三月二日 -- 唱K

好一段時間冇唱K, 加上好耐之前一路都同Marian話唱K話左好耐~
終於等到佢考完試+我又得閒

幾得意的組合: 我, 哥, 娟, Marian, 民
大家似乎都唱得幾開心, 不過以後都唔去Neway了...閒日都only三個鐘...都係GreenBox好d
九點半夠鐘, 出到來諗住散; 一齊行出Nathan road, 一路行一路傾偈, 傾到慶起, 時間又早, 於是去左M記坐, 傾下偈~
傾得好高興, 唔經唔覺11點半, 大家第日都要返工, 局住要散, 不過幾開心呢~
下次可能係3月尾4月頭~ ^^

完

二月二十八日之 廣播劇班Gathering

廣播劇班呀Sir吳忠泰帶我地一班同學去佢屋企附近相熟o既食肆食晚飯
當晚我可以早d到, 先上呀Sir屋企坐一陣 (民因事缺席)
傾左陣偈, 大家就慢慢開始睇NOW播緊的電影"1947年之劫後英雄傳", 都OK好睇
一路到8點陸陸續續人都來齊(包括呀Sir的年輕貌美女友), 就落去附近一間餐廳食飯
據呀Sir講, 個大廚有多年經驗(呀Sir亦識佢o既), 而且係果頭來講係呢間最好食, 價錢亦豐儉由人
當晚o既菜單係平時冇的, 係呀Sir叫大廚自由整的(後來俾左咭片我地, 所以我地之後都可以咁), 類似私房菜咁, d野包括左日本野, 順德野, 泰國野, 西式野...好雜
菜單o既名唔知, 所以我只好形容係咩了 (次序都係大概o既)

1. 刺身船 -- 隻船就同平時去食日本野o既一樣咁大, 不過d刺身就鋪到滿一滿, 係超多! 而且好新鮮~
2. 魚咀煲 -- 類似將個魚雲分開兩邊, 好似係再炸過之後, 再同蔥呀等等佐料一齊煲, 呢個好食~
3. 人蔘燉生魚湯 -- 人蔘味唔太苦, d魚肉煲到好淋, d湯味(魚味同人蔘味)o既調教好得
4. 鬼馬唔知咩 -- 其實係油炸鬼上面"讓"左魚肉同芝麻, 由於可能係滾油炸o既關係, d油炸鬼唔會油淋淋, 再點d千島醬, 幾簡單得來又幾好食同特別 (呢個配搭真係幾攪野)
5.
6. 泰式生菜包 -- 一大碟類似炸過o既肉碎+蔥碎+唔知咩, 自己整d落生菜度, 擠檸汁再+泰式汁, 酸酸辣辣咁幾好食
7. 蠔煲 -- 蔥+好多又幾大隻o既炸過o既蠔(美國蠔)o既煲, 抵食, 味道OK啦
8. 鮑魚菇+白菜 -- 鮑魚菇同白菜都普普通通啦, 不過個汁"淆"得幾好
9. 豉油王炒麵 -- 呀Sir推介之一, 雖然係普通o既豉油王炒麵, 但係呢d簡單野反而考功夫, 幾好食!
10.紅莓Pancake -- 唔會"漏", 幾好食

10道菜+有人飲啤酒+汽水+奶茶檸茶等等(我飲左呀Sir推介o既茶走, 掂!)
11個人每位$140, 食物o既質+量+價真係好抵!
有機會要再去呢~

完

二月二十八日 -- 無言

1. 想轉工指數已經去到90%
2. 我個同組同事好可能會調走, 我留係度就會仲煩, 一家係時候真係要走了<--好不知所謂o既一句話
3. 個Blog交投淡靜, 好好好少人呢...
4. 我要自由...我要自由...我要自由...我要自由...我要自由...
5. 目標 -- 3月前清到80%之前睇o既complaint+CMBS出到Orders
6. 下期工聯會, 可能再報話劇 - 初班
7. 下期工聯會, 唔一個星期報兩日course了...
8. 其實唔計讀過d咩書做過d咩工, 我最適合做咩工作呢?

完住先

推介CD -- 自作自樂 Demo Project

自作自樂 Demo Project

精選16首本地樂壇高質流行作品DEMO!
由原曲作曲作詞班底親自演釋
令歌迷透徹解構16首流行名曲之真諦!!
支持原創作品　表揚幕後功臣

一首歌曲的成功，很多人都會把功勞歸於幕前的歌手，往往忽略了一班幕後功臣。環球
唱片有見及此，誠意推出一張輯錄了十六首本地原唱作品的Demo精選大碟《自作自
樂》，以表揚這群幕後音樂人努力創作的成果。

今次大碟所輯錄的十六首作品，都是流行一時的大熱歌曲，而Demo的主唱者，當中既有
資深的音樂人，如金培達、張佳添，也有新一代的唱作歌手，如王菀之、藍奕邦和馮穎
琪等，他們都是作得唱得之人，細聽這些Demo，在音樂或錄製上容或有些粗疏簡單，跟
正式推出市面的成品亦大有不同，有些甚至連歌名也被改掉，然而卻有著一份質樸自然
的可貴，聽起來也饒富趣味，值得歌迷細味。

由構思到製作，《自作自樂》這張Demo精選大碟，有別於市面上一般的精選或雜錦碟，
因為藉著這張大碟，唱片公司希望可以傳遞一個正面的訊息，讓有志從事音樂創作的新
秀，了解發表作品的渠道。加上不少Demo原唱者，均為新一代的唱作人，他們不時參與
校園表演，深受學生歡迎，故此希望透過他們對音樂創作的熱誠，讓莘莘學子支持原創
音樂外，也尊重知識版權，購買正版唱片。

為了配合大碟的宣傳工作，除了選出《按摩女郎》、《兩個人的幸運》和《終身學習》
三首歌曲的原裝Demo作主打作品外，現已訂於二月份推出，為配合宣傳，也將於二月十
二日在海港城舉行一場《馬拉松音樂會》，邀請Demo原唱者接力演唱，與歌迷分享他們
創作的樂趣和豐碩成果。

-----------------------------------------------------

自作自樂
1.執爾之手 (出版歌: 按摩女郎-原唱:劉德華) 主唱: 馮翰銘
2.兩個人的幸運(原唱:梁詠琪) 主唱: 金培達
3.臉紅 (出版歌: 戀上你的床-原唱:鄭秀文) 主唱: 王菀之
4.終生學習 (原唱:鄭融) 主唱: 謝杰
5.斷尾 (原唱:劉浩龍) 主唱: 藍奕邦
6.苦撐 (出版歌: 明目張膽-原唱:何韻詩) 主唱: 張佳添
7.數你不是 (出版歌: 雌雄同體-原唱:麥浚龍) 主唱: 馮穎琪
8.自我增值 (出版歌: 必殺技-原唱:古巨基) 主唱: 張繼聰
9.Beautiful Sunset (出版歌: 夕陽無限好-原唱:陳奕迅) 主唱: Eric Kwok
10.空中飛人 (原唱:李克勤)主唱: 阿志
11.今非昔比 (出版歌: 天之驕女-原唱:容祖兒) 主唱: 陳詠瑜
12.颱風 (出版歌: 男孩像你-原唱:薛凱琪) 主唱: 徐繼宗
13.空肩膊 (出版歌:兄妹-原唱:陳奕迅) 主唱: 徐偉賢
14.名種愛人 (出版歌: 奇洛李維斯回信-原唱:薛凱琪) 主唱: Eunice
15.無賴 (原唱:主唱:鄭中基) 徐志勇
16.回到記憶深深處 (出版歌:今年沒聖誕-原唱:許志安) 主唱: 柳重言

歌曲推介 -- 傾偈

唔係話d咩大作, 歌手又唔見得好好
不過幾鐘意呢首歌

傾偈

歌手：蔣雅文, 李逸朗 | 作曲：Aisana Yoojareon/Ryo Kung
填詞：夏至 | 編曲：藝琛

呆坐我家天光再打算
無謂太灰只不過失戀
談論理想統統不實踐
題目涉及到很遠

天空邊際　容納我留低
內容沒關係　談論過經濟

其實我最想不顧一切
求突破每天刻意傾計
其實再講幾多都白費
難共你共對一世

不知不覺　誰習慣留低
話題沒關係　談及你身世

不要想太多　過去天天跟你相處想太多
若拍拖終有天會失去麼
最尾終於醒覺沒幫助

隨時樂意照例相依對坐　聽過快樂的歌
無聊預計哪部影片叫座
未算示愛吧總有想過

天空邊際　容納我留低
內容沒關係　談論過經濟

其實我最想不顧一切　(好嗎)
求突破每天刻意傾計　(很假嗎)
其實再講幾多都白費　(過去相處不太差)
難共你共對一世　(誰沒法取替)

就愛你的話題　推測走勢
終於有日破例　(未去想破例)
未理太多問題　不想估計　(留不低)
但最後你未放開一切

＊未夠徹底
　不要想太多　過去天天跟你相處想太多
　若拍拖終有天會失去麼
　最尾終於醒覺沒幫助＊

REPEAT＊

其實我最想不顧一切　無謂要後悔一世

二月二十四日 -- 數日雜記

1. 搵工搵工搵工! 轉工轉工轉工!
2. 二月之星等人放學之計成功, 仍然保持到十人應戰, 希望之後果d都keep到啦~~
3. 見到Albert嫂, 同Albert哥好有夫妻相呀~~
4. 三月之星可以特別d, 踩單車+BBQ, good ar~
5. 星期四抖左一日, 好鬼正呢~ 不過d"架生"唔見晒, 想開工砌模型失敗 >__<
6. 今晚公司5.30pm開始熄server, 我點等民仔呀~~~~~!!! 又上唔到網, newsgroup, ICQ, blog都唔得!!
7. 娟見工努力! 一日兩場實有場掂!
8. 暫時係咁多

完

之前的schedule.改
18/2(Sat) 在家中休息+睇School of Rock+剪髮(應該冇波打) <----剪ed, 睇ed
19/2(Sun) 在家中休息+睇School of Rock+剪髮(應該冇波打) <----剪ed, 睇ed
21/2(Tue) 二月之星gathering <----間日本野竟然執左, 去左上海坊, 見到Albert嫂
22/2(Wed) 收工過澳門表妹婚宴 <----新post講
23/2(Thu) 請左假, 夜晚同娟, Mandy, Sam沙田沙角大排檔之約<----晚飯postpone左, 等Sam去完旅行返來先
24/2(Fri) 與民民食飯上堂
25/2(Sat) 在家中休息 or 打波 <----收工同媽去黃大仙
26/2(Sun) 在家中休息 or 打波 <----未知有咩攪
27/2(Mon) 同雞脾, 馮Sir, Connie, Carmen, Freak食飯
28/2(Tue) 收工返企
1/3 (Wed) 上堂
2/3 (Thu) 同哥, 娟, 民, Marian唱K
3/3 (Fri) 上堂

仲有呀貓Maychan, Carol, Rex係話左要出來而仍然未約的...

悼 -- 二月二十三日

尋日放假一天, 下午係屋企磨緊o既時候, 呀源打電話來
我收到電話聽到佢"喂, 打電話來有d野同你講時", 我都大概估到咩事了

只係係好耐之前見過一面, 印象好模糊, 不過果時仲係健康的, 幾年前聽到佢得左病都好驚訝
人真係好化學, 就算點小心點保養有d病都係避免唔到...

我都唔知講咩好, 安慰說話講左都冇用, 亦都唔知有咩好講, 所以都冇講d咩野
病左七年, 一路睇住愈來愈嚴重, 到左前排都知唔係剩得幾多時間, 相信大家都有心理準備
而家最緊要係處理之後o既事, 不過應該都冇問題o既

不過, 都總算係見到仔仔女女大個生生性性啦 ^^"
希望你屋企d野快d settle down, 好快就冇事啦

總之都係果句, 有d咩要幫手就搵我啦

完

足球與我

足球與我

大家一睇到個題目一定會好奇怪, 一向剩係打籃球o既我, 居然會講足球?

由細到大, 我一向就同"足球"冇咩緣份
由於小時候屋企冇咩俾我去課外活動, 加上又冇得睇電視, 所以對"足球"o既認識就限於新聞報導o既片段
而間中一次半次係家中睇"世界杯", 由於足球知識薄弱, 入球數目又偏少, 所以並不覺得精彩 (印象中仲要係睇意大利)
小學時期, 我所讀o既2間小學都唔興踢波, 尤其係後期果間, 好細o既校舍, 冇地方踢
到左中學, 要踢o既人都係踢開, 我呢d完全冇踢開已經係比唔上, 所以更加冇去踢; 由於上體育堂有得打籃球, 所以就開始左打籃球了~~

開始接觸得多d, 都係中學成日聽d同學仔講波, 成日聽到d咩曼聯, 車仔, 皇馬, 連係咩地方都唔知, d球星一大堆更加唔知係乜水, 聽聽下叫有d認識, 不過對呢樣野o既"認識度"都係好低, 一路到而家, 對呢樣野都仍然都好似係"緣慳一面"

我冇睇開足球, 又冇踢波, 冇捧開邊隊足球隊, 更加冇買波, 既然係咁, 點解會無啦啦講呢? 當然有原因啦~~~
話說逢星期五我都會同民民上堂, 上堂時間為八點四十分; 民民收工來到旺角通常七點島
個半鐘時間, 對於食飯食得好快o既兩個魯男子來講, 實在好長; 於是慣性地食完飯就去"麥花臣球場"睇人踢波, 而夜晚好多時都有比賽睇

又話說幾個星期前睇左一場一堆呀叔踢o既波, 幾精彩, 有個籠門好型, 撲左個單刀波再拗腰禁實個波, 引來全場鼓掌; 而上星期五, 更加睇左一場業餘杯賽, 精彩非常; (兩場波o既詳情都係由比較識講波o既民民係佢blog度講啦), 令我地寧願遲到都要睇晒場波 (好彩有睇到最後!)

另外一樣關於"足球"o既野, 就係"打機"
平時我自己打機係唔會打足球o既game的, 但係如果民仔來我屋企玩, 就九成都係打足球
通常我同佢都係玩一隻舊版o既winning eleven(因為冇新機)
大家都打得好水皮, 不過打下打下, 大家o既技術都有所進步, 由以前打"easy"都未必有波入, 到而家打"normal"都可以入下波贏下波(仍然水皮); 不得不提星期日o既一場大戰: 我同佢一齊Random用左中國對電腦Random的唔記得邊隊, 由於之前試過俾電腦o既中國射球射過人牆入波, 呢場開場三分幾鐘係禁區外博到球球, 由我施射, 我福至心靈, 學電腦咁射, 居然俾我入左波!! XDDDD
後來同民仔一齊打左好多場, 愈打愈頹, 終於出現左一球經典, 勁過區偉倫: 當時我地已經將波推入禁區, 敵方籠門同後衛俾我引晒過去, 我一球美妙o既傳球, 傳左俾係籠前空晒o既民仔, 正當興奮之際, 佢竟然橫傳!! 唔係單刀橫傳, 係空籠橫傳!! 仲要係好近個籠, 求其掃一腳都入o既距離! 當堂灰左...場波到最後互射十二碼輸埋, 灰晒... ...

其實足球都幾有趣, 不過我都係鐘意打籃球多d ^^

完

道

有一位朋友, 常常喜歡跟別人談論一些問題, 不論歌曲, 電影, 電器, 人生...etc
他經常把"終極", "根本"掛在口邊, 常常想發掘一些最簡單最基本的做法便能獲得最多, 最好的方法, 或者什麼/怎樣才是最好的歌曲/電影...等等
不過, 問題有三:
一, "最好"只是他自己主觀的"最好";
二, 他有時所知的東西又不夠多, 又以為自己知得夠多;
三, 完全不理會不同情況會有不同的評價/方法, 一定要一種"萬能的方法"
在此不想提這個人的做人論調, 亦不想談論誰對誰錯, 只是在討論中經常涉及到所謂"根本性", 或是"快樂/滿足"與否"~

有一大堆論點不想在此提, 要講實在打幾萬字也不能盡述大家的意見, 其中一個想提的論點是"快樂/滿足"
那位朋友經常認為, 做一樣事情/吃東西/去那裡玩...等等, 就一定要做盡可做的東西, 例如:
一, 去吃自助餐就一定要狂吃貴的東西, 絕對不會吃平的東西
二, 去香港迪士尼樂園就一定要全部玩過某幾樣遊戲
三, 電影/戲劇/故事...等等一定要有某些原素, 否則就不好看/不值得入戲院看
等等...等等...
他完全不會想想不是每一個人都要求同一樣東西, 有些人去吃自助餐可能是一班朋友要去, 而又不喜歡吃生蠔; 內地人去迪士尼樂園只是想"到此一遊", 對那些人物全無感覺, 更不想等個多小時去玩一玩遊戲...
他卻認為, 不做盡使是"蝕", 是"不應該鼓勵"的行為, 當跟他說每人都有不同的期望, 他卻說, 如果不做便能滿足, 那些人是"深層Bad End", 完全不接受...

再一次強調, 並不想在此談論他的人生觀; 只是有一點我最想討論的, 是他曾經說過"一個人經歷過很艱辛的時候(或者是斷手斷腳的人), 但心靈快樂, 是"深層Bad End", 他完全否定"心靈快樂"
即是說, 有些人去自助餐, 吃到自己喜歡的東西, 又和朋友有一個快樂的聚會, 但全部貴的東西都不吃, 是不應該的; 打機就算永遠只用同一種沉悶的方法, 永遠都在低層次沒有進步, 只要爆機就可以了; 沒有大場面大特技的小品電影便應該租碟而不應進戲院看? 同樣地, 如果有一個人有一億元, 但心靈不快樂, 而另一人很窮, 但很快樂/滿足, 他會認為後者是不應該的...

我的文筆差, 不知道應該如何清楚表達, 但大概是這樣的意思
個人認為, 有些時候也是得到最多時是最快樂, 但真的只有"得到最多"才是"最快樂"? 最值得做? 這樣的世界真的會有進步?
我不知道什麼是"道", 什麼才是"終極", 但我知道我"要什麼", 我怎樣才快樂

每一個人都是不一樣的

完

聽住mp3四圍留意野o既一次記錄

今日搭巴士返工, 係等車期間, 見到前面隊中有個中年男人幾特別
由於有幾多人等車, 我見唔到佢o既衣著, 只係見到個男人都幾高, 留鬚留長頭髮, 面型輪廓亦都唔差(都幾靚仔的)
當時只係留意到咁多, 亦冇再多作深究

上車後, 不論是否兩座皆空, 我一向都會坐最前排; 上到上層走到最前坐下, 發覺身旁正是剛才留意到的男子, 平時愛咩都睇咩都留意下o既我, 當然就會不時眼望望留意下佢啦~

一坐底第一樣就留意到o既, 就係佢條牛仔褲超爛, 係爛得幾緊要, d窿窿又好大; 隨即望上半身, 著住件咖啡色皮褸, 又係有d爛爛地o既, 拿住個好普通o既類似"Jansport"背囊; 係呢個時候, 再加埋頭先我話佢留鬚留長頭髮, 大家係咪會即刻想像到一個露宿者或者一個地盤佬o既型像呢?

不過又唔似係~
再留意多d, 發現佢左手手腕帶住一"揪"金屬飾物, 幾"型"o既款來o既; 佢雖然長頭髮, 但係一d都唔污"wear", 打理得幾好(冇做負雜子的); 見佢用耳筒聽緊野, 後尾見佢唔聽拿出來收埋, 係一部類似"i-river"物體o既野, 而個耳機係好特別o既一種來的
當然呢堆野都唔係咩實質証據話佢唔係一個地盤佬(起碼唔係露宿者掛?) 但係仲有一個好主觀o既理由, 就係我見到佢個樣唔似係(當然唔係剩係話塊面, 而係計埋氣質...各方面)
後來我落車佢都未落車, 咁就完了

究竟佢係個咩人呢?

完

二月十七日 -- 三星期Schedule

二月十七日 -- 三星期Schedule

今次呢個雜記完全係記事簿only
幾乎全部係收工後紀事 (不過都有d野show到出來)

13/2(Mon) 收工返企
14/2(Tue) 食飯+睇Chronicle of the Narnia
15/2(Wed) meet William, 上堂
16/2(Thu) 交收MG Aile Strike Gundma, 同民民見周天恩+食飯吹水
17/2(Fri) 與民民食飯上堂
18/2(Sat) 在家中休息+睇School of Rock+剪髮(應該冇波打)
19/2(Sun) 在家中休息+睇School of Rock+剪髮(應該冇波打)
20/2(Mon) 收工返企
21/2(Tue) 二月之星gathering
22/2(Wed) 收工過澳門表妹婚宴
23/2(Thu) 請左假, 夜晚同娟, Mandy, Sam沙田沙角大排檔之約
24/2(Fri) 與民民食飯上堂
25/2(Sat) 在家中休息 or 打波
26/2(Sun) 在家中休息 or 打波
27/2(Mon) 同雞脾, 馮Sir, Connie, Carmen, Freak食飯
28/2(Tue) 收工返企
1/3 (Wed) 上堂
2/3 (Thu) 同哥, 娟, 民, Marian唱K
3/3 (Fri) 上堂

每個星期o岩o岩好得一日係返屋企食飯的...(唔計星期日)
仲有呀貓Maychan, Carol, Rex係話左要出來而未約的...
......

完

二月十三日 -- 數日雜記

1. 星期六睇左"梁祝-下世傳奇"o既DVD, 都幾好睇呀, 校花瑄瑄 XDDDD
2. 星期日打波, 發覺近幾個月個射波命中率都OK, 除非係好好累o既時候, 基本上會令人覺得"唔可以唔mark"
3. 聽到有關話劇高班另外一d同學o既野, 太得人驚了
4. 下星期三過澳門參加表妹o既婚宴, 星期四請假
5. 明天是情人節了
6. 多謝呀源, 另外希望你媽會有好轉啦
7. 武林群俠傳冇心機玩了, 因為之後有個小遊戲要玩先過到, 但係而家部機玩會太快, 一家定過唔到的...
8. 尋日呀哥生日, 都慶祝唔到咩野, 不過送左件褸同衫
9. 尋日打完波, 同民民一齊再約埋呀源呀娟食飯, 食完行陣街再返企一齊打炸彈人, 幾開心
10. 星期三上堂, 希望可以自己組隊啦...如果唔係真係風起雲湧

完

天龍八部custom version演員表

上星期五同民民上完堂, 一齊返企時吹水, 吹吹下傾開d無聊野
其中一樣就係如果我地自己友開拍"天龍八部", 會搵邊個做邊個角色
經過我地用左好多時間(真係用左好多時間, 同埋諗左好耐, 改來改去), 終於都諗好晒邊個做邊個角色
以下呢堆人係我同民民都識o既人, 但唔代表佢地互相認識 (不分先後次序)

喬峰(蕭峰) – 馬 (最豪邁)
虛竹 – 民 (唔使講原因啦XDD)
段譽 – 昇 (多情, 有書呆子氣XD)
慕容復 – 天 (有吸引某d人o既能力)
游坦之 – 麥 (偏激)
丁春秋 – 馬智豪 (唔記得點解 XDDDD 請民民re返點解 XDDD)
段延慶 – Tim (似! XDD 似惡人)
葉二娘 – Carmen (冇咩其他角o岩佢咁, 唯有 XDD)
鱷神 – 何文智 (似)
雲中鶴 – 周天恩 (因為雲中鶴係...XDD)
鳩摩智 – Albert (佢本身好戲, 扮奸人又似, 又幾勁)
段正明 – King (因為同呀Ken係兄弟)
段正淳 – Ken (因為同呀King係兄弟, 又較似溝女格)
蘇星河 – 猩猩 (聰辨先生)
刀白鳳 – Crystal (觀音)
鍾夫人 – 寶 (其實幾個段正淳相好都係填塞落去的, 不過都有大概諗過邊個好dd)
馬夫人 – Susanna (其實幾個段正淳相好都係填塞落去的, 不過都有大概諗過邊個好dd))
秦紅棉 – Step (其實幾個段正淳相好都係填塞落去的, 不過都有大概諗過邊個好dd)
阮星竹 – Amy (其實幾個段正淳相好都係填塞落去的, 不過都有大概諗過邊個好dd)
慕容家臣 – Ben，屎蟲，輝，包不同 – 瑛 (非也非也XDD)
段家家臣 – 源，澤遠，Leo，朱丹臣 – 娟 (友情客串) (八個家臣都係搵剩返o既人填晒的XDD)
蕭遠山 – Sam (豪)
慕容博 – Law仔 (與Sam可有火花)
掃地僧 – Valentino (宗教人士+唔似勁人XDD)
枯榮 – 翔 (填塞的)
玄慈 – Addison (填塞的, 不過都o岩 XD)
無崖子 – 瑛的呀哥 (都係識好多野o既人)
天山童姥 – 民之妹 (o岩晒啦, 有小孩o既面)
李秋水 – Sharon (填塞的)
碧 – May (乖乖地)
白世鏡 – David (表面係好人, 雖然實際都係, 但係起碼表面o岩左先XDD)

完

二月八日 -- 雜記

好耐冇出日期post, 更耐冇用口語, 都係咁舒服d

1. 返左工幾日, 都未係好慣, 仍然holiday mood, 好彩冇咩忙/急o既野
2. 身邊唔知點解好多人都係屬於固執o既人, 講極講唔明, 又主觀到極, 不過亦由於呢d人(尤其係某大學同學), 令我自己都學到唔少野(知識上, 人性上, 情緒上)
3. 同一位朋友講開一個話題, 冇諗住講宗教上o既野, 但係由於佢係教徒, 都不得不講埋; 好多時我講o既野跟本就唔係講緊個宗教, 或者講緊個宗教有咩唔好, 有咩問題, 我講有問題o既野係"人", 不過由於大部份宗教人士都有o既bios, 一講到牽涉呢d o既野就會起左一堵牆同埋好敏感, 又會話我地唔明佢地o既諗法, 於是好難講得明, 不過, 由於我都對得好多呢d人, 所以希望到最後佢聽得明啦~
同日亦同另一個好鬼"牛"o既friend爭論野, 久經訓練, 好"爽口"~ XD
4. 最近玩返一隻自由度幾大o既舊game, 以前玩過一次爆左其中一個結局就冇玩落去, 其實果個結局雖然都正, 但係會玩少好多野; 返鄉下時見人玩, 又拿返出來玩, 幾好玩呢
5. 玩返隻game, 發玩左好多野, 不過唔係關於隻game的, 係自己; 隻game係RPG, 但係有好多小遊戲係其中, 十分需要靈巧o既心思同技巧, 一玩之下, 發覺原來自己o既身體協調性比以前差左了...
6. 玩game之中(唔止呢隻game), 都有發現自己有進步o既地方; 就係個人沉穩左, 有d野玩衰左冇咁炆, 同埋好快可以平靜返專注返去玩呢~
7. 係時候又要剪短返d頭髮了~
8. 又要攪"二月之星" :D

完

新年大病 (II)

話說夜晚9時多哥哥陪我到了急症室, 分流只分到第4類, 即是要 -- 等
無論有多少人, 快不快, 似乎都有心要分流為4及5類的人等, 有時明顯有一大段時間沒有叫人

在痛苦及沉悶之中渡過3小時(爸爸也在11時多來過, 但我們叫他先回去不用等), 見醫生的時候已經比初時沒那麼差了, 由於怕是感染, 於是吃了一粒退燒藥, 便抽血, X光照肺, 再坐2個半小時等報告
等到報告時已是凌晨2時半, 証實不是感染, 不用留院; 而在等了那麼久的過程中, 原來已經退了燒...
回到家已是3時, 當然要洗澡才睡覺, 睡時已是4時, 而病情其實已經好了很多, 比起日間精神很多了

在急症室等候期間, 有一緊急的病人, 聽說是自殺不遂; 只聽得他在簾後不停大聲呼救慘叫, 直聽得人心寒, 當時覺得, 做人真的不要隨便輕生, 更不要半死不活; 而要更加珍惜生命, 身體, 因為病痛實在太痛苦了; 由於上一年家人身體欠佳, 令我有深刻體會, 這次回鄉很多時拜神許願或祝賀人時, 都會說身體健康, 想不到許願後回港立刻便病了

我並沒有留意流年運程什麼的, 也不知今年運程如何, 但新年便大病一場加上被抽2次血有血光之災(後來要再去醫院一次再抽第二次), 希望已經過了不好事情的配額, 今年打後能順順利利, 健健康康, 在此也希望身邊親人朋友也都身體健康, 笑口常開!

完

新年大病 (I)

初六回港, 剩7時半飛機到深圳, 於是5時多要起床執拾(當然之前一天已經執好能執的東西), 吃了些少東西, 6時半便上車到機場了, 車程不過15-20分鐘, 7黠鐘登機, 差不多7時半便準時起飛了
到了深圳, 還得坐一小時巴士到羅湖關口, 意料之外地有不少人過關(當天是星期五, 又不是公眾假期了), 辛辛苦苦過關後便上火車轉地鐵回家

在機上及巴士上時, 雖無病的感覺, 但好像有少少暈浪的感覺; 而由於著住褸拿行李的關係, 覺得很熱又一身汗, 於是一回到香港(其實發覺氣溫較涼)上到火車就立刻除褸, 換上另一件沒那麼熱的; 經過早起, 搭飛機巴士, 過關, 拿行李之後, 實在極度疲累

回到家, 父母叫我和哥哥星期六或日要到祖父及姑媽家中補賀, 由於回到家後極覺疲累及開始不適, 所以都打算星期六或日去, 但哥哥不想再浪費一天出去, 提議下午就去, 一次過了結事情, 星期六日就可盡情休息; 中飯時候開始沒胃口, 沒有吃飯只吃了些少東西就開始頭暈躺在沙發休息; 哥哥吃完飯後不斷問何時可以起行(因為仔也很疲累及有些不舒服, 想當天完結事情), 我想休息一會到狀態好些才起行, 但他堅持要一個確實時間, 我哪知道要休息多久才好些? 我怕愈休息就愈不想行, 於是就頂著不舒服的身體離家

在街上, 明顯覺得自己力氣不足, 想行快些都不能, 總算到了柴灣祖父家, 坐了一陣就離開去北角的姑媽家, 此時再出到街上已經覺得狀態奇低了, 頭很暈, 而且腳步虛浮, 全身脫力, 好不容易到了姑媽家, 已是滿頭冷汗, 想嘔也嘔不出, 也不知姑媽有沒有留意到我痛苦的神情; 後來我終於不行了, 太暈了, 於是便借沙發躺著, 姑媽也覺得不得了, 幫我塗藥油, 我在哪裡睡了一會, 有些少精神後便強起精神回家 (好像沒有發燒的)

當時已經很暈和全身乏力, 好不容易回到家也沒胃口吃飯, 一試之下竟然已發燒, 平常的我很少胃不舒服, 但當時我已經是發燒+頭超暈+全身乏力+胃不舒服+有些少肚瀉, 由於擔心是否著了流感, 於是便打的直去急症室

待續

疲倦的靈秀山

在前文中提過, 年初一午飯後到靈秀山走了一轉
在小時候, 每年暑假我和一眾表兄弟姊妹都會回鄉(當然包括家長們), 由於有足夠地方住, 大家又年紀相當, 所以回鄉絕對是一件樂事(偏離話題了)

以前每年回鄉, 我都總會到靈秀山走一轉, 有時是大清早, 有時是下午, 無論是什麼時候, 治著那寬闊的山路(那山路在我小時候就修建成的, 所以行上山並不辛苦), 兩旁有田有花草樹木雞狗石屋, 倒也覺得十分自在和舒服, 那景色和清新空氣令人覺得大自然是有生命, 有活力的一樣東西

近年經濟起飛, 我鄉下所屬城鎮及村莊尤其是附近比較富裕的地方, 因此開始大興土木, 很多人都買地, 起房子; 因此靈秀山腳下很多的地都起了屋子, 大路兩邊的田完全不見了, 只剩下空空的石地泥地, 地上大量被採完石礦的碎石, 野草及垃圾; 沿路行上去, 那大路有很多地方亦開始失修, 聽聞從前於村中山腳下的一塊"風水石"也因為要炒地皮起房子而都被破壞名不知去向了; 山上的寺廟空相院十分熱鬧, 地上滿是垃圾, 信眾四出拜拜, 拿著香枝又不顧其他人, 不覺莊嚴而只覺庸俗不堪

走了一圈, 回程的時候都四, 五時了, 回頭看那靈秀山, 它的靈氣哪裡去了? 我只覺得它很疲累了, 它的生命, 活力也慢慢地消失了...讓它休息吧...

回到香港, 再次感受這個地方, 我完全不感覺到香港疲倦, 也感覺不到它生命力慢慢遠去
不過, 那只是代表, 香港已經是一塊死地了嗎? 還是已經是一個就像人造人, 機械人那樣一個沒有生活但會活動的地方呢?

奢侈, 浪費, 健康

這年回鄉渡歲, 感觸良多, 會分不同題目慢慢道來

這次回鄉, 其中一個原因是表弟"虛齡十六"的成年慶祝活動
在我家鄉(相信內地很多地方也是吧?), "虛齡十六歲"就代表"長大", "成年"了, 習慣地也會有活動
以前農村時代窮的時候, 也會一家人好好地吃一個飯(當然可能也只是在番薯粥中多了些少肉而已), 送禮物給主角等等, 現在沒有以前般窮, 一般家庭當然也會吃餐好的, 送一條金鍊什麼的; 而富有的人, 就會有大大的慶祝活動

這次表弟的慶祝活動, 也算熱鬧非常, 在家屋前有大型的裝飾, 上面寫著慶祝表弟的字句
正式擺酒的正日是初四, 但其實真的大宴親朋, 於初三晚, 初四中午及晚上和初五中午都分別擺十多圍至幾十圍, 而於初四當晚, 未開始前先放一輪煙花及炮仗, 便在家中大空地及其中一層, 分開2個地方開始了幾十圍, 請了幾百人的宴席

宴上食物極其豐盛, 主要菜色都圍繞住"海鮮"
在那三天, 天天都有大量的魚蝦蟹鮑參翅肚, 份量多得足夠令人吃到不想吃
以魚翅為例, 翅的份量可以塞滿你的口, 而完全沒有粉絲及其他佐料; 蟹黃, 大蝦已經多得令人覺得平凡到不平凡; 盛宴過後的第二天, 還有很多食物買了回來多的, 我們更可每人一隻鮑魚, 整隻地吃...
席中, 煙酒汽水也是大量供應, VSOP幾十支任人飲用, 而那些叔伯兄弟們亦能當是水一般面不改容地成杯一口氣喝下去...他們可以喝多久呢?

內地近年經濟增長快速, 財富愈來愈多, 但全國8-9成的財富都在很少百分比的人手中, 那些魚蝦蟹鮑參翅肚豬牛羊雞看來還有很大段時間在同一堆人的肚中打轉

新春回鄉過年

呢個post大約講下果幾日o既過程, 感想另post

28/1 - 年廿九, 下午深圳5點機, 食完中飯12點零出門口, 過關幾多人, 不過冇想像中咁多, 幾快過到關
返到去鄉下到埋屋企around 7點, 去探外婆, 食飯, 抖
29/1 - 大年初一! 基本上冇咩特別野做
好熱鬧, 凌晨o既時候四圍開始放煙花(係大型果隻), 放炮仗好吵好熱鬧, 去天台睇煙花, 睇住煙花係咁爆, 係自己o既四圍, 頭頂係咁放, 都幾好睇同正呢! 之後有一日我地自己都有買d小型煙花自己放, 此後話不提
起身後, 上午再去外婆度坐, 打左一轉麻將, 摸王本色再現, 幾乎都係我贏多, 最後贏左百幾蚊
中午食完飯去左條村附近o既名勝"靈秀山"行下, 上面有個都有d名o既"金相院"(又名空相院), 上去到都有拜下佛, 裝下香, 夜晚冇咩做o既時候就睇下小說"鹿鼎記", 雖然係唔記得左第幾次睇, 不過都係好睇, 之後果幾日有時間o既時候同臨訓o既時候都有提, 打後不提
30/1 - 呀哥農曆生日, 我新曆生日, 上午冇咩做, 中午後, 呀姨車我地去另一名勝"姑嫂塔", 之後去埋"黃金海岸", 各行左一圈就返歸了
夜晚呀哥請食飯, 食湖南菜, 都幾辣, 但係都頂得住, 係有碟魚真係辣又唔多頂到(不過好食), 食完飯, 去唱K, K完返企抖了
31/1 - 初三赤口, 由於初四係表弟正日做"十六歲", 所以呢日唔打算做d咩, 不過就去左條村所屬o既市"石獅市"行下, 好富裕o既一個城市呢 (順帶一提, 好多街邊小吃都好食 : p)
晚飯時間返到來, 夜晚果餐已經係表弟"十六歲"o既前宴, 擺左十幾圍, 飲飲食食咁完左當日
2/1 - 全日都係為左表弟o既"十六歲"而設, 話說我地鄉下每逢有人虛齡十六歲, 就會有慶祝活動(當然係男丁先有份, 同埋有錢先有得大攪啦), 通常都係父母攪食飯同送禮物俾佢
由於表弟家都攪得起大野, 所以係早上拜完一大輪神之後, 當日午飯同晚飯都大攪幾十圍, 好熱鬧, 而d食物亦好豐富, 鮑參翅肚魚蝦蟹肉, 食到你唔食, 當然仲有大量煙酒汽水供應, 有好多人猜拳飲酒, 好不熱鬧, 野食方面, 另post再講
係午飯同晚飯之間, 都係留左係家中抖抖, 睇下書咁
2/2 - 臨尾一日, 食完中飯去左泉州行下
另一大城市, 去左著名o既開元寺東西塔, 洛陽橋等幾個名勝, 又行左一陣街, 最後返去食晚飯執野, 總算完左成個旅程了
3/2 - 晨早5點幾起身, 7點半機, 一早未到12點返到來, 好累, 開始唔舒服, 又出左去呀爺度(因為返左鄉下冇同佢地拜年), 更加唔舒服, 再去姑媽度, 終於頂唔住, 係姑媽度抖左陣, 頂硬上返屋企, 食完晚飯超唔舒服, 發燒+頭超暈+周身冇力+肚唔舒服, 9點呀哥陪我到急症室, 分流後等左三粒鐘, 睇醫生, 抽血, 食左粒退燒藥, 照肺, 再訓下醒下等2個幾鐘報告出, 唔係感染同禽流感, 唔使留院, 等o既時候個燒都差唔多退晒...3點幾返到屋企, 沖個涼訓, 辛苦晒呀哥...其實佢都唔多舒服

完

狗年好開始

狗年即將來臨
返鄉下過年, 好耐冇試過了, 應該會好熱鬧
其實都係有少少朦查查咁, 個個都叫我返就返

放返個好假返來, 希望有工見, 見完有得做
咁就真係好開始了

想轉變環境, 仲有咩可以轉變呢?
最有可能都係"工"而已...
衣? 食? 住? 行? 家? 女? 學業?
冇咩好改到了

所以, 希望都放晒係工度了

完