且晏d都無所謂, 所以有一次直頭約6點係MK等, 去唱K唱到9點半先去上堂, 哈哈; 個呀叔唱得唔錯呀, 個女仔就好斯文, 好細聲。
2. 終終終於係前排問人借到草蜢來睇(好out), 好正呀~~~ 好想唱K唱~~~ 有好多都想唱!!
3. 份工實在係...都係遲d出過一篇野講啦...
4. 呢排返睇金庸, 不過進度慢左了, 睇埋手頭上果套天龍八部可能要停下了; 另外, 一路寫緊個"金庸小說讀後感", 唔覺唔覺寫下寫下都未寫完居然有三千幾字了 =.=, 不過轉左工之後未郁過了...
5. 22/7-23/7 同娟, 民, Sam, Mandy去珠海玩。覺得有d老點地去深圳再搭巴士去, 平係平d, 不過搭車好晒時間, 離開屋企要個半鐘到深圳, 再2個半鐘到珠海; 由於要等Mandy放工, 攪下攪下6點半先到...寧願貴少少搭船去澳門再過關...一去到就去一早卜左o既酒店(珠海渡假村)放低野, 再出去食飯; 食海鮮, 又平又抵, 不過海鮮以外o既野就唔好多食, 同埋記得果時係深圳福田食仲平d又好食d...不過呢餐民仔請, 有人請就算啦 XDDD。 食完之後去"碌鈴", 今次佢地碌多, 我碌左幾手, 都係中6-7個島...下次有機會要試下篤波...玩完返去都12點幾, 沖完涼大家未眼訓, 一齊玩UNO吹下水, 唔覺唔覺就3點幾4點...訓。第2日checkout之前又唔想去第二度, 所以留左係酒店, heahea下睇下電視就夠鐘checkout, checkout之後食午餐, 普普通通一餐之後就去睇小型賽車場, 睇睇下大家就都去玩, $30 for 10分鐘, 都幾刺激呀~ 之後去按摩, 我唔係好好, 所以2個鐘都按腳only, 原來按腳係平d的, 佢地按身2個鐘$60島, 我按腳$38, 平到嘔。按完都6黠零了, 大家聽我意見過關去澳門, 去碼頭見賣7.30pmo既船飛, 於是決定返HK先食晚飯, 買左船飛返去了。順帶一提, 買完船飛後大家有唔少人仔, 但係無晒港幣, 又無得"手禁", 好慘 XDDD 總的來講, 其實玩過d野食過d野深圳都有, 除左小型賽車之外其他野都係深圳平/好d, 又慳好多時間係旅程上, 所以第日都係寧願去深圳~ 不過今次有d唔同o既, 大家幾個friend一齊過夜吹下水都幾開心。
6. 7月頭呀爸同表弟返大陸, 所以閒日無約人都返屋企同呀媽食下飯, 收工去買下"食送", 返屋企煮2野咁。
7. 呢份工d同事雖然未必會好熟, 不過都係一班幾好o既人同玩得o既人, OK啦~~
8. 諗唔到有d咩住, 有遲d再加
9. 來緊會寫返野密返d...希望

轉工

成個星期無寫野, 原因係病
上個星期一, 二發燒, 星期三無再發, 但係一路咳到今個星期(不過係星期六日長抖之下好左好多)
成日唔舒服, 所以無咩心機寫野

另外一個原因, 係唔知點解個人好空
我上星期三就返新工了, 返新工有新氣象新環境, 照計應該好有新鮮o既感覺
尤其好似我呢d咁多野諗o既人應該有好多感覺
但係居然無
返左幾日工, 唔知自己係度做緊咩/諗緊咩
所以一路都無寫野

講返份工
而家返地政署, 人工同之前差唔多, 轉工係想轉下環境, 做下唔同o既野; 返工地點係油麻地停車場大樓, 咁樣講大家唔知係邊, 用另一方法講就可能會知: 直頭係油麻地圖書館果棟大廈, 即係係油麻地同佐敦中間。
唔知好唔好彩地, 請十幾個新人, 係呢個唔算忙o既部門做野; 我同係BD一樣, 十幾個人偏偏我係唯一果個編左去最忙果一組度做野(睇成個啟德機場)。一入去就聽人講我個組係好忙的, 2個人跟晒所有野...算啦, 好過無野做, 又可以學到野。
返放工時間係9.00am-17.48pm(食飯12.30-1.30, 得一個鐘), 由於而家係返五日工, 所以放遲d, 不過聽聞我果組唔一定可以準時收工(又未至於會好晏收); 返五日工真開心。
我果組得我同我老細, 係一個幾後生o既女人(三十島啦); 我上一手做埋呢個星期走, 好偶然地我上一手係我City的舊同學呀康(仲要係final year project同組添); 佢話無可能係走之前教晒我所有野, 叫我自己慢慢摸下點做...佢話老細好熟d野, 有咩唔識可以問佢, 不過真係可以成日問嗎? 後尾聽返, 原來老細都係contract staff(地政唔似BD, 好少contract staff的), 佢以前係外面應該好高級好有經驗, 唔知點解(睇怕係公司執笠定炒人)會來到呢度收少咁多人工做野。
同事方面, 由於有一堆都係新o既contract staff, 所以好自然地都係會一齊熟d; 我o既感覺係班人都幾好, 大家年輕人幾好傾又幾好玩, 不過熟我就未必會同佢地好熟到, 相性唔算好近。
返左差唔多一個星期工, 由於好多野未識o既關係, 老細都唔係比好多野我做, 所以都暫時幾得閒; 遲d上手走左, 我就會坐佢果個位, 就會有得上網(雖然會無時間上, 但係起碼"有得上"), 個office都幾靜, 同埋個feel好似好耐之前o既政府office咁, 個感覺好似做緊好耐之前o既公務員咁XDD
最值得高興o既野, 應該就係幾樣: 返放工仍然可以一程巴士, 幾方便; 好好好近圖書館, 仲近過旺角果時, 而家差唔多日日去; 隔離(真係隔離二步路)就有籃球場(雖然無咩機會打...), 所以個返工地點對我來講算係好唔錯了。

最在意o既, 始終係個人唔知點解對轉工一d感覺都無, 轉左就轉左了...好唔知點
不過, 反正都係生活
諗唔到有咩講, 就此。

今次篇野完全唔經大腦, 睇唔明就算啦

完

生病

細個時成日都病, 成日去睇醫生, 係藥罐來。到左大個, 雖然身體好過細個, 但係間唔時都會病下, 而且其實個身體一向都唔係好好狀態o既人。
由於細個成日病又食藥丸, 已經練就左可以同時唔使用水都可以吞幾粒藥丸o既能力, 有時要食藥又無水起來都可以照吞, 好方便。
話說呢排世界杯期間, 由於有PP Stream同PP Live, 而屋企電視又有CCTV1 的關係, 睇多左好多波, 後遺症就係夜訓。一向個身體同精神狀態都唔算好, 而且不嬲都訓得唔係好好, 所以睡眠對我來講好緊要。睇多左波, 自然就訓夜左; 不過通常都係睇頭場, 3點果場唔睇。
o岩o岩過左去果個星期五, 民仔上我屋企睇頭場, 而星期六, 民Sam娟上來我家睇波(屋企無人), 由於第2日唔使返工o既關係, 大家都諗住睇埋尾場(巴西對法國, 實好睇過英格蘭對葡萄牙)。英格蘭對葡萄牙果然係一場悶波, 呀Sam睇到恰眼訓, 完場就入房訓, 下場再出來; 娟唔係波癡, 所以睇完第一場就訓, 剩返我同民仔磨到3點; 到得3點, 叫唔醒呀Sam, 於是得返2個人睇; 由於連續2日夜訓, 加上成日係冷氣度, 所以終於出事了。
星期日發覺自己喉嚨有d痛, 諗住都無咩事, 星期一起身都唔係好唔得, 反而返到公司就開始頂唔住; 喉嚨痛, 人飄飄浮浮, 頭赤赤又暈, 覺得自己好可能係發炎+發燒...由於約左o既關係, 收工仲同鼓班同學唱K, 之後再上堂。返到屋企快快沖涼訓覺, 覺得自己有d發冷, 於是唔開冷氣訓; 訓到半夜醒左, 唔係因為熱, 係半夢半醒咁, 發左個好騎呢o既夢; 由於個夢好亂, 個人又醒醒地, 所以反來反去訓得好差...等於無訓過...無啦啦床尾個架跌左一堆野落來, 嚇左我一大跳; 果下真係好驚, 叫左一聲出來(唔係大叫, 係好微弱無助果種...), 果刻真係覺得有d無助, 又病又唔舒服又訓唔到...嚇親之後仲醒晒添...
由於醒左, 又唔舒服唔想開電腦, 於是出廳坐下, 磨左差唔多成個鍾(5點幾了)就返返房訓, 又係反來反去訓唔到...終於慢慢到訓著左, 但係星期二(4/7)係返公司o既last day, 無理由唔返, 於是死死氣地遲到都返公司了。
明天就返新工(5/7), 第一日返headquarter, 實際要返左第一日先知返邊; 希望快d好返, 唔好返工第一日就病啦...

完

長洲遊記

上星期六及日(24/6及25/6), 我同幾位朋友(娟, 民, 源, Sam, Mandy)一行人去左長洲玩。其實呢次行程都傾左幾耐, 大家時間難就, 但係最終都約到一個日子出來; 好耐無試過一班friends去玩2日1夜, 所以好期待。

一早睇定船期, 所以當日約定12.00係碼頭等(搭12.15o既船), 我同民仔相約係北角站一齊去; 由於我地都早左o既關係, 到左中環專登走去買以前彭定康食過果間o既蛋撻來食, 我呢d蛋撻魔人當然要試下啦(果日都無食早餐)~ 一試之下, 覺得個底唔錯, 牛油味幾重而且幾脆; 中間的蛋味都幾夠, 唔係純粹甜味; 不過整體來講, 個底o既味太勁, 蓋過左其他味道, 所以唔算真係極好o既蛋撻。

係碼頭食完蛋撻, 其餘人都到了(4人約埋一齊), 大家懷住興奮o既心情(細個寫遊記9成都會寫"懷住興奮o既心情", 所以無論係唔係都實要寫下XDDD)入閘上船, 約莫過左一個鐘就到了。到左長洲第一件事當然係拿左房先啦~ 今次book果間同上前同一班朋友果間係同一間(東堤), 入到去發現裝修左, 各樣野都好新淨呢~ 放底晒行李之後就去食晏。不自覺地去以前食o既某餐廳食晏, 匆匆食過之後, 去超市買d必要物品(廁紙, 水, 杯, 零食等)就返房討論下一步行動。

當日天氣好~~熱, 又極曬, 根本無可能燒烤同踩單車; 大家當然唔會戇居居留係房唔知做咩, 所以一致決定去沙灘。去到沙灘發覺真係好曬好熱, 有d人係陰o既位看住d野, 而其他人就當然落水啦~ 東灣o既水實在係幾污糟...同之前去大清水實在無得比, 不過由於太熱o既關係, 都係落水狂游; 練左一陣發覺無咩進境, 就叫呀源較蛙式; 蛙式真係易好多! 我試左幾野, 已經游到下, 而且仲可以呼吸到添~ 要練習多d先得!

幾個人輪流游一陣水之後, 大家都上返水; 係沙灘玩下飛碟, 數字球, 馬騮搶球咁(d沙好~~~熱又好粗, 所以一定要著住涼鞋), 唔覺唔覺就過左差唔多3個鐘(好明顯有曬黑左, 對腳仲有涼鞋印添...=.=); 返返間屋沖完涼, 差唔多7點出去食飯了。當然就去食一早決定o既海鮮啦~ 叫左一堆海鮮同小菜, 加埋食飯飲野每人都係幾廿蚊, 好平, 不過味道就算係普普通通, 將價就貨算係好好了。由於當晚世界杯賽事分別係11.00pm 瑞典對德國同埋3.00am 阿根廷對墨西哥, 而民仔係阿根廷fans, Sam係瑞典fans, 所以諗住落bar睇波; 食完飯去行下視察環境, 搵到一間bar好唔錯又有大電視, 即時book定位大家齊齊睇波~ 之後返屋磨一輪到夠鐘就去食糖水; 去返不嬲去果間食, 仍然係又平又抵食, 由於係民仔請(因為之前book房果日甩底), 大家都唔客氣了~ 食完就去睇波。係bar一堆人一齊睇波氣氛當然好好, 不過呀Sam愛隊瑞典後防唔知點解好大漏洞, 開波12分鐘內就比人入左2球, 下半場搏到球12碼仲要炒埋(拿臣>.<)...大勢已去...睇完都已經1點了, 返屋途中見碼頭外有好~~多街邊小食, 食左d(幾好食)之後就返去了...大家沖完涼, 民仔同Sam2個波痴再去睇下場波, 剩返我地4個就訓覺了(都2點幾3點了)。o岩o岩好2間房2個人一間唔使爭; 呀源一d都唔反訓, 所以同佢訓一張床都無咩問題, 幾好訓(反而好似我逼左佢出去 XDD)。

一訓到第2朝9點幾起身, 大家都起晒身, 見到得民仔係度; 原來佢地睇完場波都5點幾天光了, 飲埋早茶先返來, 一返來無耐呀Sam可能意興闌珊之下返屋企先; 我地一行5人梳洗妥當之後就去食早餐, 食完返屋打啤牌(Mandy果日o既手氣實在太好太可怕了), 到得差唔多時間, 就去還房食晏(食之前去買定一堆糖水); 食晏去左果對日本夫婦度食, d紅豆餅同手卷仍然都係好味呢~~ 食完之後係碼頭食埋糖水, 夠鐘上船。到左碼頭之後就各自散了, 呀源就上我屋企拿野。

總的來說, 今次玩得好開心, 長洲仍然都係我o既宿營favourite地點, 希望來緊可以再攪過, 同埋可以燒野食+踩單車啦~~~

完

p.s.同場加映: 第2日搭船返去時, 發生左一樣好精彩o既野, 我當然即刻影低左(見下圖); 係唔係好晶瑩剔透呢~ 好一條天然o既鐘乳石! 某去左外國o既朋友係唔係諗返起讀書時o既不快回憶呢? 話說當年我同受害人+下圖之人係學校o既集會中, 某人恰眼訓時又做出左下圖o既事, 而該鐘乳石大大滴咁落左該去左外國o既朋友o既校褸度。希望下圖唔好引起人不安啦 XDDD
另, 下圖打左格仔, 以防有人認出當事人。 :D

(按:暫時貼唔到圖, 遲d再補)

轉工

講左好耐好耐好耐轉工

最想就係轉返出去做私人公司, 唔係好想再做政府野
退而求其次, 就係點都想離開屋宇署, 因為做左好~~耐了~
牢騷之前都發過, 所以唔再講點解想走了。

上2個月寄過唔少application搵工, 回音唔多...見左1, 2份
當中有一份係地政處o既工, 又係contract, 一年一年咁續, 人工同而家又差唔多...
其實無咩特別好, 不過一來有得離開而家呢度, 二來轉下環境無咁悶, 三來可以做下第二d job nature, 學多少少野, 都好o既...
去見果日, 都無點準備, 膽粗粗就走去見; 估唔到問o既問題我又大部份OK答到; 同一般見開o既政府工(尤其係BD)唔同, 居然有7成用英文問答(平時得1-2條用英文), 我又用英文答得好順下喎~ 見完都無咩特別, 就走了。又估唔到政府效率咁快, 過左3個星期, 就打來話請; 由於我d假可以拿返錢, 所以我足一個月通知先走。

唔覺唔覺, 又唔記得寫上來, 仲有一個星期島就last day了; 公司d野清得就清, 儘量啦, 其餘都無咩好講了, 無咩心機做o既其實 XD

來緊新工未知返邊度, 人工就差唔多, 各位唔好叫我請食飯啦~~~~

完

！！！！熱火冠軍！！！！

上星期三(21/6), 係NBA FINALS Game 6, 係7場4勝制o既賽事入面, 熱火場數領先3-2
Game 6 同 Game 7 都會係小牛主場

原本諗住Game 6都係輸多, 最後去到Game 7先分到勝負(仲諗住Game 7請假睇波), 點知Game 6就俾熱火贏左!!
熱火係落後0-2 o既情況之下連贏4場!

好野! 熱水羸波!~~~~
點解我會甘開心?

我並唔係Wade或者Oneal的fans, 亦都唔討厭小牛(仲OK中意小牛添)
但係, 我長久以來支持o既球星--Payton彼頓, 係就來要退休之時終於都得償心願! 拿到冠軍指環!
仲有Zo(莫寧)!
佢地2個都係值得拿冠軍指環o既!
而且拒地係比賽入面都係有貢獻, 唔係"痴"人拿冠軍的~!

好感動呀~ 好開心呀~
好野~

請容我係度發下癲~
嗚嗚嗚嗚嗚~ 羸波了~
~>_<~ 苦盡甘來呀~

完

慾望與自制能力

其實對於好多野, 我o既自制能力並唔高

讀書時, 有得玩/打機時會玩唔停, 唔識收(當然又唔係好似我表弟咁完全唔停), 所以成績並唔理想
自小好鐘意睇書, 一開始睇書就唔願停, 一路睇一路睇, 如果係好似金庸小說果d咁精彩o既書, 直頭會睇到廢寢忘餐(唔係好誇張, 真係除左返學讀書訓覺ｏ既時間, 行緊路又睇, 食緊飯又睇, 連去廁所/沖涼時對眼都唔離開)
想食野/飲野時, 明知有ｄ時間唔應該再食, 但係又忍唔住再食
早上起床好眼訓, 明知再訓就會走車, 但係都要磨到最後一刻先起
...
...
好多野都係咁, 雖然睇落好似好多都好小事, 但係其實可以睇得出一個人係大事o既時候會點

不過, 由於細個有留意到呢樣野ｏ既關係, 有去嘗試練習過自己ｏ既耐力同自制能力
所以, 係好多大/重要ｏ既時候我相信自己可以做到; 好似係自己火大, 情緒唔好時, 可以儘量keep住個脾氣; 係有誘惑(even係大o既誘惑)ｏ既時候保持清醒...等等, 我覺得自己係呢幾年係呢方面有長進。
而如果自己覺得自制唔到o既, 就直頭唔做, 例如:賭, 吸毒...etc,　呢ｄ我覺得一試左就好難停ｏ既野, 就連試都唔會試。

人ｏ既自制能力其實唔係好高...通常都係受幾樣野影響, 最大ｏ既就係"環境"同"習慣"。
環境, 就當然係講緊身邊o既人, 事, 物等等; 簡單來講就係"近朱者赤, 近墨者黑", 好易明, 金科玉律; 正如d家長希望自己o既仔女入名校, 並唔係話d老師教得特別好, 而係d同學o既質素/讀書風氣...等等好好多;大家千祁唔好認為自己可以係唔好o既環境下, 出瘀泥而不染, 好難的, 唔好o既野就避免唔好接觸啦...

而所謂"習慣"只係一個好"籠統"o既詞語, 其中包括左好多野: 習慣/承諾/堅持/意志...等等o既野, 但係我覺得可以用"習慣"來做統稱。一個人意志堅強, 都係因為長期處於某d環境而練就左呢樣野; 一個人承諾左, 就會做/唔做一樣野, 就會被"承諾"影響住, 而變成習慣; 一個人習慣左一樣野, 就會keep住做/唔做。所以, 當人"破戒", 做左一次違反自己"習慣"o既野, 有d人就會好~~唔舒服, 有d人一破左就會自暴自棄...etc, 例如:
一個戒緊o既酒徙/賭徙/癮君子, 一旦做左一次, 果次之後就九成上返癮。
有d男/女仔, 試過one night stand, 個思想可能就變左"反正都試過, 一次同好多次都無所謂", 而繼續沉淪落去。
有人從來都係係"拍拖"o既狀態, 將一切o既心機, 所有野都放晒落去, 一無得拍就好唔慣, 而且好似失去左好多野, 跟住愈來愈鑽牛角尖, 愈諗愈多野...愈來愈唔開心。

其實好多野都係"心癮", 而"心癮"起皆因"慾望"。愈執著愈追求, 就愈會沉落去。好似游水咁, 愈用力就愈沉。
最近覺得, 其實人要搵o既應該係"追求快樂o既方法", 而唔係追求點樣"滿足自己o既慾望", 咁就會容易開心d。我知其實呢個係一樣好矛盾o既野, 因為"追求快樂o既方法"都係一樣"慾望", 而"快樂o既方法"亦都可以係滿足自己o既某d"慾望", 不過我o既意思係一種精神層面o既滿足同解脫; 好多野, 睇得開d遠d, 其實好簡單...當然人都係有慾望有壓力的, 係睇下有幾執著點樣追求如何放低同發洩吧了~

要開心, 又並唔需要好似和尚咁"四大皆空", 因為無"慾望"同"追求", 就唔會有進步; 而其中困難之處, 始終都係"平衡"同"中庸"之道吧?

再講落去, 似乎要做和尚了, 唔講了。

六月二十日 -- 雜記

1. 好耐無雜記, 唔知點解, 前排有野就會開topic, 而家都係覺得有d短短地o既都係開雜記一次過記低仲好, 而且內容有意義好多
2. 由於有好一排無講野, 所以都有唔少野可以記低, 不過唔跟時間次序了; 有幾個point本來應該係獨佔一篇文的, 不過而家一次寫晒係度, 又簡單d講啦~
3. 學游水, 唔算好順利, 浮/游都OK, 不過踢水時下半身沉沉地, 唔多好
4. 星期六(17/6), 同呀Sam去左大清水游水(雖然呀Sam話到明睇女為主 =.=), 果日天氣係最近最好o既一日, 陽光普照, 去到沙灘換完衫就搵個位坐低; 由於得2個人, 又要有人睇住d野, 所以輪流去游; 由於呀Sam想晒太陽為主(睇野為主一.一), 所以我就好開心地游左好耐水; 一個人, 當然唔敢去得太出啦; 嘩, 成世人第一次係海度游水, d水浮好多! 好易游~~ 雖然練左好耐, 又游到, 不過都覺得好似無咩用, 因為返到泳池都唔一定下半身浮得返...但總算都有唔少運動量呢! 而且又近屋企, 以後都要不時去下呢~~
5. 打鼓都差唔多OK, 慢慢熟習個鼓, 遲d游水堂完左多返d時間, 要自己去練下, 希望以後有機會搵到人夾下! o岩o岩叫學完"愛我別走", 下次教"光輝歲月"; 另外, 同一個同學前幾堂都有d偈傾, 個呀叔都幾傾得; 尋晚放學時個呀叔suggest下星期一6.00pm去唱K, 唱K9.00pm上堂, 好主意呢~~ 總共三個人: 我, 呀叔同一個女仔, 3個鐘都OK夠皮啦~
6. 某表妹要過澳洲了, 由細睇到佢大, 而家都開始要闖下自己o既路了, 星期三會兩家人一齊食個飯, 佢星期日就飛了...努力啦~!
7. 又有朋友拍拖, 努力好好對人啦...(對於戀愛無咩好講了)
8. 人真係好難影響其他人o既諗法, 我都好明白而且接受; 不過亦都唔好攪到我...以思想來講, 我絕對覺得我果套係會開心過好多人好多(我無話"好"過人)
9. 來緊星期六同娟, 民, 源, Sam, Mandy去長洲玩2日1夜, 好耐無試過了, 同成班friends一齊去玩! 期待!
10. NBA Finals去到白熱化階段, 熱火領先3-2, 仲有2場作客, 是但贏一場呀!!!! 熱火努力GOGOGO!!
11. 世界杯開鑼, 由於有得上網睇o既關係, 今屆睇左好多場賽事, 由細到大睇o既都唔夠今次多! 有得同同事朋友傾下, 都幾開心呢~ 不過就令人眼訓d, 4年一次, 算啦~~ 無咩特別捧邊隊, 不過由於打機o既關係, 幾鐘意瑞典, 就支持下佢啦~ 另外16/6(星期五晚)同民, 家昇, Herman, 民o既friend同Gloria(!)一齊去茶記睇波, 當然俾自己睇波有氣氛好多, 而且咁o岩睇果場係阿根廷6-0大數塞黑...不過果日最大o既archievement應該係第一次正正式式見到Gloria啦! 幾好呀, 個人幾nice又outgoing, 唔錯呀~ (雖然某人無行了)
12. 18/6(星期日)打籃球, 又隔左一段時間無打, 果日又熱又焗, 幾辛苦, 而且之前果日游左水, 所以好快累...(好少會覺得累而唔係無氣)由於而家少左某幾個人來打波, 剩返果d有d唔帶波, 有d剩係會進攻/走位, 所以變左成日係我key波了; 尋日打波, 起手次數OK, 該射則射, 而且幾準! 似乎都keep到個射術呢, 而家o既我同民+以前o既馬, 肯定勁過以前好多了~ 另, 呢排keep住運動, 覺得運動量OK夠呢~~ keep住呀! 來緊星期四晚同同事打波! 逢二, 四游水! 唔知幾時先攪到逢星期五打羽毛球呢?
13. 之前諗到好多野講, 暫時諗唔到, 就此啦

完

能力不足

做人最怕就係識少少, 又識唔晒, 唔湯唔水

要飲一係就飲足料足味o既湯, 最怕溝左水o既, 又淡又唔知點, 寧願就咁飲水
最驚遇到d人, 識d野認知度唔係高, 又有好多睇法同意見, 但係由於知得唔全面, d意見跟本無用o既; 尤其係d投訴o既人, 以為有d野係點點點, 又以為自己好有權利, 係度嘰嘰喳喳, 其實跟本就廢o既

自己都一樣, 好多野都好有興趣, 但係自己已經唔細, 無以前細個咁多時間精力同能力學野; 學一樣野學唔到好叻, 有時真係幾洩氣~ (當然都會努力學)

今日食晏o既combination幾得意, 好少有咁o既組合, 而且令我獲益良多; 某位朋友同另一個做社工o既朋友傾最近發生o既問題; 果位社工朋友講野o既內容/意念, 基本上同我一模一樣, 而且佢做人o既態度同埋某d對人性o既見解都一樣; 不過由於佢係社工, 見o既case多, 而且亦都係自己o既行業, 所以佢講出來o既見解同方法好"正", 我學到o既野並唔係佢講o既內容, 而係佢o既講野方法, 技巧同態度, 不愧為專業呀~ (雖然佢係作為朋友角度去講, 而且係誠懇o既)
另外, 聽到佢講o既野, 都令我有好深o既感受; 原來我一路諗o既某d野都有人係咁諗的, 我亦覺得自己一向諗o既野同行o既方向係無錯。

不過, 一向係某d朋友搵人傾偈o既對象o既我, 好多時聽到人講左o既野, 自己會諗到好多野, 會識點解決, 但係點樣做一個聆聽+俾意見o既人方面, 真係麻麻地, 主要係自己o既表達能力並唔能夠將自己諗o既野講到出來, 太多太雜同埋太空泛了...其實我一向都明白, 個個人都係唔同o既個體, 諗野o既方法同角落會唔同; 不過有時真係好想人地明白我o既思想, 好想有人好明白d野...不過, 能力不足。

其實唔好話呢樣野, 究竟我咩野係叻o既呢? 有咩野唔係能力不足?

完