四月二十七日 -- 剛果驚魂-->生化危機

1. 21/4(一) -- 開始係白田執野搬野上澤安; d櫃同台仲有好多雜物都好重呀...諗起果時由龍翔搬野去白田都係2個人, 累死了...收工返企。

2. 22/4(二) -- 繼續搬野大業; 好好累, 手都軟; 收工再返企。

3. 23/4(三) -- 係白田o既last day; 都有d唔捨得o既感覺o既; 係白田o岩o岩好一年(多幾日而已), 呢一年穴係發生左好多野...實在係好多...不過都過左去了, 返唔到轉頭的了, 都有好有唔好o既; 期待下條村同往後o既路啦! 收工都係無約, 但係連續返企又唔想, 於是收工臨時決定去葵芳行街, 諗住完村買個模型獎勵下自己; 點知行完發覺無野o岩買...是晚開始喉嚨好痛, 痛得好犀利...唔知係咪搬左3日野, 個人累所以抵抗力差左呢?

4.24/4(四) -- 病, 好唔舒服o既一天, 夜晚喉嚨痛早上起身好少少, 但係鼻水鼻涕就好犀利, 個人成身都好累同軟弱無力, 個人都無咩反應, 如果唔係開村第一日, 我會請病假...夾硬返工o既後果, 就係病得更嚴重...當日拜神, 拜完食完野基本上個人都無咩反應, 幾乎係坐到收工就返企, 醫生都無睇, 食完飯沖完涼8點半訓左, 諗住第日會好d...是晚本來約左ConnieMartinCarol等人打網球, 不過爽約返左企了...

5. 25/4(五) -- 本來諗住訓成晚起身會好d, 點知唔掂, 請左病假...成日在家hea抖一天; 晚上又爽左約Lands舊同事o既飯局...嗚嗚嗚...

6. 26/4(六) -- Long Week; 由於廢事請咁多病假, 於是未好返都照返工; 好彩當日工作量唔多; 一來返左澤安拿PDA先(因為星期五無返, 無拿到...), 拿完落白田收貨, 收完貨中午係下面食埋飯先返上澤安; 由於未好返, 收工返企...

7. 27/4(日) -- 咳同喉嚨痛痛地始終未清, 但係個身體叫係無咁軟手軟腳; 難得天氣好好, 而且好耐無打波, 於是去打波!! 今天打得反而幾好, 各方面都打得幾好, 射波亦準。打完食埋飯陪呀馬行左陣傢俬就返企。

8. 開村以來都黑仔? 第一日就病, 第二日請埋病假, 第三日未病好得來係公司仲界親手指, 都幾深仲流左唔少血...唔通澤安不利我? 明明條村感覺係幾好的...

9. 呢排都有開工砌野...KO左一d唔使/唔想加工o既模, 慢慢減少庫存都係一件好事呢~~

10. 仍然有睇o既漫畫仍然好睇。就算有d人話搵笨都好, 都係好睇 :D

11. 六月o既BB三國傳 -- 關平, 超型!! 可能買多一隻!!

12. 之前明明諗到好多野想打, 又唔記得晒, 算。

來緊:
28/4(一) -- 同ManPuzzleWingSpenser俠士凱琪K, confirmed; 我個喉嚨都唔知唱唔唱到...
29/4(二) -- 同LoboWilliam民食飯
1/5(四) -- 公眾假期
2/5(五) -- 好耐無打o既羽毛球!!同白田o既HO等人打~~
3/5(六) -- short week
16/5(五) -- 同死黨們去東涌食buffet慶祝呀Sam同S生日
未約到貓MayChan等人食飯

完

四月二十日 -- 雜記

1. 14/4(一) -- 收工本來返企, 收到電話奇趣有有平模, 去到係有,不過d野唔o岩...15/4(二) -- 同話劇同學去灣仔金源Gathering, 民AlbertAddisonCrstalFrederick; 燒雞好味, d甜品正呀~ 尤其係榴槤慕絲; 而家係內地開廠真係好難做呢...希望Albert加油啦! 16/4(三) -- 同ConnieMartinCarolAlvin係TKO打羽毛球, book一個鐘only, 當日精神狀態好低, 打完無同佢地食飯就返左企, 好早沖完涼就訓左... 17/4(四) -- 收工後留係公司4個人打機, 之後食飯返; 18/4(五) -- 同民Joelle等人K, 班人實在...好攪笑, 睇來第日都係少同佢地唱為妙~唱到1點島走先, 佢地晏d先走; 19/4(六) -- 突然打風落雨, 在家一天; 20/4(日) -- 估唔到天氣咁好, 不過無打波, 一早起身睇NBA Playoff Round 1 Game 1: Utah @ Houston! 民仔來左一齊睇, 之後基本上都係成日係企hea。

2. 古龍小說, 睇晒七種武器系列, 陸小鳳都就來睇完; 佢寫o既風格同金庸真係好唔同; 好多時都好有電影片段feel(佢亦都有小說其實係一寫就係拍片o既), 而且內容豪邁奔放好多, 主角們通常都係一來就已經武功高強, 比較少講成長o既野(因為篇幅較短); 佢寫o既野好講"意境", 好多時都寫到d人同武功o既意境好高, 好精彩; 不過佢寫咁多小說, 質素真係好參差...好睇起來可以好好睇, 差起來都幾唔好睇呢。而佢o既小說中, 無論係情節定係人物, 同佢o既人一樣, 都係好喜歡酒, 同埋都係以"俠氣"為本, 而且都係喜歡女人(而女人亦會好喜歡佢地而痴埋來), 古龍書中o既"真男人"同金庸o既好唔同, 不過的而且確比起金庸o既角色有氣概。比較唔鐘意o既有幾樣野: 由於佢o既小說故事通常都係懸疑故事, 所以好多時都係一路唔知發生咩事, 而慢慢解開迷題, 不過好多時都太濫地懷疑一個角色, 原來唔係佢, 原來又係深一層, 係另一個人, 點知原來又唔係...一路落去, 個個都懷疑過, 最終原來又係某某人咁, 其實有少少無聊同埋佢講晒o既...另一樣唔鐘意亦牽涉到呢樣野o既, 就係入面d好人當然就一定係好人, 奸o既(或者睇落去以為好, 其實係奸果d), 會出賣自己友, 跟住原來佢係卧底, 點知又再再出賣返另一邊, 跟住點知又有另外d人又出賣返佢...又係一路落去, 亂晒龍...頭先講果2樣野加埋, 真係好亂...up晒...

3. 星期五早上親身上左澤安, 一上到去咩都未見, 直覺感覺覺得好唔錯o既地方; 其實環境真係好靜又大風, 幾舒服, 只不過係唔方便左d...而且一間食肆都無...好彩都有一間華潤超市...有球場, 似乎之後o既lunch無機打, 都係會自己練下波呢。

4. 徵求topic一個。

5. NBA playoff開始, 打完又完一季了...今年真係不知鹿死誰手...不過完左又有幾個月時間少左樣娛樂了。

6. 諗唔到有咩講, 係咁。

來緊:
28/4(一) -- 同ManPuzzleWingSpenser俠士凱琪K, confirmed
16/5(五) -- 同死黨們去東涌食buffet慶祝呀Sam同S生日
未約到貓MayChan等人食飯
呢個星期會有一日閒日同Lands舊同事(另一堆)食飯, 未firm
下星期會同民LoboWilliam食飯

完

維修怪談之吉房奇遇

原本呢段無謂野好耐之前已經諗左(因為某d野係真係發生左係我身上的XDD), 但係一路都無寫, 而家終於都寫完。之前post左係呀sir個blog, 不過post左幾日, 諗諗下覺得太無聊, 於是修改左少少之後係度post返, 做返一個好無聊o既鬼故 :P
另外, 吉房, 即"空置單位"也。

**********

某大機構轄下掌管大量物業, 因此聘請了大量人士以作管理維修事宜(以下簡稱"大便", 乃"予人極大方便"之簡寫也)。話說由某一段時間開始, 大批的大便開始離職, 人心惶惶, 逃亡潮持續不斷。有人估計, 大便們隨著不斷工作之中, 發現自己的辛勞並無合理回報, 而另一大機構又掀起了挖角行動, 才出現了所謂"逃亡潮", 其實不然。

此大機構(以下簡稱H公司(或者HD), H for Happy, 因機構內有大量快樂的冗員也)轄下之物業, 大部份都經過時日的洗禮, 當中有不少日久失修, 而最重要的, 乃是這麼多年來, 總有不少人在這些物業中因各種原因"仙去", 因此也發生了很多"怪事"。以下就是其中一則行內流傳的"事情"。

話說某個天陰寒冷之日, 某大便要進行已作預約的入屋堪察, 於是在指定時間在某座頂樓該單位前等候工程聯絡員(簡稱"鑊高", 諧音也)及工程技術員(簡稱"廢達", 亦諧音也)*, 等了一段時間, 但見已經過了約定的時間仍然未到。為了不致失約, 唯有硬著頭皮, 自己先敲門, 作出檢查, 待同事們到達之後才補回其他工夫。

敲了好幾下, 沒有人應門; 由於該單位處於垃圾房旁, 該大便忍著臭味, 忍住頂樓機房的嘈雜及頂樓的陰暗, 繼續敲門。到了幾乎想放棄的時候, 大門"呀"的一聲打開, 一個面貌呆滯的老婆婆從門後伸出了頭, 問: "什麼事呀?" 大便解釋了自己的來意, 該老婆婆打量了他一下, 就開了門及鐵閘, 讓他入屋檢查。

大便不厭其煩而詳細的把檢查及維修的內容解釋了一次, 便開始了檢查。他有點納悶 "怎麼這單位內的陳設這麼舊? 而且像這麼空蕩蕩, 卻又好像比外面暗? 不過倒是沒什麼需要維修的地方..." 那老婆子也不跟他說話, 只自顧自的打掃, 大便也怕了這冷場, 但由於氣氛奇異, 也不知如何說些話來打破沉默, 於是唯有硬著頭皮快些檢查完便走。

檢查得好一會, 大致完成之後, 回到大廳正想向那老婆子解釋檢查的詳情, 突然發覺原來在露台中的洗衣機後, 有一個人一直蹲在後面, 一聲不響瞪大了眼看著他!! 大便自入屋以來一直沒有留意到那人, 即使檢查露台時也留意不到, 自問一向一眼關七耳聽八方的他不禁心中打了一個大突!! 不過檢查也已到了尾聲, 當然要完成整個程序; 他硬著頭皮向沒怎麼理他的老婆子解釋了檢查結果, 把該說的"台詞"都說了後, 就道謝一聲離開, 那洗衣機後的男子一直只是一聲不響地瞪著他; 就在他踏出了該單位後, 他突然發現原來廳中一直另有一人躺在椅上!! 他竟然也沒有留意到!!

他趕緊離開了該處, 正自奇怪鑊高與廢達仍未到達時, 電話突然響起。
"喂, 大便, appointment約左10點係十座XXX室等, 你做咩仲未見人o既?" (為了原汁原味, 口語得以保留, 原諒則個)
"下? 我頭先已經行左啦喎, 你地都仲未見人o既??"
"點會呀, 我地係間野門口等左你好耐啦噃!"
"下...等我睇睇先...咦! 原來我去錯左9座, 入錯左房口呀~~!"
"你快d來啦, 個住客開埋門等你來架啦~~!""好好好!"

大便原來去錯了地方, 他順便打電話去客戶服務主任查詢有關去錯了的九座單位, 該主任一查之下, 發覺...
"你頭先行果間, 應該係吉房來架噃!!"
"咩話?! 無理由架, 明明有人開左門, 我入去睇埋添架噃!!"
"唔係喎, 我見個record真係vacant flat來架噃, 你有無記錯呀~~"
"下..."

事後, 幾位同事一起再上去該大便"檢查"的單位查探, 發現真是一間空置單位, 而且聽知情人事說, 還有一些傳聞...該大便在事後也病倒了好一段時間...此後亦不時生病, 常取病假...
此事於大便界不脛而走, 慢慢傳遍了整間公司; 這只是第一次發生事情, 不過是滄海一粟, 之後在不同物業不斷再有類似情況發生, 因此才出現了所謂的轉工潮也。

完

文中所言有超過一半乃係創作, 如有雷同, 實屬巧合

*注 -- 此兩簡稱乃H公司某C級管理人員所擬, 意境之高, 非本人所能想像也。

完

四月十三日 -- 雜記

1. 每逢星期日, 我多左個會問自己o既問題: 我上星期做過d咩呀? 每星期o既閒日又懶無記低自己做過d咩, 次次都係星期日用個腦load返, 實在係麻煩呢。

2. 經過左大半年o既時間, 幾乎只係寫雜記, 自己都覺得自己個blog頹到爆; 雖然, 寫下感想寫下無聊故事都係低水準之作, 但係都總比只係有雜記多姿多采d; 不過, 我應該會開始寫返下d無聊野, 希望唔會出現只係有雜記o既情況。

3. 都係唔係好記得...儘記先: 7/4(一)返屋企; 8/4(二)心血來潮, 同Catherine去左新浦崗食大盛, 唔知點解埋單一人派左一張VIP card正~~9/4(三)返企; 10/4(四)約返好耐無見的Lands同事出來食飯: 八婆, 八婆老公(八公?), Maggie, Gordon, 呀B, Esther七個人, 係荃灣o既南翔小籠包食; 好耐無見八婆了!! 佢大左肚幾個月之後都未見過, 而家佢個B都2個幾月了, 睇左好多B相呢~ 好得意。11/4(五)極累收工後返企; 12/4(六)longweek收工去左葵芳睇玩具; 13/4(日)落雨無波打, 全日係企。

4. 白田村已經完結, 剩低o既時間就係等d工程完埋, 四月尾完村上澤安 -- 一個鳥不生蛋o既地方; 聽聞果度極度平靜, 都係一件好事...不過靜到連唯一一間食肆都執埋, 又有點兒那個...我同同事講笑形容: 果度變左bio-hazard都可能無人知 :P

5. 近兩星期爆左好多NDS game, 仲要係唔同類型o既game: Dungeon Explorer, 爆走貨櫃車, 忍者龍劍傳, 熱血躲避球, 不過一次過玩得太快, 又好似無咩game玩了...

6. 金庸小說返睇中, 但係唔係成日可以連續借到, 於是係中間o既時間借左古龍o既; 好細o既時候都有睇過, 但係已經完全唔記得, 所以幾乎可以話自己係未睇過(因為已經無咩印象了); 古龍小說好多都比金庸短好多, 而且風格好唔同, 另有一番風味, 不過質素比較參差, 好睇起來可以好好睇, 差起來又真係幾差。等我繼續慢慢睇返啦。而家睇緊七種武器系列。

7. 好耐無寫下故仔, 不如大家俾個題目我呀? 唔係俾題材, 而係俾一個"題目", 內容同方向果d就完全我自己諗, 唔該晒。

8. 某死黨係網誌中呼籲有睇佢blog的人留個言俾佢; 我以前都好似有做過類似o既野呢, 嘿嘿。不如我又係度呼籲下有睇o既人留個言啦(不過我估雜記應該無咩人睇, 更加未必會睇到呢度 XDD
9. 好多朋友又開始轉工, 而且都轉得好唔錯呢; 加油呀。

來緊:
15/4(二) -- 同話劇同學Gathering, 去灣仔金源, 好期待再食個燒雞同d甜品!!
16/4(三) -- 同ConnieMartinCarol係TKO打羽毛球, 係要開始打返熟習下了, 5月開始每星期同馮生打返!
20/4(日) -- 同Lands同事GordonEricaWendy食飯? 未firm
28/4(一) -- 同ManPuzzleWingSpenser俠士凱琪K, ok firm
16/5(五) -- 同死黨們去東涌食buffet慶祝呀Sam同S生日
未約到貓MayChan等人食飯
未約死黨們同Joelle等人唱K

完

做人難

由第一份工作開始, 工作上朋友上同事上等各方面也會常常接觸到很多不同的人(尤其因為工作, 之前每一份工作都要經常跟不同的陌生人打交道)。

人真的是很“衰”的生物, 總是對別人的期望很大。
不論是陌生人, 同事, 朋友, 情人, 親人也好, 總會慢慢的要求得愈來愈多。

做一個壞人, 對別人壞, 別人就不會喜歡你。
做一個好人, 對別人好, 別人就會慢慢的覺得理所當然, 覺得你好的行為是應該的, 或者想你做得更加好。
做到最好, 別人可能也會要你做得更好, 就算做不到更好, 就會要你保持著。當你間中一次半次做不到之時, 錯的卻就是你。

愈親近的人這情況就愈嚴重。大家也會覺得你一次半次的做得不夠好(可能比起很多其他人也好得多了)也是很不好, 甚至變了。一個好人就不可以有心情差發脾氣的時候, 不可以有很累想躲懶的時候, 不可以有想自主不聽話的時候…

工作上, 縱使有很多選擇做好/壞人的時候, 但始終公司/上司會有一定的指引及守則, 不會有太難做的時候。到最後只要跟規矩做就可以了。
在對待身邊的親友時, 卻就難了。

像對待小朋友一樣, 都是不可以“縱”的。
和很多人談“湊仔經”, 大都認為不論是嚴是寬, 是慈是惡, 教小朋友一定不可以“縱”。即使大家都不縱, 但有一個人縱, 也沒有用。

其實成年人何嘗不是? 當身邊的人個個也是好的時候, 要求就自然會提高。當大部分員工/同事做得好的時候, 也會要求效率高些。這樣當然很正常。

但有2個問題:
(1) 當身邊有人“玩爛”的時候, 把一些不應該做的事都做成“該做的standard”時, 就會令所有其他人都很麻煩了。有很多上司(尤其是不懂管理學的發不到達的老細, 或政府部門公營機構不會想賺錢的公務員)都不會把這些情況考慮, 也因此造成了惡性競爭的出現…(尤其在中國人社會); 又或者有些人會花很多時間或金錢去取悅男/女朋友, 但每個人的時間, 工作, 經濟狀況及人生態度也不同, 不能一概而論; 但卻也出現了很多“理所當然”應該要做的事, 但實際上是否真的需要做的呢?

(2) 前幾段所說的那樣, 愈做得好要求愈高。基本上你曾經做得好過, 就起碼要保持這那一個水準的“好”。做不到嗎? 是你的問題了。難怪“男人不壞, 女人不愛”。除了很多其他不同大家已知的原因之外(像: 能俘虜壞男人的心更有成功感, 壞男人通常比起好男人有趣不會悶…等等), 他們在一向壞的時候偶爾給你一絲的溫柔, 的而且確比起一個經常對你好的“好”來得矜貴。

那樣的話, 其實是否應該對人差一點? 難道又要常常說要保持“中庸之道”? 每一個人也是不同的個體, 而人的思想也是很複雜的, 要做到每一個人都好實在很困難。

到最後, 公司倒閉, 難以東山再起; 愛情消逝, 不能再回頭了。只有政府這些不會倒閉的公司, 一直半生不死地留在世上, 受盡唾罵。

做人真的很難哪, 造人相對卻簡單得多呢。
至於如何好好地造人, 卻是另一個話題了。

完

一再返睇金庸小說之閱讀報告之神鵰俠侶

幾經艱辛, 終於借到神鵰#2, 可以一口氣讀完。不過真的不會談寫作手法什麼的, 只會談談對小說故事人物的感覺。特別要提的, 是金庸先生於新版小說的後記的一段文字, 談論應抱什麼心態去欣賞小說, 看罷覺得這正是大家看小說, 電視/電影等等的心態, 大家有機會可以一看。這次的感想也包括了一些對"人"的感想, 希望大家看了之後可以給一點意見及有些幫助吧。

始終覺得雖然劇情很精彩, 主角的遭遇很傳奇, 故事中各項武功及人物都營造得很好, 但在金庸的小說當中, 縱使有很多人也最喜歡這部小說, 我自己卻比較沒這麼喜歡。

一個人喜歡一部小說與否, 除了作者的寫作功力是否能寫得有感染力之外, 讀者的性格及喜好也有很大的影響。正如一個文靜充滿愛情幻想的少女不一定會喜歡驚慄大師的小說, 一個粗豪的漢子也就未必會看少女愛情小說。

同樣道理, 由於自己的性格關係, 不太喜歡神鵰俠侶。當然不會討厭, 因為其劇情等等各方面也很精彩, 但有幾個主觀原因使得自己不喜歡。

第一個原因可能就是其他人最喜歡這部小說的原因。有不少人(包括身邊的好友)很喜歡小說主角楊過, 喜歡他反叛的性格。而這部小說的內容也深刻地描寫了他離經叛道及偏激的行為。個人覺得合理的反傳統, 對於傳統迂腐及不合理的“習慣”嗤之以鼻是很值得鼓勵, 而且十分欣賞的(我自己也不是一個傳統及循規蹈矩類型的人)。但我不能接受的是“偏激”。

自己的性格比較祟尚自由及平和, 憑心之所安而為, 不同種類的所有東西共存於世界上; 當然, “偏激”也是世上不同種類的東西之一, 因此我“接受”它, 但這並不代表我喜歡它(理智上接受與情感上接受有很微妙但截然不同的差距)。自己比較不喜歡偏激, 過份的偏激的性格或意念, 在歷史及經驗上通常只會愈走愈偏, 所發生的事只會愈來愈不好。

楊過若果沒有偏激的性格, 當然不會有他的各種奇遇, 不會為故事添上無數色彩, 不會產生出這麼惹那麼多人喜愛的人物, 更不會顯出他與小龍女一段刻骨銘心至死不渝的愛情。有很多人就是喜歡這些, 可憐楊過及龍女, 也為他們最終能成眷屬而歡喜。

自認為很客觀地覺得, 楊過是“抵死”的, 活該的。一個人是否獲得他應有之所報,並不是單純地想“好人有好報, 惡人有惡報”, 而是要看他的性格行為環境經歷而發生的。楊過個性高傲得很, 而且想法又偏激, 又剛愎自用, 壞就壞在他聰明(最怕就是這種人, 認為自己很會想很會明白各樣事情, 經過了自己的想像, 沒有看清楚情況就妄自猜度, 然後就產生了很多誤會, 帶給自己及別人很多麻煩, 其實大家不多不少也一定會這樣的, 希望大家看了之後要小心, 共勉之)。

楊過這樣的性格, 造成了他的遭遇, 因此十分合理, 並無該可憐之處。縱使他經常被人無理的懷疑, 但如果他不是這樣的性格, 像張無忌那樣柔弱一些, 說道理一些, 或像灰雲一樣忍辱負重一點, 就不會把事情愈弄愈糟。當然(當然又當然), 他的性格不是這樣就不是楊過, 我也並沒有說他的不是, 他所做的也相當符合他的性格, 貫徹了“楊過”會做的事, 只不過很符合他的性格行為之餘, 他的遭遇也就很符合他的所為, 也因此並不可憐。

由於自己並不是這樣的性格, 因此與楊過“相性不合”, 也就並不太投入於這角色, 於是便對書的喜愛程序打了折扣。

其實就這樣也算是一個完整的閱讀報告, 不過也就把其他的感覺也都寫了下來吧。除了以上這最大的原因之外, 還有幾個原因。

這部小說寫的是“愛情”, 不過不知道是由於書中人物太出類拔萃, 還是他們不多不少也甚偏激(應該2樣也有點吧), 他們愛上一個人後也很快就極深, 以致生死相隨, 終生不棄, 也就因此浪費了很多青春。先不說楊過到處惹下的相思, 其實連李莫愁, 武三通, “射鵰”之中帶下來的瑛姑, 林朝英…等等, 都是因為雙方的性格而導致了大量的遺憾。自己算是比較怕看這些劇情吧? 一段不完滿的愛情可以很美麗, 但不斷出現就使人生厭了。

談談人物吧。
楊過談了很多, 談談龍女。小龍女長居古墓, 因此不通世務行為完全像個白痴我覺得沒問題。而她對楊過的愛是真心的, 肯為他犧牲, 而她所遇到的事也因為楊過而變得慘了(受人影響才叫可憐, 不過她自己甘願去愛楊過, 不計一切也愛他, 她自己不覺得辛苦, 究竟這樣是不是叫開心?) (其實一個人快樂與否, 究竟應該看心境還是遭遇? 一個知足一生的窮人和一個擔心一世的富翁, 那個才叫幸福?)

李莫愁
只是一個失戀被人拋棄個性偏激而造成一生悲苦的可憐混蛋。

金輪法王
可算是其中一個營造得差的“最後大佬”了。雖然書中不斷強調他智慧過人, 武功高強, 又是一國之師, 氣派極大; 可是就書中所見, 他智不及黃蓉, 武不及周佰通郭靖楊過等人, 行為更是齷齪, 完全沒有武林高手的感覺, 只是一個武功頗為厲害的小人而矣。新版他的結局改了一點, 原本他是被打敗, 最後死於失火塌下的高台; 新版之中也差不多, 不過強調了他愛才之心, 極想收郭襄為徒, 真心地想救她而死...

射鵰之中帶下來的人物
基本上也差不多, 郭靖更加地成為一個"很完美"的人, 真的可以百分之百為了"俠義"而作出一切舉動, 太不真實了; 而黃蓉改變就最大, 由本來活潑可喜的小妖女, 變成了一個猜忌心極重又有點討人厭的中年婦人...

絕情谷中人
公孫止作為中期"大佬", 的確寫得夠賤, 不過仍然無甚氣派, 只是一個極度渴求女人的變態叔叔; 裘千尺則只是一個發狂的婆婆, 兩夫婦天造地設...綠萼是一個悲劇人物, 她的行為有點像程靈素, 不過沒有靈素的聰明, 但心境卻比靈素慘...除了得不到所愛, 更發現一向尊敬的父親的真面目, 更想置自己於死地...

尼摩星, 瀟湘子等人
地位及作用完全等於"射鵰"中的沙通天彭連虎等人, 只是給大家感覺到主角愈來愈強的, 書中所謂的一流高手...

愛楊過的女子們
只好說一聲: 真浪費。她們都是營造得很不錯的女角, 可惜可惜...

郭芙
不得不提, 實在是營造得很好的角色: 太討厭了。

完

雜談歌曲

自己很喜歡聽歌, 不論新舊中英日甚麼的歌也喜歡聽; 忽然有興致想談談一些歌; 以下的歌並不一定是自己範得最好聽或最喜歡的歌, 因為有太多歌了, 因此只寫一些想起的/現在聽到的/其中一些歌, 真的要談好歌, 談幾天幾夜也談不完。以下同我睇書o既感想一樣, 係極度主觀o既意見, 同埋唔一定係評d藝術性o既野, 完全係自己o既感覺; 另外, 搵到link的話, 我會post埋youtube的link比大家聽下。由於太多, 今次講返HK歌手多, 其他英文日文電視卡通果d有機會再講多d。今次來一個大轟炸, 唔知有無人有心機睇晒呢? 唔睇晒d link都睇下有d咩歌, 同埋講下大家有咩感覺/仲有咩歌大家想講啦~~

沒結果 -- 林憶蓮
好好聽o既一首歌, 超難唱, 唱到都唔一定好聽; 最有印象o既, 除左係原唱之外, 當然係我識o既其中一個唱K勁人MayChan唱o既, 超勁又超好聽, 呢首都唱到好聽, 唔係勁人係咩? 可惜無男仔唱o既version, 我都好想唱呀~~ 不嬲呢類有d激昂o既抒情歌都係我鐘意o既類型呢。http://www.youtube.com/watch?v=mBjtciVZmjo -- 痴線o既live演出!

下雨天 -- Blue Jeans
又係老歌一首。其實鐘意Blue Jeans+林憶蓮version (其實梁詠琪+Swing果個live version都唔錯)。好鐘意果種淡淡o既憂鬱感覺, 同埋簡單o既beat+輕鬆抒情。不過以下2條link o既live就無呢種感覺了...
http://www.youtube.com/watch?v=30tVFH70dgU
http://www.youtube.com/watch?v=BfO4F57ubLU

千億個夜晚 -- 林子祥
又係爆晒激情o既一首英文改篇歌, 自問果d高音位唱唔到(唱到都唔好聽), 雖有自己唱大半, 後段搵女仔唱 XDD
http://www.youtube.com/watch?v=5dr59mFOh8w -- live version, 大家聽下live有幾勁!

最佳位置 -- 趙學而
無錯, 唔係陳慧琳原唱o既version, 係趙學而o既版本。其實Kelly版本都OK, 個編曲好standard, 又係前面靜dd後面多d背景音樂同鼓咁樣; 反而更加鐘意趙學而全首靜靜地o既版本; 同下雨天同一道理, 係又淡淡o既憂鬱...
http://www.youtube.com/watch?v=-lB9Z4IeTDc -- 趙學而MTV versionhttp://www.youtube.com/watch?v=arsbsXwr5Zs -- 趙學而Live versionhttp://www.youtube.com/watch?v=_qaOfkpFycY&feature=related -- Kelly MTV version

魚蛋歌 -- 呀Sa+苦榮
估唔到我會講呢首歌呢。其實覺得首歌幾好聽(大家唔好比苦榮攪笑o既腔影響), 係幾有心機作的。鐘意個編曲(同埋中間間奏o既結他!), 歌詞其實填得好有心思(其實係好認真的歌詞), 起碼成首係有意思o既, 唔錯呢~
http://www.youtube.com/watch?v=e7MdgpKcwLs -- MTV version

我們都是這樣失戀的 -- 草蜢
不得不提呢首啦...曾經係自己唱K次次都要唱, 唱到人驚o既一首歌; 又係激情o既抒情歌, 仲有2重添。搵到的link都唔係好聽o既...大家搵返草蜢自己唱o既live version來聽啦...
http://www.youtube.com/watch?v=0dHj0-bVOJ0 -- 容祖兒+草蜢live version...
http://www.youtube.com/watch?v=X58sRKovEoo -- 居然有人唱來比賽, 不過麻麻地...

原來你什麼都不要 -- 張惠妹
又係好難唱又好激情o既歌。不過其實最鐘意都係迪克牛仔o既version XDD 好勁好激 (可惜搵唔到link), 早期唱K成日都唱呢 :P
http://www.youtube.com/watch?v=vAvcdRzm8Mc -- 張惠妹 MTV
http://www.youtube.com/watch?v=2mWLb2CSgjs -- 張惠妹 live

仍然是最愛你 -- 彭羚
好好聽, Cass把聲超正呢~~ 就算其他人唱到都無佢把聲咁好聽~~ 係佢o既歌入面最鐘意o既一首!
http://www.youtube.com/watch?v=RXfHucDh6L4 -- Live version
http://www.youtube.com/watch?v=JN4vrMf0Qrw -- 又係live version
http://www.youtube.com/watch?v=mrw5qEIIz5g -- TVB MTV version, 有得睇當年"再見亦是老婆"片段
http://www.youtube.com/watch?v=V-C2_1ALUQM -- Cass MTV version

Eyes on me -- Faye Wong (王菲)
又係好聽聲又甜o既一首歌。係日本出名o既game Final Fantasy VIII o既主題曲, 無懈可擊。
http://www.youtube.com/watch?v=R8u3DLU0CU0 -- MTV by Fayehttp://www.youtube.com/watch?v=HNefNLOHVYk -- Final Fantasy version

The Game of Love -- Santana feat. Michelle Branch
因為睇NBA而識o既一首歌(係某年NBA片段用o既一首歌); 有超出名o既結他手Santana演出, 彈得勁正! 同時亦顯示出, 唱歌唔係係咁震音就叫好聽, 完全唔震音都可以係勁同好聽的, 有style有感情都好重要!
http://www.youtube.com/watch?v=7yoGTVzgow8 -- MTV version
http://www.youtube.com/watch?v=KhMMYlOnVac -- Live version

親密愛人 -- 梅艷芳
梅姐有好多好歌, 好難講晒; 係咁多咁激o既歌入面, 反而揀左呢首慢慢靜靜o既歌; 好舒服好sweet o既歌...
http://www.youtube.com/watch?v=kVzMPR10gpQ -- 某Live演出, 已經係病緊o既時候了。

問誰領風騷 -- 甄妮+羅文
好聽又經典, 而且好勁!! 好有氣勢!! 根本就痴線o既; 由於首歌女果part太搶o既關係, 甄妮完全蓋過左羅文(不過都要係羅文先唔會俾佢蓋過晒)! 正! 型添呀!
http://www.youtube.com/watch?v=70fyjthntPQ -- MTV version
http://www.youtube.com/watch?v=kZ8NjVJxXRg -- Live先值得睇呀!!

風之Fantasia -- Sherry
日本卡通"羅德島戰記"片尾曲; 勁好聽o既一首歌, 有少少Elf(精靈)的感覺, 而歌手把聲勁好聽~ 係好早期開始鐘意o既一首卡通歌。
http://www.youtube.com/watch?v=K-z27UxNVbw -- 節錄自卡通片尾o既片段

Slam Dunk 主題/片尾曲
又係早期聽卡通歌就好鐘意o既歌, 搵到d卡通opening同ending version only
http://www.youtube.com/watch?v=7sivYQU66Vw -- ending version
http://www.youtube.com/watch?v=r4wPqBOuqnI -- 真人跟返卡通片段拍o既version, 好有心機但係好好笑XDDD
http://www.youtube.com/watch?v=ZUzow7Ni__M -- 另一首好好聽o既ending song 2
http://www.youtube.com/watch?v=PQyKqJfWHBU -- 經典場面配埋首歌, 就係呢度開始極鐘意首歌, 3分幾鐘開始至4分半鐘!

天涯孤客 -- 鄭少秋
不嬲都好鐘意呢首歌...唱得出果種離鄉別井o既哀愁...可惜被拿左去做僵屍片o既歌...有d人聽到都係笑多...
http://www.youtube.com/watch?v=buTb89AVqbM

與淚抱擁 -- 陳慧嫻
其實都想講傻女, 不過以前都講過, 所以講呢首。又係一首唱到後面激激地o既歌, 好難唱...得好聽。
http://www.youtube.com/watch?v=eEAXgKquSYU -- Live version
http://www.youtube.com/watch?v=XE-jxi0z9Ck -- Live version2
http://www.youtube.com/watch?v=zAp5iw2euQs -- 附送傻女勁正Live version

Black Diamond -- Purple
某卡通片o既片尾曲; 好正o既原因係結尾o既片段配埋音樂好型! 其實自己無睇果套卡通 :P
http://www.youtube.com/watch?v=l7bjytN8KVo -- 卡通ending version

You Give Love A Bad Name -- Bon Jovi
80年代經典rock歌一首; rock o既歌鼓同結他都唔一定要好快, 一下一下結結實實都好型! 可惜K無得唱~~
http://www.youtube.com/watch?v=GccfzxHIXaY -- 當年真係幾型http://www.youtube.com/watch?v=WWA28E0r_1c -- 附送Bad Medicine, 又係勁歌一首, 真係唔知佢黠係Live咁樣唱咁多呢d歌, 聲嘶力竭!

Liar -- Vanilla ninja
女子band組合o既一首歌; 係因為打鼓機先識o既一首歌; 感覺一個字: 型。Liar!! (果句Liar!!正)
http://www.youtube.com/watch?v=Q7rBfGVJUTY -- MTV

浮舟 -- go!go! 7188
又係因為打鼓機先識o既一首歌; 首歌就怪怪地, 但係個鼓同結他好正~~ d歌詞意境都幾正。首歌好有日本味。
http://www.youtube.com/watch?v=f5C-C9Ym8P8 -- 原MTV version, d片段意境都用得好特別, 好有意境。d英文歌詞係意思而已, 本來d日文詞填得有詩意d的。
http://www.youtube.com/watch?v=FoNBzKAuFYo -- Live version

死了都要愛 -- 信樂團
好激好痴線o既一首歌; 好難唱, 條友癲o既, 首首歌都係呢類歌, 變態o既
http://www.youtube.com/watch?v=mU99c0bA7Q0 -- MTV version
http://www.youtube.com/watch?v=b2q6YYqV5Ig -- Live version
http://www.youtube.com/watch?v=h1dlra7Qu_k -- Live version 2

吻別 -- 張學友
張學友大把好歌, 點解突然要講呢首呢? 因為個MTV好正~ 周海媚果時真係超掂呀~~估唔到佢做到咁sexy! 講返首歌, 當然係好好聽, 而且亦好鐘意迪克牛仔o既version呢~
http://www.youtube.com/watch?v=bW8vK-GpSbg -- MTV version, 海味~~~
http://www.youtube.com/watch?v=zCZw8CGnPIo -- Michael Learns to Rock version XDDD

鴿子情緣 -- 劉德華
又係係好多首歌入面偏偏揀呢首? 因為而家好少有呢d咁古代武俠風o既歌, 真係好有feel, 果時聽o既時候真係好有feel~~
http://www.youtube.com/watch?v=WnGCgfKqgwk

Without You -- Mariah Carey
又一首好好聽但係好好好好難唱o既歌...Mariah Carey又係一個癲人, 又高音又巨肺...痴線, all time favourite之一
http://www.youtube.com/watch?v=vOR_jq9M53c -- Live version, 根本就唔使聽CD version, Live仲正

珊瑚海 -- 周傑倫 feat. Lara
雖然唔係話十分鐘意周傑倫, 不過佢有時d歌都幾好聽, 尤其係同人合唱時; 屋頂, 千里之外等等都OK呢
http://www.youtube.com/watch?v=qn3qRNgG9eU -- MTV version

Since I Don't Have You -- Guns'n Roses
好激o既一首歌, 好正~ 唱得好放好癲~~ 點解HK硬係無咩其他類型o既歌呢?
http://www.youtube.com/watch?v=xKMGWRZloH0

一切也願意 -- 關淑怡
關淑怡all time favourite歌之一。仲記得呀man唱得好聽呢。
http://www.youtube.com/watch?v=nhlRPRZYcq4 -- Live versionhttp://www.youtube.com/watch?v=NWdMbbkNX4c -- MTV versionhttp://www.youtube.com/watch?v=UgAjg3L9b30 -- 關淑怡+李克勤version

眼訓了, 暫時係咁多啦~~

完

四月六日 -- 雜記

1. 呢個星期o既schedule有d唔記得左, 唔打了 =.= 人老無藥醫 =.=

2. 大字堂終於完了, 下一期又無報d咩野...其實都想掹d野報; Gundam OO第一季又完埋; NDS Dungeon Explorer 同暴走貨櫃車都爆左; 神鵰俠侶睇完, 下一套係射鵰..

3. 繼上次o既"沙爹司華力腸燒賣天使麵"同牛柳扒之後, 今次係"冬蔭功司華力腸天使麵"同雞扒; 終於都整晒屋企d天使麵了XDDD

4. 星期四晚又約左唔同地方識o既朋友聚會(民, Carol, Esther仲有民o既朋友Issac); 其實主旨係自己想去好耐無去o既禾輋陳根記 XDD; 好耐無食, 仍然好食又唔貴; 之後因為同路, 一齊去KT迡住返企, 突然叫埋Connie & Martin 係KT食糖水傾偈先返企, 好似有一段時間無搵下朋友一齊咁樣食飯吹水了, 雖然累都開心。

5. 今日無波打, 好難得地去行街買衫, 好耐無買衫, 轉季都係時候買d了...係九龍灣四圍轉買左d衫...

6. NDS雖然仲有d新games未玩, 不過都差唔多詔一過冷河, 要砌返模先。

7. 本來唔想諗同打神鵰同之後果d感想, 不過諗諗下都係打埋, 而且有人支持我打埋, 所以都係會啦。

8. 終於有機會打返羽毛球!! 久未開鑼o既羽毛球活動, 隨住辦事處某HO同事搬完屋又復興!! 5月起動!!

來緊:
10/4(四) -- 同Lands同事荃灣食飯! 八婆有左之後幾乎都未見過佢!! 生左2個月o既佢, 終於重出江湖!!
仲想攪下d唱K食飯同聚會, 幾時會有呢?

links:
可愛貓貓漫畫"甜甜私房貓Chi's Sweet Home"動畫版在線觀看http://www.youku.com/playlist_show/id_1551734.html

完

人類的進步

本來只想談談有關藝術方面的東東, 不過愈想愈多愈遠, 最後還是想談"人"的文化、想法。

**********

隨著時代的變遷, 科技的改革, 經驗的累積, 人類從數千年的歷史中應該在不斷的進步。可是, 究竟是怎樣地進步了呢?

起初, 我是看到了一個現象: 很多有關藝術的東東, 都是以前勝過了現在, 不論是書法, 畫, 音樂, 文學作品, 甚至較為現代的電影等等, 被稱為"大作"、"經典"的, 都是從前的東西。好像是古代的以前的都是好的, 現代的人再生產出來的, 就沒以前的那麼好(尤其是名畫, 名字等等, 有誰會說現代的畫家書法家比以前的好?)。

為什麼會這樣呢? 原因可能有以下(當然亦不只這些):

(1) 古代的(或以前的)人沒那麼多姿多采的娛樂/事情, 因此能較專注。
(2) 現在的人總覺得新不如舊, 而且覺得以前的東西總是好的, 香的。
(3) 很多事情已經進步到了極限, 很難再進一步, 已經到了"樽頸位"。
(4) 一代不如一代; 現在的人已經不重視這些東西了。

不論是哪個原因, 這些都只是有關藝術方面東東的退化原因。

真正想到的, 是人類除了科技進步了, 賺錢的各項方法系統進步了, 生活是舒服了方便了; 其他的東西有沒有進步呢? 不要說藝術這些陶冶性情的東西; 現在的文化、人與人之間的關係、人的心性各方面有進步了嗎?

又回到了老話題。
真的覺得現在的人很不同了。有時回到鄉村地方, 或者看電視, 見到一些生活在偏遠地方或較窮地方, 人們真的比較純樸, 十分可愛。現在社會開發得愈發達的地方, 人就愈沒有了一些特質。在拜金主義, 金錢為上的世界, 大部份人都只向錢看, 除了錢以外, 其他的生活及思想就變得很空洞。人與人之間的關係, 隨著科技的發展, 卻不見得更加接近(嘿, 人們的肉體關係卻很接近, 很多的接近; 心靈?......)

即使是很好的朋友, 說話也會很容氣, 很避忌小心, 不盡不實; 有些人交朋友更十分功利主義, 幫不到自己的就不是朋友。人對人都十分小心, 事事保護了自己, 大家都很虛偽, 開了幾層防護網(卻不知其實別人也看穿了自己, 甚至大家也知道大家也是虛偽的); 人看人也變得愈來愈表面, 不是看賺錢能力就是看外表漂亮與否。

賺不到錢, 上不到高位的就不是成功, 生活在平靜安穩世界不懂得/不想去投資的人就是"戇鳩"(這詞語只是轉述, 原汁原味地把別人的說話呈現, 不要責備我說粗口)。追求錢以外的東西都變了是不設實際的, 或者應該是退休以後想的事情。

社會上大部分的現象, 當你發掘到最後, 原因也只不過是為了錢。不只商場上黑暗, 其實小至娛樂圈大至政治上的一切也都只是騙人的, 一般人看見的只是很表面很表面的東西罷了(這些大家應該一早就知吧?)。到最後就只是錢錢錢。不愁錢的人, 像某些二世祖, 或者政府架構的某一些冗員(好在也有一些好的...), 就渾渾噩噩, 成了社會的寄生蟲也就算了, 最慘的事吃飽飯等屁放, 自己是廢物又要麻煩到人的那些垃圾...

為理想而努力? 為民族而奮鬥? 為大義而犧牲? 在這繁榮的社會中提也別提, 提了也只會被人當作傻子。

在此並不是想探討人生究竟是為了什麼, 以上只是一些很膚淺的見解。
不過經過了千百年, 人類卻仍然不能從以前的經驗學習。爭執仍然存在, 罪惡仍然發生, 戰爭仍然爆發...世上不平不快不該的事, 從來也沒少過。究竟人類進步了什麼?

當然, 自己也不是什麼聖人, 也不會大義凜然地說別人錯, 只是偶爾想到了這些東西, 就記了下來而已(而且由於思想比手快, 有很多意念已經在打字的時候忘記了...唉)。自己只想與大家開開心心, 風花雪月地過快樂日子就好了。人類的進步嗎? 就別再想那麼多了。

完

三月三十日 -- 雜記

1. 25/3(二) -- 返企食飯剪髮寫大字揀埋歌。

2. 26/3(三) -- 大字堂

3. 27/3(四) -- 之前果日臨時約食Martin生日飯; 由於大家無意見於是我提議去左花滿樓。食之前去左旺電買2G的SD card, 而家好平呢, 八十幾蚊咋。終於部NDS又可以放返好多games入去了。花滿樓d野唔太差掛? 食完行一陣先返企。

4. 28/3(五) -- 收工極累, 返企。

5. 29/3(六) -- 當然繼續short week, 係企抖。中午自己煮左個"沙爹司華力腸燒賣天使麵", 雖然騎呢但係ok呢, 呵。晚上試整牛柳扒, 估唔到味道都OK, 不過都係煎耐左少少...

6. 30/3(日)-- 當然無返大球場, 早上打波都OK, 打完同民仔行街同佢睇左陣衫, 之後身體狀態甚低同佢返企打機, 晚上睇獎門人幾好笑。

7. Gundam OO終於完左第一季, 尾呢幾集好好睇呀~~ 好熱血又打得精彩。

8. 天氣開始熱了...

links:
潮語字典 -- 身為HK人, 點可以唔識? 推介大家睇睇!
http://hk.myblog.yahoo.com/abraham-lincoln/article?mid=3077

攪笑動物圖 -- 好攪笑的動物圖
http://www2.discuss.com.hk/viewthread.php?tid=6733643&extra=page%3D9

半斤八兩日本人唱version XD, 幾無聊, 不過幾攪野
http://www.youtube.com/watch?v=imXil3ioBWk&feature=related

好勁的掃描
http://www2.discuss.com.hk/viewthread.php?tid=6677252&extra=page%3D16

完

轉貼: 家明雜感﹕生命是用電影煉成的

世界上無奇不有, 呢d野都無咩值得驚訝; 轉貼出來係因為入面某d野好認同。

**********

家明雜感﹕生命是用電影煉成的 (明報) 03月 23日 星期日 05:10AM

【明報專訊】在眾多文藝愛好者之間，是不是只有「影癡」才這麼雜食？就是說但凡「電影」，無論新片、舊片、爛片、cult片、紀錄片、前衛電影，古今中外，都可以吸引影癡的注視。不少影癡，就以什麼電影都看為榮。如果看電影真的等同飲食口味，那影癡必然是凡可以下嚥的，都願意一試的食客。
影癡電影看得多，都是一台會行走的電影字典。他們是內建了 metadata的資料庫，可以隨時如數家珍，滔滔不絕，歷史哲學、天文地理扯個不易樂乎。一個人名或戲名，影癡總有說不完的電影往事、童年回憶、技術概念、歷史理論、相關知識……，或再牽連出十個人名廿個戲名，每筆資料總可一再無限延伸，沒完沒了map下去。
《Cinemania》影癡實錄
前陣子看了2002年一部美國紀錄片《Cinemania》，圍繞幾個紐約的影癡。他們是怎樣的瘋迷程度？每天看3至5部電影，全年無休。他們從不社交，影癡間離群獨居。若有電影要看，他們不出席婚宴、葬禮或到醫院探望朋友，毋須掙扎，朋友自會明白。對影癡而言，電影比愛情、性更重要，電影已不止是「迷戀」（beyond obsession）。這幾個影癡沒有工作，有些人節衣宿食、有些繼承親戚的財產，不找工作、發 展個人事業，全為了節省時間看電影。他們熟悉紐約所有電影放映場合（如MOMA），熟讀每周的時間表，以時間換取空間，像我們在電影節編排時間表「趕場」，分別只是，他們天天都是「電影節」，做人的目標就只一個：「看電影」。
有個叫Bill的哲學家，每次觀映前，必定洗浴、換上乾淨衣服及內衣褲，確保以最舒適的狀態入影院。而且每次都把眼鏡清洗乾淨，他對不潔的眼鏡有恐懼，像患有「強迫症」的人不住洗手一樣。有個叫Jack的，飲食習慣也得遷就。他不吃全素餐，因為大量蔬菜影響腸臟「時間表」，變相減低看電影的效率。有個叫Harvey的，他隨口可說出任何影片的長度，在蒲影院時，常主動向主辦單位更正影片的資料：「By the way，今晚那部片子其實是108分鐘才對」。
終極影癡樂與怒
有個叫Roberta的中年女人，個子不高，說起電影來卻斬釘截鐵，很有霸氣。她說自1950年代開始對電影認真，此後看電影不絕，收藏所有票尾、大量放映節目表及珍貴電影紀念品，雜亂無章堆滿自己居住的小單位。她不算易相處，多次跟影院的職員摩擦，MOMA的管理層決定取消她的會員資格，不歡迎她再到那裏看戲。至於Jack，也因為常在影院跟別人吵架、打架（他要教訓在影院談話、吃東西的滋擾者），屢被警察逮捕。
《Cinemania》的終極影癡，全部都沒有工作，沒有家庭，沒有戀人。看在我們這些沒有工作就混身不自在的打工仔眼裏，都是異類。他們其貌不揚（嚴格來說都很醜），居室狹小，卻堆滿書本、影帶、雜物及垃圾（塑膠袋、廢紙）；那副狼狽，也肯定不是我們見慣窗明几淨、落地破璃的小布爾喬亞心態能夠明瞭。他們不修邊幅、衣衫襤褸、頭髮蓬鬆、帶厚厚的老花鏡，頂大肚子踢涼鞋便出門，而且總提或背上大包小包。要是在香港的街頭給我們撞見，不被看成精神有問題或露宿者，也準被判定為「雙失」的loser無疑。
電影節熟客與稀客
但這些終極影癡除了看電影，什麼都不在乎，也休管別人怎樣看。 Jack的朋友曾問他，會不會覺得自己很不正常？他說會，但「不正常」有什麼不好？「正常」只代表大部人的行為，不一定見得就是好或對。又有人問他一天到晚蒲影院，不是很逃避現實嗎？他說，「逃避」本來就是電影與生俱來的功能，再說「現實」有什麼好稀罕，誰願意活在這見鬼的現實？
香港有沒有這樣狂熱的影癡？這些年看電影節或其他特備電影節目，偶爾也碰見一些逢戲必看的熱心觀眾。有位好像叫阿漢的老人家，很低調，但多年來出現在不同場合，看電影看展覽都碰過他。另外有更多叫不出名字的影友，有人總要佔差不多位置（所以文化中心大劇院第一排都是熟悉的臉孔）；有些人提大包小包，節目表及場刊放滿一袋，手上的戲票厚厚一疊。香港的電影放映數目遠遠不如紐約，但好些觀眾還是矢志不渝的，只要有機會就蒲電影院去。反而最怕一些為趕時髦湊電影節熱鬧的稀客，幾年光景不到，已經一副「曾經滄海」的老鬼姿態，說電影節變了、電影褪色了，自己不得不放下身段，電影節沒參與好多年。本來人各有志，要過主其實不必說出來；而且江山代有影迷出，少你一個，沒人會放在心上的。
說起神憎鬼厭，大部分人都像《Cinemania》的Jack 一樣，最討厭影院的滋擾者。你有權說話、向女朋友解話，但我也有權喝止你、公然咒罵你，自由社會人人平等。常覺得，第一次看一部電影，就像初夜，一生人就那麼一次，要是你故意來挑撥，高談闊論或大聲接電話，斯可忍孰不可忍，一定不讓你好過。令人好奇的是，《Cinemania》的Jack愛恨如此分明，若出現在今年香港電影節開幕觀賞山田洋次的《母親》，目睹主辦單位在電影放完前，急不及待多次公告貴賓酒會之安排，將有什麼言論及反應？
文﹕家明
編輯：葉旺文
策劃：家明

三月二十四日 -- 雜記

1. 18/3(二) -- 同而家o既同事Spenser俠士Grace凱琪仲有呀怡Charlene唱K; 好耐無唱無狀態不在話下, 係Neway City唱(呀怡識人可以唔限時+9折), 都唱得幾開心, 11點幾散。

2. 19/3(三) -- 由於某死黨轉工人工暴漲, 因此想食好野, 亦因此走堂; 3個人去左新蒲崗o既大盛食; 總店o既質素好過KT好多, 是日無顧忌地食, 好好食, 多謝某死黨請 XDD

3. 20/3(四) -- 收工留係公司三個人打機; 一齊打好玩好多呢~ 之後快食埋飯返企。

4. 21/3(五) -- 一堆人一齊去踩單車; 去到大圍食d野(又食日本野, 一星期食左好多次 :P), 之後發現租單車好貴($150, 有鋪頭仲$180添)! 太貴了, 假期坐地起價; 大家於是決定唔踩單車直接去SZ玩。Sam, Ivan, Jowelle, Penny四個人上去先, 咁o岩呀哥又上去, 我, 民, 馬, 娟等埋佢一齊上去; 先去書城買同睇書, 等到G來埋join, 連埋呀哥o既frined (愛, 莎)一齊去join呀Sam佢地; 中途食d野, 跟住去左篤波+碌Ling; 8點幾先走, 9點幾先去到食海鮮, 好好食又好抵食, 食完之後12點幾佢地去按摩, 我+哥+G就返HK, 返到企2點。

5. 22-24/3(六-一) -- 係企抖同打機, 上網; 睇左獎門人同早熟; 早熟果2對父母(黃秋生,曾志偉,毛舜筠,余安安)做得好正呢~ 星期一下午出左來, 同死黨1+2行KT, 到倉睇波鞋, 居然佢地2個買到我買唔到...之後4點幾同Nike係APM食tea傾偈, 再行一陣, 之後返企食飯(本來預同佢一齊食, 不過有人話唔食所以返企食)。Nike星期二返美國了。

6. NDS出左一系列o既新game好似好好玩; 忍者龍劍傳, 期待已久o既熱血躲避球, 正呀; 原來仲出左幽遊白書, 好想玩~

7. 係網上見到有地方譯o既Mario vs Sonic奧運: 水管工人大戰變種老鼠 =.=

8. Gundam OO第一季已經播到尾二啦(#24), 故事去到白熱化階段, 雖然d迷團要第二季先解, 但係而家主角們o既危機到底...?!

9. Hunter x Hunter keep住仲有出, 真係好野...希望keep到啦。

10. 金庸果堆新版書仲未借到(剩返果d都係好睇d同長o既作品了), 不過由於各種關係, 唔再寫d讀書報告了 :D

11. 今日得知某Lands舊同事散左拖...

**********

Links:

Street Fighter 4 trailor, 估唔到街霸摺左咁耐又出返!
http://tw.youtube.com/watch?v=K7fVk8lfI6c

Street Fighter the Movie?!, 估唔到仲有電影會拍?!
http://www.imdb.com/title/tt0891592/

完

三月十七日 -- 雜記

1. 10/3(一) -- 幫Catherine去KT拿野, 之後食大盛, 好早返企; 11/3(二) -- 返企; 12/3(三) -- 上堂; 13/3(四) -- 約左中學舊同學Nike食飯; 同死黨一二+Nike去左灣仔金源再試燒雞, 好味, 由於有人等, 居然好早被趕走, 甜品都無買...之後去左Pacific Coffee坐, 本來諗住早走, 點知臨尾Nike話要影相, 叫左個唔識o既鬼佬幫我地影, 之後個鬼佬同我地攀談, 講左好耐先走...其實如果唔累第日又唔使返工係好好的...不過真係幾累...; 14/3(五) -- 返企; 15/3(六) -- 出左KT諗住行d倉, 點知原來無左...行左一輪, 發現另一個地方有好多波鞋賣, 仲有好多我著開o既牌子添(MK已經唔係好見有...)下次要同死黨一去睇睇; 16/3(日) -- 無波打=.=, 下午去Spenser屋企玩; 9個人, 4個人打麻將, 好耐無試過5個人打賽車!! 好好玩好緊張!! 呀Wing果然係好敵手~~ 好累無試過出晒全力打同埋打到咁累, 晚上去左外野手, Spenser請我食, 呵呵, 不過食到好飽, 晚上唔係好訓得著...

2. 好想打羽毛球, 有左新拍之後反而好少打...好想做多d運動呀~~~

3. Gundam OO去到第一季季尾, 真係極好睇呀~~好感動!! 劇情合理打鬥好睇又唔會有咩人或者咩機贏晒, 而且d人係會死o既, 唔係話點打都無人死。今集真係睇到大家心都up呢~~!!

4. 同第二條link有關的一句, 凶手Bowen講的一句: "I'm a Christian," he said. "Sometimes when we feel like we're wrongfully accused, you have to look at it as people we try to emulate our lives after were wrongfully accused. It's about how you handle that, more than anything else."
呢句野真係某d教徒o既典範, 亦都係我唔鐘意某d教徒o既原因。

5. 今天17/3(一)很累, 推左同batch gathering同貓gathering都無去, 返企。

Links:
講緊MTR港鐵o既野, 不過...係用Gundam OO入面o既其中一段, d語音都係跟返原本o既; 不過中文字幕就改左, 改到係講MTR o既野, 但係d表情氣氛又好o岩噃, 好好笑; 唔睇gundam o既人紀絕對都可以睇~~~
http://www.youtube.com/watch?v=9mKFDhSOilc

Bowen攻擊Chris Paul片, 第二條係高清版
http://youtube.com/watch?v=w8WXVJQ06Sk
http://youtube.com/watch?v=hZNwSC_6H90&feature=related

狗狗咬貓貓, 真係唔識死,好笑
http://www.youtube.com/watch?v=76-tL5NulhU&NR=1

完

拍拖白痴?

很煩亂。想到很多東西, 難以組織, 儘量寫下讓自己以後看看。

想到以前和現在很多經歷和發生過的事。其實自己究竟是一個怎樣的人? 究竟有沒有從經驗中學習到些什麼?儘量地想對所有人好, 寬宏, 看得開, 無所謂; 但偏偏對自己及身邊的人很嚴苛, 平時對其他所有人都接受到容忍到的東西, 對身邊的人反而一點兒都不能容忍; 平時與朋友或其他人隨時能說笑甚至肆無忌憚地調戲, 對身邊的人反而做不到, 連對方不開心時也不懂得逗笑; 明明放下身段及面皮說一些自己都能夠想到的話就完全解決事情, 在腦中想得很厲害, 比起其他人想的都好, 就是做不到。

經常看到對方不好的地方、做得不夠的地方、自己不喜歡的地方: 原來自己一樣有犯下同樣的錯誤; 經常想大家坦白: 自己的事、經歷、做過什麼也是百份之百透明度(這個網誌實在把我的生活及大部份想法透露了), 但其實自己內心中所想的一些很深很深的東西卻沒有表達出來(或者可以說因為太多太複雜而不知如何表達出來)。自己在其他方面的想法很樂觀很有彈性, 但有時卻又極固執, 想改變想放軟下來也做不到。

到最後一塌糊塗(指的不是自己行為, 是自己的思緒及情感), 傷害了對方, 也傷害了自己。傷得別人深, 傷得自己更深。

究竟自己是否適合拍拖? 似乎自己並沒有從之前的經驗學到改變到。自己與所有人做朋友都無問題, 做朋友時真的很好, 大家的感覺都很好, 很舒服, 但就是不能再進一步, 進一步就不行了, 自己就控制不到之後的事, 之後的感覺了, 很可怕。

不想對任何人做成傷害, 不想自己看見別人受到傷害, 也不想因為這些原因而令自己受到傷害(看見別人因自己受傷, 比別人令我受傷更令我覺得受傷害); 傷害很可怕, 很辛苦。

以上的不是寫小說, 不是寫愛情小品, 不是把故事和想像套上現實生活; 這是我內心的感受。

真的很對大家不起。大家也不用擔心我, 只是長期性腦部過份活動及周期性負面思想而已。

很煩。不想再想。未能抒發心中所想之萬一, 就此。

完

一再返睇金庸小說閱讀報告之倚天屠龍記

由於之前先讀了金庸較短篇及名氣較遜的作品, 因此剩下來會講的都是大作。

倚天屠龍記當然是金庸武俠小說中一大作品。書中描寫人物, 武功, 故事情節及把人物融入歷史中的功力, 都已經比之前的作品爐火純青, 而當中有很多情節及事件, 都是從他自己其他故事所進化及應用的, 不過佈局及結構自不可同日而語了。當然用不著也論不到我來品評其文學藝術價值, 只談談自己的喜惡。

第一次看時很喜歡, 因為故事情節從頭到尾很精彩, 沒什麼冷場。之後再返看時不太喜歡, 因為覺得主角很無能, 性格猶豫不決。經過幾次的返看, 現在的感覺, 仍然是覺得很好看。當中曲折離奇之處及人性陰暗奸謀紛爭金庸寫起來自然駕輕就熟, 相當精彩, 這些劇情也就不多談; 其中想提一提一段自己覺得精彩及喜歡的, 是張無忌及4女(還有義父)同處一舟, 當中各人的思緒及情況, 雖然筆者著墨不多, 而人物也沒有說或做什麼, 但當中可想像的空間及意境實在很精彩, 一點不比其他武鬥(六大派圍剿光明頂)及詭奇情節(多不勝數)差呢。

書中改寫增減的地方不多, 唯一較留意到的, 就是增添了一些主角及四女之間所發生的事, 說過的話; 相比起來, 使人更覺得他與眾女感情深一些(連不多提及的主角對小昭之情, 也加了不少對話及情節, 使人覺得他也喜歡小昭, 想跟她廝守)。而最後結局也加插了一段, 張無忌的想法: 他的為人只會記著人的好, 忘記別人的不好, 因此很容易原諒別人, 而那四個女子, 也都是很好很好的。所以有點像一個open-end(當然結局一切也定了案, 所謂open-end, 只是他會與哪個女角一起, 或哪幾個女角一起而已)。

書中出現了大量人物, 而當中令人印象深刻及好的人物也很多, 難以盡錄, 所以就只寫寫其中一些自己的感覺吧:

張無忌: 以前有一段時間很不喜歡, 因為他在書中好像很渾渾噩噩, 一切做及發生的事情好像是身不由己, 為人有點猶豫不決, 不是做大事的人。然而, 有些人生性如此, 難道他自己本來便很想做大事嗎? 他小時候遭逢大變, 之後一直到十多歲仍然一直徘徊生死關頭, 本來就是身不由己, 之後得有奇遇才不致身亡; 到了武功高強, 身為明教教主後, 雖然未能展現身為一教之主的氣魄, 但總算堅持了俠義之道, 又導引了明教入正途, 其所作所為是好得很了。他的性格雖然猶豫不決, 而對女人更似乎是沒什麼辦法, 使讀者看起來感覺是沒有男子氣概, 但其實書中不只一次形容他的胸襟廣闊, 氣量極廣, 面對大是大非也決不含糊, 能忍下心頭一切氣憤; 這樣的人, 雖然不是一個能治世或一純江湖的大器, 卻能成為每一個人身邊的朋友。因此, 現在也頗為喜歡這人物。

趙敏: 書中後半段才出現的人物。雖然著墨甚多, 但總對她沒有很深刻的感情。她對主角的情雖然描述為很深, 為他做很多事, 但總覺得比起其餘三女沒有了一點東西。而其本身足智多謀, 論其奸的程度, 也不比周芷若低吧…只不過是她後來一心為了主角, 才淡化了她的這一面。

周芷若: 不論是書中形象, 或之後電視劇中的演員也好, 都是她比較優勝。書中突然有一段成了敵角, 實在出乎意料; 雖然後來作者為她開脫了, 她所做一切只是為一向尊重的師父所逼, 而又沒有真的犯下大錯, 但相信在很多讀者心中扣了分了。總之有點奇怪, 忽然變奸, 又忽然變好…

小昭: 很多朋友喜歡/會選為妻子的其中一個角色。而貫徹了整個故事, 大部份的女角或多或少也有騙張無忌(或隱瞞一些東西)。不過小昭對張無忌卻都是從頭到尾真心而沒有對他壞的。書中加插的些許情節, 就有一點是小昭與主角之間的關係及對話, 增加了讀者的對於“張無忌喜歡小昭”的認知。

殷離: 返看再返看後, 由以前比較喜歡小昭, 到現在反面比較喜歡蛛兒(殷離); 雖然著墨不多, 但她不論對小張無忌或者大張無忌(曾阿牛)都是真誠的! 記憶中, 她也從沒騙過張無忌。雖然因為其經歷關係, 性格較為偏激, 但從少耳濡目染之下, 卻可以接受(之後有很多劇情也提及她良心很好)。為此, 四女之中現在反而對她好感最大。

張翠山及殷素素書中有四分之一的篇幅以他們為主角; 其實金庸小說中的愛情, 有很多並不通; 很多時候男女主角(或配角)只因一面之緣就愛上對方, 不能自已, 終生不渝。他們之間愛情的“根底”並不足夠, 一味靠之後一起所發生的事及經歷患難而一起。這一對也是一樣。張翠山的人品性格本是不錯, 但他的門戶之見很深(金庸小說中名門正派人物的門戶之見實在太深, 不過也因此有許多故事發生), 深得有點迂腐, 有師若張三豐般胸襟廣闊, 他卻顯得小氣了。殷素素機智無比, 雖起近手段毒辣, 但實不失為一可發人物。

武當七俠及張三豐相比很多其他XX三俠, XX五怪, XX九傑, 武當七俠實在是描寫得很成功。他們之間的兄弟之情描寫得很深刻, 各人的武功也能寫得使大家覺得很厲害, 不失大俠風範; 而最好之處, 在於雖有七人, 每個人都有不同的性格, 而不會模糊不清。張三豐乃書中不世之奇人, 要寫得他武功深不可測容易, 難在而且也成功在形容他見識胸襟皆高, 平易近人不拘小節愛說笑, 對徙子徙孫極度愛護關心的性格。明教眾人不打算逐個談了, 只可說他們一個一個在故事中出現, 各有其精彩的出場及獨特性格, 實在是每一個都很真實的活現於眼前。

謝遜貫串整個故事的一個人物, 明教護突法王之一。文才武功都是一流, 簡直就是人中之龍(當然書中有很多人也一樣, 但他算是眾人當中比較出類拔箤的一個了)。不過其性格偏激, 其師父大奸角成崑就是看準這點, 才造成了謝遜一生的不幸及整個故事。一個人的性格才能實在很影響他的經歷及遭遇, 即使是聰明的、厲害的人, 也不一定會成功。最後謝遜參悟了, 倒是一個很好的結果。

滅絕師太實是一個形容得十分成功的人物。雖然很可怕甚至有點討人厭, 但實在描寫得很強, 而且氣概極大!! 姑且不說她門戶偏見極大, 行為偏激, 但她所做一切都是於心無愧, 徹底地維持她心目中的正義!! 不得不為讀者們既敬且佩。

成崑由於一直只聞樓梯響, 真正出場時間不算多, 不過書中大部份奸謀及事件背後都幾乎是他作為幕後黑生, 武功又高, 算是很厲害的“最後大佬”。不過他大部份的行為及奸謀都在暗中而為, 雖然厲害, 但總覺得不太轟然。最後一場決戰不是由主角, 而是由獅王對成崑, 描寫上及意義上也很合理及好看, 作為書中最後決戰算得上是好了。

完

三月九日 -- 繼續地獄雜記之連續四星期Long Week

1. 5/3(三) -- 大字堂; 連續幾星期去街市食, 終於試左頗為有名o既果個咖哩包包, 幾好食, 不過又唔係真係極度出色, 又唔係平, 可以一試o既。大字真係好多野要學, 呢2堂o既野好o岩我呢!! 講字型同構造, 真係要記同練多d呢~~

2. 6/3(四) -- 好多/一切o既野來得太突然; 中午去左石夾尾村痴餐, 開新村contractor拜神好多野食, 最正係係買左馳名o既炭燒燒豬來拜神, 好好食; 由於Puzzle唔舒服, 晚上唔來; 所以去返Spenser好想去的博康打邊爐; 仍然都係好平同抵食, 好耐無見呀Wing呢。同日, 突然知道原來Spenser星期long week, 但係佢要去旅行, 所以又係要搵我同佢調week...仲要同佢餵三日貓...

3. 7/3(五) -- 由於星期六突然要返工, 星期日又要返part time, 所以即係無得抖同去街玩, 收工搵左死黨2食飯; 未食飯之前同呀Mak去Spenser屋企餵貓; 2隻貓貓雖然無反抗, 但係好明顯怕陌生人, 唔係好合作又狂躲埋, 好彩有呀Mak幫手, 鏟屎屎, 洗野, 餵野, 攪左好耐先攪完; 貓貓又唔肯食野, 我地唔係度又唔放得出籠, 最後唯有放d兜兜入籠...攪完都成8點幾好累...之後同死黨2返企食野打下機...

4. 8/3(六) -- 地獄連續第四個星期返Long Week, 真係好累; 中午得Grace一個人食飯, 所以無叮飯同佢一齊食; 終於第一次去左食維記豬潤麵! 其實d料真係好平, 賣差唔多廿蚊真係幾好賺; 豬潤好多同埋真係幾好食, 個湯都OK, 值得一試呀; 收工又去餵貓, 今日比較合作少少, 又係攪到差唔多8點...之後去左食KT車仔麵, 居然賣晒主打o既豬頭皮, 太失望了...返到企本來都好累, 突然呀哥打來要我幫佢做d野, 原來係幫姨丈翻譯一份contract(嚴格來講係sales agreement), 本來已經好累(返左4星期long week, 餵貓...)又眼訓, 但係仲要譯d難o既野, 仲要係幾頁紙添, 想死!! 自己譯左一半島, 之後搵左死黨2幫手, 剩返果d再一人一半島...2點幾先訓...太累了...

5. 9/3(日) -- 由於太累, 所以唔返part time了; 連續返4星期+餵貓, 就係為左Spenser去旅行, 唔叫佢請返食餐勁o既都唔得!! 早上去打波, 由於之前lunch time射過一次發現自己問題所在, 今天手感返左來~~ 今日打得都唔錯呢~~!! 死黨2真係有太多野要改進, 近2次打波都令人感到洩氣呢。打完波食完飯, 即興上左死黨1屋企(好耐好耐無上過去啦), 坐左陣搬左套漫畫(Slam Dunk)走, 同死黨2去餵貓貓, 似乎貓貓開始習慣陌生人, 都OK。之後各自返企了。

6. 唔可以成日就人, 只會帶來自己痛苦...話時話, 又話我地條村有人生日果個月都攪下野, 到我生日果時都無啦 :D, 來緊居然有人可以自己出聲話幫佢攪...=.= 攪就無所謂, 但係幫班自私鬼攪就無興趣。不過而家都好少攪到gathering了, 時間又難就, 又話要返學又返工又補習又成日有人放飛機, 又話唔得閒, 無咩心機。

7. 追開o既動、漫仍然好睇。

好links:
沙鍋雲吞喵?
http://www.youtube.com/watch?v=uWkxt1O7m-s&feature=related

經典推介!! 林敏聰+曾志偉當年果堆改篇歌, 超好笑(雖然其實好無聊), 呢條link仲可以link到好多佢地其他o既歌o既 ; 不過要識舊歌先好笑。
http://www.youtube.com/watch?v=_P_M4YzTQRk&feature=related

完

極力推介的一條link

昨天上網, 無聊之中見到有人在網上post了一條link, 是一位女性的網誌(blog)。一看之下, 發現實在很值得推荐給大家看。

在該網址中, 是一位女性描述了自己的日常瑣事, 有很多是有關與男友的性事。為什麼會這麼極力推介大家看呢? 主要原因, 是她描寫的性愛當中帶出了: 最開心就是能與喜歡的人一起, 去令對方快樂, 而對方與自己又是那麼的親密, 因此很多時也可以不怕醜地取悅對方。而因其文筆淫而不低俗, 可當作一篇好文章而去閱讀。

由於"愛", 網主當然不只在性方面使對方滿足, 大家可見她很多方面也很懂得體貼愛人, 實在是使很多網友認為她的男友太幸福了。亦因為網誌中有很多心態及想法方面很值得學習(當然還有技巧上), 因此我特別在此以一篇文去推介; 網誌中的各項分類(請看"網誌分類"), 也有很多很值得大家去觀摩研究的(尤其是由女性角度去研究如何取悅男方/女方)。

在此與大家共勉, 希望大家別帶著有色眼鏡去看; 反正大家就只在家中自己一個在上網的時候, 別怕羞, 信我一次認真地去四處瀏覽一下吧!!

亞理沙的性愛手記
http://hk.myblog.yahoo.com/jw!aupwpeKTAh6NeLmdgZ._eoXi9q4-/article?mid=3191

完

三月四日 -- 雜記

1. 3/3(一) -- 因有人臨時甩底cancel了, 仲要到過左6點先講唔去...係就早d嘛。

2. 今日食完飯同辦事處同事坤坤去射左陣波; 佢仍然都係勁呢, 雖然個人係怪d, 不過打波係幾勁。自己都射左一段時間波, 發現左d好緊要o既野; 話說自己近年都無再自己落街練波, 次次去打都係鬥波, 有好多基本野同埋姿勢原來唔覺唔覺改變左, 差左; 今日一射之下發覺原來同以前射波o既姿勢唔同晒, 錯晒; 即時發覺同慢慢改返~~ 而家個手感好似好返d, 希望之後可以愈來愈好啦~~ 睇來呢2年打波方面, teamwork打form走位果d好左, 但係個人技術反而退步左了。

3. 工聯會又就來新一期, 要研究下有咩好報了。

4. NDS張SD Card死左一輪, 一排無玩, 估唔到呀哥俾左張128mb的card我而玩返, 反正平時都好少玩, 128mb放到2-3隻games玩已經好夠我玩了。

5. NBA自從Payton退休後, 好似都無特別捧咩球星, 雖然都有d幾鐘意o既球員, 但係都無話捧邊隊; 近2年o既新人Chris Paul好正~~ 似乎係繼Payton後我會捧o既人物呢~ 而且又係一個PG呢~

6. 過左個寒冷o既冬天, 發覺自己真係有肥返, 果期實在太凍, 又無點做運動, 又成日想食野...真係慘...要打返多d波!!

完

一再返睇金庸小說閱讀報告之連城訣

第一次看這書和之後再看, 感觀改變很大。本來覺得不好看, 很無聊, 尤其結果更是無聊, 但後再來再看, 到這次再看, 都覺得很好看, 很是喜歡(當然不是最喜歡)。

這部小說很“苦”。作者仍然以很簡樸的字眼去描述主角所見所聞及其心聲。主角是一個思想單純, 但也是非常正直的人。跟其他小說的主角不同的是, 他天資魯鈍, 又不是英俊瀟灑, 並不像其他的主角般都是學武奇材; 而他的遭遇更是悲慘, 故事一開始不久就受到莫大的冤屈, 右手使劍的手指被削, 琵琶骨被穿, 又被監禁了數年…大家都誤會他, 連自己最親最愛的人也誤會他, 在獄中又被狂人毒打, 絕望到了極點; 後來終於遇上丁典, 其人生就有了很大轉變(也不算是奇遇迭起吧, 他可是挨了很久的)。有了武功根底, 到了出獄後卻又失去了好友, 又再不停地墮入被人折磨及誤會的遭遇當中。到最後終於解決了所有事情, 可能作者也不知可以怎樣處理其他人物, 又想帶出“貪”念的可怕, 所以一次過將所有人全部“解決”掉。而真正正直又不貪心的人就有較好的結果。(雖然到最後, 主角狄雲的餘生不知會否比較快樂呢?)

書中除了描述了主角的苦, 也講述了人性的醜惡。金庸小說中經常以“貪念”為惡, 寫出很多人為了它做了很多壞事, 卻最終引致自己滅亡; 也經常寫名門正派或以正道自居的人, 實際上也有醜惡的一面。這部小說也不倒外, 也以這個題材貫串了整個故事。

談談書中人物。狄雲: 他的遭遇真可稱得上是“很慘”。像楊過般所經歷的悲哀, 實是自己性格所致, 合情合理, 實至名歸; 但狄雲的遭遇卻與他的個性無關, 是不由自主的, 所以是真正的可悲可憐; 他的性格十分正直, 即使戚芳被虛假的事實矇閉, 但也不太相信他會做出那些被冤屈的壞事, 而到最後也終於明白了真相! (不知為何, 自己很怕看人物被冤屈的劇情, 也因此很喜歡真相大白的情節!)後來狄雲慢慢因自己的經歷及丁典大哥的指點, 變得較為世故, 也變得沉穩, 加上其本身性格堅毅, 因此是一個非常不錯的人物呢~

戚芳: 想不到她的出場時間及用處比起想像中大, 因為通常這種女角(因不同原因, 而嫁了給其他人的青梅竹馬/師妹: 馬春花, 田青文, 甚至南蘭等等)都沒什麼大用處, 也沒有很多出場機會。但她在故事後段卻表現出平凡的機智及行動力, 而且也慢慢的查出了真相。最後的結果雖然悲哀, 但數年夫妻之情, 她會這麼做也是很合理的, 而且劇情上也比較完整。不過雖然是一個好的人物, 感覺上卻好像太“強”了一點。

丁典與凌霜華: 金庸故事中經常出現的典型“強”的人物, 通常用以帶起主角各方面的成長 – 其中一個就是丁典了。本身丁典這一個角色各方面都很厲害, 也沒什麼好提的。他與凌小姐的一段情, 其實比起很多其他的, 都算是很動人的一段。雖然他們很傻, 寧不遠走高飛, 行為上很受到世俗的影響, 但他們這樣困難也能守著對對方的情, 實在可歌可泣。英雄配美人, 凌小姐不僅是美人, 她的氣魄也很大, 作出如此大的犧牲! 雖然只是喜歡, 而不是極喜歡這兩人, 但卻很喜歡這段情。

落花流水: 這四人的出現就只像用來被人打得落花流水般…只是用來顯示出了血刀老祖的強…唯一只有水大俠, 臨死倒也極有氣魄。

血刀老祖: 在金庸的“最後大佬”之中, 算得上是營造得很好, 給人的感覺很“強”。而且一向欣賞做壞人壞到底的人, 血刀老祖壞得很透, 也因為不擇手段, 強得很厲害。可惜死得太早了。
其餘的人, 也就沒什麼好講的。

完

三月一日 -- 疲累的地獄一星期

1. 25/2(一) -- 去上水training第二堂; 之後同Mak, Carol, Sam同Esther上SZ加埋KTG食小肥羊。真係一個顯示出我朋友值o既組合, 因為呢5個人都係各自唔識, 而都係我係唔同地方識o既(Mak-CityU同學, Carol-BD同事, Sam話劇同學, Esther-Lands同事, KTGSZ朋友)~ 未上SZ之前就已經唔係好舒服, 不過一早約左就當然照去啦~ 雖然佢地大家各自唔識, 但係做我得friend的都有返咁上下傾得, 因此由頭到尾都無悶場呢~~ 一過關去左東門陪Carol買左老番(自己都買左2隻), 之後就join埋一齊食小肥羊; SZ小肥羊好平好抵食好好食呀~~ 食完由於我唔好按摩, 大家都陪我唔按返HK了(而且自己狀態又低); 最後10點幾就返HK了。

2. 26/2(二) -- 病了, 但之前同呀Mak約左整野, 所以本來諗住收工攪o既野, 變左請左病假然後日頭出來; 係MK食好耐無食過o既宜豐; 呀Mak就順便介紹左去工聯會睇醫生, 幾方便又幾快又唔貴, 唔使好似平時診所等咁耐; 之後第一次上呀Mak新居, 好開心呢~~ 之後返TKO, 夜晚同ConnieMartinCarol打羽毛球; 唔係大病, 做下運動出身汗果然好d(中學時試過發燒打波出身汗好左)~ 返企之後沖涼寫大字, 做左好多野好充實的一天...除左病之外...

3. 27/2(三) -- 大字堂。放學後居然撞到Connie馬生係TGW, 真係o岩。

4. 28/2(四) -- 同死黨們唱K; 終於正正式式同過mandy o既朋友Cass唱K; 的確係唱得幾好, 唔怪得可以係APM唱歌呢~ 雖然係唱得好, 由於我識得太多唱歌好聽o既人, 始終都係同頭三位爭少少呢(KTG, MayChan, Sharon); 不過同朋友唱K唔在乎唱得好唔好聽, 大家開心就好了~~ 唱得好聽係一個bonus來姐~ 當晚唱到12點島搭到尾班巴士返企, 都唔太太夜。好耐無唱K, 都係果句, 無可能返到以前o既狀態...不過唱一唱都好返d, 下星期一可能會好少少...

5. 29/2(五) -- 好耐無攪過o既話劇gathering, 今次都唔係好齊人, 得6個人(我, 民, Sam, Addison, Crystal, Federick); Lobo介紹o既"花滿樓"果然係好食, 大家都覺得好食, 價錢又唔貴; 當晚大家都傾得好開心, 過晒d聖誕新年呢d節日後, 來緊呢d平常o既日子都會多返gathering~~ 順帶一提, 當日由於要等佢地到, 去左星際望一望, 終於見到亦以平價買到夢寐以求o既GundamWeapon -- 武者烈傳零篇!!好正!!

6. 1/3(六) -- 俾人搵左笨返o既long week; 本身已經連續返左2次long week, 好累好想抖, 但係由於同事想要有time-off去旅行, 因此要去幫手MEB來賺一日time-off; 於是就想同我調week; 本來新同事答應同佢調, 點知突然又話唔得...於是都係搵左我來攪...其實如果自私d, 唔比佢去而由我去MEB賺一日time-off, 仲可以4點收工, 或者可以唔答應, 係屋企抖一日都好...而家連續返三個星期long week仲要6點收工...不過都係把啦...不嬲都係咁的; 收工返企未食飯就訓左...食完再訓...好好累...

7. 2/3(日) -- 由於星期六都早訓, 星期日都有d想打波; 不過係未決定之前, 死黨一早打左電話來, 反正都醒左, 緊係去打啦; 手風好過前2次, 不過都係麻麻地, 不過其餘各方面都打得唔錯, 所以都幾好; 雖一不幸就係好難得地右手食指爆左甲好痛, 打波以來好少試過呢。打完波食完飯去左葵芳買玩具...

8. 出左新一期DMC! 仲有HunterxHunter, Gundam OO#21; 全部都好睇呢~~

9. 成日都會蝕底去幫人, 虧待自己唔係問題, 最大問題係會虧待埋身邊o既人; 以前都好多次為左幫朋友, 令到身邊o既人唔高興, 或者寧願無陪屋企人或者最friend果d朋友; 可能自己覺得, 同我愈親o既人就愈明白我, 愈唔介意我咁樣...真係要講聲對唔住; 不過希望大家明白, 平時一般o既野, 我就個個都會幫, 但係最好最好o既野同時間, 或者係好緊要o既時候, 我一定係會留返俾我親人, 死黨/真正o既好朋友同愛人的。

10. 又係果句, 成一個星期先打返d野, 有好多感覺o既野都唔記得了...

link:

日本校服美少女選舉, 不過參賽者全部都係已為人妻及人母o既女性!! 但係都唔差架, 仲靚過唔少後生女添!!
http://www.dailymotion.com/video/x4dqc5_japanprbeupdate_blog

來緊:
3/3(一) -- 同而家同事唱K(Spenser, Grace, 凱琪, 俠士, 呀怡)
5/3(三) -- 大字堂
6/3(四) -- 本來同Puzzle呀Wing等人唱K, 不過P突然話唔想唱, 所以改為食飯; 應該會去KT的廣福宮韓燒
9/3(日) -- 下午返好耐無返的大球場

完