六月一日 -- 雜記

1. 又係無寫底, 好多野唔記得, 又累, 是但寫d。

2. 收工去Mak屋企食飯, 傾下見工d野; 第一次食住家飯, 佢呀媽整d野都唔差呢~基本上都無咩傾見工野, 都係hea左個晚上就完。

3. 係觀塘NDS Mario Kart七人大戰勁爽, 好耐無試過咁多人一齊玩, 好好玩; 唔講唔知, 原來KT間花園餐廳係唔多人的, 想係度打躉同hea真係唔錯。

4. 星期五hea足一日(唔知點解好累); 中午返SKM食飯farewell Grace同Yuki; 之後就去上環見工; 唔問technical問題, 只問d general野, 所以好睇主觀感覺...野就照答左, 請唔請真係唔知...晚上同MayChan貓MiMi食飯, 好耐無食過MayChan公司訂返來o既三文魚刺身, 超好味! 可惜大家都唔記得左準備Wasabi同豉油...去左MK熟食中心食, 原來佢地都未去過, 比佢地試左咖哩農夫包小菜王同燒臘, 都OK呢~ 之後8點幾食完行左陣10點幾返企。

5. 好憎o既Spurs同唔太鐘意o既Pistons都出局, 總決賽係Celtics vs Lakers, 2隊都ok鐘意, good!

6. 星期日無波打, 上午去左馬屋企本來諗住幫手整傢俬, 點知搵左師父整, 因此上去齋hea; 之後同臨時拉夫o既民仔返TKO打羽毛球(Connie唔舒服); 打完之後突然決定同馬民3個人睇戲, 同Carol佢地散左之後上我企hea同沖涼, 晚上同2個死黨係MK睇左be kind rewind(低清老翻王), 好笑, 預期之中, 佢d翻拍經典戲o既位都好笑, 好抵死; 好耐無試過咁樣我地3個一齊食飯同睇戲呢(雖然時間緊迫3條友好快咁食左M記)。睇8點到10點散場返企。

7. 呀哥幫我買左個外置harddisk, 終於可以backup下HD d野, 清空下佢了。

8. 睇左Indiana Jones第三集, 好好睇, 由於細過打過computer game, 所以好多情節印象都好深刻, 亦都係3集之中最鐘意o既。

9. 明天就有2個人來澤安了...唉...

10. 唔太記得有咩想講, 就咁啦。

來緊:
4/6(三) -- 同Carol同佢村d同事打羽毛球。
5/6(四) -- 同CarmenLobo等食飯, 未知去邊食。

完

五月二十七日 -- 大事件!!

一日之間, 好似發生左好多事咁。

早一日有個新人來左我地條村, 睇落都ok傾到偈, 唔係夾唔來o既人; 早兩日聽到將會調多兩個人來澤安, 聽聞其中一個係爛人…仲要係好爛果種…唉…成日都整d咁o既野來破壞本來好好o既平衡。d高層實在係一d管理o既理念同能力都無。D人幾差都唔會炒人, 死都留住d唔得o既人, 咁樣反而令d好o既係咁走; 其實咁咪仲衰, 慢慢又係好似房署或者好多政府部門咁, 變成一個藏污納垢o既地方…

收工6點幾時, 收到電話, URA打來叫我星期五見工!! 突然有d緊張, 希望快d見完攪掂件事啦…

同民仔Joelle3個人食飯, 去左山林道金鳳, 食完仲好早, 未夠8點, 佢地都覺得好早, 未想返屋企住, 諗住搵d野攪, Joelle提議唱K; 一般來講民仔雖然唔會咁早返屋企, 但係通常都唔會答應無啦啦食完飯唱K, 但係一係“女”提出, 佢就完全無問題, 於是3個人去左唱K到11點幾先走…

太耐無唱K, 唔使講當然係完全不在狀態之中, 仲要係好差…係比起之前o既差更差…唉…而家真係一d唱Ko既心機都無了…好多位完全唱唔到…唱到果d又唱得唔好…

晚上返到屋企, 發生左近年內(近好多年, 保守估計5年)最驚o既事情!! 實在好耐好耐無咁驚過!! 話說返到屋企入左廳, 突然感覺到有黑色o既野係天花掠過, 即時停步四圍望, 又唔見d咩野喎; 於是衝入自己房, 諗住躲埋算啦, 入到房, 關左窗諗住開冷氣, 一轉身發現有隻好大隻黑色o既野飛入來, 仲要係向住我!!!! 其實一團黑色o既野飛入來, 我都睇唔清楚係咩, 不過以我咁多年驚曱甴o既經驗(如果大家唔知我驚曱甴同埋唔知我係好準o既曱甴探測器, 請睇返之前我寫o既一篇“兒時趣事1”), 我都肯定係曱甴來o既!! 我間房唔大, 我企係入面, 隻死野係外面飛入來, 仲要係我心口咁高, 仲要向住我, 真係好驚好驚好驚!! 仲要係困獸鬥!! 一向好執著張床要乾淨o既我, 係未換衫仲著住d去街衫o既時候, 仍然一d都無考慮過就跳左上張床, 即時拿起張被向住佢“發過去”, 之後掉底晒d野勁叫, 好耐未試過咁驚咁歇斯底里咁叫, 完全係好無助好心驚肉跳咁抱頭叫, 叫左2野眼鏡都甩埋望一望唔見左隻野, 即時衝出房離開現場, 眼鏡都無拿!!

之後呀哥出來問我咩事, 我同佢講見到隻黑色野係我房, 佢捲左張報紙入我房搵, 但係搵唔到, 四圍成間房都拍過搵過晒都話唔見, 仲話我係咪眼花添, 之後佢再搵左陣唔見, 就返自己房; 我戰戰兢兢咁慢慢入返房, 四圍望左好耐, 唔見隻野, 不過已經打定主意, 唔係間房訓了, 諗住拿d野去沖涼啦, 入到間房, 突然聽到d異聲, 即時衝出房!! 話說大隻o既曱甴, 唔單止飛, 有時郁都係會有聲o既!! 我當時聽到o既, 好似係果d聲, 唔係好肯定之下, 慢慢慢慢行去房門口, 四圍望又唔見隻野, 唯有再行入去聽下, 一聽就又聽到果d聲!! 我好肯定係曱甴!!! 於是衝返出廳叫呀哥; 呀哥又出返來, 我同佢講話有聲, 於是佢又入我房, 過左一陣佢終於見到隻野!!

為左令我安心, 佢幫我拿晒d枕頭被鋪果d出來, 拿左報紙入去, 仲關埋個房門同隻野搏鬥。良久, 終於話攪掂左; 其實我應該望一望條屍先會安心, 不過實在唔敢望, 而且信得過呀哥; 見呀哥拿住一團報紙掉入垃圾桶, 事件終於解決左。睇返呀哥o既形容, 隻野好~~~大隻, 比起一般大o既仲大隻, 痴線o既, 變態o既, 肯定係曱甴后來o既。

經過左今次事件, 我一再肯定, 自己係好驚好驚曱甴o既, 係完全無辦法控制到; 另外, 亦肯定左我對曱甴o既敏感度好高, 真係好強o既曱甴探測器, 如果唔係, 我係房度隻野已經飛左上我身。另外, 好彩屋企有呀哥呢個勇者係度。(呀爸呀媽仲勁, 可以徒手捉添。) 實在係好驚好驚, 真係好多年都無咁驚過了, 而且自從好細過, 都未試過比隻曱甴向住我飛埋來了。實在係太驚, 折騰左一輪, 攪到2點幾先訓…

完

雜雜雜感

聽話的孩子
從小到大, 都是一個“聽話的孩子”, 即使在反叛年齡, 也沒有什麼一般年青人的反叛意識, 十分聽父母話。長大以後, 仍然算是聽話的孩子, 不過已經不是盲目地聽話, 而是經過了自己的分析去聽話。如果覺得不對的, 也不會反抗, 而是與他們談談。父母在很多方面都算是很開明的, 比起很多同輩的父母, 其實他們都很算是放任我們去做自己喜歡的事, 不會拖著我們。不過當然亦有例外。雖然實際上並沒有阻止我們的行動, 但也會有很多意見。最大的其中一個問題就是“拍拖”, 雖然開明, 但其實他們有十分非常極之多的意見; 常常說“其實拍拖是你自己的事, 我們不會反對的”, 但之後就會“我們沒有什麼要求, 不過只要對方怎怎怎樣就可以了”, 或者有時就會說“如果對方怎怎怎樣, 就會對以後有怎怎怎樣不好的影響”, 但愈就愈多, 其實就是對那人有十分之多不滿意的地方。看著哥哥曾經有幾個對象, 都是被他們不停地“彈”, 開始時我也以為他們只是不滿意某樣東西, 到了另外的女孩子時原來又慢慢的出現了很多的意見…哥哥很尊重他們, 也因此覺得很不開心; 看著這情況實在覺得很煩(其實已經不是很多東西可以令我看著覺得很煩的了), 所以, 在這方面, 我已經決定完全不理他們, 徹底地做個不聽話的孩子算了。什麼不要內地的女孩子, 什麼對方家庭有負擔就會影響自己, 什麼最重要只有健康, 什麼學歷不夠, 什麼對方賺錢能力好點會輕鬆些, 什麼對方長得矮會影響下一代等等, 一概不理了。

普通朋友
拍拖的女友與普通朋友不同; 雖然以前也談過很多次, 但也再此再談一些。在很多人眼中, 兩者的分別很大(這是當然的啦), 雙方會說的話, 會做的行為也很不同, 而其中最大的分別, 就在於“對對方的期望不同”。這“不同”會因應性格、拍拖的時間等等而慢慢改變; 與普通朋友不同, 即使是很好很好的朋友, 大家也知道對方要什麼, 不要什麼, 不會過份地要求, 只有善意的鼓勵及批評。因此, 朋友通常都是長久的(當然, 我經常認為即使多好的朋友, 也不要牽涉金錢), 拍拖反而會出現很多問題, 爭拗, 很麻煩, 很令人不高興。反而如果是朋友, 倒是永永遠遠舒舒服服地相處呢。

張無忌
看金庸小說寫感想時, 曾經說過很不喜歡張無忌, 後來也慢慢的接受他。無疑, 作為一個領袖, 他不合格; 但作為一個人, 作為一個朋友, 他是很好的。雖然自己一向嚮往令狐沖的自由自在, 但其實自己在某方面也像張無忌的待人處事。最大的相同之處, 就是“不記恨”。自少已經是這樣, 很多人對自己差, 對自己不好, 固然那刻會覺得很不開心, 但經常很快便忘記了那種“恨意”, 即使還記得那人的所作所為, 但對他的“不快感覺”很快便會消失。對很多人也一樣, 即使曾經是什麼關係也好, 即使曾經多麼的不快也好, 我也始終狠不起心腸去恨, 慢慢的也只會記著對方的“好處”, 那樣雖然做人比較快樂, 但也令人有不少煩惱…最起碼, 有很多人因為知道我是這樣, 就更大膽地得寸進尺欺負我, 知道我以後不會恨他們…

男朋友
香港的“男朋友”, 相信在世界中已算是不錯的了(只討論對對方好不好, 而不是思想上長不長進身體上強不強壯)。外國的男女, 通常自主性都很高, 而且比起華人社會更有真正的“男女平等”, 男/女友不會過份地依賴對方, 各自有各自的空間, 因此很少存在“縱壞”的問題。在中國大陸, 台灣, 日本, 韓國等地, 仍然頗為“大男人”, 男性仍然比較主導, 在劇集之中男朋友對女朋友那些溫存軟語呵護備至, 在當地的現實中, 其實百中無一。在香港卻不然, 很多人(包括男女)也被小說電視劇等蒙蔽了, 縱壞了, 有很多其實不必要的行為, 也成為了“該做的事”, 變成了“例行公事”, 一點意思也沒有。其實不同地方有不同環境及文化, 盲目去跟從, 跟本一點意思也沒有。再者, 香港是中國人的社會, 有很多觀念仍然很傳統, 也影響到所謂的“男女平等”也是假的, 只是增加了女性的便利, 加重了男性的負擔, 跟本是欺壓男性而已…

死前的思想
一個人的一生, 究竟是為了什麼, 要做什麼, 要得到什麼, 很難有一個結論。我們可以試試想像, 自己就快要死了, 在床上試想像自己臨死的時候, 會回想一生, 會想起自己究竟做過什麼, 想起這一生人有沒後悔, 會認真的想究竟自己真正要的是什麼, 那末也許大家可以得出一個適合自己的目標, 就算不能知道自己一生的最終目標, 也能知道自己“目前這階段”最想要得到的, 最想達到的理想是什麼。

完

五月二十五日 -- 雜記

1. 19-22/5 -- 星期一至四都收工返企, 無咩好講。

2. 23/5(五) -- 收工打羽毛球, 由於幾個勁人都打, 我呢d弱o既人超夠運動量(因為不停前後左右追波俾人玩 :D), 打得好爽好開心~ :D

3. 24/5(六) -- Long Week, 收工同Catherine去葵芳; 預料之中都係果間"目標舖頭"d野最平, 買左新出o既BB三國傳夏侯淵; 之後本來諗住是但食, 點知見到有任食任飲打邊邊, 於是就無啦啦食...d野麻麻地, 來野又來得慢又唔多齊, 價錢唔算好平, 麻麻地...係間酒樓睇左成套"鼠膽龍威"先走, 因此幾晏; 晚上係企叉NDS電舊野爆左, 好大聲BANG一聲, 好大陣膠o既燶味, 仲有火花添, 嚇死人。要買過個叉電器了...

4. 25/5(日) -- 好難得天氣OK, 灑左2陣小雨但係唔多影響, 仲有好難得吳志天同家昇都來打!! 自己友都幾多人, 霸左半個場; 今日打得幾順, 贏多輸少, 打得幾盡興呢(平時lunch時間練波係有用o既)! 下午返企訓到晚上; 晚飯其他幾樣"食送"都係屋企人整, 自己請纓試整係網上見到的"水蛋蒸肉餅", 估唔到都OK! 第一次成功整到滑滑o既水蛋! 可惜肉餅咸左d。

5. 睇"鼠膽龍威", 都係覺得以前d戲係好好睇; 以前呢d八九十年代港產片, 完全唔理有無深度, 大堆頭將d野塞晒入去: 有動作, 有好多特技(唔係電腦特技), 有功夫打鬥, 有槍戰, 有爆破, 爆車爆直昇機, 有佈局, 有攪笑, 有無聊野; 演員有李連杰, 張學友, 邱淑貞, 午馬...等等, 要咩都有; 好多以前o既導演都話, 拍戲要三分鐘一小高潮, 五分鐘一大高潮, 總之唔好有悶場, 就係好似呢d片了。雖然係無咩深度, 但係直接了當, 精彩百出, 娛樂性極度豐富, 都係鐘意睇呢類戲多d呢!(近年來講, 成龍o既寶貝計劃都係呢類, 其實幾好睇(我都係唔多鐘意成龍呢個人, 但係戲還戲, 人還人)) 另外, 除左見到好耐無見o既邱淑貞(真係好靚同索)之外, 仲有另一個幾乎遺忘o既既靚又索又有女人味(真係大個左先識)o既周嘉玲, 幾欣賞呢個類型呢。

6. 經過左房署唔知高層中層定低層人士o既討論, 果然五天工作失敗左, 之前我都係抱觀望態度架啦。不過無論係點, 都唔到我地呢d小薯來決定, 上面想點咪點咯, 到我地出聲咩?

7. 今次好似無咩寫, 而且之前無記底, 因此應該又流失左某d感想~

來緊:
29/5(四) -- 約左呀WingCarol白田同事等人晚上食飯, 主打係打機3
0/5(五) -- 白田羽毛球活動
4/6(三) -- 同Carol同佢條村o既人羽毛球活動

Links:
今次簡潔d, 少d, 等大家有心機去睇下...尤其係youtube條link:

某位同事o既blog -- 同我一樣, 會寫好多自己體會同對人生或者自己o既感想; 年紀輕, 佢o既見解都唔差, 大家值得睇返佢d舊posts, 就算唔o岩自己, 都可以知多d野; 可惜o既係, 我雖然唔係唔同意佢o既諗法, 但係佢o既方向同我唔同, 而且有d野都係嫩左少少(不過自己又何嘗唔係好幼嫩?); 不過都再講多句, 有d係幾值得睇的。
http://hk.myblog.yahoo.com/kinman_1982

無聊又有d攪笑o既野, 唔開心可以睇; 而且, 其實入面講o既野, 唔多唔少都係o岩o既...
http://failforum.net/forum/redirect.php?tid=554396&goto=lastpost

嘲笑 -- 日本老牌明星玉置浩二o既一段Live片段, 佢現場唱"嘲笑", 邊彈邊唱; 唔使講唱功, 只係坐係度邊彈唱已經好有味道, 不論係唱功定情感方面都發揮得好正, 雖然只係簡單結他伴奏, 但係已經好夠; 自己第一次睇o既時候, 係完全唔停低由頭睇到尾, 雖然無字幕, 唔係好知佢唱咩, 但係都覺得好好聽, 呢d就係"感染力"! 亦都唔係好多好有唱功o既人有o既...誠意推薦大家睇晒去。 :)
http://www.youtube.com/watch?v=Gyjr0KiAoKE
http://www.youtube.com/watch?v=aeEr1I7slfo&feature=related

完

無聊短篇故事 -- 財神到

前言

很久沒寫寫無聊的故事了。自己好像甚少寫這類題材的故事; 這次想寫得比較草根, 比較生活化, 而又想帶給人心中一點點溫暖的感覺。
自己並不生於六、七十年代, 只是以書本及港台電視節目中所見所聞, 儘量去營造那個感覺, 總覺得香港在六七十年代的草根階層, 仍然很純樸, 很有草根味, 也更有人情味, 於是便以當時的屋村作為故事背景呢; 相信不只比我年輕的一代, 就算和我同輩, 也不一定感受到或知道那一種感覺吧…

財神到

“財神到, 財神到, 好心得好報…”
正值農曆新年期間, 收音機播放著一首家傳戶曉的流行歌。

亞興拖著疲累的步伐回到家中。只是傍晚時份, 爸媽上班仍未回家。晚飯時間未到, 只好睡一睡休息一下。在五金鋪當學師仔的生活真的不好過, 但誰叫自己不是讀書的材料呢? 別說家裡沒錢再供他上學, 就算再上, 也不見得有什麼成就, 倒不如中三畢業就出來做學師, 做到三五七年滿師了, 生活倒也就好點了, 也不用再使家裡有負擔; 弟弟成績一向很好, 如果升得上大學, 家裡出個大學生, 那可光宗耀祖哪。

“財神到! 接財神哪!” 在農曆年時總有人做著這些事。
亞興才剛倒在床上, 就又要起來打發這些小朋友。
只見一個面部紅撲撲眼睛又大又圓的小孩子站在門外, 拿著幾張上面寫著“財神”的紅色紙條, 身上也穿著紅色的新衣, 一派喜氣洋洋的氣氛。

“財神到! 接財神哪!”
小孩子熟練地叫著, 好像已經成為口頭禪那樣了。亞興正不耐煩被打擾, 想責備那小孩一頓的時候, 只見那小孩笑得那麼天真, 眼神之中帶著期待, 他心一軟, 拿出了一點零錢, 給了那小孩, 就想關門打發他走了。

小孩子接過零錢, 見亞興想關門, 拉著他說: “哥哥, 你忘了接財神呀!” 說著就遞了一張紅紙給他。
“不用了, 你留著吧, 快些走, 我要睡了, 乖乖快些回家吧!”
“不! 我不是騙錢的! 你給了我錢, 當然就要接財神啦!” 小孩硬將一張“財神到”紅紙塞進他手中, 然後一溜煙地走了, 臨走還在叫“記著帶在身上呀, 它一定會帶給你好運的!”
亞興苦笑一下, 隨手把紙放在褲袋裡, 倒頭便睡。

鈴…鈴…鈴…鈴…鈴…鈴…
剛睡了一會, 就被電話嘈醒。
“你他媽的真麻煩, 剛剛睡著又什麼人打來嘈…”邊罵邊接電話, 另一方傳來媽媽焦急的聲音。
“興仔! 你爸上班時突然暈倒了! 現在醫院還未醒呀! 快些來某某某醫院吧…”話未說完已帶哭音。

很快地趕到醫院, 媽隨著醫生走過來。
“林先生, 經過檢查, 發現你爸爸的心臟有問題, 現在要立刻做手術才能渡過危險期呢。”
“什麼! 怎會這樣的…”

“興仔呀…現在怎算呀…我們…我們哪有這麼多錢做手術…”
“難道便不做嗎? 不做的話爸爸…很危險的呀…”
“他是家中的經濟支柱, 沒了他我們可不知怎過了…你只是個學師仔, 我也只是做幫工, 細佬還在讀書…唉…拿了家裡所有錢, 都只能做手術, 之後爸爸要休養, 不能打工之餘還要吃飯還要補身子…我們怎負擔得起?”
亞興默然。
“唉, 見步行步, 唯有做了手術才算吧…”

亞興走出醫院, 漫目的地在街上亂逛, 見到一個投注站, 從褲袋中拿出些錢, 買了張六合彩。剛走出來, 見到有一個婆婆大叫“搶錢呀! 有人搶錢呀! 捉賊呀!”
亞興見狀立刻追出, 只見一個男人拿著個手袋狂奔, 一個婆婆在後面追著。他叫道: “婆婆, 等我來追吧!”
他追著賊人, 很快地追到個牆角, 突然賊人回身一拳打來, 他閃避不及坐倒在地。那賊人拿出刀子, 連亞興的錢包也被搶去了...
“唉...最近的運氣真背...”
伸手想從褲袋中拿紙巾抹一抹, 只拿到那張紅色的“財神”紙條...

茫然之際, 背後有人拍一拍他的肩膀。
“哥哥, 你跌了東西了。”只見早上那小孩子拿著一張六合彩卷遞給他。
“噢! 謝謝你。乖...”亞興正想轉身離開, 小孩子又拉著他。
“我幫你拾到了六合彩卷, 你要給回我呀。”
“什麼? 你要什麼? 我才剛被人搶了錢包呢...”
“不是呢, 那張紙要給回我呀!”說著便從他手上把紅紙搶了去。他邊走邊說, “哥哥, 祝你發財哪。”說著指了一指在店舖貼著的一張財神畫像, “看, 我長大以後就是這樣了, 嘻。”

手術順利完成, 亞興一家在醫院等了一天, 總算鬆了一口氣。
回到家中, 收音機正播出六合彩的結果...
“2, 4, 6, 8, 10, 12, 特別號碼14...”

“媽! 媽! 你...你你你看, 我中了六合彩呀! 中了二獎呀! 發達了!!”
“不單止爸爸的手術費, 連之後一段時間的生活費也不用怕了! 太好啦!”
“呀! 真的謝天謝地...老天保佑呀...”

“財神到, 財神到, 好心得好報…”六合彩之後接著播出了農曆新年期間常常播出的流行曲。
“財神到!! 真的財神到了呀!!”

完

自由的一晚及感想

昨晚過了一個很自由的晚上。
放工後, 決定不回家吃晚飯, 回到將軍澳, 在街上閒逛一會, 死黨打電話來, 在家中樓下和他談了整個小時(膝頭很痛呢), 買了牛扒回家, 自己煮東西吃。

八點多, 煮了個冬蔭功麵煎了兩塊牛扒, 邊吃邊看電視就到了十時半。其間, 看了很多平時不會看的電視劇集, 除了同事三分親, 還有銀樓金粉, 火蝴蝶, 鑑証實錄II。

銀樓金粉故事是環繞了大家族內爭鬥, 自從金枝慾孽收視成功之後, 無線便開拍了多套類似劇集。劇中演員大多是“老戲骨”, 因此幾場明爭暗鬥的戲也好看; 只是某幾名年輕演員仍然是大大地被比下去…鑑証實錄II暫時也過得去; 火蝴蝶又是典型的“時裝大家族內鬥+商場+股票”劇集, 有曾江鮑起靜林偉等人, 以亞視的人力資源來說很不錯了, 可惜的是作為第一主角的李彩樺演技實在不太好, 她所飾演的“草根階層奮鬥上位成為大家族媳婦兼商界女強人”實在令人不能感受到角色應有的氣質。

電視看到十時半, 碗碟煮食用具全部未洗, 洗完再洗澡都已經差不多十一時了。

從小到大都很怕悶。自己算是好動及比較外向的人, 小時候連排隊也覺得等得很痛苦; 記得以前排隊買首日封, 或者回鄉時要乘廿多個小時的長途車, 真的有“悶到想嘔”的感覺。而由於家人各有各忙, 兄長的年紀與我又有半個代溝, 家中的環境影響, 又不能看電視(讀書年代幾乎沒看過卡通片漫畫書)及去街或朋友家玩(只有星期日可以), 因此雖然不喜歡悶, 卻習慣了悶。

在悶的時候, 唯有想辦法使自己沒那麼悶。在沒有什麼東西在手的時候, 最有效的就是“想像”, 典型的水皮座, 最愛胡思亂想, 想東想西的, 就過了好些時間, 也就過了童年。(幸好有圖書館在家附近, 看了不少書呢)

到了現在, 仍然怕悶。長大了點以後, 小時候因為小與人接觸而怕羞的問題漸漸好轉(始終自己基本性格是外向的), 慢慢的認識了很多朋友, 在不同群體中也經常擔當攪手及攪氣氛的角色。現在慢慢的退居至幕後了, 經常要保持心情為最高狀態已經比以前難, 也很累; 而有時一大班朋友聚會, 我也不是出聲及突出的一個, 反而經常默默地坐於一角, 聆聽著大家, 不只是因為累; 以前也說過, 自己經常會留意各種各樣的東西, 也會去想及分析種資訊(當然是對是錯沒人知), 雖然我坐著沒有出聲談話, 但其實是在留意著大家的談話, 動態, 甚至小動作等等, 也在不停地去“看”及“感受”大家的想法及性格; 其實是不停地與所有人交流(不論我的想法對與錯, 但這樣使我對很多東西比較了解, 也使我可以接受到不同的人生觀及想法, 能求同存異, 也較能代入不同的思想去體察不同的東西), 只不過, 是單方面的交流罷了。

談得很雜亂; 到了現在, 雖然仍然很怕悶, 但也仍然是習慣了悶。在悶的時間裡, 仍然能如常渡過。其實以前也發現了, 自己能忍受“辛苦”的能力也不弱, 原來由小至大很多時候病了, 受傷痛了, 或者精神上不開心或悶, 都慢慢不經不覺的就捱過了, 再與別人說起時, 才知道原來都是很嚴重, 很痛, 很辛苦的; 但可能自己察覺不到, 雖然覺得很辛苦, 但沒有比較之下, 過了就過了。

不知怎的, 雖然很少看電視, 也不太欣賞現在的劇集, 但有時在家看著看著, 也消磨了很多時間呢。

完

大企問vs住家男

今晚在家看了一集"同事三分親"。(基本上一向喜歡這劇集, 只要在家也會看)
沒有看的人, 不會對看這篇文有影響。
很想談一談在現實中如果真的"大企問vs住家男"會怎樣。當然不要說劇中的"大企問"是一個丑角, 個性很差, 而且後半集發覺原來他是有目的才追Doris這些, 而是想談談這兩種人。

無疑, 在現實中, "大企問"類型的男性應該會有很大的優勢; 有學識, 高薪厚職, 樣貌不算差, 應該算是"荀盤"; 相反, "住家男"雖然有一技之長, 生活也可無憂, 但吊兒郎當, 毫無情趣, 品味也不及對方, 相比之下, 會選擇大企問的人應該會較多吧? (重申一次, 只是談這條件及類型, 並不是談角色)

在現實中, 相信沒有人會天真得只相信"愛情"的感覺, 那一剎那的感覺並不永恆, 也不長久; 兩個人相處, 性格比較合得來, 是不難產生"好感"的, 現在的人就憑這份"好感", 在單身的時候很容易就可以找到個對象, 但也因此亦很容易就分手, 因為基礎不足。除了所謂"好感"、"喜歡"的感覺, 相信絕大部份的人也會對另一半有一定的要求, 而且其"優點"愈多一定愈有優勢。人都是很現實的, 只是性格很好, 有內涵, 一定不會受到很多異性的青睞; 貧賤夫妻百事哀, "賺錢能力"或"家底"對男士尤其重要, 因為在感情基礎之下, "生活"也是極其重要的。因此, 大家不要說"有錢人"沒有優勢。

除了錢, 另一樣重要的就是"情趣"了。樣貌還不是那麼重要(當然如果"靚仔"就更好了), 但一定要有情趣。沒有錢, 有情趣, 就算最後不能長長久久, 但起碼拍拖時不會"悶"。
在劇集前半段, "大企問"有情趣, 有品味, 懂得製造氣氛, 搏人歡心; 相反"住家男"除了煮得一手好菜, 就什麼也不懂, 不解溫柔, 不懂情趣, 連去看個電影也不會; 大家會選擇那個呢?

如果你只是一個賺到點錢, 但沒樣貌, 沒家底, 沒情趣的人, 你認為你可以找到自己理想伴侶的機會高不高? (不是yes or no, 而是%) (緣份? 說笑吧)

另外有一樣想談的, 就是"大企問"的看法:
"香港人都生活在工作中, 平時大部份的時間, 就只是為了工作; 而他就會在工作時間以外享受人生, 增強自己的內涵及品味。"
真的說得很對, 可惜, 我相信香港人並不是不肯, 而是不能這樣(是不能, 非不為也)。被某些老闆及員工"玩爛"後, 在現在的香港社會, 要享受人生似乎只是有錢人的專利, 一般做小生意或打工的人, 跟本很難在這麼壓迫的社會去有品味地生活。(識玩識食什麼都識的蔡先生陶才子等等都是小時候家中有錢才能這樣)
有很多人可能已經慢慢地淡忘了應該要有這樣的生活, 也有可能有很多人根本就不會; 不要說什麼有品味, 現在的人有很多連書也不愛看, 更遑論什麼有品味了。有錢有時間, 相信大家最多也只會"享受生活"而已。

自己雖然不太算是不長進的人, 但也不是很進取很追求"出人頭地"的人。而自己的興趣也不在政治經濟方面(可悲的是我也會留意及懂, 而且某程度上已經比起很多一般人懂很多了...其他國家很多一般人民也會對政治經濟有認識, 更是學校的必修科), 專長也幾乎不是可以"賺大錢"的能力; 而自己所追求的生活, 是自由自在的享受生活, 至於追求品味甚麼的, 也只是一些草根品味, 閒時自己高興一下而已; 看來, 不要說"大企問", 連"住家男"仔不及呢~

完

附綠:
讀小曼姐姐的網上日誌, 見她看了一本書, 而她看書記錄了以下"11至討厭男士"要點:

"如果你係中其中一樣就要小心...
1.沒紳士風度 2.小器 3.留長髮 4.體臭,口臭 5.太肥 6.講大話7.計較,小家 8.沒愛心 9.EQ低 10.沒情趣 11.爛佬,粗略"

某幾位好朋友似乎中了好幾樣呢, 嘿嘿。不過, 能完全不中的, 也沒幾個吧?

各位男士, 注意了。

再完

轉載: 陳冠希事件副產品 「醬油男」一句成名 被問及豔照門看法 「我出來買醬油的」 (明報) 05月 14日 星期三 05:10AM

唔係想講陳冠希事件, 而係想講有時好多野, 成日係咁煲, 好煩o既時候, 呢種態度同反應實在好正, 夠直接, 唔好煩!!

**********

【明報專訊】「醬油男」跟陳冠希 有什麼關係？是的，真的沒關係。前陣子沸沸揚揚的藝人裸照風波，在內地也一度被炒熱。不過，廣州電視台（GZTV）早前在街頭訪問市民，「請問你對豔照門（裸照事件）有什麽看法？對CGX（陳冠希）等明星又有什麽看法？」怎料，一名男受訪者回答說﹕「關我X事，我出來買醬油的……」此段畫面在網上廣為流傳，一句「我出來買醬油的」亦頓成網絡流行語。

只要在內地搜尋網鍵入「醬油男」三字，就可看到網友各種PS（修改畫面）。這位其貌不揚的「醬油男」已成網絡紅人。廣州《信息時報》稱，這句話的流行，也代表了普通市民對被熱炒過頭的話題的厭煩。

「買醬油也是一種態度」

對此，有網友回應說，「網路世界要選中一個人，要讓這個人被矚目、被娛樂、被蔑視或者被侮辱，往往不由分說，被選中的人，從此必須被動地擔當被矚目、被娛樂、被蔑視或者被侮辱的使命。」在網路世界上，這個無名的醬油男也是毫不知情地成為「知名人士」。

「這面相，這才是非主流。欣賞，這個人相當內涵！」；「買醬油都能成名人。感謝GZTV！」「我決定從今天起，不再打醬油，我打陳醋！」「買醬油，也是一種態度」……

「醬油男」能受到這麽多人追捧，最重要的是前句話「關我X事」，雖然粗俗但直截了當，更展示了一種淡漠不屑的態度。此回答也適合近來被炒作過度的話題，特別是娛樂圈的種種傳聞：「請問你對劉德華 結婚的消息有何看法？」「關我X事，我出來買醬油的……」言下之意很明顯：別說無聊的事，我只關心柴米油鹽……

完

五月十九日 -- 雜記

1. 14/5(三) – 收工同民仔出MK終於完成任務, 買好禮物, 之後食街市返企。

2. 15/5(四) – 收工同貓MayChan係始創o既和花亭食飯; 唔係sell平o既鋪頭, 不過有幾款真係幾好食呢~~ 當晚大家食得幾狼, 用左唔少錢。妹味。

3. 16/5(五) – 收工係東涌食buffet慶祝S同Sam生日; 一行9人食都幾好傾幾開心, d野幾好食, 又唔貴, 雖然遠d但係都幾抵食, d羊架好味呢~~ 東浦個商場好多outlet, 幾多野行, 不過由於大家係收工去, 大家去到食, 食完出來都關門了, 無機會行。

4. 17/5(六) – Short Week; 一早起身同民去馬屋企睇波, 好耐無試過一齊睇波, 好開心; 下午食完飯落街練波, 好耐無train過民仔, 大家亦交流左d心得(其實都係單方面交流), 希望民仔可以有多d進步啦~ 5點幾返企買埋送, 整左金菇牛肉卷同埋蒜蓉炒荷蘭豆, 牛d味OK不過個卷就散散地, 豆就d蒜蓉味好夠但係唔多夠咸…煮餐飯都唔夠呀爸呀媽當日係屋企打掃同清潔咁辛苦, 聊表心意罷了~ (d牛有某d好似有少少少少唔熟, 好彩無食到佢地肚痛 :P 自己整牛都係偏整得無咁熟多過整得太熟) 晚上睇奪寶奇兵, 第一集就唔係好記得, 但係第二三集就印象深刻好多, 遲2個星期有機會會睇呢~

5. 18/5(日) – 在家hea一天, 搵到收埋左好耐o既縮小女神VCD; 當晚煮左鹵水雞翼同埋腐乳通菜, 雞翼好成功好好味, d菜就腐乳味好夠, 但係咸左d…一日淡左一日咸d…=.= 晚上睇獎門人, 又係睇d女藝人俾男藝人搏懵…在男觀眾角度來講, 有野睇好過無野睇o既…

6. 19/5(一) -- 星期日晚訓到3點幾4點醒左, 覺得好眼訓, 但係訓極都訓唔到, 於是起身, 食d野, 睇波play by play, 眼光光到天光, 6點9恰左半個幾鐘起身準備返工...; 呀叔係加拿大返來; 收工返企同佢食個飯, 傾2句, 沖涼hea至訓。

7. 日本Bandai模型展公佈, 會出大量模型友期待o既MG Guntank(太空坦克)!!!! 實在係太正了! 等左多年終於肯出, 聽聞仲係識郁o既?! 睇來又要出血了~~ 終於可以齊晒三架G Operation機體!!

8. 返工方面, 6月開始5 days work?! 不過將會係shift返星期1-5, 2-6咁返…第日星期一放假都唔知有咩攪呢~

9. 終於証實左Sam成功溝左Esther, 可喜可賀, 嘿嘿, 有餐飯食呢~~

來緊:
23/5(五) – 白田羽毛球活動
4/6(三) – 同Carol&佢同事打羽毛球
搵Carman同叫埋Lobo等人食飯
約人唱K!

完

外星人

要講外星人, 真係有好多野可以講。只係談論外星人究竟存唔存在, 已經可以出本書。而有好多探討外星人o既野, 大家都可以係d咩咩探秘, 咩咩搜奇果類書睇到好多好多資料, 因此唔需要再係度講了。

係度想講下另一種“外星人” – 就係平常人眼中奇怪o既人。

好多時, 大家都會稱一些同佢地溝通唔到o既人做“外星人”, 通常呢d人o既思想同行為都同一般人好唔同(唔計精神有問題果d啦), 佢地o既世界觀同對好多野o既睇法都好特別。

由細到大, 相信大家身邊唔多唔少都會有呢類人: 思想古舊, 同現代世界脫左節o既人; 諗野完全唔經大腦, 只得行動o既人; 完全唔知諗咩o既人; 諗野好偏激, 行為亦好偏激o既人…等等。歷史之中, 有好多出類拔萃o既人, 其實佢地o既思想同行為, 都係同普通人好唔同的。

天才同白痴好多時只係一線之差, 其實呢個題目係以前都曾經講過下。不過如果唔計d叻人, 剩返果d庸碌o既“外星人”又如何呢? 佢地並無卓越o既成就, 亦唔一定有富裕o既生活, 咁佢地o既人生可唔可以稱得上“成功”或者“快樂”呢?

曾經同一位朋友傾開, 講開一d小說中o既人物, 或者現實生活中o既人; 佢地遭遇好慘, 生活好貧窮, 或者有好多平常人會覺得“唔好”o既事, 例如斷手斷腳等等; 但係可能因為其他方面, 佢地精神上覺得好滿足(例如得到真愛, 某方面去到某境界, 追求到佢地人生o既目標…等等), 呢d算唔算滿足呢? 算唔算成功呢?

該位朋友完全否定左呢種人生。佢覺得只係精神上o既滿足係完全唔值得鼓勵的。當然如果真係全部親戚朋友死晒又斷手斷腳咁極端, 就算精神上幾滿足都可能係“bad-end”(其實我而家想討論o既, 有少少都係想講係呢d極端情況下, 精神方面真係好滿足又算係點), 但係某d朋友o既諗法上, “錢”同埋“物質”似乎都係一個用來衡量一個人幾成功o既要素。

有好多case列舉出來, 大家諗諗呢d人係唔係開心, 人生算係成功定失敗:
有d人係天才, 係科學或者藝術上好另叻, 但係唔一定有錢, 在生時可能非潦倒, 但係佢地o既見解理論或者作品得到後世稱頌, 咁佢地算唔算係成功呢? (當然, 大家可能會覺得佢地成功, 但係唔會想要佢地咁o既人生)
又或者, 係d窮鄉僻壤o既人, 或者諗諗係HK屋村住o既窮人, 佢地可能一生都未享受過好多豪華o既設施或者飲食(甚至係知道, 但係又唔係十分想去試), 佢地終其一生就只係平凡咁渡過, 但係有三餐o既溫飽, 而且平時唔會好辛苦勞碌, 無咩憂慮, 呢d叫唔叫係開心o既人生? (大家會覺得佢地唔成功, 但係叫唔叫開心?) 不用再舉太多其他例了。

在此並不是認同以上2種人生態度或者鼓勵人向這些方向邁進, 亦都並唔鼓勵“只要簡簡單單生活就好”呢d咁消極又唔長進o既諗法; 我一向都係求同存異o既人, 絕對接受同埋支持全世界不同o既睇法同做法, 只不過想大家諗諗, 呢類o既想法可能有d人會不以為然, 但係佢地到臨死o既時候, 如果無後悔過, 可以好平安喜樂, 咁究竟係好事定壞事呢? 一個人o既人生究竟追求d咩野, 係咪追求到自己要o既野就已經係“成功”呢? 係咪要大家都覺得你“成功”先係好呢? 如果大部份人覺得你成功, 但係亦有d人覺得你所得所失係“戇居”, 咁又如何呢?

呢個話題當然唔係以係呢度三言兩語就有結論, 人生呢個課題十分複雜, 就算係到老到死亦唔一定參透到; 只不過係大家努力生活o既同時, 不妨係空閒o既時候都諗諗, 自己想要d咩野, 然後努力地去做, 亦努力地去玩, 去休息, 咁相信大家o既人生, 起碼都會比唔少人開心同安樂呢。

對於自己, 最近同某位前輩稍為講過有關“人生目標”o既話題, 佢o既說話令我好有同感; 佢想追求o既係“colourful, simple and pleasant life”, 同我一向o既想法不謀而合呢。好羨慕佢可以完全向住自己o既興趣同夢想做事, 想做就做, 想抖就抖, 有實力, 同時亦有飯開, 好厲害呢。(順帶一提, 佢係一個藝術工作者, 仲要係水瓶座o既)

諗法同一般人有異, 異想天開, 大家會覺得奇怪o既人, 但係又融入到普通人o既社會, 可能大家身邊都有不少呢d“外星人”呢。其實, 水瓶座會唔會都係外星人來o既呢?

完

天真的小朋友

首先多謝某朋友提供題目, 佢亦係暫時唯一一個一聽就明咩叫“只係俾題目”o既人。

講起小朋友, 大家即時可能就會諗起“天真”, “可愛”, 甚至係“幼稚”、“無知”等等。

明顯地, 大家再諗一諗, 都應該會覺得時移勢易, 其實呢種諗法已經錯得好緊要了。君不見而家o既細路仔, 好細個已經好醒, 知好多野, 超級人細鬼大? 好多幼稚園畢業或者小學低班o既小朋友, 已經知道好多社會上發生o既, 或者已經對日後長大o既自己有一定目標, 更有不少已經識得“溝女”(真人真事)(當然仲係好初步想討好對方或者想對方做女朋友果種啦)。再大dd, 到左小學高班或者中學, 佢地知o既野已經比起我地當年所知仲多; 好似我識o既一d小朋友, 或者好似我表弟, 雖然係大人心中只不過係黃毛小子, 雖然佢細好多, 但係我同佢同輩, 都傾到偈, 聽過佢講o既野佢o既諗法同佢o既內心世界, 已經唔係好似小朋友咁渾渾噩噩, 係有自己o既“一套”想法了(當然就唔好論佢諗o既呢一套o岩定唔o岩啦, 隨住人慢慢成長, 自己o既一套諗法會因經歷而慢慢改變o既)。

大家都可以見到新聞同研究指出, 而家o既小朋友係好細個已經有拍拖經驗, 甚至係未成年已經不只初嘗雲雨, 偷嘗禁果, 而係多嘗雲雨, 屢嘗禁果了。姑勿論佢地夠唔夠成熟去handle呢d野, 但係可見呢個趨勢係愈來愈嚴重; 大家諗諗係我地仲係流緊鼻涕唔知自己做咩o既年紀, 而家o既細路已經知咩叫“溝女”, 係我地毛都未出齊, 大家好好奇咁睇緊咸書o既時候, 而家o既“小朋友”已經咩都做過晒了。可笑o既係, 而家o既年青一代可能仲會覺得(而有好多劇集、漫畫等等亦都渲染), 到左廿幾歲都仲未經過人事, 仲係“處”, 係十分“on9”o既添。(係咪好似某d人覺得, 出左來做野或者大個左, 唔識/唔去投資都係on9一樣呢?)

小朋友吸收力強, 而家o既社會資訊科技發達, 佢地亦好容易地會接觸到不同o既information。相信呢樣野係無可能避免, 亦都係制止唔到o既; 真正要做o既, 係教育方面要與時並進。教育一個小朋友, 並唔可以好似以前o既封建思想咁, 同佢地講“咩叫o岩, 咩叫錯”, 最重要係令佢地懂得“自己去分辨是非”, 有“獨立o既思考能力”; 過度保護小朋友, 只會帶來反效果, 除左令佢地無左分辨是非o既獨立思考能力之外, 更令佢地到左青春期時o既反叛思想更強烈。

觀乎而家好多家長, 非常“on9”地經常投訴各種媒體o既節目, 有什麼暴力呀、色情呀等等o既成分, 使到而家o既大部份電視節目(尤其所謂合家歡時段o既節目), 所有o既呢類場面都cut晒, 最好笑係一d打交o既卡通片, 將入面o既人物打中人或斬中人o既果個scene cut左。我心諗, 你地班師奶同呀叔或專業人士, 係細個o既時候, 睇d武俠o既劇集、卡通片或者其他節目, 大把殺人, 色情等等o既情節啦, 又唔見你地係學壞左? 會有暴力傾向? 會對性關係好隨使? (我本人十分肯定我細個時o既節目, 呢d野o既尺度係寬鬆好多的) 可見最重要o既係教育, 而唔係單單係資訊方面做無謂o既抑制。

當然, 而家o既各種媒體亦經常嘩眾取寵, 經常扭曲事實, 過份地標榜色情暴力,或者刻意報道有關o既新聞; 但有錯的並不只他們, 也不能經常“賴”學校教育, 真正背負其中很大責任的角色, 父母一定是其中一方。只要教育得好, 孩子們懂得思考, 哪怕他們看了什麼東西?

看來, 天真的, 可能只是我們這些年紀大的人們。

完

五月十二日 -- 好多金牛座朋友

1. 5/5(一) -- 病好返好多, 起碼無咳, cert晒d單, 又唔使落白田, 因此呢日先第一次行樓; Lunch又練射波, 另外亦不停練基本layup+籃底跳射, 仲練Key位擦版, 一身汗, 有進步; 收工同家人去金源, 好少可一家人出街食飯呢, 呀爸極少去街食o既; 都係食果d野, 好食; 一早食完返企, 晚上訓得好差...

2. 6/5(二) -- 之前果晚訓得好差, 因此極眼訓+累; 當日知道又有同事走...真慘呢... 唔知Spenser不喜歡的某人會唔會因此調返澤安呢? 當晚早訓。

3. 7/5(三) -- 為左睇生日禮物for next Fri, 收工同民民行街; 由於佢收工晏, 因此唔睇得好多野(但係極速行路+目標為本, 都行左好多地方!); 不過大致上都睇到要買咩了; 天氣開始熱, 而家d女仔愈來愈敢著, 好多短裙/短褲小背心呢~

4. 8/5(四) -- 呀Mak生日快樂!!

5. 9/5(五) -- Lunch一星期一度落去食飯, 去左係Openrice睇到d人話幾好食o既泰國野"蓮金", 野食都唔錯; 晚上終於有得打返羽毛球!! 打7:00pm, 打之前係Openrice見原來SSP有間出名食蝦子撈麵雲吞水餃o既"劉森記", d蝦子落好~~多, 雲吞水餃好足料又夠味, 唔錯呢~ 打足2個鐘, 唔太累, 運動量好夠呢~~ 希望以後keep住有得打; 打完去左綠林食個甜品先走。

6. 10/5(六) -- Long week; 一早返白田攪完d野先返澤安; 夜晚在家睇星光執執耀保良, 睇睇下轉台見到衛視播"超級星光大道", 2邊睇, HK歌手完全被人地d參賽者比下去... =.=

7. 11/5(日) -- S生日快樂; 早上想打波, 點知落左場雨無去打, 民仔上左來打機, 點知後尾出太陽...下午出MK睇禮物, 大致上確定左買咩; 之後諗唔到食咩晚餐; 突然叫S出來食飯, 去左荃灣, "飯廳"full左於是食附近o既Olive唔知咩Cafe/Bar, 都幾好食, 睇晒成集和味無窮+大半集獎門人, 之後返企。

8. 12/5(一) -- 公眾假期; hea抖一天, 5點幾出門口同Mak & Friends食晚飯慶祝Mak生日; 去左兆萬15樓o既"五月花"食, 係"港台日"食品放題, 即係三樣野都有d o既任食; d野食都OK啦...價錢就$150島, 唔算好貴, 刺身都有好多, 其餘各樣野都OK, 唔多講了, 中規中矩o既一間野食; 食完有d人散, 有d人話上個friend屋企坐下, 上去坐左個幾鐘就走, 返企。

9. Indiana Jones有廣告了! 呢套野係我地呢d老fans必睇! 到時要去睇呢~~ 就算"福伯"已經咁老, 但都想睇! 期待

10. 病終於叫好晒! 喉嚨好返, 好想唱K呢!

11. 十分碓定自己, 髮線上移...

12. 由於屋企都有好多野想backup, 有時都覺得有個外置harddisk都幾方便, 可以同朋友過data, 又唔貴, 因此想買個。

13. 搭lift見到隔離屋o既小朋友, 唔經唔覺已經好大個了...發覺真係歲月催人呢。

14. 睇星光大道, 真係好正; 之前睇過某台灣清談節目, 請晒成班星光二班上去傾偈, 係節目度大家又會唱下歌講下好多野, 因此對佢地好有印象, 好impressive, 而且個個都好叻, 有唔同character又唱得好好; 睇當日播o既比賽, 佢地雖然比起係清談節目表現得無咁放同無咁正, 但係水準都好高; 而評判都係資深o既音樂人, 而且評得好嚴謹好仔細, 佢地o既評審包括晒技巧、感情、style...各方面等等, 真係好犀利好有見解! 而且睇左都可以知多好多野, 學到好多野呢~~ 另外, 係聽佢地參賽唱歌時, 都試下自己評下佢地有咩好有咩唔好, 有好多位, 好或者唔好o既, 都同d評審員講o既一樣呢~~ 睇來雖然我自己唱就麻麻, 但係眼光都唔錯呢~~ 另, 當日睇"星光執執", 即時相比之下, HK歌手真係好多都好唔掂...人地d參賽者, 最差果個放入來, 都可以排得好前了(而且又唔係醜樣架喎...)

links:

教科書塗鴉, 有d真係好精彩, 真係要睇睇!

http://www2.discuss.com.hk/viewthread.php?tid=6974495&extra=page%3D21

劉林聯婚-今晚擺酒有你; d人真係好有心機整, 慶祝朋友結婚, 改晒歌詞唱晒整埋MTV, 好掂; 好有誠意呢!

http://www.youtube.com/watch?v=rISipIz1iJs

劉林聯婚-開場片1(廣告 full version)

http://www.youtube.com/watch?v=RG9mhbcAVG8&feature=related

張雨生和林志炫-比高音&比低音 -- 2個台灣超勁o既歌手, 鬥高低音, 好勁! 其實各有各擅長o既野呢~ 另外, 旁邊d link有佢地唱o既一d高難度o既歌(或者唱人地o既歌), 都好正!!

http://www.youtube.com/watch?v=ffmzkaD9awg

棒球達人? 個呀伯好勁呢...

http://hk.youtube.com/watch?v=uV6SClrOi0o

壞孩子的天空 之 快餐店阿叔 -- 前排網上有一段有個八婆係美心攪事, 仲要拍片放上網; 好多網上o既人都好大迴響, 鬧到個女人好勁, 呢一段係有個呀叔改左歌詞放上網, 仲自己唱埋, 好抵死。果句"一起出醜卻感覺多好"好正 :P

http://www.youtube.com/watch?v=scO5bhS-Q1w

來緊:

星期三或四同貓MayChan等人食飯

16/5(五) -- 去出名o既東涌酒店食buffet, 慶祝2個朋友生日。

完

失眠隨想

天氣很差, 很不舒服, 睡得不好。
想著很多過去的事, 很多不同的人和事。

人與人之間的關係和信賴實在是很薄弱的。
單方面當然可以很強, 但關係和信賴是雙方的, 單方面強, 一點用處也沒有, 而真正有很強牽絆的, 可能只有血濃於水的親人及青梅竹馬的好朋友。

小時候常常聽說, 最好的朋友一定是從少認識到大的朋友, 通常都是中學同學, 而到了出來社會工作後. 就很難交到好朋友了。
當然, 最熟最死黨的朋友, 起碼對我來說, 一定是中學同學及幾位大學同學; 但我從來也覺得, 出來工作並不一定交不到很好的朋友。
因此, 即使工作多年, 我對新認識的人, 一開始就算不交心, 也一定不會虛偽待人, 儘量地用自己的真心交往, 去交多一些朋友; 相信只要自己付出真心, 就能影響別人。

可是, 現實卻不是這樣。

即使在工作時或一直接觸時多麼熟悉多麼健談多麼像好朋友, 一旦離開了就像很快便不相干, 只像人生的過客;
即使像我一樣, 經常去保持跟人聯絡, 也發覺大部份的人也慢慢的淡出了, 找不到了, 不理我了。
即使在面前是對你笑, 對你很好, 但也不知道對方在背後是怎樣想你, 怎樣在別人面前說你。
雖然我並不是一個硬直得不懂人情世故的人, 但我面對不喜歡/不好的人時, 最多是不跟他笑不談話, 起碼不會假到像一般人那樣笑裡藏刀。
我會對一個人笑會跟一個人談話, 就一定不會是討厭他, 就算有時不知說甚麼或者無甚反應, 只是我狀態很低, 或者一時不知所言罷了。
幸好, 出來工作多年, 起碼現在仍然有出來工作後才認識的朋友, 起碼, 我心中當他們是好朋友。
(不過, 由以前到現在應該有很多很多我當他們是朋友, 他們卻只當我是普通人的人)

人都是負面的動物。
一個人即使如何地做得好, 如何地儘力, 都總有做得不完美的時候。有時環境因素客觀因素很差, 儘起力來做更加未必有好結果。
但人就總會比較容易看到壞的一面。
做得好的, 就只是惹來一點鼓掌, 甚至只是被覺得是"應該的"; 做得不好的, 沒有盡善盡美的, 就會覺得你做得不好, 很不應該了。
跟著很理所當然地假想了很多不好的原因, 去解釋你為何做得不好; 但從來也沒有人去想過, 做得好的地方及不好的地方之間有沒有矛盾, 也沒有人去衡量做得好及壞的地方及把它們去做一做比較; 只是很理所當然地指出不好的東西, 然後就以那些壞的東西去延伸出那人壞的"証據"。
慢慢地, 不信任、猜疑、不滿就會發生; 就算仍然信任對方, 也會有很多怨懟之情出現(如果有其他人推波助瀾, 煽風點火, 三人成虎, 被疑慮者也只有徒然)。
即使能捱得一段時間, 慢慢地總會愈來愈不能忍耐, 最後就爆破, 一段關係從此破裂。
不論是任何一種關係都是如此, 尤其是牽涉金錢及愛情的事情。

卡通片及幻想世界中愛興正義的力量在現實世界中並不是萬能的(當然吧), 現在也已經沒有人去很天真很傻的去相信"真善美"了。
人與人之間的關係, 一開始總是先存在著猜疑及小心, 慢慢才能建立起信任(現實當然是這樣, 相信大家也是的);
而最可悲是那建立起來的信任, 卻又是那麼容易地崩潰(即使在很多小說中, 一些大好人做了一百件大功德事, 卻可因為一點小事就被全世界唾棄);
我當然明白現實就是這樣, 也明白大部份人都是這樣; 可是追求"心靈自由"及與人"心靈交流"的我, 明白, 卻不接受。
極度的心灰意冷, 這些天真的想法, 放棄罷...

只要人與人之間有一點"關係", 就會有期望, "關係"愈密切, 期望就會愈大; 路人, 顧客, 上司, 下屬, 同事, 朋友, 死黨, 愛人, 親人...
自己當然絕對不會變成一個六親不認的人, 親人及朋友對我都十分重要, 不會放棄;
但有時想想, "六親不認"雖然很孤獨, 但在某方面其實是很輕鬆的, 因為一點負擔也沒有, 沒有人對自己有期望, 自己也沒有對任何人有期望(但衡量中間的得失, 當然不言而諭有很大的不同吧)。

要讓自己的身心恢復自由;
一向自己很多東西也看得開;
只要再把這些"現實"看得開, 就能再向更廣闊的天空飛去...(不要誤會我想死吧, 沒可能的, 嘿)

完

執blog大工程完成!!

終於用左好多個鐘o既時間, 執好左個blog; 好耐之前已經想執, 將以前o既文分晒類, 唔分類o既話根本唔會睇返, 而家分左類, 起碼有晒categories, 想睇返邊類野都易睇d, 而且可以幾乎ignore晒d雜記類 XDDD

原來呢幾年來自己都算好有心機, 打左好多野, 不過真係早兩年d野好好多, 就算差都好無聊都好水準低都好, 起碼都有好多類型o既文章同好有心機諗好多野呢~~不經不覺都有四百幾篇野!! 扣除雜記都有二百幾篇呀~~!!

係執o既時間, 都有睇返好多文(其實好多睇返個題目都記得自己寫咩), 有好多講自己睇法同人生觀o既文, 睇返都覺得幾有意義, 起碼都係自己o既見識同經驗而得出o既結論, 而且自己都算係比較正面o既人, 相信我o既意見, 就算唔一定o岩, 起碼都可以比到人正面o既思想呢~~

至於d故事, 就當然見仁見智啦~~ 自己睇返其實真係幾好笑, 尤其係龜兔賽跑系列, 雖然好無聊但係都估唔到當時幾有諗頭, 就算d故事唔好笑, 起碼都可以笑下我呢~~ :P (好多文如果要睇要由底睇返上來呢~~ 因為佢係跟時間排, 愈新就愈係上面o既。)

估唔到o既係, "其他/不能分類"果少量o既幾篇都OK好笑 :P

除左分左好多類型, 仲有幾個categories係特別整出來的: "還OK的"、"我喜愛的故事/文章"。
"還OK的"係一d我覺得都OK的故事、感想、人生觀或者有關自己o既野, 由於未到"精選", 所以2樣混埋一齊。
"我喜愛的故事/文章"就將"故事"同"感想/人生觀"分開左, 而且都係幾篇自己特別喜愛, 或者覺得有道理d感受深d o既文章, 覺得特別值得分享同自己會最想睇返o既文。

總之分完類好有成功感, 亦都希望有助一d有少少興趣睇返我d好d舊文o既朋友去爬返舊文啦~~

完

兒時趣事1

有時諗起好多細個時發生o既趣事, 得閒就記底下先。
當然, 呢d係自己當時好深刻印象或者覺得好笑, 唔代表個個都覺得好笑o既。

1. 由細到大都鐘意食野o既; 雖然唔會好似Lobo咁, 會四圍食, 試好多唔同o既野食, 又唔會好似d食家咁專業, 會品評d野; 但係其實自己都好喜歡食野, 而且真係要食o既時候都會好有要求(我一向o既態度都會將價就貨, 有時食平野或者為餐飽就無咩所謂, 真係食好野或者貴d o既野時就會奄尖d)。所以講一樣有關“食”o既野: 聽呀媽講, 我BB時識講o既第一句話, 居然唔係“爸爸” “媽媽”, 而係福建話o既“食”字 =.= 呢樣野簡直就係一個好大o既藉口比人話我點解食咁多野同肥…(雖然而家細食左好多了~) 不過一個人一生人第一個識講o既字居然係“食”, 真係有夠…唔知呀媽有無記錯呢?

2. 熟我o既人都知我好鐘意貓。不過應該唔多人知道我一生中第一次同貓結緣係點樣o既。話說好細個o既時候有一次暑假, 一家人去上海叔公屋企玩, 當時佢家養左一隻深啡色虎紋家貓; 第一日去到佢屋企, 就見到有隻喵, 第一次近距離接觸貓, 果時o既感覺有d緊張(相信好多動物第一次面對其他生物時都會有呢種感覺), 不過我都唔算怕佢, 仲好有興趣添; 記得果時走埋去逗佢, 仲係度扮喵叫; 不過, 大家勢估唔到, 我第一次逗貓貓o既下場居然係比隻貓“where”我, 亦即係出爪爪我塊面! 當時緊係驚啦, 亦令我果個年紀第一次感受到莫大o既痛恨~ (當然無咁誇張:P) 由於呢一次o既事件, 我亦真係有d討厭果隻貓, 係叔公屋企玩o既期間仲成日整蠱佢, 將佢趕入間房之後又關埋門關住佢, 又成日拉佢條尾(呢樣野應該我叔公家人同我家人都好記得), 到臨走我仲成日形住佢條尾比我拉拉下拉長左添~ 隻貓貓仲有同我地影相, 張相仲係度添~ (睇返其實好可愛 :D) 估唔到到左而家, 我好鐘意貓貓, 而且我o既favourite貓款係深啡色虎紋家貓呢~~

3. 同樣都係一件發生係上海o既事; 記得有一次唔知係家中無水定點樣, 我家同叔公一家人要去公共澡堂沖涼(係一生人第一亦係唯一一次); 話說果時年紀仲好細(應該係3歲左右), 成日話要跟住呀媽, 而且三歲都仲要人幫我沖涼, 因此, 我就被帶到男人o既天堂 – 女子澡堂果邊!! 咁細個, 當然唔會有d咩色情o既諗法啦~~ 不過由於好少有呢d機會, 所以印象都好深刻呢~ 印象中, 澡堂中有好多女性係度沖涼, 而且都係白雪雪, 而且唔知係咪比較北方, d身材都好勁下…唔…唔…唔…不過, 大過左o既我, 如果問我最喜歡欣賞o既女性部位, 絕對會答你係“腳”。人人都話男人年紀輕會鐘意睇面, 慢慢大左就會向下移睇胸, 再大d就睇腳; 但係我由以前開始已經係答人“腳”的…當然, 身為男人, 有得睇應該係樣樣都鐘意睇o既, 只不過講緊“最喜歡欣賞部位”姐~ :P 另外, 反正講開呢d野, 又再講多d: 我又反而唔係好喜歡“絲襪長腿”喎, 對絲襪呢樣野又無咩特別癖好~ :P 嘿嘿。

4. 頭先講起貓, 不得不提另一種同我好大關係o既動物 – 蟑螂。又係熟我o既人都知道, 我係極極極度害怕曱甴o既, 仲要係好誇張果種, 比起女仔見到時o既害怕更害怕!! 相信係我識o既人入面, 都無我咁驚! 無錯, 一個大男人怕曱甴好似好羞家, 但係我從來都唔會隱瞞呢樣野, 驚就係驚呀嘛!! 係我眼中簡直就係世上最最最醜惡o既生物!! 我反而唔係好驚其他蛇蟲鼠蟻(証明我唔係膽細, 只係驚呢一種生物), 好多時近距離見到老鼠都無咩野, 就只係驚曱甴, 如果有人專登拿呢樣野來同我玩, 我係真係會反面o既, 大家千祁咪拿呢樣野來同我玩呀! 究竟我有幾驚? 好難講到出來, 我儘量形容下啦; 係街上見到, 我係一定會運路走, 仲要兜到無雷公咁遠來行, 如果見到會行果d(唔好話會飛, 會飛果d我一定會以100米9秒9極速逃走), 我都會即時心跳大動作一彈彈開; 而厭惡o既程度, 係食飯時見到間餐廳有佢躝過, 都即時會疑神疑鬼, 四圍望同埋留意佢o既動向, 成餐都食得唔安落仲要愈快走愈好; 另外, 即使係書上o既圖片, 或者隔住一層玻璃, 知道一定唔會直接掂到, 我都係唔會去摸落去; 更加唔敢執佢o既死屍, 就算知佢死左, 再加上幾十層報紙加手套, 我都唔敢執的。有佢經過過o既地方或者躝過o既野, 我都係唔會掂或者行o既; 係咪幾誇張呢~

講左咁耐, 都未講到有關“兒時”o既事; 我同曱甴o既結緣, 要追溯到我BB歲幾兩歲o既時候; 記得果時自己應該識識地講野, 記憶仲好模糊, 而且仲係困係BB床無得走o既時候; 話說係BB床上無野做, 又走唔甩, 突然呀哥指住張床話“有曱甴呀”, 仲大為緊張好驚咁。對一個入世未深, 咩都唔知o既人來講, 面對住一樣未知o既生物, 緊係即時好驚啦!! 當時有幾個原因令我驚o既: 1. 呀哥好大反應好緊張(見到自己o既長輩咁緊張, 其實真係有影響的, 因為生物係會係長輩身上學習, 見到佢地驚, 自己緊係驚啦); 2. 唔知係咩生物(面對未知生物, 一定係淆底先o既) 3. 最慘係我係床度, 轉來轉去都見唔到佢(直至事件完結都無見過) (面對未知o既生物, 仲要連樣都見唔到o既神秘生物, 更驚) 4. 我係BB床度係無得走o既(困獸鬥, 當你被逼同你怕o既野關係一個地方無得走, 仲更驚(大家睇好多驚慄片或者喪屍片殺人片, 好多時驚都係因為係一個逃唔出o既地方比人/野追殺)。因為呢4個原因(係我由細到大諗出來, 分析過事件經過同人o既心理而得出o既結論!), 我係好驚好驚曱甴o既。之後都有幾件事值得一提: 係上幼稚園年紀o既時候, 有次企左係房門口, 係門框上有隻大曱甴(大家諗諗一個人企係門口, 同門框上o既野係幾近!), 由於屋企門同門框都係啡色, 一開始無留意到, 到我突然發現時好近, 隻衰野仲要無啦啦起飛!! 我當時嚇到即刻衝入房同大喊添!! 仲有好多次, 我係以前住果度(由出世到讀Year 1都係住北角舊樓)有好多曱甴的, 佢地平時都會躲埋, 但係夜晚就當然會走出來啦, 發生過好多次, 晚上醒左要去痾夜尿時, 開燈發覺(唔開燈係全黑咩都睇唔到o既)有隻大野係我隻手同燈制o既旁邊, 或者係係我企果個位o既牆旁邊, 真係嚇死人。亦都因此, 我練就出“曱甴探測器”o既本領。同我熟d的朋友都知, 我係街度行, 即使係係好暗o既環境(當然唔係黑晒o既地方啦), 係好刁鑽o既地方, 如果有曱甴我都會感覺到, 可能我對黑色o既移動或者待機物體好敏感o既關係, 而平時自己行路做野都慣左四圍望, 一眼關七(擺明係”目及”女 :P), 因此成日都發現人地見唔到o既曱甴呢, 如非狀態好低或者好專心咁做緊第2d野, 通常“曱甴探測器”都好勁的!!

太多兒時o既事可以講, 打左咁多, 未必有人有心機睇晒啦, 分開留返下次2345或者再多d先再講啦~~ 下次會講下有關“鬼”o既野。

完

五月四日 -- 五四詳盡雜記

1. 今次雜記唔係一日寫晒, 係之前有時間或有心情精神時就寫定果日做過d咩, 因此比較詳細dd, 唔會星期頭果d就唔記得晒而好短呢~ :P

2. 28/4(一) -- Carmen生日快樂。收工唱K。由於仲病緊o既關係, 個喉嚨仍然唔舒服, 基本上係唔適合唱歌的...大家都幾耐無見, 呀Man把聲仍然好聽; 不過呀Man又係典型天才型水皮座, 有d好叻或者好好o既野, 但係唔一定好有心機去做/練好佢, 佢把聲好聽唱歌亦都好好, 不過始終未必係最喜歡o既興趣, 因此少練同埋隨自己心情而唱或者有d求其(典型水皮座, 極度情緒同埋睇心情做野:P), 所以會有瑕疵呢~~雖然同我識o既唱得最好o既人仲未夠level, 不過把聲真係好聽~~

3. 29/4(二) -- 好耐無試過咁耐都病未好返...今日lunch第一次Spenser同凱琪去跑步, 希望佢地keep到成日去跑啦~ 自己都同佢地去左果度, 不過自己就練射波, 個場無咩人, 真係練波o既好地方, 可以慢慢adjust返自己o既手勢同手感; 收工同Lobo等人食飯, Lobo帶路當然就食佢推介o既野啦; 點知一開頭諗住去果度原來個4人set無做, 於是轉去另一間都係Lobo推介都係中菜o既地方。d野都OK好食, 不過個size就幾細, 而且唔係樣樣好食。個魚翅就好食, 唔係平時果種做法, 係用雞湯燉o既, 有好重o既雞味, 幾好食, 個文昌雞都唔錯; 魚就普普通通, 不過個龍蝦真係好細隻, 個菜直情唔係好好食...由於d野食唔係全部都好食, 加上每位差唔多$140都唔係平, 因此覺得overall普通而已, 過幾條街o既金源會好d呢~ 之後去左另一間野食甜品, 個綠茶布甸幾好食, size又係唔大仲要$20, 都係金源會開心d :P

4. 30/4(三) -- 病未好, 收工返企。晚上終於爆左忍者龍劍傳o既"超忍道"(即係最難o既level)(第二日仲儲齊晒所有木札), yeah! 相信唔係好多人有心機同能力做到呢! 係master左個game, 唔係finish而已~

5. 1/5(四) -- 五一勞動節假期, 由於之前果晚夜訓關係, 是日頭痛。在家hea抖一天。

6. 2/5(五) -- 雖然白田HO book左場, 但係由於佢唔得閒o既關係, 所以佢唔去兼無得幫我地拿場; 不過我地就照拿場紙入去打, 搏一搏成功左; 同SpenserCatherine打, Carol到時都差唔多打完; 7點鐘完場之後約左ConnieMartin係ssp一齊食飯同一齊打機; 6個人打Mario Kart打左3個幾鐘, 幾爽!! 好耐無試過咁多人一齊打啦~~ 好開心~~~ 係食飯地方打到9點幾, 再轉場到M記打到11點半島一齊走。

7. 3/5(六) -- 在家hea一天, 極悶。晚上剪左髮, 睇左大半勁歌季選(都係自己叫返季選, 叫咩第一季優秀選呀, 怪到死); 由12首歌增至14首... =.=。

8. 4/5(日) -- 由於星期六在家hea爆左, 星期日一早起身諗住打波又訓著左無去打, 頹爆。到下午居然msn都無咩熟朋友出現。3點幾同C行九龍灣, 行得少反而係M記打機好耐, 係UNIQLO仲撞到呀馬添; 晚上返企睇獎門人。


9. 星期二返企途中, 出左TKOMTR之後行緊返去時突然聞到陣臭味, 四圍望之下見有個年紀大的呀叔(即係又未到呀伯)企左係度, 我望落去見佢褲管同鞋上都有屎屎, 但係鞋底又無喎! 佢應該係...實在太可怕啦~~

10. 幾鐘意睇勁歌呢類節目; 主要o既原因當然係有得睇人唱Live啦~~ 星期六晚睇完, 仍然都係覺得, HK樂壇實在係笑死人...連一向唔唱歌o既主持崔建邦, 都唱得好過某d歌手...真係死得...唱歌唔係只係o岩音唔走就叫OK, 唱現場唔錯得只係基本, 發聲o既方法, 感情, 仲有出音收音有無瑕疵等等, 都有好大o既分別, 計埋晒呢d, 真係無邊幾個係叫"OK", 就算唱得較好o既Joey都有d位差dd(雖然佢o既歌係難唱過第2d人), 最好始終都係Eason, 克勤唱就無問題但係仍然係0感情, Joey同泳兒都好, 關心研叫OK, 何韻詩普通, 方力申叫係唔錯, 陳柏宇反而係一向都唱得OKo既, 其餘陳小春周柏豪Stephy果堆真係好垃圾...盧冠廷出返來, 佢演繹方法一向都係怪怪地, 佢唱就一定係唱得唔錯, 但係鐘唔鐘意就好主觀啦~ 個外國小朋友, 6-7歲就可以唱到咁, 好厲害呢~~

11. 發現左一樣野: 細個成日生飛滋, 大個d出來做野有時去街食飯或者自己煮野食就唔會(lunch帶屋企o既飯都唔會), 一連續多幾日返企食飯就好似又生, 究竟有無關係呢??

來緊:
5/5(一) -- 約左屋企人去灣仔金源食飯; 好難得一家人去街食飯呢。
9/5(五) -- 白田羽毛球活動? 未confirm。有一日約Carmen食飯

Links:

談戀愛必算的數學題 -- 睇到我頭大, 不過幾得意, 推介大家睇睇呢。
http://blog.pixnet.net/ironsnow/post/12591521

賭俠1999張家輝片段 -- 當年佢其中一套好好笑o既戲, 一路都覺得, 佢做配角真係好好, 好適合做一個好好o既配角/第二男主角, 但係擔正就始終爭d...同胡杏兒一樣。
http://hk.youtube.com/watch?v=LJSeEkmyJaU

有趣的招牌 -- 有d幾得意。
http://www.wretch.cc/blog/cwwany&article_id=16655078

完

四月二十七日 -- 剛果驚魂-->生化危機

1. 21/4(一) -- 開始係白田執野搬野上澤安; d櫃同台仲有好多雜物都好重呀...諗起果時由龍翔搬野去白田都係2個人, 累死了...收工返企。

2. 22/4(二) -- 繼續搬野大業; 好好累, 手都軟; 收工再返企。

3. 23/4(三) -- 係白田o既last day; 都有d唔捨得o既感覺o既; 係白田o岩o岩好一年(多幾日而已), 呢一年穴係發生左好多野...實在係好多...不過都過左去了, 返唔到轉頭的了, 都有好有唔好o既; 期待下條村同往後o既路啦! 收工都係無約, 但係連續返企又唔想, 於是收工臨時決定去葵芳行街, 諗住完村買個模型獎勵下自己; 點知行完發覺無野o岩買...是晚開始喉嚨好痛, 痛得好犀利...唔知係咪搬左3日野, 個人累所以抵抗力差左呢?

4.24/4(四) -- 病, 好唔舒服o既一天, 夜晚喉嚨痛早上起身好少少, 但係鼻水鼻涕就好犀利, 個人成身都好累同軟弱無力, 個人都無咩反應, 如果唔係開村第一日, 我會請病假...夾硬返工o既後果, 就係病得更嚴重...當日拜神, 拜完食完野基本上個人都無咩反應, 幾乎係坐到收工就返企, 醫生都無睇, 食完飯沖完涼8點半訓左, 諗住第日會好d...是晚本來約左ConnieMartinCarol等人打網球, 不過爽約返左企了...

5. 25/4(五) -- 本來諗住訓成晚起身會好d, 點知唔掂, 請左病假...成日在家hea抖一天; 晚上又爽左約Lands舊同事o既飯局...嗚嗚嗚...

6. 26/4(六) -- Long Week; 由於廢事請咁多病假, 於是未好返都照返工; 好彩當日工作量唔多; 一來返左澤安拿PDA先(因為星期五無返, 無拿到...), 拿完落白田收貨, 收完貨中午係下面食埋飯先返上澤安; 由於未好返, 收工返企...

7. 27/4(日) -- 咳同喉嚨痛痛地始終未清, 但係個身體叫係無咁軟手軟腳; 難得天氣好好, 而且好耐無打波, 於是去打波!! 今天打得反而幾好, 各方面都打得幾好, 射波亦準。打完食埋飯陪呀馬行左陣傢俬就返企。

8. 開村以來都黑仔? 第一日就病, 第二日請埋病假, 第三日未病好得來係公司仲界親手指, 都幾深仲流左唔少血...唔通澤安不利我? 明明條村感覺係幾好的...

9. 呢排都有開工砌野...KO左一d唔使/唔想加工o既模, 慢慢減少庫存都係一件好事呢~~

10. 仍然有睇o既漫畫仍然好睇。就算有d人話搵笨都好, 都係好睇 :D

11. 六月o既BB三國傳 -- 關平, 超型!! 可能買多一隻!!

12. 之前明明諗到好多野想打, 又唔記得晒, 算。

來緊:
28/4(一) -- 同ManPuzzleWingSpenser俠士凱琪K, confirmed; 我個喉嚨都唔知唱唔唱到...
29/4(二) -- 同LoboWilliam民食飯
1/5(四) -- 公眾假期
2/5(五) -- 好耐無打o既羽毛球!!同白田o既HO等人打~~
3/5(六) -- short week
16/5(五) -- 同死黨們去東涌食buffet慶祝呀Sam同S生日
未約到貓MayChan等人食飯

完

四月二十日 -- 雜記

1. 14/4(一) -- 收工本來返企, 收到電話奇趣有有平模, 去到係有,不過d野唔o岩...15/4(二) -- 同話劇同學去灣仔金源Gathering, 民AlbertAddisonCrstalFrederick; 燒雞好味, d甜品正呀~ 尤其係榴槤慕絲; 而家係內地開廠真係好難做呢...希望Albert加油啦! 16/4(三) -- 同ConnieMartinCarolAlvin係TKO打羽毛球, book一個鐘only, 當日精神狀態好低, 打完無同佢地食飯就返左企, 好早沖完涼就訓左... 17/4(四) -- 收工後留係公司4個人打機, 之後食飯返; 18/4(五) -- 同民Joelle等人K, 班人實在...好攪笑, 睇來第日都係少同佢地唱為妙~唱到1點島走先, 佢地晏d先走; 19/4(六) -- 突然打風落雨, 在家一天; 20/4(日) -- 估唔到天氣咁好, 不過無打波, 一早起身睇NBA Playoff Round 1 Game 1: Utah @ Houston! 民仔來左一齊睇, 之後基本上都係成日係企hea。

2. 古龍小說, 睇晒七種武器系列, 陸小鳳都就來睇完; 佢寫o既風格同金庸真係好唔同; 好多時都好有電影片段feel(佢亦都有小說其實係一寫就係拍片o既), 而且內容豪邁奔放好多, 主角們通常都係一來就已經武功高強, 比較少講成長o既野(因為篇幅較短); 佢寫o既野好講"意境", 好多時都寫到d人同武功o既意境好高, 好精彩; 不過佢寫咁多小說, 質素真係好參差...好睇起來可以好好睇, 差起來都幾唔好睇呢。而佢o既小說中, 無論係情節定係人物, 同佢o既人一樣, 都係好喜歡酒, 同埋都係以"俠氣"為本, 而且都係喜歡女人(而女人亦會好喜歡佢地而痴埋來), 古龍書中o既"真男人"同金庸o既好唔同, 不過的而且確比起金庸o既角色有氣概。比較唔鐘意o既有幾樣野: 由於佢o既小說故事通常都係懸疑故事, 所以好多時都係一路唔知發生咩事, 而慢慢解開迷題, 不過好多時都太濫地懷疑一個角色, 原來唔係佢, 原來又係深一層, 係另一個人, 點知原來又唔係...一路落去, 個個都懷疑過, 最終原來又係某某人咁, 其實有少少無聊同埋佢講晒o既...另一樣唔鐘意亦牽涉到呢樣野o既, 就係入面d好人當然就一定係好人, 奸o既(或者睇落去以為好, 其實係奸果d), 會出賣自己友, 跟住原來佢係卧底, 點知又再再出賣返另一邊, 跟住點知又有另外d人又出賣返佢...又係一路落去, 亂晒龍...頭先講果2樣野加埋, 真係好亂...up晒...

3. 星期五早上親身上左澤安, 一上到去咩都未見, 直覺感覺覺得好唔錯o既地方; 其實環境真係好靜又大風, 幾舒服, 只不過係唔方便左d...而且一間食肆都無...好彩都有一間華潤超市...有球場, 似乎之後o既lunch無機打, 都係會自己練下波呢。

4. 徵求topic一個。

5. NBA playoff開始, 打完又完一季了...今年真係不知鹿死誰手...不過完左又有幾個月時間少左樣娛樂了。

6. 諗唔到有咩講, 係咁。

來緊:
28/4(一) -- 同ManPuzzleWingSpenser俠士凱琪K, confirmed
16/5(五) -- 同死黨們去東涌食buffet慶祝呀Sam同S生日
未約到貓MayChan等人食飯
呢個星期會有一日閒日同Lands舊同事(另一堆)食飯, 未firm
下星期會同民LoboWilliam食飯

完

維修怪談之吉房奇遇

原本呢段無謂野好耐之前已經諗左(因為某d野係真係發生左係我身上的XDD), 但係一路都無寫, 而家終於都寫完。之前post左係呀sir個blog, 不過post左幾日, 諗諗下覺得太無聊, 於是修改左少少之後係度post返, 做返一個好無聊o既鬼故 :P
另外, 吉房, 即"空置單位"也。

**********

某大機構轄下掌管大量物業, 因此聘請了大量人士以作管理維修事宜(以下簡稱"大便", 乃"予人極大方便"之簡寫也)。話說由某一段時間開始, 大批的大便開始離職, 人心惶惶, 逃亡潮持續不斷。有人估計, 大便們隨著不斷工作之中, 發現自己的辛勞並無合理回報, 而另一大機構又掀起了挖角行動, 才出現了所謂"逃亡潮", 其實不然。

此大機構(以下簡稱H公司(或者HD), H for Happy, 因機構內有大量快樂的冗員也)轄下之物業, 大部份都經過時日的洗禮, 當中有不少日久失修, 而最重要的, 乃是這麼多年來, 總有不少人在這些物業中因各種原因"仙去", 因此也發生了很多"怪事"。以下就是其中一則行內流傳的"事情"。

話說某個天陰寒冷之日, 某大便要進行已作預約的入屋堪察, 於是在指定時間在某座頂樓該單位前等候工程聯絡員(簡稱"鑊高", 諧音也)及工程技術員(簡稱"廢達", 亦諧音也)*, 等了一段時間, 但見已經過了約定的時間仍然未到。為了不致失約, 唯有硬著頭皮, 自己先敲門, 作出檢查, 待同事們到達之後才補回其他工夫。

敲了好幾下, 沒有人應門; 由於該單位處於垃圾房旁, 該大便忍著臭味, 忍住頂樓機房的嘈雜及頂樓的陰暗, 繼續敲門。到了幾乎想放棄的時候, 大門"呀"的一聲打開, 一個面貌呆滯的老婆婆從門後伸出了頭, 問: "什麼事呀?" 大便解釋了自己的來意, 該老婆婆打量了他一下, 就開了門及鐵閘, 讓他入屋檢查。

大便不厭其煩而詳細的把檢查及維修的內容解釋了一次, 便開始了檢查。他有點納悶 "怎麼這單位內的陳設這麼舊? 而且像這麼空蕩蕩, 卻又好像比外面暗? 不過倒是沒什麼需要維修的地方..." 那老婆子也不跟他說話, 只自顧自的打掃, 大便也怕了這冷場, 但由於氣氛奇異, 也不知如何說些話來打破沉默, 於是唯有硬著頭皮快些檢查完便走。

檢查得好一會, 大致完成之後, 回到大廳正想向那老婆子解釋檢查的詳情, 突然發覺原來在露台中的洗衣機後, 有一個人一直蹲在後面, 一聲不響瞪大了眼看著他!! 大便自入屋以來一直沒有留意到那人, 即使檢查露台時也留意不到, 自問一向一眼關七耳聽八方的他不禁心中打了一個大突!! 不過檢查也已到了尾聲, 當然要完成整個程序; 他硬著頭皮向沒怎麼理他的老婆子解釋了檢查結果, 把該說的"台詞"都說了後, 就道謝一聲離開, 那洗衣機後的男子一直只是一聲不響地瞪著他; 就在他踏出了該單位後, 他突然發現原來廳中一直另有一人躺在椅上!! 他竟然也沒有留意到!!

他趕緊離開了該處, 正自奇怪鑊高與廢達仍未到達時, 電話突然響起。
"喂, 大便, appointment約左10點係十座XXX室等, 你做咩仲未見人o既?" (為了原汁原味, 口語得以保留, 原諒則個)
"下? 我頭先已經行左啦喎, 你地都仲未見人o既??"
"點會呀, 我地係間野門口等左你好耐啦噃!"
"下...等我睇睇先...咦! 原來我去錯左9座, 入錯左房口呀~~!"
"你快d來啦, 個住客開埋門等你來架啦~~!""好好好!"

大便原來去錯了地方, 他順便打電話去客戶服務主任查詢有關去錯了的九座單位, 該主任一查之下, 發覺...
"你頭先行果間, 應該係吉房來架噃!!"
"咩話?! 無理由架, 明明有人開左門, 我入去睇埋添架噃!!"
"唔係喎, 我見個record真係vacant flat來架噃, 你有無記錯呀~~"
"下..."

事後, 幾位同事一起再上去該大便"檢查"的單位查探, 發現真是一間空置單位, 而且聽知情人事說, 還有一些傳聞...該大便在事後也病倒了好一段時間...此後亦不時生病, 常取病假...
此事於大便界不脛而走, 慢慢傳遍了整間公司; 這只是第一次發生事情, 不過是滄海一粟, 之後在不同物業不斷再有類似情況發生, 因此才出現了所謂的轉工潮也。

完

文中所言有超過一半乃係創作, 如有雷同, 實屬巧合

*注 -- 此兩簡稱乃H公司某C級管理人員所擬, 意境之高, 非本人所能想像也。

完

四月十三日 -- 雜記

1. 每逢星期日, 我多左個會問自己o既問題: 我上星期做過d咩呀? 每星期o既閒日又懶無記低自己做過d咩, 次次都係星期日用個腦load返, 實在係麻煩呢。

2. 經過左大半年o既時間, 幾乎只係寫雜記, 自己都覺得自己個blog頹到爆; 雖然, 寫下感想寫下無聊故事都係低水準之作, 但係都總比只係有雜記多姿多采d; 不過, 我應該會開始寫返下d無聊野, 希望唔會出現只係有雜記o既情況。

3. 都係唔係好記得...儘記先: 7/4(一)返屋企; 8/4(二)心血來潮, 同Catherine去左新浦崗食大盛, 唔知點解埋單一人派左一張VIP card正~~9/4(三)返企; 10/4(四)約返好耐無見的Lands同事出來食飯: 八婆, 八婆老公(八公?), Maggie, Gordon, 呀B, Esther七個人, 係荃灣o既南翔小籠包食; 好耐無見八婆了!! 佢大左肚幾個月之後都未見過, 而家佢個B都2個幾月了, 睇左好多B相呢~ 好得意。11/4(五)極累收工後返企; 12/4(六)longweek收工去左葵芳睇玩具; 13/4(日)落雨無波打, 全日係企。

4. 白田村已經完結, 剩低o既時間就係等d工程完埋, 四月尾完村上澤安 -- 一個鳥不生蛋o既地方; 聽聞果度極度平靜, 都係一件好事...不過靜到連唯一一間食肆都執埋, 又有點兒那個...我同同事講笑形容: 果度變左bio-hazard都可能無人知 :P

5. 近兩星期爆左好多NDS game, 仲要係唔同類型o既game: Dungeon Explorer, 爆走貨櫃車, 忍者龍劍傳, 熱血躲避球, 不過一次過玩得太快, 又好似無咩game玩了...

6. 金庸小說返睇中, 但係唔係成日可以連續借到, 於是係中間o既時間借左古龍o既; 好細o既時候都有睇過, 但係已經完全唔記得, 所以幾乎可以話自己係未睇過(因為已經無咩印象了); 古龍小說好多都比金庸短好多, 而且風格好唔同, 另有一番風味, 不過質素比較參差, 好睇起來可以好好睇, 差起來又真係幾差。等我繼續慢慢睇返啦。而家睇緊七種武器系列。

7. 好耐無寫下故仔, 不如大家俾個題目我呀? 唔係俾題材, 而係俾一個"題目", 內容同方向果d就完全我自己諗, 唔該晒。

8. 某死黨係網誌中呼籲有睇佢blog的人留個言俾佢; 我以前都好似有做過類似o既野呢, 嘿嘿。不如我又係度呼籲下有睇o既人留個言啦(不過我估雜記應該無咩人睇, 更加未必會睇到呢度 XDD
9. 好多朋友又開始轉工, 而且都轉得好唔錯呢; 加油呀。

來緊:
15/4(二) -- 同話劇同學Gathering, 去灣仔金源, 好期待再食個燒雞同d甜品!!
16/4(三) -- 同ConnieMartinCarol係TKO打羽毛球, 係要開始打返熟習下了, 5月開始每星期同馮生打返!
20/4(日) -- 同Lands同事GordonEricaWendy食飯? 未firm
28/4(一) -- 同ManPuzzleWingSpenser俠士凱琪K, ok firm
16/5(五) -- 同死黨們去東涌食buffet慶祝呀Sam同S生日
未約到貓MayChan等人食飯
未約死黨們同Joelle等人唱K

完