又到每年回顧下自己記得又值得少少提下嘅事，可能都係d好瑣碎嘅野，或者對於其他人唔係d咩野，不過都想記錄一下。以下事情不分先後，不分重要程度。
1。今年其中一件大事應該係呀B準備升小? 雖然未升，但已經好傷腦筋。其實想簡簡單單開心讀下書咪好，不過係HK似乎唔係咁簡單。不過，其實如果唔係報私校或者直資，其實都只係等大抽獎姐。之前諗咁多其實一d用都無，根本無得估果年嘅情況，真係晒心機。仲記得有2個禮拜小學參觀/open day/talk馬拉松，真係聽到嘔。
2。另一件值得講嘅事係爸媽搬屋，因此佢地搬來同我地一齊住8個月。住緊間屋係佢地嘅，況且佢地係我呀爸呀媽，所以我一定無問題嘅。不過一定辛苦左呀C同呀B。始終人多咗，地方又得咁多，大家生活習慣又唔同，所以一定對大家生活有影響。呀媽就專登返大陸同埋去英國，幾長時間唔係度。不過總算有時限，捱下捱下終過去。搬屋事雖然呀媽攪晒大部份野，我同C只係少量幫手，不過都幾攰。暑假呀嫂返來，到暑假尾佢地走，呀爸搬返過去，我仲記得所有嘢一完，我即時病倒。
3。各樣嘢嘅延伸，就係我嘅腳痛。先係唔知點解無啦啦有反甲好痛，再因為痛行路就力攪到另一邊腳痛，再返返另一邊又痛，然後又影響過膝頭...總之痛來痛去影響左半年...而家touchwood總算反甲果度仍然反，但唔攪到都無乜嘢(但都會有痛)，腰係近年來講都算唔錯(都一定係keep住會冤呀痛呀咁，不過好過往年了)，打波狀態雖然都知唔會好好，但都叫不錯了。
4。承上，今年做body check，雖然有d指數之前高嘅都仲係偏高，不過除咗血糖之外全線下降，都算係咁。
5。好開心農曆新年返鄉下。比呀B感受下新年氣氛，同埋好大地方可以走來走去同玩。雖然果期腳好痛...今年都好想返鄉下，不過似乎無機會。
6。自從上年年尾跟公司trip上深圳再加上農曆新年返鄉下之後，今年開啟咗北上消費嘅大門(比起好多朋友同事好遲了)。我地住將軍澳，車程都幾耐，而且又帶住個小朋友，所以唔會好似北區朋友去得咁密。其實北上主要目的，真係地方大好多，去玩playhouse或者行街都闊落好多，比起香港成日都係果d地方無咁悶。咁當然飲食住買各樣真係平過香港好多...
7。講少少B嘅嘢。睇醫生確認好活躍同唔專心都預咗。愈來愈曳都係事實。每日返工放工返去好攰再做埋家務仲要日日聽到佢嘈佢扭佢發癲真心難頂。但亦都只係我可以睇佢情況來順應佢達成要達到嘅目的，同埋諗古靈精怪嘅嘢同佢玩。希望可以儘量拓展多少少佢睇到見識到嘅嘢。今年見到B係好多方面都進化咗﹕首先就係由文盲變做識睇字仲識寫字，呢下比起識講嘢感覺強烈。另外年頭學識踩單車之後，好快已經掌握咗呢樣嘢，仲同我地兜到將軍澳。今年終於同佢去Disney第一次玩Frozen區，佢人生第一次玩過山車仲唔驚添~ 另外，今年奧運呀B都係第一次睇，佢都對唔少項目睇得有趣味。
8。講下少少自己d嘅嘢。今年唔計有關屋企人嘅，又最最最值得講嘅，就係同中同幾家人一齊去愉景灣Staycation。真係好難得同好開心。
9。今年睇過嘅電影﹕臨時劫案，飯戲攻心2，熱辣滾燙，Seed Freedom，破地獄，我談的那場戀愛。比起以前有排幾乎個個禮拜自己睇戲當然少好多，但計近年真係算唔少了。
10。今年有睇開嘅漫畫，竟然完咗幾多套﹕徹夜之歌，咒術迥戰，小太郎一個人生活，我的英雄學院。
11。電視劇一向少睇。近年都係每年睇三幾套。今年不得不提"婚後事"，雖然係TVB劇，不過劇情、舖排、演技etc各樣嘢都好OK。
11。NBA真係無咩好講，近年真係愈來愈唔好睇。All Star Game更加係垃圾到爆。以前會睇波睇Stat睇recap，而家只係睇下賽果同boxscore算了。
12。講起籃球，幾開心參與咗九叔group嘅籃球賽(第一日開戰，同埋我齋join event同鬥下波無join正式比賽)。雖然keep住有打波，但一直無練波，深深感到自己個人嘅balance同手感都唔好。真係好想搵返時間來練下波。
13。今年砌左好多模型。係有紀錄以來最多，就算扣除Pokemon或者有d1簡單呀B砌嘅，個數目都多過往年。其實時間都係得咁多，只係抽到多dd可以有嘅時間同埋有精神去做呢樣嘢。
14。難得地唱了2次K。雖然好耐無唱狀態麻麻，但實在係開心。(好似近2年唱果幾次個狀態都係唔好的)
15。呢幾年明顯感覺到長老年紀大咗，退化咗。今年覺得自己各方面都算唔錯(家人安好/見到好多朋友/健康算係咁/工作算係咁)，希望來年最緊要係自己同家人健康，其他嘢可以起碼keep住已經好唔錯了。
完
