相隔左一段短時間，又執起書本，繼續去完成翻睇金庸N次系列。
睇神鵰其實我自己有少少卻步。
相信神鵰係好多人好鍾意甚至係最鍾意嘅一部，但我自己絕對係排到跌出五名之外。
並唔係話佢唔好睇唔精彩，純粹係我自己嘅個人喜好，呢部小說劇情同主角同我"相性"唔啱。
首先一定要講講男主角楊過。
有好多人鍾意神鵰好大原因都係因為楊過。又靚仔又型又武功高強又溝死女，而最令人好多人欣賞嘅原因係佢嘅反叛，反社會傳統，孤芳自賞嘅傲氣。尤其係以前成班同學仔或者朋友討論時，大家都係處於反叛期或者係年少無知嘅年紀，代入感特別強。
偏偏呢，我自己由細到大都算係"循規蹈矩"果類人。當然，我自己諗野、想像、諗故事...etc好多野都會雲飛天外天馬行空，但係現實執行上算係乖仔同埋聽話果堆。所以一直都比較鍾意令狐沖，佢一樣係不屑於世俗嘅睇法，追求自由，但係佢同時亦好豁達。相反書入面都強調過唔少次楊過性格偏激而且氣度胸襟殊不廣闊，對我來講就敬謝不敏了。
自己一直覺得運氣對人生好大影響，但性格亦都同時會反映到係遭遇上。一直都覺得楊過嘅經歷雖然係慘係苦，但唔多唔少都係佢自己有份拿來(咁當然佢自細嘅經歷都造就佢嘅性格)。反而佢自己嘅任性一樣影響左其他人。亦都因為呢個原因，我睇呢部小說總係有d位會覺得唔舒服。並唔係因為唔精彩唔好睇或者唔合理，而係純粹因為我自己唔喜歡罷了。
以下講少少對書中人物同埋情節嘅睇法。
作為射鵰嘅續篇，好多人物都係呢部延伸落去。其中老叫化同老毒物嘅結果令我好深刻。竟然係互鬥到精、氣、神、力全部都盡晒，突然靈台清明，一笑泯恩仇，好勁好有意境。講到死，絕情谷一日之間死咁多人都好震撼。綠萼嘅可惜，公孫兩公婆嘅可笑，洪凌波嘅可憐，仲有作為中boss嘅李莫愁，係火中唱住"問世間，情為何物..."咁消逝，真係其中一個經典嘅退場。
小龍女 -- 細個睇會覺得佢係一個無乜腦無乜思考好靚嘅女主角，一再翻睇之下其實佢係好有血有肉。古墓教育令佢好似好冷淡咁，其實書入面比較多嘅描述佢個心係好有熱血同直率同埋好溫柔嘅人。以前成日覺得小龍女同王語嫣係similar嘅模板，但其實2個都好唔同，而且各有個性，並唔係男主角嘅附屬品咁簡單。小龍女嘅單純係可以為左對方原惜付出一切，以對方嘅快樂為先，雖然睇落好似只係兒女情長，但果種一往無為嘅氣魄其實好強大。
黃蓉 -- 好多人都表達過射鵰同神鵰嘅黃蓉實在爭好遠。射鵰嘅蓉兒佻皮可喜，神鵰變左一個多疑同埋諸多阻礙嘅婦人，好討厭。我個人都覺得佢係幾煩，不過自己年紀大左、負擔大左，有埋小朋友之後，顧慮多左，的而且確係會諗多好多。佢會為自己兒女過份擔心實屬正常，就算姆聰明嘅人都好，為"愛"之所困(不論係愛人定子女父母朋友)關心則亂，好容易會諗埋一邊。不過佢同小龍女講嘅野真係影響好大，好令人覺得討厭啊。
公孫止 -- 究竟佢係天性就咁cheap又咸濕定係因為比佢老婆長期逼迫壓抑到性格大變呢? 我覺得人人本性都係陰暗面，佢本來唔多唔少都會有，但如果唔係裘千尺咁癲，佢係唔會變到咁的。不過係書中佢嘅表現真係cheap左d...另外，書入面有提過佢要娶小龍女兩人相差廿幾歲，好多人覺得有問題。各位睇睇而家社會...d有錢人同埋明星...哈哈。
耶律齊 -- 好想講下佢。雖然書入面寫到佢係年輕一輩之中差不多最叻，又靚仔又打得性格又穩重聰明，但係因為要湊數夾硬講佢鍾意郭芙實在係佢呢個人物嘅一大敗筆。不過轉念一想，其實都無話好唔合理嘅，佢叻都好佢都係一個男人，郭芙幾蠢幾刁蠻係一回事，佢欣賞美色係另一回事，何況人地呀爸呀媽有錢有權有勢，娶佢都係一個好選擇。
金輪法王(國師) -- 雖然書中多次講佢武功智謀好強，而佢都真係好強，但比起好多"大佬"，佢真係無咁"大佬格"。何講"大佬格"其實應該無乜定義，不過我自己以前都有提過好多，除左"強"(其實呢樣任作者講)，最緊要係營唔營造酊恐怖感、絕望感，有無充分顯示出boss嘅氣魄。我成日都話，好多漫畫嘅前期boss係有feel過後期嘅，例如幽白嘅戶愚呂弟、龍珠嘅菲利、One Piece嘅沙鱷...etc。神鵰入面我覺得李莫愁嘅bosss格仲強過金輪少少(起碼一開波已經營造左佢個恐怖感)。新修版神鵰唔大改動，係幾個位增加左描述，其中一個就係金輪同郭襄嘅師徒之情。個人覺我雖非蛇足，但又唔覺加左有好幾多。
故事入面，楊過小龍女多災多難，最令人感受深同埋氣氛營造得最好嘅一段，我覺得係佢兩人經歷多番離合、重傷、中毒之後，諗住終成眷屬，點知又又又中招，小龍女毒入內臟無法得治。用左一段篇幅寫兩人重回古墓，化妝換上嫁衣一段，佢地強顏歡笑，真係好淒涼。呢段真係好表達到果種絕望同哀傷...另外，其實睇返楊過呢d喧至情至性嘅人痴痴等十六年，到到知道南海神尼係流嘅，再到絕情谷等過十六年，再癲左跳落崖，其實幾令人動容嘅。而郭襄跟住落去果下，我覺得佢出場雖然遲同篇幅唔多，但都好做到佢都係情感極強烈嘅感覺，比起天龍八部游坦之跟住阿紫落去嘅震撼強得多。
不得不再提N年前曾經少過內地劇集，個一燈講南海神尼碌大對眼好誇張個樣，明明書入面係黃蓉講再問一燈，一燈唔想講得咁明只係嗯嗯嗯...真係要一講再講，內地拍金庸除左硬件好之外其他野都唔多得。
其實要講金庸小說，寫篇論文甚至出本書都唔夠講啦，不過呢d少少字嘅短篇閱後報告係度都夠皮了。唔係咩文豪亦無grammer check，匆匆邊諗邊打完就算，係咁啦~
完
