睇完"底褲人"之我感

首先問下大家，蝙蝠俠同超人有咩相同之處，又有咩唔同之處?
錯錯錯，緊係唔係咩行俠仗義，有無超能力甘啦!
相同之處: 都係將條底褲著係外面。
不同之處: 一個笠係頭度，一個著係條長褲外面。

相信睇到呢度大家都對佢地有ｄ認識了

愈扯愈遠了。話說睇左呢排上ｏ既電影"超人"，柅講下觀後感。
首先，估唔到套戲成２個半鐘(之前無留意簡介)，坐甘耐，咩都底晒。
第二，個男主角係幾靚仔。相信好多女仔都係睇呢樣野先。
第三，ｄ特技係做得好好，唔係戲院睇感受唔到。

講完一般人要ｏ既野，講下自己ｏ既意見先。
結論先: 套戲唔差，但係亦並唔係一套好好ｏ既戲。

無錯，人靚，特技好睇。但係比起幾廿年前ｏ既Christopher Reeve，演繹無甘有內涵, 情感無甘豐富。今時今日ｏ既電影純粹著重視覺效果, 有點忽略演員的感情戲份上。並唔係話而家果ｄ差，但的確係無以前甘好。劇情方面，同近年ｏ既"美式英雄片"一樣，幾乎可以話無咩，總之就係有班衰人作惡，要解決各種麻煩，再加上ｄ感情線，就係甘。所謂有帶出來ｏ既信息，套套都係甘講架啦，要加ｄ有意思ｏ既野話甘易，唔係深刻ｏ既根本無用。

導演係"X-men"第一集ｏ既導演。呢個人根本就唔得，名大於實。導演最重要有２樣野：一係就係一個好ｏ既story teller (即係講故事ｏ既人)，一係就可以控制到觀眾情緒（開心，傷心，緊張，驚怕．．．等等)，呢個導演，絕對唔係一個好ｏ既story teller都算，拒拍呢ｄ"美式英雄片"，又唔見得有咩故事，居然動作場面都唔算多，一味影住堆人係度講野，一係就做ｄ好不知所謂ｏ既動作來發動能力，加特技又攪掂；甘使鬼搵拒拍咩! 總之個導演實在係唔得。

講返呢套戲，其實比係"X-Men"第一集，已經好好多，而且ｄ特技真係好唔錯。不過成套野雖然無咩悶場，但係又無特別高潮位；正常無論小說，故事，電影．．．都會有高潮位，但係呢套又唔係好算有(係有幾幕會緊張少少咯)，非演員之罪，乃導演之錯也。

總的來說，由於我一開始果３個原因，加上"超人"名頭又大，加上又係近期熱門，俾錢入戲院睇都係OK的，一看無防。５粒星會比３至３粒半星啦。

完

八月四日

呀馬生日快樂!! 祝身體健康! 心想事成!

1. 呢排都係返返返工, 放放放工
2. 呀媽同呀哥屋企大執屋, 當然除左我間房之外, 天堂與地獄之比更顯著
3. 呢幾個星期都有一日半日同Lobo, Martin, Carmen食晚飯。由於Martin係廚師, Lobo又係四圍試食o既食家, 所以次次都去d介紹地方, 而質素亦都幾好。最印象深刻係1/8(WED)去西環山道o既加拿大餐廳, d野好得! 係食西餐o既, 幾十蚊一位晚餐, 但係質素絕對超越呢個價位! 係個地方隔涉d。
4. 終於唱K唱左草蜢演唱會!(緊係唔會全部唱晒啦) 雖然好out, 但係好開心! 在每夜草~~~~蜢彈跳於激光中!草~~~~蜢彈跳於心窩中!
5. 今期工聯無報野, 要搵一日regular同民民去游下水先得
6. 本來想出另一個詳細o既文講返工d野, 諗左好耐但係都無心機寫...可能真係收左工唔想諗起啦...有機會先寫啦...總之好彩自己都OK勤力同暫時跟得住d野, 老細都無咩野大不滿啦
7. 果個幾千字o既金庸更加停左手成個月
8. 好多朋友都有野唔高興, 屋企人又有野唔多高興, 攪到自己都有d唔多高興
9. 睇左底褲人, 估唔到成2個半鐘; 套野OK啦, 唔差, 又唔見得極好; 不過要睇就最好係戲院睇; 總評都值得入戲院睇o既
10. 暫諗唔到d咩, 係咁

完

七月二十五日 -- 雜記

好耐無寫野了, 原因主要係轉左工, 由於太耐無寫, 所以記得d咩特別野就寫啦, 但係次序, 日期等等就可能求其d了~
1. 打鼓堂終於上完, 覺得雖然個班無咩用廢廢地, 但係由於自己有意識去學野, 所以一樣有得著, 同埋對個鼓o既感覺熟左d(雖然仍然要練多d); 另外, 係堂上都叫識左2個朋友, 一個係呀叔來o既, 一個係個好斯文o既後生女, 尾果幾堂上堂之前仲會一齊食飯添; 由於我地上8.45pm, 係MK上, 而且晏d都無所謂, 所以有一次直頭約6點係MK等, 去唱K唱到9點半先去上堂, 哈哈; 個呀叔唱得唔錯呀, 個女仔就好斯文, 好細聲。
2. 終終終於係前排問人借到草蜢來睇(好out), 好正呀~~~ 好想唱K唱~~~ 有好多都想唱!!
3. 份工實在係...都係遲d出過一篇野講啦...
4. 呢排返睇金庸, 不過進度慢左了, 睇埋手頭上果套天龍八部可能要停下了; 另外, 一路寫緊個"金庸小說讀後感", 唔覺唔覺寫下寫下都未寫完居然有三千幾字了 =.=, 不過轉左工之後未郁過了...
5. 22/7-23/7 同娟, 民, Sam, Mandy去珠海玩。覺得有d老點地去深圳再搭巴士去, 平係平d, 不過搭車好晒時間, 離開屋企要個半鐘到深圳, 再2個半鐘到珠海; 由於要等Mandy放工, 攪下攪下6點半先到...寧願貴少少搭船去澳門再過關...一去到就去一早卜左o既酒店(珠海渡假村)放低野, 再出去食飯; 食海鮮, 又平又抵, 不過海鮮以外o既野就唔好多食, 同埋記得果時係深圳福田食仲平d又好食d...不過呢餐民仔請, 有人請就算啦 XDDD。 食完之後去"碌鈴", 今次佢地碌多, 我碌左幾手, 都係中6-7個島...下次有機會要試下篤波...玩完返去都12點幾, 沖完涼大家未眼訓, 一齊玩UNO吹下水, 唔覺唔覺就3點幾4點...訓。第2日checkout之前又唔想去第二度, 所以留左係酒店, heahea下睇下電視就夠鐘checkout, checkout之後食午餐, 普普通通一餐之後就去睇小型賽車場, 睇睇下大家就都去玩, $30 for 10分鐘, 都幾刺激呀~ 之後去按摩, 我唔係好好, 所以2個鐘都按腳only, 原來按腳係平d的, 佢地按身2個鐘$60島, 我按腳$38, 平到嘔。按完都6黠零了, 大家聽我意見過關去澳門, 去碼頭見賣7.30pmo既船飛, 於是決定返HK先食晚飯, 買左船飛返去了。順帶一提, 買完船飛後大家有唔少人仔, 但係無晒港幣, 又無得"手禁", 好慘 XDDD 總的來講, 其實玩過d野食過d野深圳都有, 除左小型賽車之外其他野都係深圳平/好d, 又慳好多時間係旅程上, 所以第日都係寧願去深圳~ 不過今次有d唔同o既, 大家幾個friend一齊過夜吹下水都幾開心。
6. 7月頭呀爸同表弟返大陸, 所以閒日無約人都返屋企同呀媽食下飯, 收工去買下"食送", 返屋企煮2野咁。
7. 呢份工d同事雖然未必會好熟, 不過都係一班幾好o既人同玩得o既人, OK啦~~
8. 諗唔到有d咩住, 有遲d再加
9. 來緊會寫返野密返d...希望

轉工

成個星期無寫野, 原因係病
上個星期一, 二發燒, 星期三無再發, 但係一路咳到今個星期(不過係星期六日長抖之下好左好多)
成日唔舒服, 所以無咩心機寫野

另外一個原因, 係唔知點解個人好空
我上星期三就返新工了, 返新工有新氣象新環境, 照計應該好有新鮮o既感覺
尤其好似我呢d咁多野諗o既人應該有好多感覺
但係居然無
返左幾日工, 唔知自己係度做緊咩/諗緊咩
所以一路都無寫野

講返份工
而家返地政署, 人工同之前差唔多, 轉工係想轉下環境, 做下唔同o既野; 返工地點係油麻地停車場大樓, 咁樣講大家唔知係邊, 用另一方法講就可能會知: 直頭係油麻地圖書館果棟大廈, 即係係油麻地同佐敦中間。
唔知好唔好彩地, 請十幾個新人, 係呢個唔算忙o既部門做野; 我同係BD一樣, 十幾個人偏偏我係唯一果個編左去最忙果一組度做野(睇成個啟德機場)。一入去就聽人講我個組係好忙的, 2個人跟晒所有野...算啦, 好過無野做, 又可以學到野。
返放工時間係9.00am-17.48pm(食飯12.30-1.30, 得一個鐘), 由於而家係返五日工, 所以放遲d, 不過聽聞我果組唔一定可以準時收工(又未至於會好晏收); 返五日工真開心。
我果組得我同我老細, 係一個幾後生o既女人(三十島啦); 我上一手做埋呢個星期走, 好偶然地我上一手係我City的舊同學呀康(仲要係final year project同組添); 佢話無可能係走之前教晒我所有野, 叫我自己慢慢摸下點做...佢話老細好熟d野, 有咩唔識可以問佢, 不過真係可以成日問嗎? 後尾聽返, 原來老細都係contract staff(地政唔似BD, 好少contract staff的), 佢以前係外面應該好高級好有經驗, 唔知點解(睇怕係公司執笠定炒人)會來到呢度收少咁多人工做野。
同事方面, 由於有一堆都係新o既contract staff, 所以好自然地都係會一齊熟d; 我o既感覺係班人都幾好, 大家年輕人幾好傾又幾好玩, 不過熟我就未必會同佢地好熟到, 相性唔算好近。
返左差唔多一個星期工, 由於好多野未識o既關係, 老細都唔係比好多野我做, 所以都暫時幾得閒; 遲d上手走左, 我就會坐佢果個位, 就會有得上網(雖然會無時間上, 但係起碼"有得上"), 個office都幾靜, 同埋個feel好似好耐之前o既政府office咁, 個感覺好似做緊好耐之前o既公務員咁XDD
最值得高興o既野, 應該就係幾樣: 返放工仍然可以一程巴士, 幾方便; 好好好近圖書館, 仲近過旺角果時, 而家差唔多日日去; 隔離(真係隔離二步路)就有籃球場(雖然無咩機會打...), 所以個返工地點對我來講算係好唔錯了。

最在意o既, 始終係個人唔知點解對轉工一d感覺都無, 轉左就轉左了...好唔知點
不過, 反正都係生活
諗唔到有咩講, 就此。

今次篇野完全唔經大腦, 睇唔明就算啦

完

生病

細個時成日都病, 成日去睇醫生, 係藥罐來。到左大個, 雖然身體好過細個, 但係間唔時都會病下, 而且其實個身體一向都唔係好好狀態o既人。
由於細個成日病又食藥丸, 已經練就左可以同時唔使用水都可以吞幾粒藥丸o既能力, 有時要食藥又無水起來都可以照吞, 好方便。
話說呢排世界杯期間, 由於有PP Stream同PP Live, 而屋企電視又有CCTV1 的關係, 睇多左好多波, 後遺症就係夜訓。一向個身體同精神狀態都唔算好, 而且不嬲都訓得唔係好好, 所以睡眠對我來講好緊要。睇多左波, 自然就訓夜左; 不過通常都係睇頭場, 3點果場唔睇。
o岩o岩過左去果個星期五, 民仔上我屋企睇頭場, 而星期六, 民Sam娟上來我家睇波(屋企無人), 由於第2日唔使返工o既關係, 大家都諗住睇埋尾場(巴西對法國, 實好睇過英格蘭對葡萄牙)。英格蘭對葡萄牙果然係一場悶波, 呀Sam睇到恰眼訓, 完場就入房訓, 下場再出來; 娟唔係波癡, 所以睇完第一場就訓, 剩返我同民仔磨到3點; 到得3點, 叫唔醒呀Sam, 於是得返2個人睇; 由於連續2日夜訓, 加上成日係冷氣度, 所以終於出事了。
星期日發覺自己喉嚨有d痛, 諗住都無咩事, 星期一起身都唔係好唔得, 反而返到公司就開始頂唔住; 喉嚨痛, 人飄飄浮浮, 頭赤赤又暈, 覺得自己好可能係發炎+發燒...由於約左o既關係, 收工仲同鼓班同學唱K, 之後再上堂。返到屋企快快沖涼訓覺, 覺得自己有d發冷, 於是唔開冷氣訓; 訓到半夜醒左, 唔係因為熱, 係半夢半醒咁, 發左個好騎呢o既夢; 由於個夢好亂, 個人又醒醒地, 所以反來反去訓得好差...等於無訓過...無啦啦床尾個架跌左一堆野落來, 嚇左我一大跳; 果下真係好驚, 叫左一聲出來(唔係大叫, 係好微弱無助果種...), 果刻真係覺得有d無助, 又病又唔舒服又訓唔到...嚇親之後仲醒晒添...
由於醒左, 又唔舒服唔想開電腦, 於是出廳坐下, 磨左差唔多成個鍾(5點幾了)就返返房訓, 又係反來反去訓唔到...終於慢慢到訓著左, 但係星期二(4/7)係返公司o既last day, 無理由唔返, 於是死死氣地遲到都返公司了。
明天就返新工(5/7), 第一日返headquarter, 實際要返左第一日先知返邊; 希望快d好返, 唔好返工第一日就病啦...

完

長洲遊記

上星期六及日(24/6及25/6), 我同幾位朋友(娟, 民, 源, Sam, Mandy)一行人去左長洲玩。其實呢次行程都傾左幾耐, 大家時間難就, 但係最終都約到一個日子出來; 好耐無試過一班friends去玩2日1夜, 所以好期待。

一早睇定船期, 所以當日約定12.00係碼頭等(搭12.15o既船), 我同民仔相約係北角站一齊去; 由於我地都早左o既關係, 到左中環專登走去買以前彭定康食過果間o既蛋撻來食, 我呢d蛋撻魔人當然要試下啦(果日都無食早餐)~ 一試之下, 覺得個底唔錯, 牛油味幾重而且幾脆; 中間的蛋味都幾夠, 唔係純粹甜味; 不過整體來講, 個底o既味太勁, 蓋過左其他味道, 所以唔算真係極好o既蛋撻。

係碼頭食完蛋撻, 其餘人都到了(4人約埋一齊), 大家懷住興奮o既心情(細個寫遊記9成都會寫"懷住興奮o既心情", 所以無論係唔係都實要寫下XDDD)入閘上船, 約莫過左一個鐘就到了。到左長洲第一件事當然係拿左房先啦~ 今次book果間同上前同一班朋友果間係同一間(東堤), 入到去發現裝修左, 各樣野都好新淨呢~ 放底晒行李之後就去食晏。不自覺地去以前食o既某餐廳食晏, 匆匆食過之後, 去超市買d必要物品(廁紙, 水, 杯, 零食等)就返房討論下一步行動。

當日天氣好~~熱, 又極曬, 根本無可能燒烤同踩單車; 大家當然唔會戇居居留係房唔知做咩, 所以一致決定去沙灘。去到沙灘發覺真係好曬好熱, 有d人係陰o既位看住d野, 而其他人就當然落水啦~ 東灣o既水實在係幾污糟...同之前去大清水實在無得比, 不過由於太熱o既關係, 都係落水狂游; 練左一陣發覺無咩進境, 就叫呀源較蛙式; 蛙式真係易好多! 我試左幾野, 已經游到下, 而且仲可以呼吸到添~ 要練習多d先得!

幾個人輪流游一陣水之後, 大家都上返水; 係沙灘玩下飛碟, 數字球, 馬騮搶球咁(d沙好~~~熱又好粗, 所以一定要著住涼鞋), 唔覺唔覺就過左差唔多3個鐘(好明顯有曬黑左, 對腳仲有涼鞋印添...=.=); 返返間屋沖完涼, 差唔多7點出去食飯了。當然就去食一早決定o既海鮮啦~ 叫左一堆海鮮同小菜, 加埋食飯飲野每人都係幾廿蚊, 好平, 不過味道就算係普普通通, 將價就貨算係好好了。由於當晚世界杯賽事分別係11.00pm 瑞典對德國同埋3.00am 阿根廷對墨西哥, 而民仔係阿根廷fans, Sam係瑞典fans, 所以諗住落bar睇波; 食完飯去行下視察環境, 搵到一間bar好唔錯又有大電視, 即時book定位大家齊齊睇波~ 之後返屋磨一輪到夠鐘就去食糖水; 去返不嬲去果間食, 仍然係又平又抵食, 由於係民仔請(因為之前book房果日甩底), 大家都唔客氣了~ 食完就去睇波。係bar一堆人一齊睇波氣氛當然好好, 不過呀Sam愛隊瑞典後防唔知點解好大漏洞, 開波12分鐘內就比人入左2球, 下半場搏到球12碼仲要炒埋(拿臣>.<)...大勢已去...睇完都已經1點了, 返屋途中見碼頭外有好~~多街邊小食, 食左d(幾好食)之後就返去了...大家沖完涼, 民仔同Sam2個波痴再去睇下場波, 剩返我地4個就訓覺了(都2點幾3點了)。o岩o岩好2間房2個人一間唔使爭; 呀源一d都唔反訓, 所以同佢訓一張床都無咩問題, 幾好訓(反而好似我逼左佢出去 XDD)。

一訓到第2朝9點幾起身, 大家都起晒身, 見到得民仔係度; 原來佢地睇完場波都5點幾天光了, 飲埋早茶先返來, 一返來無耐呀Sam可能意興闌珊之下返屋企先; 我地一行5人梳洗妥當之後就去食早餐, 食完返屋打啤牌(Mandy果日o既手氣實在太好太可怕了), 到得差唔多時間, 就去還房食晏(食之前去買定一堆糖水); 食晏去左果對日本夫婦度食, d紅豆餅同手卷仍然都係好味呢~~ 食完之後係碼頭食埋糖水, 夠鐘上船。到左碼頭之後就各自散了, 呀源就上我屋企拿野。

總的來說, 今次玩得好開心, 長洲仍然都係我o既宿營favourite地點, 希望來緊可以再攪過, 同埋可以燒野食+踩單車啦~~~

完

p.s.同場加映: 第2日搭船返去時, 發生左一樣好精彩o既野, 我當然即刻影低左(見下圖); 係唔係好晶瑩剔透呢~ 好一條天然o既鐘乳石! 某去左外國o既朋友係唔係諗返起讀書時o既不快回憶呢? 話說當年我同受害人+下圖之人係學校o既集會中, 某人恰眼訓時又做出左下圖o既事, 而該鐘乳石大大滴咁落左該去左外國o既朋友o既校褸度。希望下圖唔好引起人不安啦 XDDD
另, 下圖打左格仔, 以防有人認出當事人。 :D

(按:暫時貼唔到圖, 遲d再補)

轉工

講左好耐好耐好耐轉工

最想就係轉返出去做私人公司, 唔係好想再做政府野
退而求其次, 就係點都想離開屋宇署, 因為做左好~~耐了~
牢騷之前都發過, 所以唔再講點解想走了。

上2個月寄過唔少application搵工, 回音唔多...見左1, 2份
當中有一份係地政處o既工, 又係contract, 一年一年咁續, 人工同而家又差唔多...
其實無咩特別好, 不過一來有得離開而家呢度, 二來轉下環境無咁悶, 三來可以做下第二d job nature, 學多少少野, 都好o既...
去見果日, 都無點準備, 膽粗粗就走去見; 估唔到問o既問題我又大部份OK答到; 同一般見開o既政府工(尤其係BD)唔同, 居然有7成用英文問答(平時得1-2條用英文), 我又用英文答得好順下喎~ 見完都無咩特別, 就走了。又估唔到政府效率咁快, 過左3個星期, 就打來話請; 由於我d假可以拿返錢, 所以我足一個月通知先走。

唔覺唔覺, 又唔記得寫上來, 仲有一個星期島就last day了; 公司d野清得就清, 儘量啦, 其餘都無咩好講了, 無咩心機做o既其實 XD

來緊新工未知返邊度, 人工就差唔多, 各位唔好叫我請食飯啦~~~~

完

！！！！熱火冠軍！！！！

上星期三(21/6), 係NBA FINALS Game 6, 係7場4勝制o既賽事入面, 熱火場數領先3-2
Game 6 同 Game 7 都會係小牛主場

原本諗住Game 6都係輸多, 最後去到Game 7先分到勝負(仲諗住Game 7請假睇波), 點知Game 6就俾熱火贏左!!
熱火係落後0-2 o既情況之下連贏4場!

好野! 熱水羸波!~~~~
點解我會甘開心?

我並唔係Wade或者Oneal的fans, 亦都唔討厭小牛(仲OK中意小牛添)
但係, 我長久以來支持o既球星--Payton彼頓, 係就來要退休之時終於都得償心願! 拿到冠軍指環!
仲有Zo(莫寧)!
佢地2個都係值得拿冠軍指環o既!
而且拒地係比賽入面都係有貢獻, 唔係"痴"人拿冠軍的~!

好感動呀~ 好開心呀~
好野~

請容我係度發下癲~
嗚嗚嗚嗚嗚~ 羸波了~
~>_<~ 苦盡甘來呀~

完

慾望與自制能力

其實對於好多野, 我o既自制能力並唔高

讀書時, 有得玩/打機時會玩唔停, 唔識收(當然又唔係好似我表弟咁完全唔停), 所以成績並唔理想
自小好鐘意睇書, 一開始睇書就唔願停, 一路睇一路睇, 如果係好似金庸小說果d咁精彩o既書, 直頭會睇到廢寢忘餐(唔係好誇張, 真係除左返學讀書訓覺ｏ既時間, 行緊路又睇, 食緊飯又睇, 連去廁所/沖涼時對眼都唔離開)
想食野/飲野時, 明知有ｄ時間唔應該再食, 但係又忍唔住再食
早上起床好眼訓, 明知再訓就會走車, 但係都要磨到最後一刻先起
...
...
好多野都係咁, 雖然睇落好似好多都好小事, 但係其實可以睇得出一個人係大事o既時候會點

不過, 由於細個有留意到呢樣野ｏ既關係, 有去嘗試練習過自己ｏ既耐力同自制能力
所以, 係好多大/重要ｏ既時候我相信自己可以做到; 好似係自己火大, 情緒唔好時, 可以儘量keep住個脾氣; 係有誘惑(even係大o既誘惑)ｏ既時候保持清醒...等等, 我覺得自己係呢幾年係呢方面有長進。
而如果自己覺得自制唔到o既, 就直頭唔做, 例如:賭, 吸毒...etc,　呢ｄ我覺得一試左就好難停ｏ既野, 就連試都唔會試。

人ｏ既自制能力其實唔係好高...通常都係受幾樣野影響, 最大ｏ既就係"環境"同"習慣"。
環境, 就當然係講緊身邊o既人, 事, 物等等; 簡單來講就係"近朱者赤, 近墨者黑", 好易明, 金科玉律; 正如d家長希望自己o既仔女入名校, 並唔係話d老師教得特別好, 而係d同學o既質素/讀書風氣...等等好好多;大家千祁唔好認為自己可以係唔好o既環境下, 出瘀泥而不染, 好難的, 唔好o既野就避免唔好接觸啦...

而所謂"習慣"只係一個好"籠統"o既詞語, 其中包括左好多野: 習慣/承諾/堅持/意志...等等o既野, 但係我覺得可以用"習慣"來做統稱。一個人意志堅強, 都係因為長期處於某d環境而練就左呢樣野; 一個人承諾左, 就會做/唔做一樣野, 就會被"承諾"影響住, 而變成習慣; 一個人習慣左一樣野, 就會keep住做/唔做。所以, 當人"破戒", 做左一次違反自己"習慣"o既野, 有d人就會好~~唔舒服, 有d人一破左就會自暴自棄...etc, 例如:
一個戒緊o既酒徙/賭徙/癮君子, 一旦做左一次, 果次之後就九成上返癮。
有d男/女仔, 試過one night stand, 個思想可能就變左"反正都試過, 一次同好多次都無所謂", 而繼續沉淪落去。
有人從來都係係"拍拖"o既狀態, 將一切o既心機, 所有野都放晒落去, 一無得拍就好唔慣, 而且好似失去左好多野, 跟住愈來愈鑽牛角尖, 愈諗愈多野...愈來愈唔開心。

其實好多野都係"心癮", 而"心癮"起皆因"慾望"。愈執著愈追求, 就愈會沉落去。好似游水咁, 愈用力就愈沉。
最近覺得, 其實人要搵o既應該係"追求快樂o既方法", 而唔係追求點樣"滿足自己o既慾望", 咁就會容易開心d。我知其實呢個係一樣好矛盾o既野, 因為"追求快樂o既方法"都係一樣"慾望", 而"快樂o既方法"亦都可以係滿足自己o既某d"慾望", 不過我o既意思係一種精神層面o既滿足同解脫; 好多野, 睇得開d遠d, 其實好簡單...當然人都係有慾望有壓力的, 係睇下有幾執著點樣追求如何放低同發洩吧了~

要開心, 又並唔需要好似和尚咁"四大皆空", 因為無"慾望"同"追求", 就唔會有進步; 而其中困難之處, 始終都係"平衡"同"中庸"之道吧?

再講落去, 似乎要做和尚了, 唔講了。

六月二十日 -- 雜記

1. 好耐無雜記, 唔知點解, 前排有野就會開topic, 而家都係覺得有d短短地o既都係開雜記一次過記低仲好, 而且內容有意義好多
2. 由於有好一排無講野, 所以都有唔少野可以記低, 不過唔跟時間次序了; 有幾個point本來應該係獨佔一篇文的, 不過而家一次寫晒係度, 又簡單d講啦~
3. 學游水, 唔算好順利, 浮/游都OK, 不過踢水時下半身沉沉地, 唔多好
4. 星期六(17/6), 同呀Sam去左大清水游水(雖然呀Sam話到明睇女為主 =.=), 果日天氣係最近最好o既一日, 陽光普照, 去到沙灘換完衫就搵個位坐低; 由於得2個人, 又要有人睇住d野, 所以輪流去游; 由於呀Sam想晒太陽為主(睇野為主一.一), 所以我就好開心地游左好耐水; 一個人, 當然唔敢去得太出啦; 嘩, 成世人第一次係海度游水, d水浮好多! 好易游~~ 雖然練左好耐, 又游到, 不過都覺得好似無咩用, 因為返到泳池都唔一定下半身浮得返...但總算都有唔少運動量呢! 而且又近屋企, 以後都要不時去下呢~~
5. 打鼓都差唔多OK, 慢慢熟習個鼓, 遲d游水堂完左多返d時間, 要自己去練下, 希望以後有機會搵到人夾下! o岩o岩叫學完"愛我別走", 下次教"光輝歲月"; 另外, 同一個同學前幾堂都有d偈傾, 個呀叔都幾傾得; 尋晚放學時個呀叔suggest下星期一6.00pm去唱K, 唱K9.00pm上堂, 好主意呢~~ 總共三個人: 我, 呀叔同一個女仔, 3個鐘都OK夠皮啦~
6. 某表妹要過澳洲了, 由細睇到佢大, 而家都開始要闖下自己o既路了, 星期三會兩家人一齊食個飯, 佢星期日就飛了...努力啦~!
7. 又有朋友拍拖, 努力好好對人啦...(對於戀愛無咩好講了)
8. 人真係好難影響其他人o既諗法, 我都好明白而且接受; 不過亦都唔好攪到我...以思想來講, 我絕對覺得我果套係會開心過好多人好多(我無話"好"過人)
9. 來緊星期六同娟, 民, 源, Sam, Mandy去長洲玩2日1夜, 好耐無試過了, 同成班friends一齊去玩! 期待!
10. NBA Finals去到白熱化階段, 熱火領先3-2, 仲有2場作客, 是但贏一場呀!!!! 熱火努力GOGOGO!!
11. 世界杯開鑼, 由於有得上網睇o既關係, 今屆睇左好多場賽事, 由細到大睇o既都唔夠今次多! 有得同同事朋友傾下, 都幾開心呢~ 不過就令人眼訓d, 4年一次, 算啦~~ 無咩特別捧邊隊, 不過由於打機o既關係, 幾鐘意瑞典, 就支持下佢啦~ 另外16/6(星期五晚)同民, 家昇, Herman, 民o既friend同Gloria(!)一齊去茶記睇波, 當然俾自己睇波有氣氛好多, 而且咁o岩睇果場係阿根廷6-0大數塞黑...不過果日最大o既archievement應該係第一次正正式式見到Gloria啦! 幾好呀, 個人幾nice又outgoing, 唔錯呀~ (雖然某人無行了)
12. 18/6(星期日)打籃球, 又隔左一段時間無打, 果日又熱又焗, 幾辛苦, 而且之前果日游左水, 所以好快累...(好少會覺得累而唔係無氣)由於而家少左某幾個人來打波, 剩返果d有d唔帶波, 有d剩係會進攻/走位, 所以變左成日係我key波了; 尋日打波, 起手次數OK, 該射則射, 而且幾準! 似乎都keep到個射術呢, 而家o既我同民+以前o既馬, 肯定勁過以前好多了~ 另, 呢排keep住運動, 覺得運動量OK夠呢~~ keep住呀! 來緊星期四晚同同事打波! 逢二, 四游水! 唔知幾時先攪到逢星期五打羽毛球呢?
13. 之前諗到好多野講, 暫時諗唔到, 就此啦

完

能力不足

做人最怕就係識少少, 又識唔晒, 唔湯唔水

要飲一係就飲足料足味o既湯, 最怕溝左水o既, 又淡又唔知點, 寧願就咁飲水
最驚遇到d人, 識d野認知度唔係高, 又有好多睇法同意見, 但係由於知得唔全面, d意見跟本無用o既; 尤其係d投訴o既人, 以為有d野係點點點, 又以為自己好有權利, 係度嘰嘰喳喳, 其實跟本就廢o既

自己都一樣, 好多野都好有興趣, 但係自己已經唔細, 無以前細個咁多時間精力同能力學野; 學一樣野學唔到好叻, 有時真係幾洩氣~ (當然都會努力學)

今日食晏o既combination幾得意, 好少有咁o既組合, 而且令我獲益良多; 某位朋友同另一個做社工o既朋友傾最近發生o既問題; 果位社工朋友講野o既內容/意念, 基本上同我一模一樣, 而且佢做人o既態度同埋某d對人性o既見解都一樣; 不過由於佢係社工, 見o既case多, 而且亦都係自己o既行業, 所以佢講出來o既見解同方法好"正", 我學到o既野並唔係佢講o既內容, 而係佢o既講野方法, 技巧同態度, 不愧為專業呀~ (雖然佢係作為朋友角度去講, 而且係誠懇o既)
另外, 聽到佢講o既野, 都令我有好深o既感受; 原來我一路諗o既某d野都有人係咁諗的, 我亦覺得自己一向諗o既野同行o既方向係無錯。

不過, 一向係某d朋友搵人傾偈o既對象o既我, 好多時聽到人講左o既野, 自己會諗到好多野, 會識點解決, 但係點樣做一個聆聽+俾意見o既人方面, 真係麻麻地, 主要係自己o既表達能力並唔能夠將自己諗o既野講到出來, 太多太雜同埋太空泛了...其實我一向都明白, 個個人都係唔同o既個體, 諗野o既方法同角落會唔同; 不過有時真係好想人地明白我o既思想, 好想有人好明白d野...不過, 能力不足。

其實唔好話呢樣野, 究竟我咩野係叻o既呢? 有咩野唔係能力不足?

完

游泳

游水, 對我來講, 實在無咩緣
雖然香港四面都係海, 又多泳池, 但係從來都無機會游
由細到大係屋企都無咩機會去學d咩同玩d咩, 好多野都係大個先自己去學
而游水亦係其中一樣, 到左大個d, 有朋友叫我去游, 又話教我, 我都提唔起勁(馬, 對, 係我衰XDD)

其實我一路都真係想學游水的
呢一期, 終於去左報學, 仲有人陪添~

以前一向都無咩機會落水, 第一次可能係幾年去泰國旅行時, 係酒店去個泳池度落過
果時起碼都証明左一樣野, 就係自己唔怕水, 夠膽睜開眼就咁成個頭浸晒落水入面~
亦都唔怕俾自己飄出泳池中間~

今次學游水, 上左2堂, 第一堂一來就學到點浮, 之後果d野都OK get到
要時間練習同埋實踐下呢~~ 希望可以學得成!

有d friend話咁大年紀好難學識了, 又講左好多好似好難o既野, 但係我唔信, 一定要學到!

另外, 希望遲d可以有每個星期游水, 逢星期五打羽毛球, 星期日打波咁o既運動量啦!

完

我食蕉了

話說上星期二俾條魚骨"kick"係喉嚨度, 過左幾日都仲有d野係度
成日都唔肯定係條骨仲係度定係"損"先覺得有d野

攪到我呢幾日都無咩mood, 成日都覺得有d野纏繞住自己, 好煩 XDDD

攪左幾日, 就係今日o既下午, 發生左一件事:
下午係屋企hea抖, 無咩做, 食完飯食隻蕉
由於呢幾日吞野個喉嚨都係有d唔多順暢, 所以食野俾起平時都咬耐好多, 爛好多
今次食蕉, 用左個好奇怪o既方法食 (有時我食野都會無啦啦奇奇怪怪的XDDD), 好難形容
總之2排牙用一種好機械o既方式同幾快咁開開合合, 而隻手"渣"住隻蕉亦都用一個好穩定而慢o既速度慢慢將隻蕉塞入個口入面, 而個結果就係好似d生產線咁好平均地慢慢將隻蕉食落去, 而d蕉俾d牙磨磨下磨到好似"漿"咁
食食下, 突然有d好唔同o既感覺, "咦? 點解...唔同左o既?" "點解個喉嚨感覺唔同左o既?"
原來不知不覺間, 喉嚨果種唔舒服感覺無左了! 之前唔係損左, 而係條骨仲係度!
而家無左了! 完全無果隻感覺了!
雖然個喉嚨變左都好似仲有其他感覺, 但係應該係有d損, 但係無野頂住了!
好野~~~~!!!
我食蕉了~~~~~~~~

完

頹廢的歌, 頹廢的樂壇

之前都講過, 香港樂壇o既歌手同歌曲水準低落。d歌唔見得好好聽得來d歌手亦唔多係唱得好。
最衰o既係, 又有大量o既"懶"係慘o既歌, 聽到又厭又悶。由早前容祖兒果d開始, 到後尾o既古巨Lay, 再到而家o既側田(仲有一堆九唔搭八的甚麼方力申Stephy...etc), d主打歌都係咁; 聽歌都係想抒發下感情或者開心下, 聽到愈來愈抑鬱, 唔知想點; 最攪野係氾濫到令到d 死o靚妹死o靚仔都懶係慘咁, 愈慘就愈好, 明明不知愁為何物又強說愁, 攪到個個都硬膠晒。

反而最近有返少少生氣, 例如復出o既關心研咁, 今次佢o既歌並唔標榜慘, 亦放棄左之前又係唱到懶慘o既唱腔, 聽落實在係舒服同清新好多~ 希望以後有多d呢d野出來啦~

話返轉頭, 真係要慘要頹廢, 香港同外國o既水準都無得比; 人地d歌詞, 唱功, 歌曲, 難度等等都勁幾皮。
最近練鼓打緊果隻歌, 就係其中之一; 以下:

Creep
by Radiohead

When you were here before
Couldn't look you in the eye
You're just like an angel
Your skin makes me cry
You float like a feather
In a beautiful world
I wish I was special
You're so fucking special

But I'm a creep
I'm a weirdo
What the hell am I doing here?
I don't belong here...

I don't care if it hurts
I want to have control
I want a perfect body
I want a perfect soul
I want you to notice when I'm not around
You're so fucking special
I wish I was special

But I'm a creep
I'm a weirdo
What the hell I'm doing here?
I don't belong here

She's running out again
She's running out
She runs runs runs RUNS~~~~
RUNS~~~~~~~~

Whatever makes you happy
Whatever you want
You're so fucking special
I wish I was special

But I'm a creep
I'm a weirdo
What the hell am I doing here?
I don't belong here
I don't belong here......

大家自己搵來聽下啦...

完

666 之 深喉經驗

今日係06年o既6月6日, 即係666

大家都知666代表d咩野

我唔知其他人有咩經歷, 但係我就認真黑仔

無錯, 被"深喉"果個係我



今日下午食飯, 由於唔想食咁肥, 於是食蒸魚飯(梅菜蒸鯇魚)

不嬲都有食魚, 從來都無發生d咩事

今日居然被條魚骨"浪"左係喉嚨底深處

唔痛但係好辛苦, 成日feel到有d野係喉嚨度

試過吞飯, 飲水, 甚至用手指伸入去扣喉, 好痛苦

但係條死魚骨仍然"浪"左係喉嚨深處

唔上唔落, 究竟幾時先攪得掂呀~!

好痛苦呀~ >__<

完

大日子

剛剛過左去o既星期六同星期日, 發生左都幾多緊要o既事情

3/6, 星期六, 見工
除左幾個星期前見o既一份政府工外, 好~~耐無見過工了。
一早起身, 使左$20, 搭左成個鐘車, 入到去大埔, 就係為左5分鐘o既花火(interview) 一.一"
不過, 我之前果幾個人都係入左去5分鐘島就出返來, interview詳情如下:
入到去坐底
1. 你之前做柏齡係做d咩野架?
2. 你而家做BD又做d咩架?
3. 你之前係柏齡做邊條村呀?
4. 你諗住人工大約幾多呀?
答完, 走得, 等消息 XDDDDDD

見完工返來2點幾睇過信箱無信, 夜晚返屋企諗住星期六下午郵差叔叔唔派信, 所以無再睇信箱~

同日, 熱火歷史性地打入NBA總決賽, 爆冷4-2踢走左乞人憎o既活塞, yeah~~~
同日, 將軍澳一日遊+買左泳褲同幾件衫褲

4/6, 星期日, 64紀念日
同2個朋友出來睇The Da Vinci Code, 可能本身小說OK, 套戲睇落就幾好睇
不過其實可以拍得好d, 個導演功力麻麻, Tom Hanks唔係做得唔好, 而係個角色無得俾佢發揮
另外如果有對歷史同宗教有d認識會知多好多野;

同日, 得知某位朋友正正式式KO
有位朋友考完試, 正正式式近期無咩野可以再考, 輕鬆晒!
同日, 小牛歷史性地打入NBA總決賽, 今年2隊入總決賽o既球隊都係未入過的
我同死黨咁o岩各自支持果隊都入到! 要牙骹戰了!
熱火努力呀!!

同晚, 好戇居地, 返屋企時望一望信箱; 諗住實無野時, 望到有d野~
一開信箱, 收到Lands Department寄來的offer! 雖然人工一樣, 但係可以逃離BD先!
太好了! Yeah~~~~~~~~~~~
轉工~~~~~~~~~~~~!!

完

死忌紀念日

人係唔識得反省o既動物

有幾多人, 由細到大可以錯左野奶過鑊, 但係未試過重蹈覆轍?每個人都會有錯, 亦都好容易會再犯同一錯誤, 但係每次經歷過d野(對也好錯也好)都應該會有所得著。但係現實中, 大部份人都係o岩o岩衰果陣時先會後悔, 慢慢就會忘記左, 跟住又來過。有d人甚至會話:我個人就係咁架啦~無辦法架喎~
你無辦法咁我都無辦法。

大家諗諗, 動物都有學習o既機能, 中過陷阱都會小心d, 但係人呢? 係人類咁多年o既歷史入面, 有幾多錯誤/戰爭/自相殘殺...等等係不斷咁發生? 但係現在又如何?
大家睇睇而家好多人慶祝o既節日: 端午節, 復活節, 情人節, 都係紀念人地o既死忌; 但係大家對呢d日子有咩感覺? 開心? 慶祝? 玩? 放假?
有無諗過背後o既意義? 知唔知點解要紀念?

我只係一個小市民, 歷史/政治唔到我理。咁自己o既人生呢? 點解唔勤力讀書? 點解唔對自己父母好d? 點解當初唔好好地對自己愛o既人? 點解唔做應該做o既事?
點解錯過之後, 會再做錯?

似乎人都係喜歡紀念自己o既失敗, 猶如大家會慶祝人地o既死忌一樣...

完

朋友的感情事件簿

呢排好多朋友, 係感情方面發生左好多事...講開發生緊果d, 都順便講埋一早發生果d啦
放心, 無提名, 無野爆

有一個朋友, 終於拍拖了...經歷左之前o既時間, 試過愛人, 亦試過被愛; 不過最終拍拖o既係新識o既朋友; 不過似乎仲有幾樣野未攪掂: 而家o既女朋友o既果幾個問題點解決呢? 之前某君o既野又點解決呢? 不過, 我相信呢位朋友拍得拖都應該諗過晒! 係呢度, 點都要祝福佢!

另一位朋友, 終於散拖了...(我應該無意會錯掛?)我唔係好知道詳情, 亦都唔係好知道佢地之間發生過o既所有事; 在我來睇, 拖拖拉拉左咁耐, 解決左係一件好事, 反正, 都唔可以補救, 而且亦都唔可以返返好似以前咁...不如早d結束吧? 雖然我都係果種唔主張人分開o既人, 不過去到某d地步, 長痛不如短痛...
我知道呢位朋友一向都好深情同專一, 而且好難好難先放得低一段感情, 又好難先可以投入另一段感情, 不過既然去到而家呢一步, 都希望可以睇開d...而且可以快d遇到+接受新o既一段戀情啦! 你仲有一班好朋友支持你, 有咩事/想出來散心/搵人傾偈, 就搵我地啦!

仲有一位朋友, 相識得唔算耐, 不過都傾得偈, 而且都大概知道佢o既情況...
而家佢係一種好混帳o既狀態中。雖然以前可能受過傷害, 而家2個人明明係中意對方, 但係由於2個人都係多野諗o既人, 於是諗左好多野, 又好多顧慮, 成日係度諗: 如果之後對對方唔夠好會點點點? 如果之後分手又點點點? 其實自己係咪真係咁愛對方? 所以到而家都仲未一齊, 仲係度磨磨磨緊, 又成日係度煩煩煩緊~
其實諗咁多有咩用? 未一齊之前, 好多野都預料唔到o既! 更加無得驚以後會唔會/有幾愛對方! 而家係相愛o既, 就無問題咯? 有咩好怕? 怕o既就一齊之後努力對對方好d, 有咩會解決唔到?
我覺得無咩咁多野好煩, 係中意就中意, 唔中意就唔中意! Just do it!
有做過野而衰左好過無做野衰! 起碼以後唔會後悔自己無做過d咩! 幸福係自己爭取的!

仲仲有一位朋友, 中意左一個拍緊拖o既人。係我朋友識對方時, 對方同佢另一半關係已經麻麻地, 而我朋友同對方亦熟絡得好快。我朋友無刻意做d咩野, 同對方都係保持朋友關係, 亦都唔想撬人牆腳。不過眼見對方同另一半o既關係愈來愈淡, 而同自己又成日會一齊食飯/其他活動, 而且好多野又唔係好避忌, 令到我o既friend覺得應該開始要做d野去追對方。而家雖然唔係好清楚對方心意, 不過從各方面睇, 應該有機會的! 反正對方同另一半都唔多掂了...希望佢成功啦!! 到時唔好有人性無異性就好了 ^o^

值得講o既, 仲有另一位朋友係前排都開始拍拖了, 2個都係成熟o既人, 我諗應該係以長久為前提, 無咩大問題吧? 希望好快見到你地拉埋天窗啦~ 呵呵呵~~

仲有一個朋友, 拍左拖都有4年, 話帶人地出來見人, 過左咁耐都仲未見人, 仲話呢世都唔會俾我見添, 驚我地斷背 XDDDD 又話答應左但係無話幾時, 拖得就拖, 死野~ 真係唔知要幾時先有機會...係咪要擺酒先見到呀喂? 我到時實唔俾多人情, 仲要賺埋張餅card, 呵呵呵~~~

嗯...有一個朋友, 未拍過拖, 到左呢幾年突然特別想拍拖, 想有個人照顧佢/錫佢, 不過好彩佢又唔會亂咁搵一個。就算幾想拍拖都好, 千祈唔好是但搵個呀~~ 自己幸福來o既! 希望你蜜運快臨啦~~

有一個又係混帳o既甲獸, 究竟係咪同人拍拖o既? 係就正正式式拍, 唔好拖住人, 但係又曖曖昧昧咁, 好衰的! 人地係一個好女仔, 唔好害左人呀衰野~~~

其他無提過o既朋友, 拍緊拖o既就祝大家長長久久, 未拍o既就希望大家快d搵到個好o既另一半啦!

係呢度, 特別要提一提
頭先講o既果d朋友們, 有熟有唔熟, 不過我都係知名不具, 連係男係女都無直接講出來~
不過我講果d野, 佢地應該都知道係講緊佢; 如果想回應又唔想比人知, 就匿名+refer返少少野來回應我啦

呢度要講一講, 無拍拖o既呀民仔來緊星期日o既考試努力啦~~~
仲有呀源都努力考試!!

完

六月一日 -- 雜記 (內藏重要資料)

27/5 -- 星期六, long week收工後, 去葵芳, 之後轉車去好耐無去o既屯門睇玩具, 不過最想睇果間雖然無開=.= 無收穫之下返返葵芳, 行完葵涌廣場(無收穫)諗住搭車去深水埔/旺角食晚飯, 係車站撞到Carmen; 之後3個人決定一齊去深水埔食譚仔(係石夾尾有收穫), 之後就返屋企
28/5 -- 星期日, 無做d咩, 係屋企抖, 下午呀Sam來一齊打機~
29/5 -- 星期一, 夜晚唱K, 本來諗住6點幾唱到8點幾之後去上堂, 不過之後當然係無上堂啦...唱到11點半島就走人
30/5 -- 星期二, 之前果晚又訓唔到, 好累之下請左病假, 同日Lands打來問我有offer做唔做, 另外一間prop man公司打來叫我星期六見工, 似乎我轉工有一線曙光了~ 果日下午去左寶琳新都城行左轉, 之後去坑口拿左張信用card, 第一次試南豐o既foodcourt, 之後就返企抖了~
31/5 -- 星期三, 端午節假期, 訓到黃朝白晏, 中午食粽, 下午過調景嶺見某一位朋友, 個女好可愛呀~ 不過好怕羞~ 呵呵呵~~ 同日得知某朋友發生左d唔高興o既野...星期四晚睇戲(Da Vinci Code)取消
1/6 -- 星期四, 返工, 新同事原來本來轉SO再轉BSO...所以6月中先走, 係一件好事, 不過到時可能我都走了~ 好耐無食過好好味o既快富街早餐~ 不枉專登早起身去食~ ^o^ 今日亦得知某朋友拍拖了~~

完

人言可畏

人係一樣好無聊同八卦o既生物, 不論男女, 一食飽飯無事做就會係度講人是非。

本身識好多朋友, 有時係同一個大圈子入面都會識幾個唔同小圈o既朋友。好多時一齊食飯, 活動, 總有d時間係講下其他朋友/同事o既野。有時聽到佢地講o既野, 真係好膚淺... 佢地有時見到一d好表面o既野, 就會有好多自己覺得好理所當然o既猜測, 之後一路推落去, 愈估愈多...從來無諗過一件事係有好多可能性。有時, 有d人又會將某d野標籤左, 見到某d人做過d咩/個樣似咩/平時態度點...等等, 就會有好多野講/猜測, 但係我覺得好多好可能同事實完全係唔同o既...(例如一男一女friend d就一定有野, 見到佢地去街就話拍拖; 個人生得樣衰就更加係"錯", 一定會將所有有關佢o既野諗去衰果邊...等等)

連普通人都係咁, 又難怪d八卦雜誌作野作得咁勁。最好笑o既係, 有時有d被講緊o既人, 其實我都識o既, 我知道事實跟本就唔係咁...聽到真係啼笑皆非。不過, 作為資訊o既收集處, 我係唔會隨便流放資訊出去, 並唔係因為我唔八卦, 而係我本身o既原則來。亦都廢事d野愈描愈黑, 或者又惹來唔同o既猜測。

最得人驚o既, 反而唔係作野。好多時見有d人係背後講左好多人地o既野, 到到係對方面前又扮晒friend, 真係好嘔心。我o既意思並唔係話要反面, 或者好明顯唔妥對方, 做人一定要圓滑的, 但係我所見o既係"稱兄道弟"(或者姊姊相稱), 真係好核突。明明背後講到對方幾咁差, d演技真係好到不得了。

請恕我直接, 我不嬲o岩就o岩, 唔o岩就唔o岩的, 除非係逼不得已。呢個世界上係有d唔圓滑o既人, 我覺得我對我喜歡的朋友們好就夠了。好彩, 我覺得係真係朋友(唔係相識/同學/同事)果d, 都唔多係咁o既人...而且我識o既朋友(或者熟到o既)都係d直接而可愛o既人。(當我當左某d同學/同事係朋友時, 就會叫"朋友", 而唔係同學/同事了)

唔知有幾多"朋友"又係我背後講過我d咩呢?

p.s. 話我好我又唔介意呀, 哇卡卡
p.s.2 呢篇野並唔係因為知道有咩人係背後話我而寫的(更加唔好諗呢句係此地無銀...)

完